1. ¿Ni rabadre orasion ye mike tuin ño jai?

 JEHOVÁ kä kwinta aune kä tibien Sribekä yekwe kukwe ütiäte biani nie: ni raba blite ben orasion yebiti. Ni raba blite ben ja brukwä tätebiti, kä medente erere känti, kukwe jene jenebiti aune niara ñaka tä köbö denkä jai ni kukwe nuakäre yebätä töbike. Nita jänbiti o camabiti hospitalte o kitani ngite yete nita orare ie ngwane, niarakwe ni kukwe nuadi ye gare metre nie. Kukwe ütiäte nebätä nita debe bien, ¿ñan ererea?

2. ¿David nämäne orasion ye mike tuin ütiäte krubäte jai ye bämikani ño kwe?

² Oradre Jehovai ye nämäne ütiäte krubäte David kräke. Kansion keteitibiti niarakwe niebare: “Orasion tikwe ye rabadre jondron rä mane sribeta kwin ye kwrere mä ngwärekri” (Sal. 141:1, 2). David näire nitre sacerdote nämäne incienso sribere kwin krubäte Jehová mikakäre täte (Éx. 30:34, 35). David tö namani töbikai kwin käne blitakäre Rün kä kwinbiti kwe ben orasionte, ye tö namani mikai gare nämäne blite incienso yebätä ngwane. Aune ye erere ni tö nuainne ñobätä ñan aune orasion nikwe ye rabadre kwin krubäte Jehová kräke ye ie ni tö.

3. Nikwe oradre Jehovai ye ngwane, ¿nikwe mikadre tuin ño jai aune ñobätä?

³ Ni ütiäte ben blitata ye kwrere nikwe blitadre Jehovabe. Kukwe mikani tuare Isaías, Ezequiel, Daniel, aune Juan ie ye ñaka ja erebe, akwa kukwe keteiti bäsi ja erebe tuani kwetre Jehovabätä yebätä ani töbike. Jehová ye abokän Rei ütiäte tuani niaratrekwe. Jehová nämäne täkänintibe “kürä mente kwin aune ütiäte yete” tuani Isaiakwe (Is. 6:1-3). Jehová nämäne täkänintibe karo kwe yete aune “mrüträ ye kwrere nämäne niara bäre ta” ye tuani Ezequielkwe (Ezeq. 1:26-28). “Ni Umbre nünanka kärekäre” dän ngwente nämäne täkänintibe kürä gobrankäre yete aune bäre ta ñukwä jutra ngitiekä ye  kwrere nämäne tuani Danielkwe (Dan. 7:9, 10). Jehová nämäne täkänintibe kürä gobrankäre yete aune bäre ta “mrüträ ye abko rababa trä ngitiekä […] esmeralda, kwrere” ye jutuabare Juan ie (Apoc. 4:2-4). Jehová ye ni ütiäte krubäte yebätä nikwe töbikaitari ngwane, ni raba orare ie ye jondron ütiäte krubäte biani kwe nie aune ni ütiäte ben nita blite ye erere ni rabadre blite ben orasionte ye tä nüke gare nie. ¿Dre drebätä ni rabadre blite orasionte?

4. ¿Dre nemen gare nie Kukwe kädekaninte kena Jesukwe orasionte yebätä? (Mateo 6:9, 10).

⁴ (Ñäkädre Mateo 6:9, 10 yebätä). * Jesukwe blitabare ngudrebiti nitre ja tötikaka kwe ben ngwane, niaratre rabadre orare ño ne kwe Jehová rabadre orasion kwetre kain ngäbiti driebare kwe ietre. “Munkwe oradre ne kwrere” niebäre kwe yebitikäre Jehová töitä ño ye mikäni gare metre kwe kukwe meden meden kädekäninte kena kwe yebiti: Jehová kä mikadre deme, Gobran kwe jatadre käkwe nitre ja mikaka niara rüere ye gaite jökrä aune kukwe kwin keta kabre rabadre bare kä tibien aune nitre kä tibienbätä kräke ye kärädre orasionte niebare kwe. Nita orasion nuainne ye ngwane nita kukwe ne ererebätä blite Jehovabe ngwane, Jehová töi ño ye ütiäte krubäte ni kräke ye nita bämike.

5. Kukwe ribedre ja kräke orasionte ye ñaka blo, ¿ye ñobätä gare nie?

⁵ Oradre ño driebare Jesukwe yekänti, kukwe mada mada kädekaninte kwe, yebiti ni raba kukwe ribere ja kräke ye ñaka blo niebare kwe. Ñodre, mrö kärädre, ngite kitamana ta jabiti, ni kriemikadre kwe kukwe käme yebätä aune ni blo yebätä ni mikadre kwäre kwe ye ni raba ribere ie (Mat. 6:11-13). Jehová ye aibe köböire nita nüne aune niarakwe ni kadre ngäbiti ie ni tö ye nita bämike nita kukwe ne erere niere orasionte ngwane.

6. ¿Oradre ño driebare Jesukwe yekänti kukwe kädekaninte kwe ye aibebätä nikwe oradre?

⁶ Dre dre niebare Jesukwe orasionte aune kukwe ño kädekaninte kwe oradre ño driebare kwe yekänti, ye ñan aibebätä nitre ja tötikaka kwe käkwe oradre ie Jesús tö namani.  Kä mada ngwane dre nämäne niara töi nike krubäte yebätä niarakwe orabare arato (Mat. 26:39, 42; Juan 17:1-26, TNM). Ye erere arato, kukwe meden tä ni mike töbike krubäte yebätä ni raba orare Jehovai. Ñodre, nikwe kukwe keteiti diain nuaindre jai ye ngwane, Jehovakwe ni mikadre töbätä aune kukwe mikadre nüke gare nie ye nikwe ribedre ie (Sal. 119:33, 34). Sribi kri mikata ni kisete aune tä nemen tuin tare nuainkäre nie ye ngwane, Jehová rabadre ni mike töbike kwin ja käne ye nikwe ribedre ie orasionte (Prov. 2:6). Nitre rüne raba orare monsotre kwe kräke aune monso raba orare rün kräke. Aune nitre ja tötikaka nibe aune nitre ie nita kukwe driere ye kräke ni raba orare aune nikwe nuaindre. Akwa metrere, nikwe ñaka jondron kärädre jerekäbe orasion yete.

7. ¿Nita orare ye ngwane ñobätä nikwe Jehová käikitadrekä?

⁷ Nita orare ye ngwane nikwe Jehová käikitadrekä arato ye nikwe ngwandre törö jai. Ni rabadre niara aibe käikitekä. Ni salmo tikaka käkwe niebare: “Mä abokän töi kwin aune mätä juto biare ngite juankäre ta”. Aune niebare kwe arato: “Mä Ngöbö ni mikaka tuin bobre jai, ni ngübare bätärekä, ja tare metre bämike krubäte aune ja ngwen metre” (Sal. 86:5, 15). Jehovata ja ngwen ño aune kukwe nuainta kwe yebätä kukwe tärä keta kabre nie niara käikitakakäre.

8. ¿Kukwe meden medenbätä ni raba debe bien Jehovai nita orare ye ngwane? (Salmo 104:12-15, 24).

⁸ Nita orare ye ngwane nita Jehová käikitekä akwa ye ñan aibe nikwe nuaindre, nikwe debe biandre jondron kwin keta kabre bianta kwe nie yebätä. Ñodre, kriblü bä tuäre keta kabre, mrö bänä jene jene aune ja ketamuko kwin bianta kwe nie yebätä. Kukwe ne erere aune mada ni Rün ni tarekä tä bien nie ñobätä ñan aune niara tö ni tuai nüne kä jutobiti (ñäkädre Salmo 104:12-15, 24 yebätä). Mrö ja üaire keta kabre tä nikwe aune tödekara kwin tä nikwe ja känenkäre yebätä ni raba debe bien arato Jehovai.

9. Nikwe debe biandre Jehovai ye ñaka käi rikwitadrekä nibiti yekäre, ¿nikwe dre nuaindre? (1 Tesalonicenses 5:17, 18).

⁹ Jondron keta kabre Jehovata bien nie yebätä nikwe debe biandre ye nuäre käi kwitakakäre jabiti. ¿Dre nuaindre ne kwe ñaka  käi rikwitadrekä nibiti? Nikwe dre dre kärädi ye nikwe tikadre täräbätä jai aune kä ruäre ngwane ni raba tuente, ne kwe kukwe meden Jehovakwe mikanina nemen bare ni kräke ye rabadre gare nie. Biti, nikwe debe biandre ie kukwe mikani nemen bare kwe ni kräke yebätä (ñäkädre 1 Tesalonicenses 5:17, 18 yebätä). Debe bianta nie ye ngwane, jata nemen ruin kwin nie aune käta nemen juto nibätä, ¿ñan ererea? Nita jondron kärere Jehovai aune tä mike nemen bare ni kräke yebätä nita debe bien ie ye ngwane, nita kä mike jutobätä arato (Col. 3:15). Akwa kukwe keteiti madabätä ni raba debe bien abokän bäri ütiäte. Drebätä blitata ani mike gare jai.

10. ¿Ñobätä nikwe debe biandre Jehovakwe Jesús juani kä tibienbätä yebätä? (1 Pedro 2:21).

¹⁰ (Ñäkädre 1 Pedro 2:21 yebätä). Jehová monso tare kwe juani dirire nie yebätä nikwe debe biandre ie. Jesús nükani kä tibienbätä ja ngwani ño kwe yebätä nikwe ja tötikadre ngwane, Jehová raba nemen gare kwin krubäte nie aune nikwe dre nuaindre ne kwe niarakwe ni kadre ngäbiti ye raba nemen gare nie. Jesús ja nire biani ni ütiäre ye ie nikwe tö ngwandre kwatibe ngwane, ni raba nüne jäme aune ja kete kwin Jehovabe (Rom. 5:1).

11. ¿Ñobätä nita orare Jesús käbiti?

¹¹ Ni raba orare Jehovai Jesús käbiti yebätä nikwe debe biandre krubäte ie. Nita dre kärere Jehovai ye raba bien nie Jesús yebiti. Nikwe oradi Jehová ie Jesús käbiti ye ngwane, niarakwe ni kukwe nuadi aune nita dre kärere ie ye biandi kwe nie. Jesukwe niebare: “Mun tö raba dre dre käräi ti Rünye ti käbti, ye abko tikwe nuendi mun kräke, ye köböire ti Rün di kri bä nuäre rabadre mikani ütiäte kri ti Ngöbö Odei köböire” (Juan 14:13, 14).

12. ¿Kukwe meden mada tärä nie debe biankäre Jehovai Jesús yebätä?

¹² Jehovata ngite kite ta nibiti Jesukwe ja nire biani ye köböire. Biblia tä niere “Jesu abko ni blitaka Ngöböbe ni mda mda diäre” aune “namani täkänintbe Ngöbö küde ruenkri kä käinbti” (Heb. 8:1). “Blitaka tärä nikrä ni Rün Ngöbö ngwärekri. Ni blitaka nikrä ye abko Jesukristo ara” nieta arato (1 Juan 2:1). Nita debe bien krubäte Jehovai Sacerdote Kri yebätä ñobätä ñan aune niarata ni mike tuin bobre jai, ni töi ño ye nüke gare ie aune tä “blite käre Ngöböbe ni kräke” (Rom. 8:34; Heb. 4:15). Ni ngite yebätä ni ñan raba blite Jehovabe, akwa Jesús ja nire biani ye köböire nita blite ben. Ni ñan raba debe bien täte Jehovai monso tare kwe juani kwe ni ütiäre yebätä.

13. ¿Nitre ja tötikaka Jesukwe ye tare kwe ye bämikani ño kwe murie ketadre ye känenkri?

¹³ Jesús murie keta jämi ye känenkri deu niarakwe orabare ora kabre te Jehovai nitre ja tötikaka kwe yebätä, Jehovakwe nitre ja tötikaka ye mikadre kwäre nitre käme yebätä ribebare kwe Jehovai (Juan 17:15). Nitre ja tötikaka kwe ye nämäne tare kwe bämikani kwe ñobätä ñan aune niara murie keta tö namani, akwa niara töi nämäne nitre ja tötikaka kwe yebätä.

14. ¿Nita ja mräkätre tarere ye nita bämike ño?

¹⁴ Jesús erere, ni ñan tä töbike ja aibebätä. Nita orare ye ngwane nita orare ja mräkätre jökrä kräke. Aune nikwe ja taredre kwärikwäri niebare Jesukwe ye nita mike täte aune ja mräkätre jökrä tare nikwe ye nita bämike Jehovai (Juan 13:34). Nitre Jehová mikaka täte ye kräke nita orare ngwane, ni ñan tä kä juen ngwarbe ta gare nie. “Ni tödekaka kwatibe Ngöböbti käta blite Ngöböbe ja di  käräkäre ie, ye köböire abko Ngöböta jändrän kri nuene”, Biblia tä niere (Sant. 5:16).

15. ¿Oradre ja mräkätre kräke ye ñobätä tätre ribere jai?

¹⁵ Ja mräkätre tä ja tuin kukwe tare ben ye kräke nikwe oradre. Ñodre, tätre bren, kukwe tare tä nemen bare käite, ja mikata rüere o rü tä nakainkä. Kukwe tare ne erere ben tätre ja tuin aisete Jehovakwe ja di biandre ietre ja tuakäre kukwe tare nebe ye ni rabadre ribere Jehovai. Aune ja mräkätre kräke ñaka nuäre akwa yebiti ta tä ja di ngwen ja mräkätre mada dimikakäre tätre ribere jai ye ngwane, ye kräke nikwe oradre arato. Ja mräkätre tä ja tuin kukwe kädrite ne erere ben ye gare mäi raba ruin nunye. ¿Ñobätä mä ñan kädekete orasion mäkwe yete? Mäkwe oradi Jehovai ne kwe niaratre rabadre kä ngwen nüke jai ngwane, niaratre tare mäkwe ye mäkwe bämikai metrere.

16. ¿Ñobätä ni rabadre orare ja mräkätre tä ni jie ngwen ye kräke?

¹⁶ Ja mräkätre tä konkrekasion jie ngwen ye kräke nita orare yebätä tätre debe bien kru bäte. Nita orare kräketre ye tä niaratre dimike. Ye erere namani bare apóstol Pablobätä. Niarakwe tikabare: “Ngöbö kukwei kuin Jesubtä nämane tiebe ye abko tikwe niedre ño ño abko Ngöbökwe mikadre gare tie amne, kä jürä rabadre ñakare tibtä blitare, abkokäre munkwe blita Ngöböbe tikrä” (Efes. 6:19). Kä nengwane ja mräkätre sribikä kwin krubäte ye tä ni jie ngwen. Kukwe nuainta kwetre ye Jehovakwe mikadre nemen bare kwin krübate ye nikwe ribei Jehovai ngwane, nita niaratre tarere ye nikwe bämikai.

17, 18. ¿Ñongwane nikwe oradre nitre kwati ngwärekri ye ribe raba nie aune nikwe dre ngwandre törö jai?

¹⁷ Ruäre ngwane ni rabadre orare nitre kwati ngwärekri ye ribe raba nie. Ñodre, meri testiko iti tä ni tötike aune meri testiko mada tä näin mukore ye rabadre orare ye raba ribere ie. Akwa nänkä mukore ye tö rabadre orasion mrä ye nuaindi mikadre gare kwe. Ne kwe raba dre ribere ni ja tötikaka ye kräke orasionte ye rabadre gare bäri kwin ie yekäre.

¹⁸ Ni iti rabadre orare gätä kukwe driekäre o gätä nuainta konkrekasionte yete ngwane, ¿rabadre dre ngwen törö jai? Dre kräke gätä ye nuainta ye ni orasion nuainkä ye rabadre ngwen törö jai. Orasion ye ñaka mäträkäre  o kukwe mikakäre gare konkrekasion kräke ye kwrere. Gätä bäsi jökrä yete kä tä dianinkä 5 minuto kansion aune orasion ye nuainkäre. Aisete ni iti ñaka raba “blite krubäte” aune metrere orasion nuainta gätä kömikakäre yete (Mat. 6:7, NGT).

19. ¿Dre käkwe ni dimikai rabakäre juto köbö Jehovakwe rükadre ye kräke?

¹⁹ Köbö Jehovakwe nibira ja ken ye medenbätä nikwe ja di ngwandre orasion nuainkäre bäri. Kukwe yebätä Jesús nämäne blite ngwane, kukwe ne erere niebare kwe: “Mun abko käkwe ja mika biare ti ngibiare ngäbti munkwe blita Ngöböbe jakrä angwane, kukwe jatadi taretare yebtä munkwe kwäräbedi jökrä” (Luc. 21:36). Käre nikwe oradi ngwane, ni täi kwin kukwe ja üairebiti aune ni tädi juto biare köbö Jehovakwe rükadre ye kräke.

20. Incienso rä mane ye kwrere orasion nikwe rabadre, ¿ye kräke ni raba dre nuainne?

²⁰ ¿Drebätä nikwe blitani kukwe ja tötikara nekänti? Ni raba orare Jehovai ye ütiäte krubäte ni kräke. Dre tuin kwin Jehovai ye erere ni rabadre kädekete orasionte ye bäri ütiäte. Ni raba debe bien Monso kwe, Gobran kwe yebätä aune ni raba orare ja mräkätre kräke. Aune nita dre ribere jai ja üairebiti aune ja ngätärebiti ye ni raba ribere Jehovai. Nikwe töbikaitari kwin käne orasion nuainkäre ngwane, orasion ye ütiäte krubäte ni kräke ye nikwe bämikai. Incienso rä mane ye kwrere rabai Jehová kräke aune kä rabai “jutobätä” (Prov. 15:8).