Ni kristiano ja ngwandre ño ye mikata gare keta ökän bersikulo yete. Känti nieta, üai deme Ngöbökwe tä ni töi mike ja tarere, kä ngwen juto jabätä, nüne jäme, ni ngübare bätärekä, ni kain ngäbiti kwin, ja töi mike kwin, tödeke, ja töi mike jäme aune ja gobraine. ¿Akwa ye aibe üai deme Ngöbökwe tä ni dimike nuainne? Ñakare.

¿Ñobätä kukwe ye gare nie? Gálatas 5:22, 23 ye känenkri apóstol Pablo dre tikani ye ani mike gare jai. Kukwe käme nuainta kädekaninte kwe ye abokän: ni nemen kämekäme jabe, kukwe tä ni mike käme, kukwe gaidre nuainta, jondron mikata ngöböre jai, ja mäkätä chokabe, ja brukwä mikata ni mada kräke, rüta ni madabe, ni nemen mokrere, ni nemen rubun krubäte, ni ngrente jabiti kwärikwäri, ni ni mada ñäkäbitikä jene jene, ni ja diankaka jenena, bätä ngwanta, dröbanikata, fiesta käme aune kukwe mada mada ne erere niebare kwe (Gál. 5:19-21). Kukwe mrä tikani Pablokwe bersikulo 21 ye tä mike gare kukwe meden käme nuainta ye ñaka kädekaninte jökrä kwe. Ñodre, Colosenses 3:5 yete kukwe mada kädekaninte kwe. Ye erere arato, üai deme tä ni töi mike kukwe meden meden kwin nuainne ye niarakwe ñaka kädekaninte jökrä Gálatas 5:22, 23 yete.

Pablokwe kukwe tikani Gálatas 5:22, 23 yete ye nikwe ketadre Efesios 5:8, 9 yebe ngwane, niara ñan tö namani kukwe kwin ye kädekete jökrä tä nemen gare nie. Konkrekasion Éfeso ie kukwe ne tikani kwe: “Ni nünanka Ngöbö trä ngwente, ye köböire abko nita kite nebe moto kuin ni mda mdakrä amne nita kite nüne metre amne, nita kukwe era erere niere arato” (Efes. 5:8, 9). Ni “moto kuin” o ni ja töi mike kwin ye “Ngöbö trä” aune üai deme tä ni dimike nuainne. Arato üai deme raba ni töi mike “nüne metre” aune “kukwe era” niere. Pablo törbadre kukwe ye tikai Gálatas 5:22, 23 yete akräke tikadre kwe.

Akwa ye ñan ngöräbe, ñakare aune 1 Timoteo 6:11 yete Pablokwe Timoteo töi mikani kukwe metre nuainne, Ngöbö mike täte, tödeke, ni mada tarere, kä ngwen nüke jai aune ja töi mike jäme. Kukwe nuain mananbare Timoteo ie ye ketamä aibe kädekateta Gálatas 5:22, 23 yete, ye abokän tödeka, ni mada tarere aune ja töi mike jäme. Akwa Timoteo üai deme ribedi jai kukwe mada Pablokwe niebare ie ye nuainkäre arato, ye abokän kukwe metre nuaindre, Ngöbö mikadre täte aune kä ngwandre nüke jai (Colosenses 3:12; 2 Pedro 1:5-7 mikadre ñärärä arato).

Kukwe ye jökrä tä mike gare nie, üai deme Ngöbökwe tä ni kristiano töi mike kukwe keta kabre nuainne ye ñaka kädekaninte jökrä Gálatas 5:22, 23 yete. Kukwe keta ökän kädekateta texto yebätä ye üai deme tä ni töi mike nuainne. Akwa ni kristiano rabadre kukwe kwin mada mada ye nuainne arato rabakäre ünä ja üairebiti kukwe metre nuainkäre aune ja ngwankäre metre (Efes. 4:24).