Kukwe ütiäte krubäte ye nikwe ñaka käi kwitadrekä jabiti
“Ne kwe rabadre gare nitre jökrä ie mä kä Jehová, mä aibe Kri kä tibien ye jökräbiti ta” (SAL. 83:18).
KANTIKO: 46, 136
1, 2. a) ¿Kukwe meden abokän ütiäte krubäte? b) ¿Ñobätä ye ütiäte krubäte ni kräke?
NGWIAN ye bäri ütiäte nitre kwati krubäte kräke. Yebätä, tätre ja töi mike jondron tuabätä ere jakwe o jondron tä kwetre ye ñaka tö tuai nete jakän. Nitre mada abokän kräke mräkätre, niaratre tätre kwin o tö dre dre ie rabadre kwetre ye bäri ütiäte.
2 Akwa nikwe ngwandre törö jai, Jehová gobran kri rabadre gare ye ütiäte krubäte kukwe kädrite ye kräke. Nikwe ñaka ja ngübaibiti angwane, ni töi raba nemen krubäte dre dre nuainta nikwe o kukwe meden tä ni kisete yebätä, ye köböite kukwe ütiäte krubäte ye ni raba käi kwitekä jabiti. Ne madakäre, nikwe ja mikai Jehová gobran kri yekri angwane, ni täi juto biare ja tuakäre kukwe meden meden rabadre ni kisete yebe aune nikwe ja ketai bäri kwin Jehovabe.
¿ÑOBÄTÄ YE ÜTIÄTE KRUBÄTE?
3. ¿Satana tä dre niere gobran Ngöbökwe yebätä?
3 Jehová ñaka raba gobrane niebare Satanakwe. Jehová ñaka tä gobrane kwin, ñaka tö kukwe kwin ie ni kräke aune ni rabadre ja gobraine akwle ye aibe köböire ni raba nüne kä jutobiti niebare Satanakwe (Gén. 3:1-5). Ni ñaka jire iti ja ngwen metre Ngöböi ja brukwä tätebiti aune ni nuadrete krubäte ye ngwane ni ñaka raba ja mike jankunu gobran Ngöbökwe yekri niebare kwe arato (Job 2:4, 5). Yebätä, nikwe ñaka ja mikadre Gobran Ngöbökwe yekri ye köböite kukwe tare raba nemen ni kisete ye mikakäre gare metre Jehová tä kä mike niken ta.
4. ¿Kukwe niebare Jehová rüere ye ñobätä ükadrete?
4 Satana tä kukwe niere ye ñaka metre gare kwin Jehovai. Akwa, ¿ñobätä tä kä bien raire Satana ie kukwe niebare kwe ye metre o ñakare bämikakäre? Ñan ñobätä aune Satana kukwe niebare ye tä gare angeletre aune ni kä tibienbätä ie arato (ñäkädre Salmo 83:18 yebätä). * Adán aune Eva ye erere, nitre kwati krubäte ñaka tä ja mike jankunu Jehová gobran kri yekri. Ye köböite, Diablu kukwe niebare ye metre raba nemen ruin nitre ruäre ie. Satana kukwe niebare ye ñaka rükadre gare kwin ni kä nebätä aune angeletre ie angwane, nitre nünanka juta jene jene te, nitre kwata bä jene jene, nitre ja mräkäre aune ni jökrä töi ñaka rabai ja erebe. Akwa Jehová gobran kri mikai gare täte ye bitikäre, gobran kwe ye köböire ni jökrä nünain käräkäre aune jäme jabe (Efes. 1:9, 10).
5. ¿Nita ja mike ño Jehová gobran kri yekri?
5 Jehová ye gobranka bäri kwin aune Satana aune nitre kä nebätä ñaka tä gobrane kwin ye bämikai aune yebätä gaite. Monso dianinkä Gobrankäre ye köböire gobran Ngöbökwe käkwe ganandi. Ni kä nebätä raba ja mike metre gobran Ngöbökwe yekri ye ni Ngöbö mikaka täte metre käkwe bämikai (Is. 45:23, 24). ¿Ni tö ja tuai nitre Ngöbö mikaka täte metre ye ngätäite? Jän. Ni rabadre niaratre ngätäite yekäre, kukwe niebare Ngöbö rüere ye nikwe ngwandre törö jai aune mikadre nüke gare jai ye ütiäte krubäte.
KUKWE YE BÄRI ÜTIÄTE NI MIKADRE KWÄRE YE KRÄKE
6. ¿Jehová gobran kri rabadre gare ye ütiäte o ñakare?
6 Nibira gare nie ye erere, Jehová gobran kri rabadre gare ye ütiäte krubäte ni kä nebätä kräke. Aune bäri ütiäte kä tätre juto nibätä ye kräke. Akwa ye ñan tä mike gare ni mikadre kwäre ye ñaka ütiäte o Jehová töi ñaka nibätä. ¿Ñokänti ye gare nie?
7, 8. ¿Jehová gobran kri rabadre gare ye ñobätä ütiäte kukwe käbämikani kwe ye mikakäre nemen bare?
7 Ni ütiäte krubäte Jehová kräke. Ni tare krubäte niarakwe, yebätä Monso kwe biani kwe ni mikakäre kwäre ne kwe ja nire käre rabadre nikwe (Juan 3:16, Traducción del Nuevo Mundo de las Santas Escrituras, [TNM]; 1 Juan 4:9, TNM). Jehová kukwe käbämikani ye ñaka mikadre nemen bare kwe akräke, niara ni ngökö aune ñaka gobranka kwin bätä ñaka tö jondron kwin tuai nemen nikwe ye Diablu raba nierebätä. Aune ye köböite nitre ja mikaka Jehová rüere raba niara kötaire bätä raba nütüre arato Satana kukwe niebare ye metre. Niaratre tä kukwe ne ngwentari: “¿Kristo rükadita bobukäre kä nebtä niebare kwe abko ame? ¿Se ñan ngwarbe ni ngökata ya? Kristo ñan rükadreta, ñobtä ñan angwane ni mräkä känekäne krütanina jökrä, akwa Kristo ngämi nüketa amne kä dätebare ño kena abko erere kä tä ja täritäri abti kä nüke mtare, aisete ngwarbe ni ngökata, niedi kwetre” (2 Ped. 3:3, 4). Yebätä, Jehová gobran kri rabadre gare ye köböire ni niara mikaka täte metre ye mikai kwäre kwe (ñäkädre Isaías 55:10, 11 yebätä). * Ne madakäre, Jehová tä ni tarere yebiti tä gobrane ño ye bämikata kwe. Yebätä, niarakwe ni taredi käre aune ni mikai tuin ütiäte krubäte kwe jai ye gare kwin nie (Éx. 34:6).
8 Jehová gobran kri rükadre gare nie ye ütiäte krubäte, akwa ye ñan tä mike gare ni mikadre kwäre ye ñaka ütiäte ni kräke o ni ñaka ütiäte Jehová kräke. Ñakare aune Jehová gobran kri aune ni mikadre kwäre ye ñaka ja erebe akwa ütiäte ni kräke. Kukwe ye rükadre gare kwin nie ye ütiäte ne kwe kukwe ütiäte krubäte ye nikwe ñaka käi kwitadrekä jabiti aune nikwe ja mikadre gobran kwin Jehovakwe yekri.
JOB JA TÖI KWITANI
9. ¿Satana dre niebare Job yebätä? (Üai bämikani kena mikadre ñärärä).
9 Ni rabadre töbike kwin Jehová gobran kri yebätä ye ütiäte krubäte mikata gare metre tärä Job yebätä. Arato Job ja tare nikadre krubäte ye ngwane ñaka rabadre ja mike jankunu Ngöbö yekri niebare Satanakwe mikata gare yete. Jehová rabadre kukwe tare mike nemen bare Job yebätä Satana ribebare ie. Ngöbökwe ñaka ye erere nuainbare, akwa Satana tuanimetre kwe Job nuinte. Niebare kwe ie: “Jondron jökrä kwe ye tä mä kisete” (ñäkädre Job 1:9-12 yebätä). * Nitre sribikä Job kräke bätä monsotre ni jätä kwe ye krütani kän aune jondron nämene kwe ye jökrä nianinte kän jötrö ngwarbe. Ngöbö ara nämene Job mike ja tare nike namani ruin ie Satana köböite (Job 1:13-19). Ye bitikäre Satana köböite bren tare aune käme krubäte namani Job yebätä (Job 2:7). Bätuakäre, muko kwe aune nitre nimä ja bämikaka ja ketamuko kwe yekwe di ganinkä (Job 2:9; 3:11; 16:2).
10. a) ¿Job nämene ja ngwen metre Ngöböi ye bämikani ño kwe? b) ¿Ñobätä Ngöbökwe mäträbare Job yebätä?
10 ¿Satana kukwe metre niebare? Ñakare, kukwe ngwarbe niebare kwe, ñan ñobätä aune Job ñaka kä mikaninkä Jehovabätä (Job 27:5). Akwa, kä nikani ruäre ta yete kukwe ütiäte krubäte ye Job käi kwitaninkä jabiti. Ja töi mikani kwatibe kwe niara töi kwin krubäte ye bämikakäre aune ñobätä niara nämene ja tare nike ye mikadre gare ie ribebare kwe arato (Job 7:20; 13:24). Job ja tare nikabare krubäte yebätä ja ngwani kore kwe raba nemen ruin nie, akwa Ngöbökwe mäträbarebätä. ¿Jehovakwe dre niebare ie?
11, 12. a) ¿Jehovakwe Job dimikani dre mike nüke gare jai? b) ¿Jehová mäträbare Job yebätä ye kani ngäbiti ño kwe?
11 Jehová kukwe niebare Job ie ye tä Job 38 nemen 41 yebätä, akwa ñobätä Job nämene ja tare nike ye Jehovakwe ñaka mikani gare ie. Job ñaka ngite kitadre Jehovabiti yekäre, Jehovakwe ñaka ja töi mikani kukwe ye mike gare ie. Ñakare aune Jehová bäri kri Job kräke ye tö namani dimikai mike nüke gare jai. Aune dimikani kwe kukwe mada mada bäri ütiäte ye mike nüke gare jai (Job 38:18-21). Ye köböire, Job ja töi ükaninte.
12 Job ja tare nikabare krubäte ye bitikäre Jehovakwe kukwe niebare metre ta ie, ¿yebätä ñäkäbare tare krubäte kwe ie ni raba niere? Ñakare. Aune ñaka namani tuin ye erere Job ie arato. Kukwe namani bare ye jökräbiti ta, kukwe ye jatani nüke gare ie. Niebare kwe arato: “Tikwe ñan kukwe ye niedre näre aune dobro munun bätä ngübrün yete ja ruin ngite tie”. Aisete Jehová kukwe niebare ye Job töi mikani jäme (Job 42:1-6). Ye känenkri, monso bati kädeka nämene Elihú mäträbare Job yebätä arato (Job 32:5-10). Job kukwe ye kani ngäbiti kwin namani tuin Jehová ie aune ja ngwani metre kwe yebätä Jehovakwe kani ngäbiti (Job 42:7, 8).
13. ¿Job ñaka namanina ja tare nike akwa yebiti ta, ¿kukwe niebare Jehovakwe ie ye niara dimikani ño jankunu?
13 Job ñaka namanina ja tare nike akwa yebiti ta kukwe niebare Jehovakwe ie ye namani niara dimike jankunu. Erametre Jehovakwe “jondron biani bäri ere Job ie nämene käne kwe yebiti ta”, akwa ye ñaka namani bare jötrö ngwarbe. Kä nikani raire ta ye bitikäre, “monso brare ni kükü namani mada kwe aune monso merire nimä namani mada kwe” (Job 42:12-14). Satana köböite Job monsoitre krütani yebätä namani uliere krubäte raba ruin nie. Aune kä nikani ta ye bitikäre dre dre namani barebätä ye nämene törö kwin ie raba ruin nie. Ñobätä nämene ja tare nike ye nükani gare ie arato, aune ñobätä nämene ja tare nike krubäte ye ruäre ngwane ngwanintari kwe jai raba ruin nie. Kukwe ye jökräbiti ta, Ngöbökwe dre niebare ie yebätä namani töbikadretari ie raba ruin nie. Yekwe niara dimikadre töbike kwin aune töi mikadre jäme (Sal. 94:19).
Nikwe ñaka ja töi mikadre kukweta ni kisete ye aibebätä, ñakare aune Jehová gobran kri rabadre gare ye nikwe ngwandre törö jai. (Párrafo 14 mikadre ñärärä).
14. ¿Kukwe namani bare Job yebätä ye tä dre mike gare nie?
14 Kukwe namani bare Job yebätä ye raba ni dimike töbike kwin aune raba ni tö mike jäme. Jehová kukwe ye tikamananbare “ni töi tikakrä amne kukwe tikani kira, ye abko btä nikwe nünandrekä dite käre amne tä kä mike nuäre nibtä, ye köböire ni rabadre tödeke kärekäre Ngöböbti” (Rom. 15:4). ¿Ye tä dre mike gare nie? Dre rabadre bare nibätä yebätä nikwe ja töi mikai krubäte ngwane, Jehová gobran kri rabadre gare ye ni raba käi kwitekä jabiti. Aune Job erere, kukwe bäri tare yebiti ta nita ja ngwen metre Ngöböi yebiti nita ja mike gobran Ngöbökwe yekri bämikata nikwe ye nikwe ngwandre törö jai.
15. ¿Nita ja tare nike ye ngwane nikwe ja ngwain metre Ngöböi ye köböire dre kwin raba nemen nikwe?
15 Nikwe ja ngwandre metre Ngöböi yebätä nikwe töbikadretari, ¿ye ñobätä tä ni dimike? Ñan ñobätä aune ye köböire ni ñaka tä ja tare nike ngwarbekäre ye tä nüke törö nie. Nita ja tuin kukwe medenbe ye ñaka tä mike gare Ngöböta rubun ni kräke; ñakare aune yebiti ni raba bämike ni tö Ngöbö tuai ja gobraine (Prov. 27:11). Nikwe kä ngwain nüke jai angwane, Jehovakwe ni kai ngäbiti aune nikwe tö ngwain bäri (ñäkädre Romanos 5:3-5 yebätä). * Kukwe nakaninkä Job yebätä ye kätä mike gare metre “Jehová ye ni tarere krubäte aune ni mike tuin bobre jai” (Sant. 5:11, TNM). Aisete, niarakwe nitre jökrä ja mikaka Gobran kwe yekri kräke kukwe kwin mikai nemen bare yei ni raba tö ngwen. Kukwe ye tädre gare nie ye köböire kukwe tare rabai ni kisete ye ngwane, kä jutobiti nikwe bätärekä kä ngwain nüke jai (Col. 1:11).
KUKWE ÜTIÄTE KRUBÄTE YE NIKWE ÑAKA KÄI KWITADREKÄ JABITI
16. Jehová gobran kri rabadre gare ye nikwe ngwandre törö jai, ¿ye ñobätä ütiäte?
16 Metrere nita ja tuin kukwe tare ben ye ngwane, Jehová gobran kri rabadre gare yebätä nikwe ja töi mikadre ye ñaka nuäre. Aune nikwe ja töi mikai krubäte kukwe kia kia yebätä angwane, nikwe kukwe ye mikai tuin jai kukwe kri ye erere. Yebätä, nikwe ja tuadre kukwe tare ben ye ngwane, ja mikadre Jehová gobran kri yekri ye ütiäte krubäte nikwe ngwandre törö käre jai.
17. Jehová kukwe drie mikani ni kisete ye nikwe nuaindre käre, ¿ye ñobätä tä ni dimike Jehová gobran kri rabadre gare ye ñaka käi kwitekä jabiti?
17 Jehová kukwe drie mikani ni kisete ye nikwe nuaindre käre ye raba ni dimike Jehová gobran kri rabadre gare ye ñaka käi kwitekä jabiti. Ñodre, meri Testiko kädeka nämene Renee ye jisai namani bren, käre ngrabare nämene nemen tare krubäte ie aune bren cáncer nämenebätä arato. Nämene niken hospital ye ngwane, nitre sribikä hospitalte, nitre mada bren aune nitre nämene nemen niara tuinbiti yei nämene kukwe driere. Bati, niara namani hospitalte bämän krobu biti ötare ye ngwane kukwe driebare 80 ora kwe. Niara namanina krütadre akwa Jehová aibe gobran kri ye ñaka käi kwitaninkä kwe jabiti. Aune yekwe töi mikani jäme.
18. ¿Kukwe namani bare Jennifer yebätä ye tä dre driere nie ja mikadre Jehová gobran kri yekri yebätä?
18 Erametre, köbö kwatire kwatire nita ja tuin kukwe kia kia yebe, akwa ye ngwane nikwe ja töi mikadre Jehová Gobran kri yebätä arato. Ru kuinta tä mata nemen tibien yekänti Jennifer nämene köbö mä jire ru kuinta ngübare nänkäreta gwi. Ru kuinta ye jökrä ketabätä namani. Niara nämene kaibe aune nainte yebätä ja jatadre ruin bobre ie näre. Akwa ja ñaka namani ruin ye erere ie. Jehovakwe niara jie ngwandre nitre mada nämene nainte arato ye dimikakäre kukwe ja üaire yebiti ribebare kwe ie. ¿Ye köböire dre namani bare? Nitre kwati krubäte ie kukwe driebare kwe aune tärä bätä täräkwata döräibare ere kwe. Jennifer tä niere: “Kukwe ye ñaka rababa nuäre ti kräke, akwa Jehovakwe kukwe kwin mikaba nemen bare ti kräke rababa ruin tie aune ti dimikaba kwe kukwe kwin niarabätä driere”. Erametre, Jehová tö dre nuain ye ñaka käi kwitaninkä kwe jabiti.
19. ¿Juta Jehovakwe ye töita ño Jehová gobran kri ye kräke?
19 Jehová gobran kri ye ütiäte krubäte ye käre tä gare juta Jehovakwe ie aune tä ja mike kiri. Yebätä ñaka ja erebe kukwe ngwarbe yebe. Ni itire itire rabadre ye erere nuaindre arato, ñan ñobätä aune nita ja mike kukwe metre yekri.
20. ¿Nita ja mike Jehová gobran kri yekri ye Jehová tä mike tuin ño jai?
20 Nita kä ngwen nüke jai aune nita ja ngwen metre Ngöböi yebiti nita ja mike Jehová gobran kri yekri ye ütiäte krubäte kräke yei nikwe tö ngwandre (Sal. 18:25). Ñobätä nikwe ja mikadre Jehová gobran kri yekri aune ni raba nuainne ño ye nikwe mikai gare bäri kwin jai kukwe ja tötikara ja känenkäre yekänti.
^ párr. 4 Salmo 83:18: “Ne kwe rabadre gare nitre jökrä ie mä kä Jehová, mä aibe Kri kä tibien ye jökräbiti ta”.
^ párr. 7 Isaías 55:10, 11: “Ñan ñobätä aune ñü aune nieve tä näkäin tibien biti ñaka nikenta kunkwäre, ñakare aune tä dobro mike ñöre jökrä, tä nura mike nirien aune tä ngwä mike nemen, tä nura mike nemen ni nura nökaka yekwe aune ye köböire mröta nemen kwetadre nitre ie, ye erere arato kukweta betekä ti kadate ye rabai bare. Ti ñaka tä kukwe ye niere ngwarbe, ñakare aune ti töita ño ye erere rabai bare metre aune ti tö dre nuain ye tä nemen bare kwin”.
^ párr. 9 Job 1:9-12: “Yebätä, Satanakwe niebare Jehová ie: “¿Ngwarbekäre Job tä Ngöbö mike täte? Niara aune ju kwe bätä jondron jökrä kwe, ¿ye ñan kriemikata mäkwe? Sribi nuainta kwe ye mätä mike nemen bare kwin kräke aune jondron nire niena krubäte kwe. Akwa, jondron kwe ye jökrä denkä kän aune erametre niarakwe ñäkäi mä rüere mä ngwärekri”. Ye medenbätä, Jehovakwe niebare Satana ie: “¡Mike ñärärä! Jondron jökrä kwe ye tä mä kisete. ¡Akwa niara ye aibebätä mäkwe ñaka kisemika!”. Ye bitikäre Satana nikani mento Jehová yebätä”.
^ párr. 15 Romanos 5:3-5, (TNM): “Akwa ye ñan aibe, ñakare aune nita ja tare nike ye ngwane nikwe kä ngwandre juto jabätä, ñan ñobätä aune gare nie nita ja tare nike ye tä ni mike kä ngwen nüke jai; nita kä ngwen nüke jai, ye köböire ni ka ngäbitita; ni ka ngäbitita ye köböire nita tö ngwen aune ni ñan tä tö ngwen ngwarbe; ñan ñobätä aune üai deme biani nie ye köböire ja tare Ngöbökwe namani ni brukwäte”.
