1. ¿Jehovakwe ja töi mikani ño ni itire itire kräke?

JEHOVÁ jatani ni itire itire ngwena ja kokwäre (Juan 6:44; NGT). Kukwe ye tä dre mike gare yebätä ani töbike. Jehová nämäne nitre kwati krubäte ye miketari ñärärä ngwane ni brukwä kwin aune ni raba niara tarere ye nükani gare ie (1 Crón. 28:9). Ni gare Jehovai, ja ruin ño nie ye nüke gare ie aune tä ni tarere ye tä ni töi mike jäme, ¿ñan ererea?

2. Jehovata ni itire itire tarere ye rükadre gare nie, ¿yekäre Jesukwe kukwe meden bämikani?

² Mä tare krubäte Jehovakwe aune ja mräkätre tare kwe arato, ye rükadre gare nie yekäre Jesukwe kukwe ne bämikani. Ni oveja ngübaka yekwe oveja 100 tä aune tä nete krati kän ngwane, ¿tä dre nuainne? Tä oveja mikete ja “ngibiare kaibe ngitiobti, bti rikadre obeja nianinte krati ye känentari”. Tä kwentari ie ngwane ñaka tä nemen rubun kräke ñakare aune käita nemen juto krubätebätä. ¿Kukwe meden mika tö gare nie kukwe nebiti? Oveja kratire kratire ye ütiäte Jehová kräke, ñobätä ñan aune niara ye ni oveja ngübaka ye kwrere yebätä. Jesukwe niebare: “Mun Rün tä kä käinbti sete abko ñan tö nitre tödekaka tibti tä ja mike bobre Ngöböbtä ngäbäkre kiakia kwrere se tuai nente jire iti jakän” (Mat. 18:12-14).

3. ¿Ni bike dre mike gare jai kukwe ja tötikara nekänti?

³ Erametre nita dre niere o dre nuainne yebiti ni ñaka tö ni mada ngwain di nekä. Kukwe ja tötikara nekänti nibike kukwe ngwantarita ne mike gare: ¿Ni raba dre nuainne ne kwe ni ñaka ja mräkätre ngwandre ngoto ritete? Ja mräkätre mada käkwe kukwe nuaindre ye matadre tare nibätä ngwane, ¿ni raba dre nuainne? Akwa “ngäbäkre kiakia” bätä blitata Mateo kapitulo 18 känti yebätä ani blite käne.

4. ¿“Ngäbäkre kiakia” ye abokän nire nire?

⁴ “Ngäbäkre kiakia” ye abokän nitre jökrä ja tötikaka Jesukwe ye meden gärätä. Kä nuäi niaratrebiti akwa niaratre monsotre kia ye kwrere, ñobätä ñan angwane tä ja tuenmetre tötikakäre Jesús ie yebätä (Mat. 18:3). Tätre nüne kä jene jene känti, ñaka nüne ja erebe, ñaka ja ngwen ja erebe aune jondron jene jene tuin kwin ie akwa yebiti ta tä tödeke Jesubiti aune Jesús abokän tä tarere krubäte (Mat. 18:6; Juan 1:12).

5. Nitre tä ni iti Jehová mikaka täte ye nuainne tare o ngwen ngoto ritete ngwane, ¿tä mate ño Jehovabätä?

⁵ “Ngäbäkre kiakia” ye jökrä ütiäte krubäte Jehová kräke. Jehovata mike tuin ño jai ye rükadre gare nie yekäre, monsotre kia ye tuin ño nie yebätä ani töbike. Niaratre ütiäte krubäte ni kräke. Ni tö kriemikabätä ñobätä ñan aune niaratre di ñaka krubäte aune kukwe ñaka gare krubäte ie nitre niena ünä ye kwrere yebätä. Erametre nitre mada nuainta tare ye ñaka tuin kwin nie akwa ngäbäkre kia nuainta tare ye tä nemen tare krubäte nie aune ni tä nemen rubun dokwäre. Ye erere tuin Jehovai arato. Niara tö nitre niara mikaka täte ye kriemikai yebätä nire tä ni niara mikaka täte ye nuainne tare o ngwen ngoto ritete ngwane tä nemen tare ie aune tä nemen rubun krubäte arato (Is. 63:9; Mar. 9:42, TNM).

6. Corintios kena 1:26-29 tä niere erere, ¿nitre kä nebätä tä nitre ja tötikaka Jesukwe ye mike tuin ño jai?

⁶ ¿Kukwe medenbätä mada nitre ja tötikaka ye abokän “ngäbäkre kiakia” ye kwrere? Ñodre, ¿nitre kä nebätä tä nire mike ütiäte jai? Nitre jondron bökäne, nitre käikitakata aune nitre ütiäte ütiäte. Akwa nitre ja tötikaka Jesukwe bäsi jökrä ye ñaka ye erere. Ye medenbätä nitre kä nebätä kräke niaratre ye abokän “ngäbäkre kiakia” ye kwrere, ye abokän ñaka ütiäte kräke meden gärätä (ñäkädre 1 Corintios 1:26-29 yebätä). Akwa niaratre ñaka tuin ye erere Jehovai.

7. ¿Nikwe ja mräkätre mikadre tuin ño jai ye ie Jehová tö?

⁷ Nita mekerabe o krire Jehová mike täte akwa ni jökrä tare Jehovakwe. Ja mräkätre jökrä tare Jehovakwe ye erere nikwe mikadre tuin jai arato. Ni ñaka tö ja mräkätre ruäre taredi ñakare aune ni tö ja mräkätre jökrä taredi (1 Ped. 2:17). Ni tö ja töi mikai kwatibe ja mräkätre dimikakäre aune ngübakäre. Nikwe kukwe keteiti nuainbare abokän matani tare ja mräkä itibätä rabadre gare nie ngwane, bren ñäkädre ja mräkä yei yebätä nikwe ñaka töibikadre aune jerekäbe käi kwitadrekä kwe jabiti ye nikwe ñaka nütüdre. ¿Dre köböite kukwe raba nemen mate tare ja mräkätre ruärebätä? Niaratre ngübabare ño yebätä ja ñaka ruin ütiäte ie o tä krire kukwebätä yebätä kukweta nainte ja mräkätre ie yebe ja tuadre ño kwe ye ñaka gare ie, akwa yebiti ta nikwe ja di ngwandre kukwe ükatekäre jötrö. Ne madakäre, ja mräkätre ruäre ie bren ñäkädre yebätä rabadre ja töi kwite ye rabadre gare ie aune ja töi ükadrete kwe ye ütiäte krubäte, ñobätä ñan aune ye köböire tädi jäme aune rabai kwin nitre mada kräke.

8. ¿Nitre töi nämäne ño ye käkwe nitre ja tötikaka Jesukwe ye töi mikani ño?

⁸ ¿Ñobätä Jesukwe blitabare “ngäbäkre kiakia” yebätä? Nitre ja tötikaka kwe käkwe kukwe ne erere ngwanintari ie: “¿Nire abokän bäri ütiäte Gobran kä kwinbiti yete?” (Mat. 18:1, TNM). Kä ye näire nitre meden käikitaka nämäne aune jondron bökäne krubäte ye nitre judío nämä mike bäri ütiäte jai. Ni ja tötikaka kri tä niere: “Nitre tö nämä ja käikitakamana, mikadre ütiäte jai aune nitre jökrä käkwe kadre ngäbiti ye jiebiti nämä ja töi mike kwatibe”.

9. ¿Nitre ja tötikaka Jesukwe käkwe dre nuaindre?

⁹ Nitre judío nämä ja töi mike jakabätä ye erere nitre ja tötikaka Jesukwe ñaka ja töi mikadre yekäre, rabadre ja di ngwen krubäte ja töi ükatekäre ye nämäne gare Jesús ie. Niebare kwe: “Ñobtä ñan angwane ni bati mikata sribi ngwarbe nuene, ye kwrere nire nire rabadre bäri ütiäte mun  ngätäite abko rabadi ni bati ye kwrere. Erere arato, mun mden rabadre ji dokwäte abko käkwe ja mika ni klabore kwrere” (Luc. 22:26). Ni rabadre ja ngwen “ni bäri bati” erere yekäre ni mada bäri ütiäte ni kräke ye tädre gare nie (Filip. 2:3). Nita ja di ngwen ja töi mikakäre ye erere ngwane, nikwe ñaka ni mada ngwain ngoto ritete.

10. ¿Kukwe meden niebare Pablokwe abokän ni rabadre ketete käre ja töite?

¹⁰ Ja etebatre aune ja ngwaitre ye bäri ütiäte ni kräke kukwe ruärebätä. Kukwe kwin kwetre yebätä nita ja töi mike ngwane tä nemen bäri nuäre ni kräke ja töi mike ye erere. Apóstol Pablo käkwe dre niebare nitre Corintios ie ye nikwe ketadrete ja töite: “¿Nirekwe mun mikani bäri ütiäte ni mda mdakrä? Mun abko ja kwrere ni mda mdabe. ¿Amne jändränta munkwe, ye mden abko Ngöbökwe biani ñakare munye? Jändrän jökrä munkwe abko Ngöbökwe biani munye, ¡ye ño abko nükani ja di jenbti munye, munta nütüre!” (1 Cor. 4:7). Ye medenbätä, nikwe ja ngübadrebiti ne kwe ni ñaka rabadre ja mräkätre töi mike krubäte jabätä o ni abokän bäri ütiäte ni madakrä ye nikwe ñaka nütüdre. Ja mräkä iti tä kukwe kädriere kwin o meri testiko iti tä ja tötika Bibliabätä ye kömike krubäte ye ñaka rabadre ja käikitekä, ñakare aune käre rabadre Jehová käikitekä.

11. Jesukwe kukwe bämikani rei aune ni klabore kwebätä, ¿ye tä dre driere nie?

¹¹ Nitre ja tötikaka Jesukwe yekwe ñaka nitre mada ngwandre ngoto ritete niebare kwe ie, ye bitikäre kukwe keteiti bämikani kwe ie rei aune ni klabore iti kwe yebätä. Ni klabore iti yebiti rürübän ütiä nämäne ere krubäte ñan raba ja ütiä bien jire ye reikwe juani biti ta. Akwa ye bitikäre ni klabore madabiti rürübän ütiä nämäne chi biankäre ni klabore ye arabe ie ñaka juani biti ta kwe. Yebätä ni klabore ye reikwe kitani ngite ñobätä ñan aune ñaka ni klabore mada ye mikani tuin bobre kwe jai yebätä. ¿Kukwe ne tä dre driere nie? Jesukwe niebare: “Ye kwrere arato, mun mräkä mden mden käkwe kukwe nuendre blo mun rüere, akwa munkwe ñan diandre bti ta ja moto kuinbti, ye ngwane ti Rün tä kä käinbti se käkwe ñan mun ngite niara rüere diandrekä jire chi munbtä arato” (Mat. 18:21-35).

12. Ni ñaka tö ngite kitai ta ja mräkätrebiti ye köböite, ¿kukwe tare meden raba nemen bare?

¹² Ni klabore ye käkwe kukwe nuainbare ye köböite kukwe tare ñaka namani bare niara aibe kräke ñakare aune nitre mada mada kräke arato. Ñobätä ñan aune ja töi mikani blo kwe sribi muko kwe kräke aune “kitani ngite kä teri, bti rürümon ütiä ye biandreta jökrä kwe angwane batibe tikadreteta, abkokäre kitani ngite kwe”. Ne madakäre, ni klabore ye käkwe kukwe nuainbare ye matani tare nitre klabore mada mada yebätä arato. Jesukwe niebare: “Sribikä käkwe nuenbare kore, ye abko matani tare sribikä mda mdabtä”. Ye erere arato, nita dre nuainne ye raba kukwe kwin o kukwe käme mike nemen bare ja mräkätre madabätä. Ja mräkä iti käkwe kukwe käme nuaindre nibätä aune ni ñaka tö ngite kitai biti ta ngwane, ¿dre raba nemen bare? Ni raba kukwe tare mike nemen barebätä ñobätä ñan aune ni ñaka tö ngite kitai biti ta, ni ñaka tö ja tare bämikai ie aune ni raba ja töi mike ñaka blite ben. Ne madakäre, ni ñaka tä jäme ja mräkä madabe ye jutuai ja mräkätre konkrekasionte ie ye ngwane, ja ñaka rabai ruin kwin ietre.

13. ¿Kukwe namani bare prekursora itibätä ye tä dre driere nie?

¹³ Nita ngite juen ta ja mräkätrebiti ye tä kukwe kwin mike nemen bare ni kräke aune jata nemen ruin kwin ja mräkätre mada ie. Kukwe ye erere namani bare prekursora itibätä abokän nibike kädeke Crystal. Meri testiko iti köböite ja ñaka nämäne nemen ruin kwin konkrekasionte ie mikata gare kwe: “Ni tikaka ngitrabiti ye kwrere kukwe nie nämä kwe ye nämä mate tibätä. Nun nämä niken kukwe driere ngwane nun mikadre karo arabe te ye ie niara ñaka tö nämä. Ti ñaka tö jataba  kukwe driei aune kä ñaka jataba juto tibätä”. Kukwe nämäne Crystal ie rabakäre rubun nämä nemen ruin ie akwa ja töi mikani kwe ñaka nemen rubun aune ja mike tuin bobre jai. Niarakwe töi bobrebiti kukwe nieta La Atalaya 15 octubre 1999 abokän kädekata “Perdonemos de Corazón” ye mikani täte kwe. Aune ngite kitani ta kwe meri testiko yebiti aune tä niere: “Ni jökrä tä ja di ngwen dän bitin ye kitakäre jabätä aune köbö kwatire kwatire te Jehovata ngite juen ta nibiti töi kwinbiti nükanina gare tie. Tribe doboko ye kwrere tikwe dianinanka jabiti ruin tie aune kä nienanta juto tibätä”.

14. a) Mateo 18:21, 22 tä niere erere, ¿kukwe meden ben Apóstol Pedro nämäne ja tuin aune kukwe meden niebare Jesukwe ye tä dre driere mäi? b) ¿Kukwe ye kwrere ben nikwe ja tuadre ngwane dre raba ni dimike?

¹⁴ Ni rabadre ngite juen ta ja mräkätrebiti ye gare nie, akwa ruäre ngwane ñaka tä nemen nuäre ni kräke. Kukwe ye kwrere nämä nemen bare apóstol Pedrobätä ruäre ngwane arato (ñäkädre Mateo 18:21, 22 yebätä). ¿Dre raba ni dimike? Kena, Jehovakwe ngite juanina ta bäbe nibiti yebätä nikwe töbikadretari (Mat. 18:32, 33). Niarakwe ñaka ngite juandre ta nibiti akwa niarata ngite juen ta nibiti töi kwinbiti (Sal. 103:8-10). Ne madakäre, “ni jökrä rabadre ja tarere kwärikwäri”. Aisete nikwe ngite juandre ta ja mräkätrebiti o ñakare yebätä ni ñaka töbikadretari krubäte ñakare aune nikwe ngite juandre ta ja mräkätrebiti (1 Juan 4:11). Kukwe ketebukäre raba ni dimike ye abokän nita ngite juen ta ja mräkätrebiti ngwane dre tä nemen bare yebätä ni raba töbiketari. Ja mräkä tä kukwe tare nuainne nibätä ye nita dimike, nita konkrekasion dimike nemen keteitibe, nita ja kete Jehovabe ye nita kriemike aune tribe doboko ye kwrere nita denkä ja kötärä (2 Cor. 2:7; Col. 3:14). Kukwe ketamäkäre ye abokän ni rabadre orare Jehovai, ñobätä ñan aune nikwe ngite kitadre ni madabiti ta ye niara tä ribere nie. Ni ñaka rabadre Satana tuenmetre ja töi mike nemen rubun ja mräkätre kräke ne kwe kä tädre jäme jankunu konkrekasionte (Efes. 4:26, 27). Jehovakwe ni dimikadre ne kwe ni ñaka rakadre kö okwä yete Satana ie ye nita ribere jai.

15. Colosenses 3:13 tä niere erere ja eteba o ja ngwai käkwe kukwe nuaindre abokän matadre tare nibätä ngwane, ¿ni rabadre dre nuainne?

¹⁵ Ja mräkä iti käkwe kukwe tare nuaindre nibätä ngwane, ¿nikwe dre nuaindre? Ye ngwane nikwe ja töi mikadre nünankäre jäme ben. Nikwe oradre Jehovai aune ja ruin ño nie ye nikwe mikadre gare jökrä ie. Ja mräkä käkwe kukwe tare nuainbare nibätä ye kräke Jehovakwe kukwe kwin nuaindre aune kukwe kwin meden jutuabare Jehovai niarabätä bätä ütiäte kräke ye erere rabadre ni kräke arato ye nikwe ribedre ie (Luc. 6:28). Ja mräkä käkwe kukwe nuainbare ni rüere yebiti ni ñaka raba ngite juen ta raba ruin nie ngwane, ni raba blite ño ben yebätä nikwe töbikadretari. Niara ñaka kukwe tare nuainbare nierare nibätä yebätä nikwe ja töi mikadre ye bäri kwin (Mat. 5:23, 24; 1 Cor. 13:7). Nita blite ben ngwane ni ñaka tö töbikai blobätä käne. Akwa niara ñaka tö kukwe ükaite ngwane, ¿ni raba dre nuainne? Biblia tä mike gare: “Ni mda mda tä kukwe nuene mun rüere ne ngwane, munkwe ñan ja ngie mika”. Ja mräkä ye ñaka ja töi ükaite jire ye nikwe ñaka nütüdre aune nikwe ngübadre bätärekä (ñäkädre Colosenses 3:13 yebätä). Nikwe ñaka ja töi mikadre nemen rubun jankunu kräke ñobätä ñan aune nikwe ñaka ye erere nuaindi ngwane ni ñaka ja ketai kwin Jehovabe. Ni mada mada tä kukwe nuainne ye nikwe ñaka tuadremetre ja ngwen ngoto ritete. Nita ye erere nuainne ngwane kukwe ñokwä yebiti ta Jehová tare nikwe ye nikwe bämikai (Sal. 119:165).

16. ¿Kukwe meden tä nuaindre ni itire itire ie?

¹⁶ ¡Nita sribire Jehová kräke oveja keteitibe kwrere aune ni oveja ngübaka itibe tä ni jie ngwen ye ütiäte krubäte ni kräke! (Juan 10:16). Tärä Organizados para hacer la voluntad de Jehová página 165 tä mike gare: “Ni jökrä rabadre ja di ngwen ne kwe konkrekasion tädre keteitibe”. Aune tä mike gare arato: “Ja mräkätre tuin ño Jehovai ye erere nikwe mikai tuin jai ngwane ni täi jäme ja mräkätre ben”. Ni tuin “ngäbäkre kia” kwe kwrere ie aune ni ütiäte krubäte kräke. Aune nikwe ja mräkätre ye mikadre tuin ye erere jai arato. Nita ja di ngwen ja mräkätre dimikakäre aune ngübakäre ye tuin Jehovai aune ütiäte krubäte kräke (Mat. 10:42).

17. ¿Ni tö ja töi mikai kwatibe dre nuainne?

¹⁷ Nita ja mräkätre jökrä tarere. Yebätä ni tö ja töi mikai kwatibe ñan kukwe mike “ni mräkä tödekaka Jesubti ye jiete” (Rom. 14:13). Ja mräkätre ye bäri ütiäte ni kräke ye erere nikwe mikadre tuin jai aune ni tö ngite kitai ta niaratrebiti ja brukwä tätebiti. Ja mräkätre tä dre nuainne ye nikwe ñaka tuadremetre ja ngwen ngoto ritete. Ñakare aune “jändrän jökrä käta ni die mike nüne jäme jabe kwärikwäri amne tä ni die mike gwaire jökrä, ye abko ari känentari bäri ja käne” (Rom. 14:19).