NITRE kristiano siklo kena yete käkwe ja di ngwani krubäte “kukwe kwin Gobran Ngöbökwe yebätä” driekäre nitre kwati krubäte ie (Mat. 24:14, TNM). Niaratre ruäre nikani kukwe driere juta madate. Ñodre, kä keteiti kä nengwane kädekata Turquía yekänti apóstol Pablo nikani aune nämene misionero ye ngwane, kukwe driebare krubäte kwe kä yekänti. * Kä nikani 2,000 ta ye bitikäre, kä 2014 yete, juta Turquía yekänti kukwe driebare krubäte. ¿Nirekwe kukwe driebare aune ñobätä?

Juta Turquía yekänti nitre 2,800 biti bäri tä kukwe driere, akwa nitre 79 millón näre tä nüne juta yete. Ye tä mike gare kä yekänti nitre 28,000 keteitire keteitire ye ngätäite iti testiko Jehovakwe. Ni raba bämike ja töite ye erere, kä yekänti nitre testiko Jehovakwe kukwe driebarera nitre braibe ie. Niaratre nikani kukwe diekäre kä braibe te nitre kwati krubäte ie. Kukwe driebare krubäte ye ngwane, ja mräkätre aune ja ngwaitre 550 blite turco nünanka juta madate ye nikani Turquía kukwe driekäre ja mräkätre nünanka yete ben. ¿Kukwe driebare krubäte ye köböire dre namani bare?

Kukwe driebare nitre kwati krubäte ie. Ja mräkätre konkrekasion Estambul yete käkwe tikani: “Nitre nämä nun testiko Jehovakwe tuin kukwe driere kä jökrä känti, yebätä gätä kri nuain nämä nunkwe o ñakare ye rababadre ngwentari nunye”. Ja mräkätre konkrekasion juta Izmir yete käkwe tikani: “Ni iti nämä sribire taxi nemen nünenkä yekänti käkwe ngwantariba ni umbre ji ngwanka ie: ‘¿Dreta nemen bare? ¿Munta kukwe driere bäri?’”. Erametre, kukwe driebare krubäte yekwe nitre töi mikani ñan krütare.

Ja mräkätre juta madate kukwe driebare ye käi namani juto krubäte bätätre. Steffen, käi Dinamarca käkwe niebare: “Nitre ben blita jämi Jehovabätä yei ti nämä kukwe driere köbö kwatire kwatire te. Ti nämä Jehová kä ye mike gare bökän rababa ruin tie”. Jean-David käi Francia käkwe tikani: “Ji kratibe känti nun nämä kukwe driere ora kabre te. ¡Ye nämä nemen bare kwin krubäte! Nitre jökrä bäsi ie nun testiko Jehovakwe ñaka nämä gare. Bäsi ju kwatire kwatire ye jökrä känti, nun nämä blite nitre ben, video mike tuare ietre aune tärä o täräkwata mikete ietre”.

Bämän krobukebe te nitre 550 kukwe driebare yekwe tärä aune täräkwata mikaninte 60,000. Nibira gare nie ye erere, kukwe driebare nitre kwati krubäte ie.

 Ja mräkätre tö namani kukwe driei bäri. Kukwe driebare krubäte yekwe ja mräkätre kä yekänti töi mikani kukwe driere bäri. Ja mräkätre kwati krubäte tö jatani sribidi köbö täte Ngöbö kräke. Ñodre, kukwe driebare kä yekänti ye bitikäre kä nikani kwati ta yete nitre 82 ja mikani prekursor regular.

Ja mräkätre juta madate janamane kukwe driere Turquía ye köböire kukwe kwin namani bare kräketre ye tätre mike gare. Şirin käi Alemania käkwe tikani: “Ja mräkätre Turquía ye kräke nuäre kukwe driedre kä jökrä ngwane. Ti abokänbätä kä jürä krubäte, yebätä ñaka nuäre ti kräke. Akwa kukwe driebare krubäte, ja mräkätre kä yekänti kukwe kwin bämikaba ti kräke aune tikwe oraba krubäte ye köböire tikwe nuainba. ¡Tren yete tikwe kukwe drieba aune tikwe täräkwata kia mikateba nitre ie arato! Ne ngwane kä jürä ñaka niena krubäte tibätä käne ye erere”.

Johannes käi Alemania käkwe niebare: “Kukwe ruäre rababa gare tie kukwe driekäre bäri kwin. Ja mräkätre käi Turquía ye töta nemen kukwe driei krubäte nitre kwati ie aune tätre kukwe driere kä jökrä ngwane. Ti rükabata Alemania ye ngwane, tikwe ja töi mikaba ye erere nuainne. Aune erametre, nengwane tita kukwe driere nitre kwati krubäte ie”.

Zeynep käi Francia käkwe niebare: “Kukwe drieba krubäte yekwe ti dimikaba ñaka kä jürä ngwen jabätä aune tö ngwen bäri Jehovai”.

Ja namani ruin bäri keteitibe ietre. Ja mräkätre juta jene jene te ja tarebare aune nämenentre keteitibe jabe yekwe niaratre töi mikani ñan krütare. Jean-David kädrite käne käkwe niebare: “Ja mräkätre nun ka ngäbitiba kwin. Nun ka ngäbitiba kwetre ja gwirete ja ketamuko aune ni ja mräkäre ye kwrere. Ni Testiko kä jökräbiti tibien ye ni ja mräkäre kwrere nämä gare kwin tie, ñan ñobätä aune tärä bätä täräkwata nikwe yebätä tikwe ñäkäba bä kabre. Akwa ye ngwane rababa gare metre tie. Tita Jehová mike täte yebätä ja rababa ruin bäri ütiäte tie. Aune yebätä tita debe bien ie”.

Claire käi Francia käkwe niebare: “Nun käi Alemania,  Dinamarca, Francia o Turquía akwa nun jökrä nämä ni ja mräkäre ye kwrere. Kukwe ruäre tä ni ñäkebiti ye Jehovakwe diankaba borrador kri yebiti ye kwrere”.

Stéphanie käi Francia käkwe niebare arato: “Kukwe drieba krubäte yekwe mikaba gare nunye, ni nüne ño o ni blite kukwe medenbiti ye ñan ai köböire nita keteitibe, ñakare aune Jehová tare nikwe yebätä nita keteitibe”.

Ja mräkätre kwati kukwe driebare krubäte ye töi jatani nünanbätä Turquía kukwe driekäre bäri nitre yete ie. Niaratre ruäre niena kukwe driere Turquía yete aune debe bianta krubäte ietre.

Ñodre, kä keteiti känti nitre kukwe driekä nämene 25 aibe. Kä kwati krubäte te ni umbre ji ngwanka itibe nämene. Akwa kä 2015 yete, ja mräkätre ni ti käi Alemania aune Países Bajo ye nikani niaratre dimike. ¡Kä namani juto krubäte nitre kukwe driekä yebätä!

¿Ja ruin ño ja mräkätre tä kukwe driere kä ruäre te Turquía yei? Erametre, niaratre ja tuanina kukwe kri ben akwa kukwe kwin namanina kwetre arato. Niaratre ruäre tä dre niere ye ani mike gare jai.

Ja mräkä iti gure kä 40 närebiti kädekata Federico, nämene nüne España ye nikani Turquía. Niara tä niere: “Jondron ñaka krubäte tikwe ye tä ti dimike ñaka töbike krubäte aune ye köböire tita ja töi mike kukwe bäri ütiätebätä”. Ye tä mike gare, ¿ni raba niken kukwe driere juta madate? Tä niere: “¡Jän, ye erere! Nita niken nüne juta madate Jehová mikakäre gare nitre madai ye ngwane, erametre nita ja mike Jehová kisete. Aune niara tä ni ngübare ño ye tä nemen gare nie”.

Ja mräkä iti gure kädekata Rudy, käi Países Bajos abokän kä bäsi 60 biti tä niere: “‘Ni kukwe driekä ribeta bäri yekänti’ nunta kukwe driere aune nitre kwati ben blita jämi Ngöböbätä yei nunta kukwe  driere ye tä kä mike juto krubäte nunbätä. Tätre kukwe metre kain ngäbiti ye ngwane, kätä nemen juto bätätre ye tä kä mike juto nunbätä arato”.

Ja mräkä iti gure kä 40 närebiti kädekata Sascha, nämene nüne Alemania ye nikani Turquía. Niara tä niere: “Käre tita niken kukwe driere ye ngwane, tita blite nitre ie kukwe Ngöbökwe ñaka gare ben. Tita blite Jehovabätä bentre ye tä kä mike juto tibätä”.

Meri testiko gure käi Japón kädekata Atsuko aune kä 35 biti ye tä mike gare: “Käne, ti töi nämä käre rü Armagedón ye tuai nüke jötrö. Akwa ti nükani Turquía ye bitikäre, Jehová tä jankunu ni ngübarebätä bätärekä yebätä tita debe bien ie. Jehovata kukwe ükete ño ye tä nemen gare tie ye ngwane bäri ti töta nemen rökrai ken”.

Alisa, käi Rusia abokänbiti kä 30 näre ye tä mike gare: “Tita kukwe driere bäri juta madate ye köböire Jehová töi kwin krubäte tä nüke gare tie” (Sal. 34:8). Niara tä niere arato: “Jehová ye ñan ti rün aibe ñakare aune niara ye ja ketamuko kwin tikwe abokän kukwe jökräbätä tä nemen gare bäri kwin tie. Tita nüne kä jutobiti, kukwe mrä mrä tä nemen gare tie aune kukwe kwin krubäte tä nemen tikwe”.

Kukwe driebare krubäte Turquía ye köböire kukwe kwin Gobran Ngöbökwe yebätä niena gare nitre kwati krubäte ie. Akwa kä ruäre känti kukwe drie jämi. Ja mräkätre nikani kukwe driere Turquía ye tä mantre jetebe blite nitre ben blita jämi Jehovabätä yebe. ¿Mä törba kukwe driei juta ne kwrere känti arato? Ye erere ngwane, Juan 4:35 tä dre niere ne ngwen törö jai: “Nura tirete ye nena biare ötadre, ye munkwe mika ñäräre”. ¿Nura tirete “nena biare ötadre” yekänti mä raba kukwe driere? Ye erere ngwane, mäkwe kukwe ruäre ükate jai kukwe driekäre juta madate. Mäkwe kukwe driei bäri “kä jökräbti temen” ye köböire kukwe kwin krubäte rabai bäri mäkwe yei mäkwe tö ngwan (Hech. 1:8).