GARE nie Jehová tä ni jie ngwen aune ni ngübare ja üairebiti “kä mrä” ne näire (2 Tim. 3:1). Akwa niara mikadre täte ye tä gare ni itire itire ie. Nikwe Jehová mikadre täte kä ne näire ye keta raba nitre israelita niara mikadre täte yebe. Niaratre nünanbare kä nötare te ngwane trompeta jüka nämäne ye ngwane rabadre mike täte.

Jehovakwe niebare Moisés ie rabadre trompeta ngwiane sribere martillobiti aune nuaindre krobu kwe, nitre israelita ükakrökäre aune ja mikakäre juto nänkäre (Núm. 10:2). Nitre sacerdote rabadre trompeta ngö mike jene jene ne kwe nitre israelita dre nuaindre rabadre gare ietre (Núm. 10:3-8). Kä nengwane kukwe keta kabrebiti kukwe mikata gare nie trompeta ngö mika nämäne jene jene nitre israelita näire erere. Ani ketamä mike gare jai. Ni nübaita gätä krikri yebätä, ja mräkätre ji ngwanka tötikata sribikäre bäri kwin aune kukwe mrä mrä mikata nuaindre konkrekasionte.

Jehová tö nämäne nitre israelita jökrä tuai ja ükökrö jukwe tabernáculo kädrikri ye känenkri ngwane, nitre sacerdote nämäne trompeta krobu ye jüke (Núm. 10:3). Nitre israelita nämäne ñäkänintubu ketabokä tabernáculo bäre, mräkä kira kwetre ye ererebätä, niaratre jökrä ie trompeta krobu ngö nämäne nemen ruin kwin. Nitre israelita nämäne känime jukwe yebätä ye nämäne nüke bäri jötrö raba ruin nie. Akwa nire nire nämäne bäri mente yebiti kä nämäne niken bäri ta aune nämäne ja di ngwen bäri rükakäre yete. Nitre israelita tädre känime o mente ya, akwa Jehová tö nämäne niaratre jökrä tuai ja ükökrö aune kukwe kwe ye kukwe nuin.

Kä nengwane ni nübaita ja ükökrö arato, akwa ñaka tabernáculo kirabe yete erere, ñakare aune gätä krikri regional yebätä aune gätä mada ütiäte yebätä, känti kukwe ütiäte mikata gare nie aune ni tötikata kwin. Ja mräkätre kä jökräbiti tibien tötikata ja erebe, aisete nire nire tä kwen gätä ütiäte yebätä ye tä nemen ja ngätäite ja mräkätre madabe kä jutobiti aune juta keteitibe erere. Ja mräkätre ruäre nüne bäri mente ja mräkätre mada ye kräke, akwa ja ükakröta kwetre ye ñan ngwarbekäre tä nüke gare ietre.

Akwa ja mräkätre nüne mobe jateta känti gätä ütiäte ye ñaka nuainta känime, ye kräke kukwe kwin tä nemen bare arato. Tecnología mrä mrä yebiti niaratre dimikata gätä ütiäte ye käi ngwen juto jabätä ne kwe ja rabadre ruin ja mräkätre ngätäite ietre. Ñodre, central mundial käkwe ja mräkä iti juani sukursal Benín tuinbiti ngwane, video gätä ütiäte yebätä ye mikani tuare kä kädekata Arlit nemenkä mobe kä nötare Sahara yete, juta Níger yekänti. Kä Arlit yete nitre braibe tä nüne aune sribi minería nuainta yete. Ja mräkätre nirike aune nitre  mada 16 ja ükaninkrö yete. Niaratre ñaka nämäne ja mräkätre 44,131 ja ükaninkrö Benín yete ye ken, akwa ja namani ruin gätä ütiäte yebätä ietre. Ja mräkä iti käkwe kukwe ne tikani: “Tä debe krubäte ja brukwä tätebiti munye, munkwe gätä ütiäte mikaba tuare nuen yebätä. Mada bati nibi gare nuen nun tare krubäte munkwe”.

Nitre sacerdote nämäne trompeta kratibe jüke ngwane, nitre kädekani jefe nitre israelita 1000 yebätä ye aibe nämäne ja ükökrö tabernáculo yete (Núm. 10:4). Aune Moisés nämäne kukwe mike gare ietre aune nämäne niaratre tötike, kukwe ye jökrä nämäne nitre ji ngwanka dimike sribi nämäne kisete ye nuainkäre kwin. Ni tädre nüne kä ye näire aune ni tädre nitre jie ngwen ngwane, ni nübaidre ni tötikakäre ye nikwe ñaka juandre ja bäre, ¿ñan ererea?

Kä nengwane nitre umbre ji ngwanka ñaka jefe konkrekasionte aune niaratre ñaka ja mike “dänkiene” nitre Ngöbö mikaka täte ngübabitita kwetre yebiti (1 Ped. 5:1-3). Akwa niaratre tä ja di ngwen nitre Ngöbö mikaka täte ye ngübare kwin. Yebätä nübaita dirikäre bäri ietre ngwane tädre kain ngäbiti kä jutobiti, ñodre niaratre nübaita Kwela Sribi Ngöbökwe Jie Ngwankäre yebätä. Niaratre tötikata ye köböire konkrekasion jie ngwandre ño ye tä nemen gare bäri kwin ietre. Kukwe tä nemen gare nitre umbre ji ngwanka ie ye tä niaratre aune ja mräkätre konkrekasionte dimike krötö bäri Jehová ken. Ni ñaka nemen kwela yete akwa kukwe mikata gare nitre umbre ie yebiti niaratre tä dirire aune tä ni dimike.

Muta nämäne tabernáculo yebiti ye nämäne nakainkä kwin ngwane nämäne mike gare Jehová tö nämäne nitre israelita tuai näin kä madakänti. Yebätä nitre sacerdote nämäne trompeta ngö mike braikä kiakia jatäri (Núm. 10:5, 6). Nitre israelita nämäne ja mike juto nänkäre ye nämäne ükaninte kwin akwa niaratre jökrä rabadre ja di ngwen mike täte. Nitre israelita ruäre ñaka tö nämäne rikai mentokwäre raba ruin nie. ¿Ñobätä?

Trompeta ngö mika nämäne gwä gwä aune ngüba nämäne ñaka ngwane ye kwrere nämäne tuin nitre israelita ruäre ie. Ruäre ngwane muta nämäne nünaninkä deu nüke dekä aibe, akwa mada ngwane nämäne nünenkä köböbu, sö krati o bäri nieta Bibliakwe (Núm. 9:21, 22). ¿Bäbe nitre israelita nünantebare kä jene jene känti? Números kapitulo 33 tä mike gare kä gre ketebu känti nitre israelita nünantebare.

Kä tibore kwin ja dükakäre nämäne kwen nitre israelita ruäre ie “kä ngwarbe nötäre” yete (Deut. 1:19). Yebätä kämikadrekä kwetre kä yekänti ye ñaka kwin kräketre nämänentre nütüre raba ruin nie.

Trompeta ngö mika nämäne braikä kiakia jatäri ngwane, nitre israelita jökrä nämäne kukwe nuin, akwa ñan jökrä nämäne kämikekä gwairebe. Nitre israelita ruäre tö nämäne kämikaikä jötrö raba ruin nie. Akwa trompeta ngö mika nämäne kena ngwane, nitre Judá mräkä, Isacar mräkä aune Zabulón mräkä nämäne tabernáculo kädrikri ye rabadre kämikekä käne (Núm. 2:3-7; 10:5, 6). Ye bitikäre, nitre sacerdote nämäne trompeta ngö mike bobukäre ngwane, nitre israelita ja mräkäre nämäne mötörikri ye rabadre kämikekä. Ye erere nuain nämäne nememe nitre israelita jökrä kämikadrekä ngwane.

Juta Ngöbökwe tä kukwe ruäre kwite ye ñan tä nemen nuäre ni kräke mikakäre täte. ¿Ñobätä? Ñobätä ñan aune gwä gwä kukwe kwitata tä nemen ruin nie. O nuain nämäne ño käne ye bäri kwin nita nemen nütüre aune ñan kwita rabadre ie ni tö. Ñaka namani nuäre ni kräke kukwe ye ka ngäbitikäre aune mikakäre täte töi jämebiti. Akwa nikwe mikadre täte ye gare nie. Nikwe ja di ngwain nuainne ngwane, Ngöbökwe kukwe kwin mikai nemen bare ni kräke.

Moisés näire Jehovakwe nitre kwati krubäte, merire, brare aune ngäbäkre ye jie ngwani kä nötare te. Jehovakwe ñaka niaratre ngübadre aune jie ngwandre akräke kä ñan rükadre ietre. Kukwe tare ne näire Jehovata ni jie ngwen aune tä ni dimike ne kwe ni tädre dite ja üairebiti. Yebätä nikwe ja di ngwandre käre Jehová mike täte, trompeta ngö mika nämäne nitre israelita nämäne mike täte erere.