1. ¿Kukwe medenbätä metrere kätä juto nibätä?

JUTA Jehovakwe tä nirien bäri ye tä kämike juto krubäte nibätä. Erametre, ye tä mike gare nitre Ngöbö mikaka täte tätre ñotra tä trä ngitiekä ye kwrere. Kä nikani ta yete, nikwe nitre 10 millón biti bäri tötikani Bibliabätä. Ne madakäre, nitre kwati krubäte tö kukwe mikai gare jai ye nükani Jesús Ja Nire Biani Ngwaninta Törö Jai yebätä aune Ngöbökwe ni tarebare yebätä Monso kwe biani kwe ni kökatarikäre ye nükani gare ietre (1 Juan 4:9).

2, 3. a) ¿Kukwe meden ñaka ni ketebätä kukwe kwin nuainkäre? b) ¿Kukwe ja tötikara nekänti nibike dre mike gare jai?

² Juta Jehovakwe yete, nitre kwati tä blite kukwe jene jenebiti. Akwa ye ñan aibätä ni ñan raba ni Rün kä kwinbiti käikitekä gwairebe (Apoc. 7:9). Nita blite kukwe medenbiti o nita nüne medente, akwa yebiti ta ni raba “kä trä Ngöbökwe mike tuare nitre kämekäme amne diän diän ngätäite kä nebtä” (Filip. 2:15).

³ Nita nirien kwati krubäte, nita keteitibe aune nita kukwe ngübare bätärekä yebiti nita Jehová käikitekä, ye tä nitre töi mike kukwe metre  ye kain ngäbiti. Kukwe ja tötikara nekänti, nikwe kukwe kwin nuaindre ño kukwe ketamä nekänti ye ni bike mike gare jai (ñäkädre Mateo 5:14-16 yebätä).

4, 5. a) ¿Nita kukwe driere yebiti ni raba nemen ño ñotra tä trä ngitiekä ye kwrere? b) ¿Nita ja töi mike kwin ni mada kräke ye köböire dre kwin tä nemen bare? (Üai bämikani kena mikadre ñärärä).

⁴ Täräkwata La Atalaya 1 junio 1925 sribebare inglere “Luz en la oscuridad” yebätä niebare: “Nire ñaka ja di ngwen kukwe kwin nuainne rabakäre ñotra tä trä ngitiekä ye kwrere ngwane, [...] ñaka raba ja ngwen metre ni Däkien ie kä nengwane”. Täräkwata yebätä niebare arato: “Ni ye rabadre kukwe kwin ye driere nitre ie Käbiti tibien aune rabadre ja ngwen kukwe drieta kwe ye ererebätä”. Erametre, Gobran Ngöbökwe kukwei driedre aune nitre mada mikadre ja tötikaka ye köböire ni raba nemen ñotra tä trä ngitiekä ye kwrere (Mat. 28:19, 20). Nita ja ngwen ni kristiano erere yebiti nita Jehová käikitekä arato. Nita kukwe driere ye ngwane nita ja ngwen ño ye nitre tä mike ñärärä. Nita kä mike kötare ja ngwärebätä aune nita köbö kwin niere töi jämebiti, ye köböire blita raba kwin nibätä aune Ngöbö mikata täte nikwe yebätä arato.

⁵ Jesukwe niebare nitre ja tötikaka kwe ie: “Mun rika nebe gwi angwane, ni nünanka gwi ye ie munkwe köbö ngwiantari jäme” (Mat. 10:12). Niaratre nämäne kukwe driere yekänti nitre jökrä bäsi nämäne nitre mada ñaka gare ietre ye nübaire jakänti. Nita nüne yekänti kukwe ne erere nuain ñaka jire raba ruin nie. Nitre kwatibätä kä jürätä nemen o tä nemen rubun ni ñaka gare ietre tä nemen niaratre kärere jukwebätä ye ngwane. Akwa, nikwe ja töi mikai kwin aune nikwe ja ngwain töbätä ngwane, niaratre töi raba nemen jäme. Nita kä mike kötare ja ngwärebätä yebiti nita kukwe driere bäri kwin. Nita kukwe driere nitre kwati ngwärekri ye ngwane kukwe ye erere tä nemen bare. Nire nire tä käre kukwe driere kä ye erere känti ie niena gare, nita kä mike kötare ja ngwärebätä köbö kwin niekäre nitre ie ngwane, nitre tä ni kukwe nuin kwin. Nitre ye ruäre tätre niken tärä aune täräkwata ngwena jai aune tätre blite jäme nibe.

6. ¿Nitre umbre gure dre nuainbare ne kwe niaratre rabadre ñotra tä trä ngitiekä ye kwrere?

⁶ Ja mräkä iti aune muko kwe nünanka Inglaterra niaratre niena umbre aune tätre bren yebätä ñaka nemen nuäre kräketre kukwe driekäre ju ju te. Akwa, niaratre tö ja tuai ñotra tä trä ngitiekä ye kwrere yebätä ja töi mikani kwetre kukwe driere ju kwetre ye ken. Ye nuainkäre, ora nuäi te nitre rüne aune meyere tä kiteta monsotre tuinta kwelate ye ngwane, niaratre tä tärä aune täräkwata mike mesabiti. Dre nuainta kwetre ye nitre töta nemen mikai gare jai ye ngwane, nitre ye tä niken tärä Los jóvenes preguntan volúmen 1 aune 2 bätä täräkwata mada ye ngwena jai. Ja ngwai iti tä sribi prekursor nuainne ja töi mikani kukwe driere kä yekänti nitre gure yebe. Ja ngwai ye ja töi mikani kwin krubäte aune nitre gure ye ja di ngwane krubäte ye köböire ni rüne iti ja tötika Bibliabätä ye kani ngäbiti.

7. ¿Nitre tä ngitie juta madate ye ni raba dimike ño?

⁷ Kä nikani bitinkä ta yete, juta keta kabre yekänti nitre menteni kwati krubäte tä ngitie ye nita tuin. ¿Ni raba nitre ye dimike ño Jehová mike gare jai? Kena, ni raba köbö kwin niere ietre niaratre kukweibiti. Ye nuainkäre, ni raba ja kite aplicación JW Language yebätä. Kukwe meden raba nemen tuin kwin ietre yebätä nikwe ja kitadre blitakäre bentre arato. Ye bitikäre, ni raba Internet käi jw.org, aune video bätä tärä aune täräkwata mike tuare ietre niaratre kukwei yebiti (Deut. 10:19).

8, 9. a) ¿Gätä nuainta bämän kratire kratire ye tä ni dimike ño? b) ¿Nitre rüne aune meye raba monsotre kwetre dimike ño blite gätäte?

⁸ Gätä Nita Dirire aune Ja Ngwen Ño ye Jehová köböire namani nikwe, gätä ye tä ni dimike kukwe driedre bäri kwin. Gätä yete kukwe ütiäte mikata  gare nie, ye köböire ja rabai ruin jäme nie nitre tuabitikäre aune tötike Bibliabätä.

⁹ Ju Ja Ükarakrö yete nitre kwati tä nüke ye ngwane, monsotre kia tä blite gätäte yebätä niaratre töita nemen ñan krütare. Aisete, nitre rüne aune meyere tätre ja di ngwen dirikäre monsotre ie ne kwe rabadre blite gätäte rabakäre ñotra tä trä ngitiekä ye kwrere. Monsotre kia tä blite gätäte ja brukwä tätebiti ngwane, nitre tö kukwe mikai gare jai yei tä nüke gare kukwe metre tä kwen ietre (1 Cor. 14:25).

10. ¿Ngöbö mikadre täte ni mräkäbe ye köböire nita nemen ño keteitibe?

¹⁰ Ni rabadre ñotra tä trä ngitiekä ye kwrere yekäre, ni rabadre ja di ngwen nüne keteitibe ni mräkätre aune ja mräkätre konkrekasionte yebe arato. Ñodre, ütiäte krubäte nitre rüne aune meyere käkwe käre Ngöbö mikadre täte mräkätre kwetre yebe. Nitre rüne kwati tätre JW Broadcasting sö kratire kratire yebiti nuainne. Tätre mrusaire yebiti kukwe meden ütiäte abokän niaratre raba nuainne ye tätre kädriere jabe. Ngöbö mikadre täte ni mräkäbe ye ni rüne tädre jie ngwen ye ngwane, monsotre kia aune monsotre niena krikri ye tätre dre ribere jai ye ngwandre törö kwe jai. Aisete, rabadre kukwe känene kwin mräkätre jökrä ye dimikakäre (Sal. 148:12, 13).

11-13. ¿Ni jökrä raba nemen ño keteitibe konkrekasionte aune ni raba nitre dimike ño ne kwe rabadre ñotra tä trä ngitiekä ye kwrere?

¹¹ Ni jökrä, monsotre arato, ni raba konkrekasion dimike nemen keteitibe aune ye erere ni raba nitre mada dimike ne kwe rabadre ñotra tä trä ngitiekä ye kwrere. Ñodre, monsotre bati raba ja töi mike ja mräkätre niena umbre ye dimikabätä. Monsotre bati raba ribere niaratre ie dre dre kwin namanina bare bätätre sribibätä köbö täte Ngöbö kräke ye niedre kwetre ietre. Monsotre bati aune ja mräkätre niena umbre ye törbai kukwe metre ye tuai ñotra tä trä ngitiekä ye kwrere. Aisete, ni jökrä raba nitre tä nüke Ju Ja Ükarakrö yete ye kain ngäbiti kwin. Ni raba kä mike kötare ja ngwärebätä, ni raba niaratre dimike täkärä ye känene, aune ni raba ja mräkätre mada ie niaratre mike gare yebiti nikwe niaratre kai ngäbiti kwin. Ye köböire, niaratre ie ja rabai ruin kwin.

¹² Nire nire tä gätä kukwe driekäre ye jie ngwen rabadre ja mräkätre niena umbre ye dimike, ne kwe rabadre sribire jankunu ñotra tä trä ngitiekä ye kwrere. Rabadre mike gare kwin jai nitre niena umbre ye kräke, kä tädre kwin ietre kukwe driekäre. Ruäre ngwane, monsotre bati ie ribedre rikadre kukwe driere nitre niena umbre  yebe aune dimikakäre arato. Nire ñan raba kukwe driere tä bren yebätä o kukwe mada tä kisete yebätä ye töi mikadre nüke gare kwetre jai arato. Ni mada ie ja ruin ño ye töi mikadre nüke gare jai ngwane, monsotre bati o nitre niena umbre, nitre tä krire kukwe driere o nitre niena kukwe driere mekerabe ye jökrä nikwe dimikai kukwe driere kä jutobiti (Lev. 19:32).

¹³ Ni iti salmo tikaka käkwe niebare: “¡Ja mräkätre käkwe nünandre keteitibe jabe ye kwin krubäte aune tä kä mike nuäre nibätä!” (ñäkädre Salmo 133:1, 2 yebätä). * Nitre israelita nämäne Jehová mike täte gwairebe ye köböire kukwe kwin nämäne nemen kwetre. Nita nemen keteitibe ye abokän salmista käkwe bämikani aceite keka nämäne nitre dokwäbiti rä nämäne nemen kwin aune nämäne mate kwin bätätre ye kwrere. Nengwane, ni raba ja töi mike sribire kwin konkrekasionte aune ja di ngwen ja mräkätre dimikabätä ne kwe ni tädre keteitibe. Ni niena nuainne ngwane, kwin nieta ni jökrä ie. Akwa, ¿ni raba ja di ngwen ja ketakäre aune ja mräkätre mike gare bäri kwin jai? (2 Cor. 6:11-13).

14. ¿Ni raba dre nuainne ne kwe ñotra tä trä ngitiekä ye kwrere ni rabadre nitre nünanka ni bäre ye okwäkänti?

¹⁴ Ni raba ja di ngwen bäri kukwe metre driekäre, ¿ne kwe ni rabadre nemen ñotra tä trä ngitiekä ye kwrere nitre nünanka ni bäre ye okwäkänti? Nita ja töi mike kwin nitre nünanka ni bäre ye kräke ngwane, kukwe metre ye raba nemen tuin kwin ietre. Ni raba ngwentari jai: “¿Nitre nünanka ti bäre ye tä töbike ño tibätä? Ju tikwe aune jondron mada tikwe ye tä ükaninte kwin? ¿Tita ja ngwen kwin ye tuin nitre nünanka ti bäre yei? ¿Tita juto biare nitre mada dimikakäre?” Nikwe blitadre ja mräkätre ben ngwane, niaratre tä ja ngwen kwin ye köböire nitre nünanka niaratre bäre, mräkätre kwetre, aune nitre nänkä kwelate bentre o sribi muko kwetre ye käkwe dre niebarera ye mäkwe ngwantari ietre. Kukwe kwin namani bare ye niaratre raba mike gare nie (Efes. 5:9).

15. ¿Ñobätä ütiäte krubäte ni rabadre ja ngwen mokre?

¹⁵ Ñotra tä trä ngitiekä jankunu ye kwrere ni tö ja tuai ngwane, kä ño te nita nüne ye nikwe ngwandre törö jai. Jesukwe niebare bati bobu nitre ja tötikaka kwe ie: “Munkwe mokre jabti” (Mat. 24:42; 25:13; 26:41). Ye erere, “ja tare nikadi kri krübäte” ye tä mente krubäte aune rükai, akwa nikwe ñaka tuai rabadre ruin nie ngwane, kukwe driedre jötrö ngwarbe ye ñaka jatai tuin ütiäte nie (Mat. 24:21). Ñotra träta kite diore aune raba nötöte ye kwrere ni raba nemen.

16, 17. ¿Ni tädre ngwäte yekäre nikwe dre nuaindre?

¹⁶ Kä te nita nüne ye jatai bäri käme ngwane, ni rabadre ja ngwen bäri ngwäte. Kä rükadi ngwane Ngöbökwe kukwe ükaite aune ye rabai bare metre ye gare nie (Mat. 24:42-44). Ye ngübakäre, nikwe kukwe ngübadre bätärekä aune nikwe ja ngwandre mokre kä jökrä ngwane. Nikwe ñäkädre käre Kukwe Ngöbökwe yebätä aune ni “rabadre blite Ngöböbe” käre arato (1 Ped. 4:7). Ja mräkätre tä ja ngwen mokre aune ñotra tä trä ngitiekä ye kwrere niaratre tätre ja ngwen yebätä nikwe ja kitadre. Kukwe kwin namani bare kädrieta täräkwata Ni Mikaka Mokre 15 abril 2012, página 18 nemen 21, “Kä gre ketamä biti kwäjätä te ti ja ketaninte ni kä Judea känti yebätä” ye raba kwen nie.

¹⁷ Ni tädre käre sribi Jehovakwe ye nuainne, nikwe jondron kwin nuaindre nitre mada kräke aune nikwe kä diandrekä jai ne kwe ni tädre keteitibe ja mräkätre ben. Nikwe nuaindi ye erere ngwane, kä rabai juto nibätä aune kä näin jötrö ta rabai ruin nie (Efes. 5:16). Siklo nikani ta yete, ja mräkätre sribi Ngöbökwe nuainbare krubäte. Akwa nengwane Jehová tä kukwe niere nie ni jie ngwankäre ye köböire ni raba sribi nuainne bäri. Ñotra tä trä ngitiekä ye kwrere nita ja di ngwen jankunu.

18, 19. ¿Nitre umbre ji ngwanka tä ni dimike ño ne kwe ni tädre ngwäte aune dite? Mä raba bämike keteiti.

 ¹⁸ Ebökänä nita ja mike ngite krubäte, akwa Jehová tä kä bien nie niara mikakäre täte jankunu. Aune ni dimikakäre ja ngwen ngwäte bätä dite yekäre “ja di biani ni kä nebtäye” kwe nieta, ye abokän nitre umbre konkrekasionte meden gärätä (ñäkädre Efesios 4:8, 11, 12 yebätä). Aisete, köbö medente nitre umbre ji ngwanka käkwe ni tuadrebiti ye ngwane, kukwe ütiäte niedre kwetre nie mäträkäre nibätä ye nikwe kukwe nuadre kwin.

¹⁹ Kä Inglaterra yekänti ja mräkä iti aune muko kwe kisete kukwe kri nämäne yebätä ja di käräbare kwetre nitre umbre nibu ie. Muko yekwe niebare ja mräkä ye ñaka nämäne ji ngwen kwin mräkätre käne Jehová mikakäre täte namani ruin ie. Ja mräkä yei nämäne ruin niara ye ñaka dirikä kwin aune ñaka nämäne Ngöbö mikadre täte ni mräkäbe ye nuainne käre ye nükani gare ie arato. Nitre umbre niebare ietre, Jesukwe kukwe kwin bämikani yebätä niaratre rabadre töbiketari. Ja mräkä ye rabadre ja ngwen Jesús erere, aune muko kwe ye rabadre kukwe ngübare bätärekä niebare nitre umbre yekwe ietre. Ngöbö mikadre täte ni mräkäbe ye niaratre rabadre nuainne ño monsotre nibu kwetre yebe ye niebare ietre arato (Efes. 5:21-29). Kä nikani ta ngwane, ja mräkä yekwe ja di ngwani kukwe ye nuainkäre yebätä nitre umbre kwin niebare ie. Niara rabadre ja di ngwen jankunu aune üai deme käkwe niara dimikai nemen ji ngwen kwin mräkätre käne ie rabadre tö ngwen niebare ie arato. Nitre umbre ji ngwanka käkwe ja töi mikani nitre gure ye tarere aune dimike ye köböire nitre ja mräkäre ye tä ñotra tä trä ngitiekä ye kwrere.

20. Ñotra tä trä ngitiekä ye kwrere ni rabai ngwane, ¿ye köböire dre rabai bare?

²⁰ Salmo 128:1 tä niere: “Nire tä Jehová jürä ngwen jabätä aune tä näin ji kwe yebiti ye jökräbätä kätä juto”. Kukwe ja tötikara nekänti nibi gare nie ni raba nemen ñotra tä trä ngitiekä ye kwrere kukwe keta kabre känti: nitre nübaidre Ngöbö mike täte, ja di ngwen nemen keteitibe aune ja ngwen mokre. Nikwe ye erere nuaindi ngwane, kä rabai juto nibätä, nita sribi kwin nuainne ye jutuai nitre madai aune nitre kwati törbai ni Rün kä kwinbiti ye käikitaikä (Mat. 5:16).