TÄRÄ ruäre ye kädeka nämä set arcoíris. Jondron üai bä nuäre krubäte nämä tärä jene jene yebätä yekwe ti dimika kukwe bämike jai töite. Aisete, ti nämä chi ye ngwane, ti törbaba kukwe metre Bibliabätä mikai gare jai nämä tikani tärä yebätä ye erere.

Rü Kri Bobukäre ye jatabara nemen bare kä India yekänti angwane kukwe ñaka kwin jataba nemen bare tibätä arato. Ti rün aune ti meye ja tuametreba. Niaratre nämä tare krubäte tikwe, akwa ñobätä niaratre ñan törbaba nünain jabe ye ñan nämä nüke gare tie. Ja rababa ruin kaibe aune ulire tie. Ti aibe nämä yebätä ti töi ñaka nämä nementa jäme aune ti dimikaka ñaka nämä.

Ti nämä nüne ti meye ben kä Karachi juta bäri kri yekänti. Bati Fred Hardaker ni testiko Jehovakwe umbre yekwe jukwe metaba nunye. Niara abokän doctor. Niara aune ni misionero tärä biani ti mräkätre ie ye nämä kukwe arabe mike täte. Ti meye ie ja tötika Bibliabätä drieba kwe. Ti meye ñakare nieba ie akwa tibrä raba ja tötike ben ti meye nieba ie. Aisete bämän rikaba ta yete, ja mräkä Hardaker jataba ti tötike Bibliabätä.

 Ye bitikäre, ti jataba niken gätä nuain nämä clínica ja mräkä Hardaker yekwe känti. Yete nitre Testiko umbre 12 nämä ja ükökrö. Niaratre ti töi mikabata jäme aune monso kwetre ye kwrere ti ngübaba kwetre. Niaratre nämä nemen täkäni ti ken aune ti mike ñärärä ngwärebätä blitakäre tibe ni ja ketamuko metre ye kwrere ye törö tie. Ye ara ti nämä ribere jai.

Kä rikaba braibe ta angwane ja mräkä Hardaker ti ngwanba kukwe driere jabe. Gramófono portátil yebiti kukwe Bibliabätä grababare ye tikwe mikadre kukwe nuadre ño ye drieba kwe tie. Ruäre ngwane kukwe mika nämä gare metre ta ye ñaka nämä mate kwin nitre ruärebätä. Akwa ti tö nämä kukwe driei krubäte. Kukwe metre ye nämä kä mike juto tibätä aune ti tö nämä blitai krubäte nitre madabe.

Nitre rükä Japón nämä ja mike juto rükäre nitre India yebe angwane nitre sribikä gobran Gran Bretaña yebe ye jataba nitre testiko Jehovakwe töi mike bäri niken rübätä. Ye köböite sö julio kä 1943 yete kukwe rababa bare tibätä arato. Ni sacerdote anglicano nämä kwela jie ngwen ye käkwe ti diankaba kwelate “ti ñan nämä kukwe kwin bämike” yebätä nieba kwe. Ti nämä ja kete nitre testiko Jehovakwe ben yebätä ti nämä ja ngwen käme monsotre mada okwäbiti nieba kwe ti meye ie. Ye käkwe ti meye mikaba rubun aune tikwe ñaka ja ketadre jankunu nitre Testiko ben nieba kwe tie. Ye bitikäre ti juanba kwe ti rün känti kä Peshawar yete, juta ye nemenkä 1,370 kilómetro ngwitärikri. Kä yekänti gätä aune mrö ja üaire ñan nämä tikwe yebätä ti ñan jataba ja kete Jehovabe.

Kä 1947 yete, ti rikabata Karachi sribi känänkäre. Ti nämä yete angwane, ti janama doctor Hardaker känti clínica kwe yete, niara ti ka ngäbitiba kwin krubäte.

“¿Mätä bren ño?”, ngwantariba kwe tie, ti nämä bren yebätä ti nämä yete nütüba kwe.

“Doctor tita kwin”, tikwe nieba ie. “Akwa tita bren kukwe ja üairebiti. Ti tötikadre Bibliabätä ye tita ribere jai”.

“¿Ñongwane mä törba kömikai?”, ngwantariba kwe tie.

“Raba ngwane gwäune”, tikwe nieba ie.

Nunkwe ja tötikaba kwin krubäte Bibliabätä köbö yete. Ja rababata ruin keteitibe ti mräkätre kukwebätä yebe tie. Ti meye kukwe ño kwa nuainba ne kwe tikwe ñaka ja ketadre nitre Testiko ben, akwa ti ja töi mikaba kwatibe Jehová mike täte. Köbö 31 agosto kä 1947 yete ti ja ngökaba ñöte aune ye bitikäre kä rababa 17 tibiti ye ngwane, tikwe sribi prekursor regular kömikaba.

Ti juanba kena sribi prekursor nuainne kä Quetta yekänti kä Afganistán ye ken, kä yete nitre rükä Gran Bretaña nünantububare. Kä 1947 yete kä India ye ñäkäninbiti India aune Pakistán. * Nitre kukwe jene jene mikaka täte namani ja rüere, ye köböite nitre kwati käkwe kämikaninkä kä yekänti. Nitre 14 millón nikani kä mada känti. Nitre musulmán nünanka kä India yete ye ngitiani kä Pakistán yekänti aune nitre hindú bätä nitre sije kä Pakistán yekänti nikani kä India yete. Kukwe ye nämä nemen bare ngwane, tren te nitre nämä kwati krubäte kä Karachi yekänti, yete ti rikaba aune tikwe ja ketateba hierro nämä trenbätä yebätä nänkäre kä Quetta yekänti.

Kä Quetta yekänti, George Singh ni prekursor especial abokänbiti kä nämä 20 biti bäri ye rababa gare tie. George bicicleta ngututure bianba tie ne kwe ti rikadrebiti ngutuäbiti ta kukwe driere aune ruäre ngwane ti nämä gitekä ja känenkäre. Bäsi kä jökrä ngwane ti nämä kukwe driere kaibe. Sö krä ti te nitre 17 rababa ja tötike tibe Bibliabätä aune niaratre ruäre ja mikani Testiko. Iti abokän ni rükä kädeka nämä Sadiq Masih. Niarakwe ti aune George dimikaba tärä aune täräkwata tä blite Bibliabätä ye ruäre kwite nitre urdu kukweibiti, kukwe yebiti blitata Pakistán. Ja känenkäre Sadiq rababa ni kukwe driekä.

Kä rikaba ta ye bitikäre, ti rikabata kä Karachi yekänti aune Henry Finch bätä Harry Forrest niaratre janamane Kwela Galaad yete nükani sribi misionero nuainne yebe tikwe sribiba. ¡Niaratre ti tötikaba yebätä tita debe bien krubäte! Bati ti rikaba ja mräkä Finch ben kukwe driere kä ngwitärikri Pakistán yete. Ngutuä krikri ye bäre nitre kwati töi bobre blite kukwe urdu yebiti tö nämä kukwe metre mikai gare jai kwanba nunye. Kä rikaba kubu ta ye bitikäre, ti janama Kwela Galaad yete arato aune ti juanbata Pakistán ni circuito tuabitikä kwrere akwa köbö ruäre aibe te.  Kä Lahore yete ti nämä nüne ja mräkätre misionero nimä ben.

Kukwe ñaka kwin rababa bare kä 1954 yete, nitre misionero nämä nüne Lahore ye ñaka rababa nüne jäme jabe yebätä sukursal käkwe niaratre ruäre kwitaba kä madakänti. Ti ñan ja ngwanba töbätä, ñakare aune tikwe ja mikaba kukwe yete siba, yebätä ñäkäba ja dibiti tie. Ti rababa ulire krubäte, ti ja mikaba ngite kukwe ja üairebiti rababa ruin tie. Ti rikabata Karachi aune ja känenkäre ti rikaba Londres (Inglaterra) yete kukwe drie kömikakäreta kena ye kwrere.

Konkrekasion te ti rababa yete ja mräkätre Betel kä Londres yete ye nämä kwati. Pryce Hughes ni sukursal jie ngwanka töi jäme käkwe ti dimikaba. Bati, Joseph Rutherford mäträbare ja dibiti niarabätä nieba kwe tie. Kä ye ngwane Joseph Rutherford nämäne kukwe drie jie ngwen kä jökräbiti tibien. Ja mräkä Hughes namani kukwe mike jabiti, akwa ja mräkä Rutherford ñäkäbare ja dibiti ie. Kukwe ye rükabata törö ja mräkä Hughes ie angwane, kä mikaba kötare ja ngwärebätä kwe ye ti töi mikaba niä. Kenanbe niara namani rubun nieba kwe tie, akwa ye bitikäre niara nämäne ye ribere jai aune yebiti Jehovata ni tarere bämikata kwe nükani gare ie (Heb. 12:6). Kukwe nieba kwe tie ye mataba ti brukwäte aune yekwe ti dimikaba sribireta kä jutobiti Jehová kräke.

Kä ye ngwane, ti meye rikaba nüne kä Londres yete aune John Barr ja tötika Bibliabätä drieba ie ye ka ngäbitiba kwe. Ja känenkäre John Barr kädekani Nitre Braibe Konkrekasion Jökrä Ngübabitikä. Ti meye jataba nirien jötrö kukwe ja üairebiti aune ja ngökaba ñöte kwe kä 1957 yete. Biti rababa gare tie, ti rün jämi krüte ye känenkri ja tötikani kwe Bibliabätä arato nitre testiko ben.

Kä 1958 yete tikwe ja mäkäteba Lene ben, niara käi Dinamarca nikani nüne kä Londres yete. Ka 1959 yete, Jane nun ngängän mubai ye däreba. Ye bitikäre monso rababa nibokä mada nunkwe. Arato konkrekasion Fulham yete sribi ruäre mikaba ti kisete. Akwa Lene nämä bren krubäte yebätä nun rikaba nüne kä bäri ngire yekänti. Aisete kä 1967 yete nun rikaba nüne Adelaida (Australia) yete.

Konkrekasion Adelaida yete nitre 12 umbre nämä dianinkä nänkäre kä kwinbiti aune niaratre nämä kukwe driere kä jutobiti, yebiti nämä kukwe kwin bämike konkrekasionte. Bengwairebe nunkwe ora ükateba kwin jai sribi ja üaire nuainkäre.

Kä 1979 yete, Daniel monso mrä nunkwe ye däreba. Bren síndrome de Down * nämäbätä aune ye  köböite niara nämä ja tare nike krubäte, yebätä nünain kwe kä braibe te nitre doctor nämä niere. Blitakäre kukwe yebätä ye ñan tä nemen nuäre ti kräke. Nunkwe kukwe jökrä nuainba niara dimikakäre, akwa nunkwe ñaka monsotre mada ye käi kwitakaba jabiti. Daniel brukwä nämä bren; ruäre ngwane ñan nämä burie jäke kwin yebätä nämä nemen jübente drüne ngrabare aune nun nämä niken ngwena jötrö hospitalte. Niara nämä bren krubäte, akwa kukwe nämä nüke gare ie, nämä ni mada tarere aune töi nämä kukwe ja üairebätä arato. Nun jämi mröre ye känenkri nun nämä orare angwane, niara nämä ja kise ketete, nämä ja dokwä mike kwintubu aune nämä “amén” niere ja brukwä ngöibiti. Ye ngwane batibe nämä mröre.

Kä nämä kobokä Daniel yebiti angwane, bren leucemia rabababätä. Ti aune Lene nun nämä nainte krubäte. Kä rabai ngwarbe ti dokwäbiti kukwe yebätä rababa ruin tie. Kukwe bäri tare ben nun nämä ja tuin ye ngwane, Neville Bromwich ni circuito nunkwe tuabitikä rükaba nun känti. Köbö yete deu, muare kwärä kise kitaba kwe nun ngärä aune nunkwe muaba gwairebe. Kukwe kwin nieba kwe nunye ye nun töi mikabata jäme. Ora 1.00 dekä näre rikabata. Ye bätäräbe bäsi Daniel krütaba. Niara krütaba nunkän ye kukwe bäri tare ben nunkwe ja tuaba. Akwa yebiti ta, nunta kä ngwen nüke jai aune gare metre nunye gata aune kukwe mada ñaka tärä jire abokänbätä Jehová Daniel käi kwitaikä jabiti (Rom. 8:38, 39). Niara gaikröta kä bä nuäre yete angwane, nun rabaita keteitibe ben ye nun tö nibira tuai nemen bare (Juan 5:28, 29, TNM).

Bren derrame cerebral namani bobu tibätä, akwa yebiti ta ti täbe sribire ni umbrere konkrekasionte. Tikwe ja tuanina kukwe tare ben ye tä ti dimike nitre mada tä ja tare nike yebätä ja töi mike aune mike tuin bobre jai. Ti ñan ja töi mike blite blo bätätre. Ñakare aune tita töbike krörö: “¿Kukwe ben niaratre ja tuanina yebätä töita ño aune ja ruin ño ietre? ¿Ti tö niaratre dimikai ye ti raba bämike ño ietre? ¿Ti raba niaratre dimike ño Jehová mike täte?”. Tita ja mräkätre aune ja ngwaitre tuinbiti ye käita nemen juto tibätä. Tita niaratre dimike aune töi mike jäme ye ngwane ti töita nementa jäme aune ja di tä kwenta tie arato.

Ja namani ruin ño salmista ie ye erere ja nemen ruin tie. Niebare kwe: “Töbika nämä nemen ti nike krubäte ye ngwane, mäkwe ti dimikaba aune mäkwe ti töi mikabata jäme” (Sal. 94:19). Ti mräkäbätä kukwe tare rababa bare, nitre ja mikaba ti rüere Ngöbö mikabätä täte, ti ñaka kukwe kwin nuainba aune ti rababa ulire ngwane Jehová ti dimikani kukwe ye jökräbätä. Metrere Jehová ye ti Rün kwrere.