1. ¿Dre nuaindre kä nengwane ie Ngöbö tö?

 KUKWE kwin Gobran Ngöbökwebätä ye driedre kä jökräbiti tibien ye ie Jehová tö (Mar. 13:10; 1 Tim. 2:3, 4). Sribi ne Jehovakwe aune ütiäte krubäte kräke yebätä Monso kwe dianinkä kwe kukwe ne jie ngwankäre. Kukwe drie ye tä ni ni jie ngwanka bäri kwin kisete, yebätä kä käme ne krütai ngwane, sribi ne nuainbare ño ye käi rabadi juto Jehovabätä ye tädre gare metre nie (Mat. 24:14).

2. ¿Dre rabadi gare nie kukwe ja tötikara nekänti?

² “Ni klabore ja ngwanka metre aune töbikaka kwin käne” yebiti Jesuta ni buke kukwe ja üairebiti aune ni ükete kukwe driekäre kä jökräbiti tibien ye rabadi gare nie kukwe ja tötikara nekänti (Mat. 24:45, TNM). Ni klabore ja ngwanka metre bätä töbikaka kwin käne aune Jesús yebe ni itire itire käkwe sribidre ño gwairebe ye rabai gare nie arato.

3. ¿Kukwe meden mikani jie ngwankäre Jesús ie?

³ Kukwe drie ye jie ngwanta Jesukwe. ¿Ñokänti gare nie? Jämi niken kä kwinbiti ye känenkri ja ükaninkrö kwe nitre ja tötikaka ruäre kwe ben ngutuä Galilea yekänti aune niebare kwe ietre: “Kä käinta se amne kä temen ne Ngöbökwe mikani gare jökrä tie”. Aune kukwe mada niebare kwe nebätä ani töbike: “Mun nän, amne nitre nünanka kä jökräbti temen [...], munkwe niaratre mika ja töitikaka siba tibe” (Mat. 28:18, 19).  Sribi ruäre tä Jesús kisete ye ngätäite kukwe drie ye jie ngwandre tä niara kisete.

4. ¿Jesús täbe kukwe drie jie ngwen ye ñokänti gare metre nie?

⁴ “Kä jökräbti temen” kukwe driei aune nitre mikai ja tötikaka Jesube ye ngwane, “ti abko tädi kärekäre munbe köbö kwatirekwatire nebebe kä mrä” niebare kwe (Mat. 28:20). Jesús tä kukwe drie jie ngwen kä nengwane ye kukwe ne tä mike gare metre.

5. ¿Kukwe nieta Salmos 110:3 ye nita mike täte ño?

⁵ Kä krüte ne näire nitre sribikä tädi kwati krubäte nämäne gare metre Jesús ie. “Köbö te mäkwe nitre rükä mäkwe jie ngwain rübätä ye näire juta mäkwe ja mikai nänkäre ja töi jeñebiti”, kukwe mikani gare ne rabai bare metre ye nämäne gare Jesús ie (Sal. 110:3). Mätä kukwe driere ngwane, mätä Jesús aune ni klabore ja ngwanka metre aune töbikaka kwin käne ye dimike aune profecia mikani gare ye mike nemen bare arato. Kukwe drie ye tä nemen bare, akwa kukwe ruäre ben ja tuata.

6. ¿Kukwe ruäre medenbe nita ja tuin?

⁶ Kukwe keteiti ben nita ja tuin ye abokän ja mikata ni rüere. Nita sribi nuainne yebätä nitre apóstata, gobrantre aune nitre kukwe ngwarbe jie ngwanka ye tä kukwe ngwarbe niere. Ni mräkätre aune ja ketamuko nikwe tä kukwe ne mike era jai ngwane, raba ni töi mike ñaka sribire jankunu Jehová kräke aune kukwe driere. Juta ruäre känti nitre ja mikaka ni rüere tä ni rä ötö, kukwe tare nuainne nibätä aune ni kite ngite. Kukwe tare tä nemen bare ne ñan tä ni töi mike ñan krütare ñobätä ñan aune Jesukwe niebare: “munta tödeke tibti, ye dokwäre ni kwati nünanka kä ketareketare temen mätä rabadi munbtä” (Mat. 24:9). Kukweta nemen bare nebiti nita ja ngwen Jesús erere aune Jehovata ni kain ngäbiti ye tä nemen gare metre nie (Mat. 5:11, 12). Satana tä nitre töi mike ja mike ni rüere, akwa niara ye ñaka di raba nüke jabätä Jesús ben. Jesuta kukwe drie ye jie ngwen yebätä kukwe kwin Gobran Ngöbökwebätä mika niena gare juta keta kabre känti.

7. Apocalipsis 14:6, 7 tä nemen bare metre, ¿ye ñokänti tä nemen gare mäi?

⁷ Kukwe mada ben nita ja tuin ye abokän, nitre ñaka tä blite kukwe keteitibebiti. Akwa kukwe ne ñaka raba kukwe drie ye ketebätä ye niebare Jesukwe metre ta Juan ie (ñäkädre Apocalipsis 14:6, 7 yebätä). ¿Dre nuainbarera ja tuakäre kukwe nebe? Täräkwata dianinkä Bibliabätä kwitanina kukwe 1,000 biti ye tä mikani jw.org yete ni jökrä kräke. Nitre Braibe Konkrekasion Jökrä Ngübabitikä ye käkwe nitre töi mikanina tärä Mä raba nüne kä jutobiti ye kwite kukwe bäsi 700 närebiti ne kwe nitre tötikadre Bibliabätä. Video sribeta nitre olo ngidianinte ye kräke aune tärä sribeta braille nitre kä ngidianinte okwäte ye kräke, yebiti mrö ja üaire tä nemen kwetre arato. Ye köböire nitre kwati ie kukwe kwin Gobran Ngöbökwebätä ñaka raba nemen gare ye ie tä nemen gare. Profecía mikani gare ne tä nemen bare metre ye tuen nie, nitre kwati “blite kukwe jene jenebiti” kä jökräbiti tibien ye tä ja kite “blite kukwe keteitibebiti” (Zac. 8:23; Sof. 3:9). Jesuta kukwe drie ye jie ngwen kwin krubäte yebätä tä nemen bare kwin.

8. ¿Kä nengwane kukwe drieta ye köböire dre namanina bare?

⁸ Juta 240 te nitre 8 millón biti bäri ye tä juta Ngöbökwe te. Kä kwatire kwatire nitre kwati tä ja ngökö ñöte. Nitre nibe ye ñan bäri ütiäte, ñakare aune tätre ja töi mike kwin ye bäri ütiäte, ye abokän Biblia tä kädeke “dän btin kita jabtä, ye kwrere” (Col. 3:8-10). Niaratre ruäre abokän nämäne  nemen kämekäme nitre madabe, kukwe tare nuainne, nitre kitete, ja mike juta keteiti yekri, akwa nengwane ñaka niena nuainne. Profecía tä Isaías 2:4 “Juta kwatire kwatire ñaka rabai ngitra rükäre den jai” ye tä nemen bare metre. Nita ja di ngwen ja ngwen kwin ye tä nitre töi mike kite juta Jehovakwe kokwäre aune Jesús ni jie ngwanka ye jiebiti nita näin nita bämike (Juan 13:35; 1 Ped. 2:12). Jesús tä ni dimike aisete kukwe ne ñan tä nemen bare nierare.

9. Mateo 24:45-47 tä niere erere, ¿dre rabadi bare kä mrä näire niebare Jesukwe?

⁹ (Ñäkädre Mateo 24:45-47 yebätä). * Kä mrä ne näire Jesukwe “ni klabore ja ngwanka metre aune töbikaka kwin käne” ye diainkä niebare kwe, ne kwe rabadre ni buke mrö ja üaire yete. Ye medenbätä niaratre rabadre sribire ja dibiti kä nengwane aune ye erere tätre nuainne. Jesukwe nitre braibe dianinkä nitre niara mikaka täte aune nitre tö kukwe kwin mikai gare jai ye bukakäre “kätä nüke ye näre te”, niaratre ye ñan ja mike ‘däkien tödeka nikwe biti’ ye kwrere (2 Cor. 1:24). Ñakare aune Jesús “ji ngwanka aune ni nitre rükä jie ngwanka” ye gare metre ietre (Is. 55:4).

10. ¿Täräkwatabätä üaita jatäri ne medenbätä mäkwe ja tötikabare ne kwe ji kwin ja nire kokwäre ye namani gare mäi?

¹⁰ Mrö ja üaire rabadre nitrekwe yekäre nitre klabore ie tö ngwan raba bätä töbätä käkwe kä 1919 yete ja käne täräkwata keta kabre sribebare. Kä 1921 yete täräkwata El Arpa de Dios mikani gare inglere ne kwe kukwe metre Bibliabätä ye mikadre gare nitre ie. Kä nikani  ta ye bitikäre täräkwata mada sribe jatani. Jehová rabadre gare mäi aune mäkwe taredre yekäre, ¿mäkwe ja tötikani täräkwata medenbätä? Täräkwata “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Dre drieta erametre Bibliakwe?, o ¿Dre drieta nie Bibliabätä?. O mätä ja tötike täräkwata Mä raba nüne kä jutobiti yebätä. Täräkwata keta kabre ne sribebare ni dimikakäre nitre tötike ne kwe rabadre ja tötikaka Jesukwe aune nükani kä debe näre te.

11. ¿Mrö ja üaire rabadre ni jökräkwe ye ñobätä ütiäte krubäte?

¹¹ Nitre ja tötikaka ye ñan aibe tä mrö ribi ye ribere jai, ñakare aune ni jökrä tä ribere jai. Apóstol Pablo niebare: “Ni ünän ünän abko käta mrö ribi ribi kwete”. Aune niebare kwe arato nire tä kukwe ne erere nuainne “nitre ye abko dre dre kuin amne dre dre käme Ngöbö ngwärekri, yebtä ja töitikanina kabre kwetre, aisete tärä nebe gare ietre” (Heb. 5:14). Nitre tä ja ngwen käme krubäte ja mika gure yebätä, aisete ñan nemen nuäre ni kräke Jehová mikakäre täte. Akwa Jesús tä mrö ja üaire kwin krubäte bien nie ni dimikakäre aune mrö ja üaire ye kite Ngöbö kukwei Biblia yekri. Jesús tä nitre klabore ie tö ngwan raba bätä töbätä ye jie ngwen ne kwe mrö ja üaire ne sribedre kwe aune dräidre kwe.

12. ¿Jesús erere dre nuainbarera Jehová kä mikakäre ütiäte?

¹² Jesukwe nuainbare ye erere nunta Jehová kä mike ütiäte krubäte jai (Juan 17:6, 26). Ñodre, kä 1931 yete nun kädekani testiko Jehovakwe. Nun Rün kä kwinbiti ye nun tö rababa kä ngwain jabätä ñobätä ñan aune niara kä ye ütiäte krubäte nun kräke (Is. 43:10-12). Sö octubre kä arabe te täräkwata inglere kwatabätä Jehová kä tikaba. Ne madakäre Traducción del Nuevo Mundo yete Ngöbö  kä rikadre medente ye erere känti mikaninta. Iglesia ngwarbe ñaka tä kukwe ye erere nuainne ñobätä ñan aune Ngöbö kä rikadre medente ye tä denkä täräkwata sribeta kwe yebätä.

13. “Ni klabore ja ngwanka metre aune töbikaka kwin käne” yebiti Jesús tä ni jie ngwen, ¿ye ñobätä metre mä kräke? (Juan 6:68).

¹³ Nitre klabore yebiti Jesús tä juta keteiti ükete kwin krubäte kä tibienbätä ne kwe rabadre kukwe metre ye mike gare. ¿Juta Ngöbökwe tä ükaninte yebätä mätä töbike ño? Ja namani ruin ño Pedro ie ye erere jata nemen ruin mäi raba ruin nunye. Niara käkwe niebare Jesús ie: “Ma kukwei abko kukwe ni mikakrä nire kärekäre [...], ¿Se abko nun rikadre nireye mda se?” (Juan 6:68). ¿Juta Jehovakwe ñan tädre gare mäi akräke mä tädre ño? Juta yebiti Jesús tä ni buke kwin krubäte kukwe ja üairebiti aune tä ni tötike ne kwe ni rabadre dirikä bäri kwin. Ne madakäre, ye köböire ni raba dän bitin ja üaire ye kite jabätä kä mikakäre juto Jehovabätä (Efes. 4:24).

14. ¿Bren tare COVID-19 nükani ye ngwane mätä juta Jehovakwe te ye käkwe mä dimikanina ño?

¹⁴ Kukwe tare ye näire Jesús tä ni jie ngwen kwin krubäte. Ye namani gare metre nie bren tare COVID-19 nükani ye ngwane, ñobätä ñan aune nitre kwati kä jökräbiti tibien rabadre dre nuainne ye ñan namani gare ietre, akwa Jesukwe kukwe mikani gare metre ta ne kwe nikwe ja kriemikadre. Ñodre, nikwe mascarrilla mikadre ngwärebiti aune nitre kwati ngätäite ni ñan tädre känime ja ken ye ni töi mikani nuainne. Nitre kukwe driekä jökrä ye tä dre dre ribere jai ja ngätärebiti aune ja üairebiti ye nitre umbre ji ngwanka konkrekasionte tädre mike gare kwin jai ye ngwaninta  törö ietre (Is. 32:1, 2). Nitre Braibe Konkrekasion Jökrä Ngübabitikä tä kukwe mike gare yekänti, kukwe ni jie ngwankäre aune dimikakäre ye mikata gare kwetre.

15. ¿Pandemia ye näire kukwe meden mada mikani gare aune ye köböire dre tä nemen bare?

¹⁵ Bren tare COVID-19 nükani ye ngwane gätä aune kukwe driedre ño ye mikani gare metre ta nie. Jötrö ngwarbe nun namanina gätä aune gätä kri ye nuainne videoconferencia yebiti, tärä tika yebiti bätä teléfono yebiti nun rababara kukwe driere metrere. Nunta ja di ngwen yebätä Jehovata kukwe kwin mike nemen bare. Nitre kukwe driekä tä nirien bäri ye sukursal keta kabre tä mike gare. Ne madakäre, kukwe kwin keta kabre tä nemen bare ye ja mräkätre kwati tä mike gare (recuadro “ Jehovata kukwe kwin mike nemen bare kukwe drie yebätä” ye mikadre ñärärä).

16. ¿Dre tädre gare metre nie?

¹⁶ Bren tare COVID-19 nükani ye ngwane juta Ngöbökwe namani kukwe ñäkäire krubäte nie ni kriemikakäre ja mräkätre ruäre namani nütüre. Kukwe mikani gare nie ni jie ngwankäre ye kwin krubäte ye namani gare metre nie bati bobu kukwe keta kabre nämäne nemen bare yebiti (Mat. 11:19). Jesús ni tarekä tä ni jie ngwen yebätä nikwe töbikadretari ngwane, kukwe ñokwa rabadi bare ja känenkäre yebiti ta Jehová aune Monso kwe ye tädi nibe ye tädre gare metre nie (ñäkädre Hebreos 13:5, 6 yebätä).

17. ¿Sribi nuainta nikwe ye Jesús tä jie ngwen yebätä ja ruin ño mäi?

¹⁷ ¡Nita sribi nuainne ye Jesús tä jie ngwen ye käi juto krubäte nibätä! Ni nünanka juta jene jene te, ja ngwanka jene aune blite kukwe jene jenebiti, akwa kukwe yebätä juta Ngöbökwe ñaka tä ni tuenmetre ja ñäkebiti. Mrö ja üaire tä krubäte nikwe aune kukwe keta kabre tärä nikwe kukwe driekäre. Ni itire itire tä ja di ngwen dän bitin kukwe ja üairebiti ye kitakäre jabätä aune ja tare ye bämikakäre. ¡Jesucristo tä ni jie ngwen kwin krubäte ye käi nuäre nibätä!