¿Täräkwata Ni Mikaka Mokre sribeta mrä mrä jatäri yebätä mäkwe ñäkäbarera? Ye erere ngwane mä raba kukwe ngwantarita ne mike gare metre:

¿Ni raba kukwe meden ketabokä nuainne kantakäre bäri kwin?

Nikwe ja ükadrete kwin, kantiko nikwe ye kadrekä kwin, nikwe burie jäkädre kri, nikwe kada ngiandrekä kri aune nikwe kantadre ja dibiti. Ye erere ngwane, nikwe kantai bäri ja dibiti (w17.11, página 5).

¿Juta Israel kirabe yekänti juta ja kriemikakäre nämene ükaninte yebätä nikwe dre miri gare jai aune ji niken juta ja kriemikakäre kokwäre ye nämäne ükaninte ño kwin?

Juta keta ti ja kriemikakäre nämäne ñäkäninbiti juta ye jökrä känti aune ji nämäne niken juta ja kriemikakäre kokwäre ye nämäne ükaninte kwin. Ye köböire, nämäne nemen nuäre aune jötrö rükakäre nitre ie juta ja kriemikakäre yekänti (w17.11, página 14).

¿Ñobätä ni raba niere Salmo 118:22 tä blite Jesús ganinkröta yebätä?

Jesús ñaka kani ngäbiti Mesías ye kwrere aune murie ketani. Niara ganinkröta ye aibe köböire namani “jä kri kä gräte bäri ütiäte” ye kwrere (w17.12, página 9 bätä 10).

¿Monso mubai mräkätre jatadre jatäri ye aibe köböire Mesías rükadre?

Ruäre ngwane nitre ja mräkäre ruäre monsoi mubai yekri Jesús jatai nie nämäne, akwa ñaka namani bare käre kore. Nitre judío yei kukwe ye nämene gare aune nämene kain ngäbiti, ñan ñobätä aune Kristo ye jatadi David, Jesé ngobo yekri ye nämene gare ietre (w17.12, página 14 bätä 15).

¿Ñobätä ütiäte krubäte ni kristiano tä ja tarere akwle ye ñaka blo?

Nikwe ni mada taredre nita ja tarere ye kwrere (Mar. 12:31). Aune nitre brare gure rabadre “muko kwe tarere tä ja ngrabare tarere ye kwrere” (Efes. 5:28). Akwa, nire nire tä ja aibe tarere krubäte ye abokän töita ja aibebätä (w18.01, página 23).

¿Nikwe dre nuaindre ririakäre kukwe ja üairebiti?

Nikwe ja tötikadre Kukwe Ngöbökwe yebätä, töbikadretaribätä aune dreta nemen gare nie Bibliabätä ye nikwe mikadre täte. Nikwe ja tuanemetre jie ngwandre üai deme ie aune nitre mada ni dimikadre yebätä nikwe debe biandre ietre aune nikwe kadre ngäbiti (w18.02, página 26).

Ni nübaidre ye nikwe kadre ngäbiti ngwane, ¿nikwe ja töi mikadre ño?

Ni nübaidre ye nikwe kadre ngäbiti ngwane, nita ja kukwei kitekä ye erere nikwe mikadre nemen bare (Sal. 15:4). Kukwe ñaka bäri ütiäte ye köböite ni ñaka rikadre. Ni ni nübaikä käkwe ja di ngwani krubäte mrö sribekäre (w18.03, página 18).

¿Ja mräkätre kädekani ji ngwanka, mun raba dre mike gare jai Timoteo yebätä?

Timoteo töi nämäne bökän nitre mada dimikabätä aune kukwe ja üaire mika nämäne nuaindre käne kwe jai. Ja di ngwani kwe sribire Jehová kräke aune kukwe namani gare ie ye mikani täte kwe. Nämäne ja kite jankunu kukwe ja üairebätä aune ja tuanimetre kwe jie ngwandre üai deme Jehovakwe ie. Nitre umbre ji ngwanka aune ja mräkätre bätä ja ngwaintre jökrä, rabadre ja ngwen Timoteo ye erere (w18.04, página 13 bätä 14).