Nire tä ja mike gure yekwe nünandre kä jutobiti, ja ketadre kwin kwe jabe aune nünandre kärekäre kwetre jabe ie Jehová tö (Mat. 19:4-6). Mä tö ja mikai gure ngwane, ni brare töi kwin o meri töi kwin, ¿ye raba kwen ño mäi? Jehovakwe ni sribebare yebätä nire kite näin krire jabe o tä ja mike gure käkwe dre nuaindre nünankäre kwin ye gare Jehovai. Kukwe ja jie ngwankäre tä bibliabätä ye mikadre täte ngwane, kukwe kwin raba nemen nikwe. Kukwe ja jie ngwankäre meden meden ye ani mike ñärärä.

Kena, ni kä tibienbätä töita ño nierare ye nikwe mikadre nüke gare jai: “Ni brukwä ye bäri ni ngökö jondron mada yebiti ta aune käme krubäte. ¿Nire abokän ie raba nüke gare?” (Jer. 17:9). Ni nibu tö ja mikabätä gure ye jatadre näin jabe ngwane, töi raba kite krubäte jabätä aune ñan raba kite töbike kwin ja käne. Ja ruin ño ietre ye aibebätä ja mikadre gure kwetre ngwane, kukwe tare raba nemen bare bätätre (Prov. 28:26). Ye medenbätä, nireta krire ja mike gare jai ñan raba blite töi tiebe yebätä aune ñaka kukwe käbämikadre kwetre jai.

Proverbios 22:3 tä niere: “Ni töbätä ie kukwe tare ye tuin aune tä kämikekä; akwa ni tö ñaka abokän tä kukwe ye nuainne jankunu aune kukwe tare tä nemen barebätä”. Nitre tä niken internet aune aplicación käi ruäre yekänti ja muko känänkäre, ¿yebätä kukwe meden tare tä nemen bare? Nitre ruärebätä kukwe tare namanina bare ñobätä ñan aune nitre ñaka gare ietre namani gare ietre internet yebiti ye käkwe kukwe ñaka kwin nuainbarebätä. Ne madakäre, nitre töi ñaka kwin tä cuenta ngwarbe mike nitre mada ngökakäre aune ngwian goikäre kän. Nitre kukwe käme nuainkä ne tä ja bien testiko Jehovakwe ruäre ngwane.

Kukwe mada ñaka kwin raba nemen bare yebätä ani blite. Internet käi ruäre ye känti kukwe nuainta programabiti ne kwe ni muko meden kwin ni kräke ye känändre kwe yekäre, akwa ye köböire kukwe kwin tä nemen bare ye ñan nemen gare metre. Ja mikadre gure ye kukwe ütiäte, aisete programa tä computadorate ye nikwe tuadremetre kukwe ye den nuaindre ja kräke, ¿yebiti ni töbätä nita bämike? Ñakare. Programa tä computadorate  ye ñan keta raba jire chi kukwe tä Bibliabätä yebätä (Prov. 1:7; 3:5-7).

Proverbios 14:15 yekänti kukwe metre ne nieta: “Ni ie kukwe ñaka gare tä kukwe jökrä nieta ye mike era jai, akwa ni töbätä abokän tä töbiketari kwin ja käne”. Ni brare töi kwin o meri töi kwin ye rabadre gare nie ye känenkri, mikadre gare kwin jai ye ütiäte krubäte. Akwa ni iti mikadre gare jai internet yebiti ye ñaka nuäre. Nitre ruäre tä kukwe keta kabre jabätä ye mike gare jai kwärikwäri aune tä blite raire internet yebiti, ¿ye köböire ja raba nemen gare kwin ietre ni raba niere? Nitre ruäre ie muko kwin kwanina tä nemen nütüre akwa tätre ja tuin gwärere ye bitikäre, kukwe tä nemen gare ie ni yebätä ngwane tä nikenkä käne.

Ni iti salmo tikaka käkwe niebare: “Nitre ni ngökö krubäte yebe ti ñaka ja kete aune nitre ja bämikaka jerekäbe ye tita kwitebiti” o mikebiti ta (Sal. 26:4). Nitre kwati tä kukwe ngwarbe jabätä mike internet yete ye ñaka blo kräketre. Niaratre töi ño metrere aune kukwe juanta kwetre yebiti niaratre töi käme ye tä üke. Aune niaratre ye testiko Jehovakwe raba niere, ¿akwa ja ngökanina ñöte kwetre? ¿Ünä kukwe ja üairebiti? ¿Tä ja kete kwin Jehovabe? ¿Konkrekasion tä mike ütiäte jai? ¿O tä kukwe käme bämike aune ñan ja ketamuko kwin? (1 Cor. 15:33; 2 Tim. 2:20, 21). ¿Kukwe ñaka ketabätäkäre ja mäkätekäre Jehová okwäbiti ie? Nikwe kukwe ne mikadre gare jai ye ütiäte krubäte. Akwa ja mräkä iti ie ni ye gare kwin yebe ni ñaka blitadre ngwane, kukwe metre ni yebätä ñaka raba nemen gare nie (Prov. 15:22). Erametre ni Jehová mikaka täte metre ñan tö ja mäkätebätä jire ni ñaka ja ngökani ñöte yebe ñobätä ñan aune ye köböite raba nemen yugo ñaka ja erebe ye kwrere (2 Cor. 6:14; 1 Cor. 7:39).

Internet käi aune aplicación ruäre känti ja muko känänta ye köböite kukwe ñaka kwin tä nemen bare, ¿akwa kukwe mada kwin tärä abokän raba nitre dimike ni brare töi kwin o meri töi kwin känene aune mike gare jai? Ni raba ja ükökrö jäme ngwane nitre testiko mada raba nemen gare nie gätäte, gätä kribätä aune kukwe mada ne kwrere yekänti.

Ni ñaka raba ja ükökrö ngwane, tä nemen bare COVID-19 ne näire ye kwrere. Videoconferencia yebiti nita ja ükökrö rikakäre gätäbätä, yete nitre testiko mada kaibe raba nemen gare nie. Niaratre tä blite gätäte aune kukwe nieta kwetre yebiti tödeka nuäi kwetre ye raba tuin nie (1 Tim. 6:11, 12). Raba ja mike gare jai gätä täbiti sala kia yete. Ja mräkätre ruäre tä ja ükökrö internet yebiti rabakäre keteitibe jabe ye ngwane raba nuainne arato. Köbö ye ngwane ni ye tä ni mada mike tuin ño jai aune töi ño metrere ye raba nemen gare (1 Ped. 3:4). Ja jatai nemen gare bäri kwin ie ngwane töita dre nuainbätä, töi ño ja erebe aune ja bä jakrä kwärikwäri ye raba nemen gare ietre.

Kukwe ja jie ngwankäre tä Bibliabätä ye ni kaibe tä mike täte, ja muko känänkäre ye köböire tä ja mike gure ngwane, raba nüne kä jutobiti. Kukwe ye kwrere nieta Proverbios 18:22 yekänti: “Nire ie meri töi kwin [o brare töi kwin] tä kwen, yei jondron kwin tä kwen aune Jehovata jondron kwin bien ie”.