NITRE israelita nämäne ngwian bien kä kwati krubäte te sribi Ngöbökwe dimikakäre. Akwa Jesús näire nitre Judío kisete impuesto keta kabre nämäne biandre, yebätä ñaka nämäne nemen nuäre niaratre kräke.

Nitre judío ünä ünä ye nämäne ngwain bien medio siclo (dos dracmas) tabernáculo dimikakäre aune biti templo dimikakäre. Siklo kena yete Herodes templo sribebare ye ngüba nämäne aune jondron nire bian nämäne kukwadre ye dimika nämäne ngwian bian nämäne yebiti. Impuesto biandre yebätä Jesús nämäne töbike ño ye nitre judío ruäre käkwe ngwanintari Pedro ie aune ye ütiä biandre ye ñaka blo niebare Jesukwe. Ne madakäre, ngwian raba kwen ño Pedro ie, ye Jesukwe mikani gare ne kwe rabadre ütiä bien (Mat. 17:24-27).

Juta Ngöbökwe kä ye näire nämäne diezmo bien arato. Ye abokän dre dre nöka nämäne kwetre aune dre dre nämäne kwetre ye nämäne bien 10% (Lev. 27:30-32; Núm. 18:26-28). Nitre rabadre jondron jökrä nöka nämäne kwe ye bien 10% ribe nämäne nitre ji ngwaka kukwebätä yekwe ietre, “menta, eneldo aune comino” ye arato. Impuesto biandre ye ñan rüere Jesukwe ñäkäbare, ñakare aune nitre escriba aune fariseo nämäne ja bämike jerekäbe yebätä Jesukwe ñäkäbare (Mat. 23:23).

Ne madakäre, nitre romano nämäne nitre judío gobraine, aisete impuesto ruäre nämäne ütiä biandre ietre. Ñodre, nitrekwe käi nämäne ye nämäne impuesto ütiä bien, ngwain yebiti o jondron nöka nämäne kwetre yebiti 20 o 25% näre raba ruin nie. Nitre judío itire itire nämäne impuesto bien ja ütiäre arato. Impuesto biandre ye kwin o ñakare ngwanintari nitre fariseokwe Jesus ie ngwane, kukwe keteiti niebare kwe abokänbiti kukwe ye mikadre tuin ño jai ye mikani gare kwe: “Jändrän emperadorekwe erere munkwe bian emperadoreye amne jändrän Ngöbökrä erere munkwe bian Ngöböye” (Mat. 22:15-22).

Jondron jän nämäne kite aune juan nämäne juta ketare ketare te ye kräke impuesto bian nämäne arato. Jondron ye ütiä kärä nämäne puerto, puente, cruce o jukwe juta ketare ketare yekänti aune jondron rürübäin nämäne yekänti arato.

Nitre romano nämäne impuesto ütiä kärere nuäi nitre ie ye nämäne tribe doboko kwrere kräketre. Ni ja tötikaka kri romano kä Tácito tä mike gare, Jesús nämäne kä tibienbätä aune emperador Tiberio nämäne gobrane ngwane, “nitre nünanka Siria aune Judea, ye ie impuesto kärä nämäne ere krubäte yebätä ñaka nämäne nemen nuäre kräketre. Aisete mikadre bäri braibe ribe nämäne kisere kwetre”.

Impuesto kärä nämäne ño ye bäri nämäne nitre judío ye ngwen ja tare nike. Sribi impuesto käräkäre, ye drie nämäne nire nämäne ngwian bien bäri ye ie. Aune niaratre nämäne ngwian ribere bäri ne kwe ngwian rabadre kräketre. Ne madakäre, niaratre ye nämäne sribikä känene ja kräke ne kwe rabadre impuesto kärere ni itire itire ie niara kräke aune nitre sribikä ye nämäne ngwian kärere bäri, ne kwe ngwian rabadre kräketre arato. Zaqueo yekwe nitre impuesto käräkä ye nämäne arato ye ni raba niere (Luc. 19:1, 2). Ye medenbätä, ñobätä nitre brukwä nämäne nitre impuesto käräkä ye kräke ye nüke gare kwin nie.