Ti däreba 19 mayo kä 1940 kä Amiún juta Líbano yekänti. Ye bäsi bätärabe nun rikaba nüne juta Trípoli yekänti. Ti mräkätre nämä nüne kwin jabe, nun nämä ja tarere Jehová nämä gare ie aune nämä tarere. Nun nirike jai merire nimä aune brare nibu, akwa ti abokän bäri bati. Ngwian ganaindre jai ye ñan nämä bäri ütiäte ti rün aune ti meye kräke, ñakare aune ja tötikadre Bibliabätä, rikadre gätäbätä aune nitre mada dimikadre Ngöbö mike gare jai ye nämä bäri ütiäte kräketre.

Konkrekasion nunkwe te, nitre dianinkä nänkäre kä kwinbiti nämä kwati. Iti ye abokän Michel Aboud, niara ye nämä gätä kädeka nämäne estudio del libro ye nuainne kä ye ngwane. Kukwe metre namani gare ie Nueva York aune kä 1920 ye ngwane, kukwe metre ye driebare kwe Líbano. Ja ngwaitre Anne aune Gwen Beavor graduabare Kwela Galaad ye niara nämä mike ütiäte jai aune dimike ye törö kwin tie. Ja ngwaitre nibu ye rababa ja ketamuko kwin nunkwe. Ja känenkäre, tikwe ja tuabata Anne ben Estados Unidos ye käi rababa juto krubäte tibätä. Ye bitikäre, tikwe ja tuabata Gwen ben. Niara ye käkwe ja mäkäninte ja mräkä Wilfred Gooch ben, niaratre nämä sribire sukursal Londres (Inglaterra) yekänti.

Ti nämä chi ngwane, nitre testiko Jehovakwe ñan nämä krubäte Líbano. Akwa yebiti ta, kukwe Bibliabätä nämä gare nunye ye nun nämä driere nitre madai. Nitre ji ngwanka iglesiate nämä ja mike nun rüere yebiti ta nun nämä kukwe driere. Kukwe meden rababa bare nunbätä ye täbe törö tie nükebe nengwane.

Bati, edificio kwati yekänti ti nämä kukwe driere ti ngwai Sana ben. Nun nämä blite nitre ben cuarto kwati yekänti ngwane, sacerdote iti rükaba. Ni iti käkwe käräbare rababa ruin nunye. Sacerdote ye rikaba ñäke ti ngwai ie aune rababa romon krubäte, yebätä ti ngwai kitaba kwe kalerabätä kwintubu. Ni iti käkwe guardia käräba. Guardia ye rikaba ngwane, Sana juruainba tare gitaninkä yebätä ye dimikamana kwe. Sacerdote ye jänrikaba guardia jue yekänti aune sacerdote ye nämä krü ngwen jabätä rababa gare. Ni guardia jie ngwanka käkwe ngwantaribare sacerdote ie: “¿Mä abokän nire? ¿Mä ni jie ngwanka iglesiate o mä maleante jie ngwanka?”.

Konkrekasion käkwe bus krati ütiä bianba ne kwe nun rikadre kukwe driere mente ye ñan käi rikwitaikä tibiti. Kukwe jökrä nämä kwin, akwa nun nämä yere ye rababa gare sacerdote iti ie ngwane, nitre ükakröba kwe ja mikakäre nun rüere. Nitre rikaba nun täke jäbiti aune ti rün täkäba dokwäte. Däri rababa nen ti rün ngwärebiti ye törö tie. Rikabata ti meyebe bute kwin aune nun jökrä rikabata jiebiti töbikara kwärä. Ti meye nämä ti rün ngwäre bätete ngwane, dre nieba kwe ie ye täbe törö tie: “Jehová mäkwe ngite juan bititre ta, ñobätä ñan aune dre nuainta kwetre ye ñan gare ietre yebätä”.

Köbö madabiti, nun rikabata basare nun mräkätre ie nun käite. Nun rababa nun ruai känti ngwane, obispo iti ütiäte krubäte kä yekänti nämä yete. Ti rün aune ti meye testiko Jehovakwe ye nämä gare ie. Kä nämä krire kwä ti tibiti ngwane, kukwe ne ngwantariba kwe tie: “¿Ñobätä mä jämi ja ngökö ñöte?”. Ti nämä chi aune tikwe ja ngökadre ñöte yekäre, tikwe kukwe Bibliabätä mikadre gare bäri jai aune tödeka tikwe tädre dite ye tikwe nieba ie. Kukwe nieba tikwe ie ye ñan rababa debe kräke, yebätä tikwe ñaka niara mikaba ütiäte jai nieba kwe ti ruai ie.

Kukwe ne kwrere ñan nakainkä krubäte, ñobätä ñan aune nitre Líbano ye ja kete kwin aune nitre kain ngäbiti kwin. Aisete, bäsi käre nun nämä blite kwin nitrebe Bibliabätä aune nitre kwati tötike.

Ti nämä kwelate ngwane, ja mräkä iti nünanka Venezuela rükaba basare Líbano. Ja mräkä ye nämä nüke konkrekasion nunkwe te aune jataba ti ngwai Wafa mike gare jai. Ye bitikäre, ja mäkäteba kwetre aune rikabatre nüne Venezuela. Wafa nämä kukwe tike ti rün ie ngwane, nun rikadre Venezuela nie nämä kwe ie, ñobätä ñan aune nämä nun uliere krubäte yebätä. Mrä mada, Wafa tö nämä dre ie ye rababa bare.

Nun rükaba Venezuela kä 1953 ye ngwane aune nun rikaba nüne Caracas gobran jue ye ken. Ti nämä monsore yebätä ruäre ngwane, gobran  nämä kite karo bä nuäre te ni karo ngwanka kwe yebe, ye nämä ti töi mike niä. Ñan rababa nuäre ti rün aune ti meye kräke nünankäre juta yete. Ñodre, juta, nitre kukwei jene, nitre nüne ño, mrö aune kä jene yebätä. Krire ja jataba ruin nuäre ti rün aune ti meye ie kä yekänti ngwane, kukwe tare rababa bare nunbätä.

Batibe ti rü ie ja rababa ruin bren. Ñan rababa nemen era nun kräke, ñobätä ñan aune niara ye nämä kwin aune dite yebätä. Ñaka näkäin bren jire nun okwäbiti. Cáncer kwani jübätä mikaba gare aune operaba. Bämän rikaba krati ta ngwane, krütaba.

Nun rababa ulire krubäte ye ñaka nuäre mikakäre gare tie. Kä nämä krire 13 tibiti. Ñan rababa bä nun kräke aune nun di riakaba jökrä ye kwrere ja rababa ruin nunye. Ti rün krütani ye ñan rababa nemen era ti meye kräke kä ruäre te. Akwa nunkwe ja töi mikadre näin jankunu ja käne aune Jehovakwe nun dimikai ye rükaba gare nunye. Kä nämä 16 tibiti ngwane, ti graduaba kwela secundaria yebätä Caracas yekänti aune tikwe ti mräkätre dimikadre ye rükaba gare tie.

Ye ngwane, ti ngwai Sana ja mäkäteba Rubén Araujo ben. Rubén ye graduabare Kwela Galaad yete aune rükabata Venezuela. Niaratre ja töi mikani niken nüne Nueva York. Ti rikadre ja tötike universidate ye ti mräkätre nieba tie, aisete ti rikaba nüne Sana aune Rubén ben Nueva York ja tötikakäre yete. Ti nämä nüne bentre ngwane, niaratre ti dimikaba nirien kukwe ja üairebiti. Ne madakäre, konkrekasion tikwe Brooklyn Spanish yete ja mräkätre ünä kukwe ja üairebiti nämä kwati. Ja mräkätre nibu rababa ütiäte ti kräke ye abokän Milton Henschel aune Frederick Franz, niaratre nämä sribire Betel Brooklyn yete.

Kä kwati kena te ti nämä ja tötike universidate ye jataba krüte ngwane, ti nämä dre nuainne yebätä ti jataba töbike. Nikwe dre dre nuaindre Jehová mikakäre täte ye nämä tikani täräkwata La Atalaya yebätä bätä tikwe ñäkäba ye käkwe ti mikaba töbike. Ja mräkätre prekursor aune ja mräkätre betelita konkrekasion tikwe te yebätä kä nämä juto ye nämä tuin tie aune ti törbaba ja tuai niaratre erere. Akwa ti jämi ja ngökö ñöte yebätä tikwe ja diandrekä mento Jehová kräke ye ütiäte krubäte rükaba gare tie aune ye erere tikwe nuainba. Köbö 30 marzo kä 1957 ye ngwane tikwe ja ngökaba ñöte.

Tikwe ja ngökaba ñöte ye bitikäre sribi köbö täte ye ti tö jataba nuainbätä. Sribi prekursor ye ti tö jataba nuainbätä bäri, akwa ñaka rabai nuäre ti kräke ye nämä gare tie. Tikwe ora ükadrete ño jai ne kwe ti rikadre universidate aune sribi prekursor nuainkäre yebätä ti nämä töbike. Ñobätä tikwe ja töi mikani universidad tuenmetre aune ti näinta Venezuela sribi prekursor ye kömikakäre ye mikakäre gare ti meye aune ti mräkätre ie ti nämä tärä juen Venezuela aune tärä juan nämänta tie Nueva York.

Ti rababata Caracas junio kä 1957 ye ngwane. Ti mräkätre nämä jondron ribere jai ye jutuaba tie. Ni iti käkwe ngwian ganaindre jai arato ngübakäre  nämäntre ribere jai. ¿Ti raba dimike? Ye tikwe ngwantariba jai. Sribi drieba tie bancote, akwa ti rababa töibikaire, ñobätä ñan aune ti rikabata Venezuela sribi prekursor nuainkäre. Akwa tikwe kukwe ketebu ye dianba nuaindre jai. Kä kwati krubäte te tikwe sribiba köbö täte bancote aune sribi prekursor nuainba. Sribi nämä nuaindre krubäte tie aune kä nämä juto krubäte tibätä ñan rababare bare jire tibätä erere.

Sylvia ye ja ngwai nünanka Alemania nämä Jehová tarere krubäte aune rikaba nüne rün aune meye ben Venezuela ye rababa gare tie, ye käi rababa juto krubäte tibätä. Ja känenkäre tikwe ja mäkäteba ben aune monsotre nibu rababa nunkwe. Michel, abokän nunta kädeke Mike aune Samira. Nunkwe ja töi mikaba niken nun meye ngwena nüne jabe nunkwe ngübadre yekäre. Ti mräkätre ngübakäre tikwe sribi prekursor tuanmetreba, akwa yebiti ta käre tikwe ja töi mikaba ni prekursor erere. Vacación ye ngwane, ti aune Sylvia nun nämä ja di ngwen prekursor ausiliar nuainne.

Kukwe rababa bare tibätä tikwe miri gare kena ye ngwane, kiatre tikwe nämä kwelate. Ti nämä nüne kwin aune nitre mada mada sribikä bancobätä nämä ti mike ütiäte jai ye ti raba nie. Akwa yebiti ta, nitre mada ti mikadre tuin jai ni Jehová mikaka täte ye kwrere ie ti törbaba. Ti rababa töbike jankunu kukwe yebätä, aisete ti aune Sylvia, nunkwe blitaba jabe kukwe yebätä. Sribi nuain nämä tikwe bancote ye tikwe tuadremetre ngwane, ngwian biain debe näre tie aune rürübän ütiä ñaka nämä nunbiti. Aune nunkwe ja töi mikai nüne jondron braibebiti ngwane, ngwian yebiti nun raba ja ngübare kä ruäre te ye rababa gare nunye.

Kukwe ye diandre jai ye ñan rababa nuäre ti kräke. Akwa ti muko tare tikwe aune ti meye käkwe ti dimikaba. Aisete mada bati tikwe ja töi mikabata sribire köbö täte. ¡Kä nämä juto tibätä! Kukwe ñaka nämä ti jiete sribikäre köbö täte te rababa tuin tie, akwa bätäräbe kukwe ngüba ñaka nämä nunkwe ye mikaba gare nunye.

Bati, nun janama doctor känti ngwane, Sylvia nämä murore ye doctorkwe mikaba gare nuen. Kukwe ye nun ñaka nämä ngübare. Kä rababa juto krubäte nunbätä, akwa ti tö nämä sribi prekursor nuainbätä yebätä ti rababa töbike jankunu. Akwa, ¿sribi prekursor ti törbaba nuaindi ye rabai bare tie? Ye ti raba ngwentari jai. Chi rabai nunkwe ye käi rababa juto krubäte nunbätä yebätä nunkwe ja töi aune ja brukwä ükateba  biarebe ka ngäbitikäre. Akwa kukwe ükaninante tikwe jai nuainkäre yebätä dre rabai bare yebätä ti rababa töbike.

Ti tö nämä dre nuainbätä ye tikwe mikatariba ñärärä ngwane, kukwe meden ükaninante tikwe jai nuainkäre ye tikwe ja töi mikaba nuainne jankunu. Monso tikwe Gabriel däreba sö abril kä 1985 ye ngwane. Sribi nuain nämä tikwe bancote ye tikwe tuanmetreba aune sö junio kä 1985 ye ngwane, tikwe sribi prekursor regular ye kömikaba. Ja känenkäre ti rababa sribire Comité de Sukursal Venezuela yete, ye käi rababa juto krubäte tibätä. Sukursal ye nemenkä 80 kilómetro (50 millas) juta Caracas yebätä mento ngwäre, aisete ti nämä niken bobu o bämä bämän kratire kratire te.

Sukursal ye tä juta La Victoria yekänti, aisete nunkwe ja töi mikaba niken nüne yete nun tädre Betel ye ken yekäre. Ye ñan rababa nuäre nun jökrä kräke. Tita nain mräkätre tikwe ie aune tita debe bien krubäte ietre. Niaratre tä juto biare kukwe nuainkäre ye käkwe ti dimikaba krubäte. Ti ngwai Baha käkwe ti meye ngübadi nieba kwe. Monso tikwe Mike käkwe ja mäkätebara, akwa Samira aune Gabriel nämä nüne nunbe. Aisete ja ketamukotre kwetre nünanka Caracas ye tuanmetreba kwetre. Ne madakäre, Sylvia käkwe ja di ngwanba nünankäre juta chi te aune juta käne nitre kwati nämä nüne ye tuanmetrekäre. Nun jökrä käkwe ja di ngwanba nünankäre ju chi te. Aisete nunkwe kukwe keta kabre tuanmetreba Caracas rikakäre nüne La Victoria.

Kukwe mada rababa bare. Gabriel käkwe ja mäkäteba aune Samira rikaba nüne jenena. Ne madakäre, kä 2007 ye ngwane, ti aune Sylvia, nun nübaiba sribikäre Betelte aune yete nun täbe sribire nükebe nengwane. Nun ngobo umbre Mike ye tä sribire ni umbre ji ngwanka konkrekasionte erere aune tä sribi prekursor nuainne muko kwe Mónica yebe. Gabriel abokän tä sribire ni umbre ji ngwanka konkrekasionte erere aune tä sribire Jehová kräke muko kwe Ambra ben Italia. Samira tä sribi prekursor nuainne aune tä Betel dimike.

Tikwe kukwe keta kabre ütiäte dianina nuaindre jai. Akwa yebätä ti ñan ja töi kwite jire. Tikwe kukwe ye arabe diandreta nuaindre jai. Tikwe dre dre erere nuainbarera sribikäre Jehová kräke yebätä tita debe bien. Mekerabe nükebe kä nengwane ja ketadre kwin Jehovabe ye ütiäte nükanina gare tie. Nita kukwe kri o kukwe chi den nuaindre jai ngwane, ‘kä jäme abokän ñan raba nüke gare ni kä nebätä ye ie’ Jehová raba bien nie (Filip. 4:6, 7). Sribi nuainta nunkwe Betel ye käi juto tibätä aune Sylviabätä. Nunkwe kukwe diani nuaindre jai ye käi juto nunbätä, ñobätä ñan aune nunkwe Jehová ngwani törö jai yebätä.