Ti därebare kä 1954 juta Saint Paul (Minnesota) Estados Unidos yekänti. Ti mräkätre abokän católico, nun ñan jondron bökäne krubäte akwa ñan bobre. Nun nirike jai, akwa ti däreba ti eteba umbre ye bitikäre. Ti nämä monsore ngwane, tikwe ja tötikaba kwela católica yete aune ti nämä sacerdote dimike iglesiate (monaguillo), akwa kukwe Bibliabätä ñan nämä gare krubäte tie. Ngöbö iti käkwe jondron jökrä sribebare ye ti nämä nütüre, akwa ti ñan jataba tö ngwen iglesia ie.

Kä jämi niken kwati ta tibiti ja tötikabätä Facultad de Derecho William Mitchell yete ngwane, nitre testiko Jehovakwe gure käkwe ñäkäba tie jukwebätä. Ti nämä dän ngutu bätete yebätä jataita köbö madabiti mikaba gare töi jämebiti kwetre. Rükabata ngwane tikwe kukwe ketebu ngwantariba ietre: “¿Ñobätä nitre töi käme tä nüne bäri kwin nitre kwin ye kräke? ¿Dre ribeta nünankäre kä jutobiti?”. Tikwe tärä La verdad que lleva a vida eterna aune Biblia Traducción del Nuevo Mundo kwata bä kare ye ka ngäbitiba. Tikwe ja tötika Bibliabätä ka ngäbitiba arato. Kukwe rababa  gare krubäte tie. Gobran Ngöbökwe ye ara nita ribere krubäte jai aune Gobran ye käkwe kä tibien gobrain rababa gare tie ye kä mikaba juto krubäte tibätä. Gobrantre kä nebätä ye ñaka raba kukwe ükete, niaratre köböite nitre tä ja tare nike, kukwe ñaka kwin nuainta aune kukwe tä nakainkä ye rükaba gare tie.

Ti ja diankaba mento Jehová kräke aune ti ja ngökaba ñöte kä 1982 gätä kri köbömä kädeka nämä “Verdad del Reino” estadio St. Paul Civic Center yekänti. Bämän mada yete, ti rikabata kä yekänti examen nuainkäre sribikäre abogado erere. Aune sö octubre kömikaba ye ngwane examen ye kani ngäbiti rababa gare tie.

Gätä kri yete, eteba Mike Richardson nämäne sribire Betel Brooklyn (Nueva York) rababa gare tie aune central mundial yete oficina de asuntos legales ye ükaninte mikaba gare kwe tie. Eunuco etiope kukwe niebare tä Hechos 8:36 ye rükaba törö tie aune tikwe ngwantariba jai: “¿Se dre tä ti ketabätä sribikäre Oficina de Asuntos Legales yete?”. Aisete tikwe ja kä tikaba solicitud sribikäre Betelte yebätä.

Tikwe ja mikaba testiko Jehovakwe ye ñaka rababa kwin ti rün aune ti meye ye kräke. Tikwe sribidre Watchtower kräke ye köböire dre kwin rabai tikwe sribibätä abogado erere ti rün ngwantariba tie. Tikwe sribidi ja töi jeñebiti aune ngwian 75 dólares biain tie sö kratire kratire tikwe nieba ie, ngwian ye näre bian nämä nitre betelita ie kä ye ngwane.

Sribi nämä nuaindre tie tribunal keteiti yekänti ye tikwe nuainba ye bitikäre, kä 1984 ye ngwane ti rikaba sribire Betel Brooklyn yekänti. Ti mikaba sribire Oficina de Asuntos Legales yebätä. Kukwe rababa gare tie sribibätä tribunal keteiti yekänti ye ti dimikaba sribi ja känenkäre ye nuainne.

Noviembre kä 1983 ye ngwane, nitre testiko Jehovakwe käkwe Teatro Stanley nämä Jersey City (Nueva Jersey) ye kökaba. Ja mräkätre käkwe permiso käräba ñotra aune ñö ükatekäre ju yete. Ja mräkätre ja ükakröba gätäkäre nitre ji ngwanka kä yekänti yebe ngwane, ja mräkätre tö nämäne gätä krikri nuainne kä yekänti mikani gare kwetre ietre. Akwa kukwe keteiti rababa bare. Kukwe ükaninte juta Jersey yekänti nämäne mike gare, kä gätä nuainkäre ye tädre nitre tä nüne yekänti aibe. Aune teatro ye nämäne jutate kä jondron rürübäinkäre yekänti, yebätä permiso ñan bianba nunye. Kukwe niebare yebätä ja mräkätre blitabareta, akwa kukwe ye ñaka namani ükaninte ietre.

 Bämän kenabätä ti rababa Betelte ye ngwane, permiso ñan bianba juta Ngöbökwe ie ye ja mräkätre rikaba ükete tribunal federal de distrito yekänti. Tikwe sribiba kä kubu te tribunal federal de distrito kä Saint Paul (Minnesota) yekänti, yebätä kukwe ye kwrere ükadrete ño ye nämä gare kwin tie. Teatro Stanley yete kukwe bätäkä nuainbarera ye abogado iti nunkwe käkwe mikaba gare, ñodre película aune concierto rock ye nuainbarera yete. Akwa, ¿se ñobätä gätä krikri sribedre kä yete ye blo niedre? Tribunal kukwe ye mikaba ñärärä ngwane, ni raba gätä krikri sribere kä yekänti aune juta Jersey ñaka raba ye ñäkäire nie, ñakare aune rabadre permiso bien nuen niebare tribunal yekwe. Juta Ngöbökwe nämä kukwe ükete gobran ngwärekri ye köböire Jehová nämä kukwe kwin mike nemen bare ne kwe sribi nuaindre jankunu rababa gare tie. Ti nämä ja dimike chi ye käi rababa juto tibätä.

Ja mräkätre käkwe ju ye ükaninteta täte kä kwatibe ye känenkri. Köbö 8 septiembre kä 1985 ye ngwane, clase 79 Galaad graduabare ju yete, abokän kädekani Salón de Asambleas de Jersey City. Tikwe sribiba abogado erere Gobran Ngöbökwe kräke ye käi rababa bäri juto tibätä tikwe sribibare abogado erere ti rükadre Betelte känenkri. Sribi ne erere nämä Jehovakwe ti kräke ye ti ñan nämä nütüre jire.

Kä 1980 ye ngwane nitre testiko ñan tö nämä däri mikai ja kwatate ye doctortre aune hospital ruäre ñan nämäne mike täte. Meritre nämä murore ye bäri nämä ja tuin kukwe kri ben ñobätä ñan aune meritre ye ja tuanemetre däri mike ja kwatate ye nitre kukwe ükatekä nämäne niere. Ñaka däri mikadre kwatate ngwane monso raba nemen uli nie nämäne kwetre.

Köbö 29 diciembre kä 1988 yete, ja ngwai Denise Nicoleau monso ngübabare ye bitikäre hemorragia tare krubäte köböite hemoglobina nämäne 5,0 o bäri chi niara ngrabarebätä. Ja ngwai käkwe jän niedre ne kwe däri mikadre kwatate ie doctor törbaba akwa niarakwe ñakare nieba. Jändrinaine dekä doctortre käkwe permiso käräbare ni kukwe ükatekä ie däri mikakäre ja ngwai kwatate. Ni kukwe ükatekä kukwe ye kädriedre ni madabe, niedre kwe ja ngwai Nicoleau o muko kwe ie akwa ñaka nuainbare kwe, ñakare aune yebiti ta permiso bianba kwe.

Viernes 30 diciembre doctortre däri mikaba ja ngwai kwatate, muko kwe aune mräkä mada kwe ñan tö rababa yebiti ta. Ne madakäre, ja ngwai ye mräkätre aune nitre umbre ji ngwanka ruäre kani ngite. Niaratre namani doctortre ketebätä ne kwe ñaka ja ngwai ye kräkäi mikadre niebare bätätre. Ja mräkätre kani ngite ye mika nämäne noticiate sábado 31 diciembre ye ngwane juta Nueva York yete.

 Nunkwe kukwe ye mikaba gare tribunal bäri kri ie. Luninte dekä tikwe blitaba ni kukwe ükatekä Milton Mollen yebe. Kukwe nakaninkä ño ye tikwe mikaba gare jökrä ie. Ni kukwe ükatekä käne ye ñaka kukwe ye kädrieba nunbe aune permiso bianba kwe tikwe nieba metre ta Milton Mollen ie. Ni kukwe ükatekä Mollen ti käräba derekri oficina kwe känti, nun raba dre nuainne ye kädriekäre jabe. Philip Brumley ni ti ngübabitikä ye rikaba tibe. Abogado sribikä hospital kräke ye ni kukwe ükatekä käkwe nübaiba arato. Nun ja kwetaba krubäte kukwe yebätä. Te batibe ja mräkä Brumley kukwe ne tikaba tie täräbätä: “Ñan ngrate kri”. Mäträba kwin kwe tibätä ñobätä aune abogado iti nämä kukwe ngwarbe niere ye ti tö nämä mikai gare metre yebätä ti jataba rubun.

Ora rikaba krati ta ngwane, kukwe blo nuainba nunbätä ye jändrinaine ükaite käne Mollen nieba tie. Nun rikabata mento oficina kwe yebätä ngwane nieba kwe tie, hospital ñaka ngite ye ñan rabai nuäre abogado iti kräke bämikakäre. Nunkwe ganaindi kukwe yebätä ye Jehová nämä mike gare tie rababa tuin tie. Ngöbö nämä ja töi mike nemen bare nunbiti ye nämä ti töi mike niä.

Nunkwe dre niei ja dokwäre ye nun rababa kädriere dibire ta. Tribunal ye nämä känime Betel Brooklyn yete. Yebätä ja mräkätre sribikä Asuntos Legales ye jökrä rikaba Tribunal yete nunbe. Nitre nibokä kukwe ükatekä nun kukwe nuaba ünä ye bitikäre kukwe ükateba kwin kwetre ja ngwai Nicoleau kräke. Ni bren kukwe nua jämi känenkri permiso biandre kräkäi mikakäre ye blo krubäte aune kukwe ükaninte gobrankwe ye mika nämä ngwarbe jai niebare kwetre. Nunkwe kukwe ye ganainba.

Ye bitikäre, tribunal bäri kri Nueva York käkwe niebare, ja ngwai Nicoleau kräkäi mikadre akwa ñaka däri yebiti. Ne kukwe kena nunkwe ganainba tribunal kri yete. Nunkwe kukwe ketabokä ganainba Estados Unidos yete aune ye jökräbätä tikwe sribiba arato (recuadro “ Kukwe ganainbare tribunal krikri känti” mikadre ñärärä). Arato, monso rabadre nire kisete, ja tuanmetreta, kukwe ükateta kä yebätä aune ju krikri sribeta yebätä ti tärä sribire Betelte abogado mada yebe.

Dawn rababa gare tie ngwane, niara ye ja tuanimetre mukobe aune monso nämä nimä kwe. Niara nämä sribire ja ngübakäre aune nämä sribi prekursor nuainne. Kukwe ñaka nuäre ben  nämä ja tuin akwa yebiti ta nämä Jehová mike täte töi kwatibebiti ye rababa tuin kwin tie. Kä 1992 nun janama Nueva York gätä kri köbömä kädeka nämä “Portadores de Luz” yebätä. Ti törbaba niara mikai gare bäri kwin jai tikwe nieba ie yete. Kä rikaba kwati ta ngwane, nunkwe ja mäkäteba aune ti rababa sribire jankunu Betelte. Ni dite ja üairebiti aune kä jutobätä rababa ti mukore ye jondron kwin Jehovakwe bianba tie. Proverbios 31:12 tä niere erere, Dawn köböire köbö kwatire kwatire kukwe kwin nämä nemen tikwe.

Nun ja mäkäteba ngwane, monsotre nimä kwe yebiti kä nämä 11, 13 aune 16. Ti törbaba ja ngwain ni rüne kwin erere, yebätä juta Ngöbökwe tärä sribebare tä blite ni rünkrä kräke ye jökräbätä tikwe ñäkäba aune mikaba täte. Nun ja tuanina kukwe tare ben akwa tita ni mada tarere aune tö ngwan raba tie, ye erere monsotre tä ti mike tuin jai ye käi juto tibätä. Ja ketamuko monsotrekwe ye nun nämä kain ngäbiti kä jutobiti gwi, kä nämä juto monsotre batibätä ye nämä tuin kwin krubäte nuen.

Kä 2013 ti aune Dawn nun rikaba nüne Wisconsin ti rün ngübakäre aune Dawn rün aune meye ngübakäre. Ti ñan sribidi Betel kräke ti rababa nütüre akwa ti tuametreba sribire jankunu. Ti nübaiba juta Ngöbökwe dimike kä braibe te kukwe ruäre ükete siba gobran ngwärekri.

Septiembre kä 2018 yete, käre tikwe blitadre ye känenkri müra nämä nemen jüräre tie. Ye dre ñan nämä gare doctor ti trä tuaka ie. Ti rikadre neurólogo känti ye doctor mada nieba tie. Enero kä 2019 yete, bren tare nämä tibätä köböite ti ngrabare jökrä rabai bren neurólogo nieba tie.

Köbömä ye bitikäre, jadaka tuin kwin tie yebätä ti nämä ja denkä ngwane ti mataba tibien aune ti kise rötaba. Ti nämä chi ngwane jadaka ye nämä tuin kwin tie aune ti nämä nuainne kwin krubäte. Akwa ti juruainba ye köböite ti ñan jataba ruin ngrabare ye tikwe gaba jabätä. Ti kite bren drekebe ngwarbe aune ñan nemen nuäre ti kräke blitakäre, ti ñan raba dikekä aune tita jondron ñainkä tare.

Sribi abogado nuain gare tie yebiti tikwe juta Ngöbökwe dimikani ye ütiäte krubäte ti kräke. Tikwe tärä keta kabre tikanina ye nitre abogado, doctor aune nitre kukwe ükatekä tä ñäkebätä ye käi juto tibätä. Arato kä jene jene te tikwe kukwe ütiäte kädrieba ja mräkätre dimikakäre ne kwe ñaka däri mikadre kwatate operakäre aune kräkäi mikakäre ye käi juto tibätä. Akwa Lucas 17:10 tä kukwe niere ye erere tita töbike, ti ni klabore jerekäbe aune ñaka jondron biandre tie, dre nämä nuaindre tie ye aibe tikwe nuainba.