¿Täräkwata Ni Mikaka Mokre sribeta mrä mrä jatäri yebätä mäkwe ñäkäbarera? Ye erere ngwane mä raba kukwe ngwantarita ne mike gare metre:

Juta ükaninte Ngöbökwe tä kukwe bien nuaindre ye ngwane, ¿nitre circuito tuabitikä aune nitre umbre ji ngwanka bätä ni mada ye rabadre dre nuainne?

Rabadre mike täte bengwairebe. Raba ngwentari jai: “¿Tita nitre mada dimike ja ngwen metre Jehovai? ¿Kukwe ükateta ye tita mike täte bengwairebe?” (w16.11, página 11, 12).

¿Ñongwane nitre kristiano metre ye namani ngite Babilonia kisete?

Nitre apóstol krütani ye bitikäre. Ye ngwane nitre ji ngwanka kukwebätä ye jatani kukwe ngwarbe driere. Iglesia aune gobran romano yekwe nitre kristiano töi mikani kukwe metre tuenmetre aune ja mike rüere bätä ñaka tö namanintre nitre kristiano trigo kwrere ye tuai kukwe metre driere. Akwa, kä 1914 ye känenkri nitre kristiano braibe dianinkä nänkäre kä kwinbiti ye jatani nemen kwäre Babilonia Kri kisete (w16.11, página 23 nemen 26).

“Ja töi mikadre jondron ja ngätäre yebätä” aune “ja töi mikadre kukwe ja üaire yebätä”, ¿ye ñobätä ñaka ja erebe? (Rom. 8:6, Traducción del Nuevo Mundo de las Santas Escrituras)

Nire tä ja töi mike jondron ja ngätärebätä ye töita kukwe blo blo aibebätä aune dre dre ie tö yebätä käre tä blite. Akwa nire tä ja töi mike kukwe ja üairebätä ye töita kukwe Ngöbökwe yebätä aune tä ja di ngwen töbikakäre niara erere. Tä ja töi tuenmetre jie ngwandre üai deme yei. Ja töi mikadre jondron ja ngätärebätä ye köböite ni raba krüte, akwa ja töi mikadre kukwe ja üaire yebätä ye köböire ja nire raba nemen nikwe aune ni raba nüne jäme (w16.12, página 12, 13).

¿Ni raba dre dre nuainne ne kwe ni ñaka rabadre töbike krubäte?

Dre bäri ütiäte ye nuaindre käne, dre abokän nuain ñaka raba ye mikadre nüke gare jai, käre kä diandrekä jai kukwe mada nuainkäre, jondron sribebare ye käi ngwandre juto jabätä, ja töi mikadre jäme, ejercicio nuaindre aune kübiadre kwin (w16.12, página 18, 19).

¿Ni ñaka raba kukwe jökrä ükete kaibe tädre gare nie ye ñobätä täbe ütiäte?

Ni töi bobre angwane, nikwe ñaka töbikai krubäte jabätä aune ni ñaka raba kukwe jökrä ükete kaibe ye rabai gare nie. Dre nuainta nikwe ye raba nitre mada mike ulire aune ni ñaka rabadre töbike krubäte ja aibebätä ye nikwe ngwandre törö jai (w17.01, página 19).

Siklo kena yete Ngöbökwe nitre braibe konkrekasion jökrä ngübabitikä dimikani, ¿ye erere tä Nitre Braibe Konkrekasion Jökrä Ngübabitikä kä nengwane dimike ye dre tä mike gare?

Üai deme käkwe niaratre dimikani kukwe metre Bibliabätä drieta ye mike nüke gare bäri kwin jai, angeletre niaratre dimikani kukwe drieta ye jie ngwen aune tö ngwani kwetre Ngöbö Kukwei ja jie ngwankäre yei. Ye erere tä nemen bare kä nengwane (w17.02, página 24, 25).

¿Ni kristiano kukwe dianina nuaindre jai yebätä raba ja töi kwiteta?

Kukwe medenbätä nita ja kukwei kitekä ye erere nikwe nuaindre, akwa ruäre ngwane ni rabadre ja töi kwitetabätä o ñakare yebätä ni rabadre töbiketa. Nitre Nínive ja töi kwitani kukwe blo yebätä angwane, Ngöbökwe ja töi mikanina juta ye gainte yebätä ja töi kwitaninta kwe. Ni ñaka rabadrera nüne käne erere o kukwe mrä mikadre gare nie ye ngwane, kukwe dianina nuaindre nikwe jai yebätä ni raba ja töi kwiteta (w17.03, página 13).

¿Nikwe ni mada kädriedre blo ye ñobätä ñaka kwin?

Ye köböite kukwe raba nemen bäri kri jabätä nie ni madabe. Kukwe ñaka kwin nuainta nibätä o ñakare, akwa ñäkädre tare ni madabätä ye köböite kukwe ñaka tä nemen ükaninte jire (w17.04, página 19).