DON ye ni testiko Jehovakwe käi Canadá abokän tä ja di ngwen krubäte blitakäre nitre tä nüne ji ngrabare yebe. Dre namani barebätä ni iti ben ye tä mike gare: “Peter ye dobrore krubäte nämä nüne ji ngrabare abokän tikwe tuaba kena. Nämä ñäke tare nitre madai aune nämä kukwe nuainne ne kwe nitre mada ñaka rabadre nemen ken. Nitre nämä ja töi mike kwin kräke ye käre ñaka nämä kain ngäbiti”. Akwa yebiti ta, kä nikani 14 biti bäri ta yete, Don ja di ngwani ja töi mike kwin kräke.

Bati Peter ngwanintari Don ie: “¿Ñobätä mä töita krubäte tibätä? Ti ñaka ütiäte ni mada kräke, akwa ¿ñobätä ti tuin ütiäte mäi?”. Don töbikabare kwin ñäkäkäre texto ketamäbätä ie ne kwe matadre brukwäte. Kena, Ngöbö kä tärä ye gare ie o ñakare ye ngwanintari kwe Peter ie aune Salmos 83:18 yebätä ñäkä mananbare kwe ie. Biti, ñobätä niara töi nämene krubäte Peterbätä ye mikakäre gare ie, ñäkä mananbare kwe ie Romanos 10:13, 14, (TNM) yebätä, känti nieta: “Ni jökrä käkwe Jehová kädekaite ja di käräkäre ie ye rabaite nire”. Mrä mada, Don ñäkäbare Mateo 9:36, (NGT) yebätä ie, känti nieta: “Ni kwati krubätebätä Jesús okwä mata namani, angwane nitre ye namani tuin bobre Jesús ie, ñobätä ñakare angwane nitre ye nämäne tuanimetre kaibe, angwane nämänentre ngitie iti iti kä ngrabare tibien ño oveja ngübabitikä ñakare kwrere”. Biti Peter rabadre ñäkebätä ribebare kwe ie. Peter ñäkäbarebäta angwane, muare kwärä ngwanintari kwe: ¿Oveja nieta nete ye ngätäite tita siba?

Peter jatani ja ükete kwin. Jübabare kwe, ja klo ükaninte kwe aune Donkwe dän biani ie ye kitani kwe jabätä. Yete ja känenkäre, jatani ja ükete kwin.

Peter nämene kukwe tike jabätä. Kena nämene kukwe ñaka kwin tike jabätä, akwa mrä nämene kukwe kwin mike gare. Kukwe tikani keteiti kwe yete niebare kwe: “Matare Ngöbö kä ye nibi gare tie. Kä nengwane, tita orare ngwane, ti raba blite Jehovabe. Niara kä rabadre gare nie ye kwin krubäte.  Jehová raba nemen ja ketamuko tikwe nieta Donkwe. Ñongwane o drebätä tikwe blitadre ben akwa käre raba ti kukwe nuin”.

Kukwe tikani mrä kwe yekänti nämene blite mräkätre ben. Tikabare kwe:

“Matare ja ñaka nibi ruin kwin tie. Ti niena umbre krubäte raba ruin tie. Akwa, ti krütai matare ngwane, tikwe [Don] ja ketamuko tikwe ye tuaita Kä Bä Nuäre yete ye gare tie. Munta ñäke tärä nebätä ngwane, ti krütanina. Akwa ti doboi mikai yekänti ni iti ñaka ni mada erere ye munkwe tuadre angwane, munkwe blita ben aune munkwe ñäkä tärä chi azul nebätä [ye tärä ni jie ngwankäre ja tötike Bibliabätä kädekata La verdad que lleva a vida eterna biani ie yebätä nämene blite]. * Tikwe ja ketamuko tikwe ye tuaita Kä Bä Nuäre yete nietabätä. Ja brukwä tätebiti tita mike era jai. Mun eteba Peter, kwe mun tare”.

Peter doboi mikani ye bitikäre, Ummi niara ngwai niebare: “Kä nikanina kubu ta yete Peter blitaba tibe. Krire kena kä nämä jutobätä rababa tuin tie. Aune kä nämä kötare ngwärebätä”. Ummi niebare Don ie: “Tikwe ñäkäi tärä yebätä ñan ñobätä aune kukwe meden matani ti ngwai brukwäte ye kukwe ütiäte raba ruin tie”. Tärä ¿Dre drieta erametre Bibliakwe? yebätä meri testiko Jehovakwe rikadre Ummi tötike ie tö namani arato.

Ye erere arato, nikwe ñaka nitre bä ye aibe mikadre ñärärä, ñakare aune ni raba nitre jökrä tarere bökän aune ngübarebätä bätärekä (1 Tim. 2:3, 4, Traducción de Nuevo Mundo de las Santas Escrituras, [TNM]). Nikwe nuaindi ngwane, nitre ñaka tuin kwin nie akwa töi kwin Peter erere ye brukwäte ni raba kukwe metre ye mike nemen. Ngöbö tä “ni brukwä [...] mike ñärärä” yekwe kukwe metre mikai nirien nitre tö rökrai niara ken brukwäte yei nita tö ngwen (1 Sam. 16:7; Juan 6:44, TNM).