Ja mräkätre Nicolas aune Céline yebätä kukwe jene namani bare, ñobätä ñan aune ja mräkätre sukursal Francia yekwe ribebare ietre, niaratre ja kwitadre konkrekasion madate. Ja mräkätre ye ie kukwe ye namani tuin ño ye kwetre tä mike gare: “Kenanbe kä rababa juto nunbätä, akwa biti ñan rababa nuäre nun kräke, nun rababa ja ketamuko nunkwe ye uliere, ñobätä ñan aune konkrekasion mrä yete nun nämä ja kete ja mräkätre ben akwa ja ñan nämä nemen ruin nunye ja ketamuko käne nunkwe ben ye erere”. a ¿Dre raba mä dimike ja tuakäre kukwe ben mäta ja tuin aune ja rabadre ruin kwin konkrekasion madate mäta yekäre? ¿Mä raba ja mräkätre mada ye dimike ño? ¿Kukwe ja üaire kwin meden raba nemen mäkwe aune mä raba ja mräkätre konkrekasion madate ye dimike ño?

KUKWE KETABÄKÄ MÄ DIMIKAI

1. Mäkwe tö ngwan Jehovabiti (Sal. 37:5). Kazumimbiti kä gre jire te nämäne konkrekasion keteiti te ye ngwane, niaratre nikani kä madakänti, brare juani sribire kä mada känti yebätä. ¿Dre nuainbare kwe ne kwe Jehovakwe jie ngwandre? Niara tä niere: “Tikwe ja brukwä tökateba Jehovai, töbikakwe, kä jürä, aune ja nämä ruin kaibe tie ye tikwe mikaba gare Jehovai. Jehovakwe ti dimikaba”.

¿Dre mä dimikai tö ngwen bäri Jehovai? Tödeka nikwe ye abokän kri mu ie abono aune ñö kitata ne kwe ririadre kwin aune tädre dite ye erere. Nicolas yebätä blitani käne yekwe töbikataribare, Abrahán, Jesús aune Pablo yebätä. Kukwe ñan nuäre nuainbare kwetre Ngöbö töi mikakäre nemen bare yebätä töbikataribare kwe, ye käkwe niara dimikani tö ngwen kwatibe Jehovakwe dimikai  yei. Ja tötika kaibe ye mäta nuainne käre ngwane, kukwe ñobe mäkwe ja tuai yekwe ñaka mä nitai tibien ñakare aune kukwe ja üaire tädre gare krubäte mäi aune mäkwe konkrekasion dimikai krubäte arato.

2. Konkrekasionte mä nämäne ye mäkwe ñaka keta konkrekasionte mätä yebe (Ecl. 7:10). Jules nämäne nüne Benín ja kwitani kwe Estados Unidos nitre nämäne nüne jene aune ja ngwen jene yebe ja tuani kwe. “Ti nämä dre nuainne aune ja nämä nemen ruin ño tie ye tikwe niedre ja mräkätre itire itire ie ye kwrere bä rababa ti okwäte”. Jules ñan nämäne ja ngwen kore yebätä ja namani ruin jene ie, aisete niara jatani kämikekä ja mräkätrebätä. Akwa biti ja mräkätre kä yekänti ye jatani nüke gare ie ngwane, namani bäri nuäre kräke. Nieta kwe: “Ni jökrä käbiti tibien ja erebe akwa ni ja ngwen jene jene. Ye medenbätä nitre tä ja ngwen ño ye ererebätä kadre ngäbiti”. Aisete konkrekasion te mä nämäne käne ye mä ñan keta konkrekasionte mätä yebe. Prekursora Anne-Lise tä niere: “Tikwe ja kwitani ye abokän ñan kukwe nämäne nemen gare tie konkrekasion mikaninte tikwe ye erere mikakäreta gare jai, ñakare aune kukwe mrä mrä mikakäre gare jai”.

Nitre umbre arato ñaka konkrekasion käne kwe ye ketadre konkrekasionte tä yebe. Kukwe ruäre nuainta jene akwa metrere ye ñan blo. Dre tä nemen bare konkrekasionte ye mikadre gare kwin jai biti kukwe ruäre niedre ye bäri kwin (Ecl. 3:​1, 7b). Nita ja ngwen ño yebiti nitre mada dimikadre ye bäri kwin (2 Cor. 1:24).

3. Mäkwe kukwe nuain ja mräkätre ben (Filip. 1:27). Ja kwitadre konkrekasion madate yekäre kä ribeta krubäte jai aune ja di ribeta, akwa ütiäte krubäte mä rikadre gätäbätä ngwärere ye kwin. Metrere mä rikadre käre gätäbätä, ñan ñobätä aune mä rikadre nane nane ngwane, ye ñaka mä dimikai krubäte. Lucinda aune ngängän nibu kwe käkwe ja kwitani Sudáfrica juta kri yete, ye tä niere: “Nunkwe kukwe drieba käre ja mräkätre konkrekasionte ben. Ja mräkätre jene jene ben nunkwe kukwe drieba aune nunkwe comentario bianba gätäte. Arato ja ükakrö raba nun gwirete kukwe driekäre nunkwe nieba ja mräkätre ie”.

Mäkwe ja di ngwain kukwe driere ja mräkätre ben gwaire ngwane tödeka mäkwe aune ja mräkätrekwe rabai dite. Ja mräkätre umbre konkrekasionte ye käkwe Anne-Lise töi mikani kukwe driere ja mräkätre itire itire yebe. Niara tä mike gare: “Kukwe nieba kwe tie ye ara käkwe ti dimikai nemen keteitibe ja mräkätre ben ye rababa gare tie”. Ne madakäre ni tädre juto biare ja dimikakäre, Ju Ja Ükarakrö mikata mrebe o ükateta ye kräke. Ye köböire ja mräkätre mada ie rabai gare nita ja di ngwen nemen keteitibe niaratre ben aune ja niena ruin kwin nie konkrekasion yete ye rükai gare ietre. Nikwe ye erere nuaindi bengwairebe ngwane, bäri jötrö ja rabai ruin kwin aune kani ngäbiti nie.

4. Ja ketamuko mrä känändre (2 Cor. 6: 11-13). Ja ketamuko mrä känänkäre yekäre nikwe blitadre ja mräkätre ben gätä känenkri o gätä tä  niken ta ye bitikäre. Niaratre mikakäre gare bäri kwin jai. Kä juto mäbätä aune mäta blite jäme nitre madabe aune mäkwe ja mräkätre kä ngwain törö jai ngwane niaratre tö rabai ja ketai mäbe.

Mä ñan ja ngwan jene matakäre kwin ni madabätä o ni mada mä kadre ngäbiti yekäre. Ñakare aune mä ño ye erere mä ja ngwan. Lucinda dre nuainbare ye erere mäkwe nuain. Lucinda tä niere: “Nunkwe ja töi mikaba ja mräkätre nübaire ja gwirete. Ye köböire ja ketamuko kwin tä nunkwe”.

“MUNKWE JA KA NGÄBITI KWIN KWÄRIKWÄRI”

Ja mräkätre ruäre kräke ñan tä nemen nuäre rikakäre konkrekasion madate, ye medenbätä ja mräkätre rükadre konkrekasion mäkwe yete ngwane, ¿mä raba dimike ño? Apóstol Pablo niebare: “Kristokwe mun itire itire kani ngäbti kuin, ye kwrere munkwe ja ka ngäbti kuin kwärikwäri” (Rom. 15:7). Nitre umbre konkrekasionte rabadre ja mräkätre tä nüke mrä konkrekasionte ye kai ngäbiti kwin Kristo ja ngwani ño ye erere (recuadro “ Dre nuaindre ja kwitakäre konkrekasionte” ye mikadre ñärärä). Ni jökrä konkrekasionte, monsotre kia, merire, brare, umbre, raba ja mräkätre tä nüke krire konkrekasionte ye dimike ne kwe ja rabadre ruin kwin ie.

Ja mräkätre tä nüke mrä konkrekasion nikwe te ye ka ngäbitikäre kwin, ni rabadre nübaire ja gwirete aune kukwe ruärebätä niaratre dimikadre. Ñodre, meri testiko iti käkwe meri testiko nükani mrä konkrekasionte ye dimikani juta kri ye mike gare jai aune nändre ño karote nekwäre, sekwäre ye driebare ie. Meri testiko nükani krire ye ie ja kani ngäbiti kwin aune ja namani ruin kwin ie yebätä tä debe bien krubäte.

MÄ RABA NIRIEN JA ÜAIREBITI

Mäta ja kwite konkrekasion madate ye ngwane, kä jürä krubäte mäbätä aune mäta ja töibikaire krubäte raba ruin nunye. Akwa töbike kukwe bämikata nebätä: jondron nire ruäre tä ja kwata tikete ne kwe ririadre aune rabadre nikenkä, ye kwrere arato kukwe tä ni mike ja töibikaire ye diandrekä jabätä, ririakäre ja üairebiti ye köböire nikwe sribidre kä jutobiti Jehová kräke. Nicolas aune Céline  tä niere: “Ja kwitata konkrekasionte ye ngwane kukwe keta kabre kwin tä nemen nikwe. Ñodre, nitre ja ngwen jene ngätäite nunta nüne yekwe nun dimikani töi kwin ñaka nämä nunkwe ye erere ja ngwen”. Jean-Charlesbätä blitani párrafo kena ye tä mike gare: “Nunkwe ja kwitaba konkrekasion madate ye käkwe nun dimikaba krubäte nirien ja üairebiti. Sö rikaba ruäre ta ye ngwane, monso merire nunkwe ye rababara kukwe bämike konkrekasionte, aune monso brare ye kädekaba ni kukwe driekä ñan ja ngökani ñöte ye kwrere”.

¿Kukwe tä mä kisete yebätä ñan nuäre mä kräke ja kwitakäre ni ribeta kukwe driekäre yekänti? Jän ngwane, kukwe miri gare kukwe ja tötikara nebätä ne mäkwe nuain, ye köböire nita nemen krire konkrekasionte ye kwrere ja rabaita ruin mäi. Mäkwe tö ngwan Jehovabiti. Mä ja di ngwan nemen keteitibe ja mräkätrebe konkrekasionte. Arato, mäkwe kukwe ükate jai kukwe driekäre ja mräkätre itire itire ben, ye köböire ja ketamuko mada rabai mäkwe o ja ketamuko niena mäkwe yebe mäkwe ja ketai bäri kwin. ¿Ja mräkätre tä nüke krire konkrekasionte ye mä raba dimike kukwe ruärebiti? Mäkwe dimikai ngwane niaratre täi dite ja üairebiti, ñobätä ñan aune ni Ngöbö mikaka täte ye tä ja tarere (Juan 13:35). Nita kukwe nuainne ye käita nemen nuäre Ngöböbätä tädre gare metre nie (Heb. 13:16).

Nitre kristiano kwati ye kräke ñan tä nemen nuäre tätre ja kwite konkrekasion madate ye ngwane, akwa yebiti ta kätä niken ta ngwane jata nemen ruin kwin ietre. Ye erere raba nemen bare mäbätä arato. Anne-Lise tä niere: “Ti ja kwitani konkrekasionte ye köböire tita ja kete bäri ja mräkätre kwati ben”. Kazumi ie nüke gare, “ja kwitadre konkrekasionte ye tä ni dimike krubäte aune Jehová tä ni dimike ño kukwe ruärebätä ye tä tuin bäri kwin nie”. Aune Jules tä mike gare metre ta: “Tita ja kete ja mräkätre bäri kwati ben aune ja ñan ruin kaibe tie. Tita ja kete kwin ja mräkätre konkrekasionte yebe, aisete ti rikadre konkrekasion madate ye ñan rabadre nuäre ti kräke”.