“Kukwe kwin nuaindre” ye käkwe ni töi mikadre kukwe nuainkäre
KUKWE meden namani tuin kwin krubäte Lisa * ie kukwe metre yebätä ye mikata gare krörö kwe: “Ja mräkätre nämä ja ngwen kwin jabe kwärikwäri ye käkwe ti töi mikaba niä”. Kukwe ye erere nakaninkä Annebätä arato. Niara tä niere: “Nitre testiko nämä ja tare bämike jai ye rababa tuin bäri ütiäte tie kukwe drie nämä kwetre yebätä”. Ñäkädre Bibliabätä aune töbikadretaribätä ye tuin kwin krubäte meritre testiko ne ie kä nengwane, akwa ja ngwani kwin bentre aune ja tare bämikani ietre ye käkwe niaratre dimikani.
Ni raba ja ngwen ño kwin aune matadre kwin ni madabätä yekäre, ¿nikwe dre nuaindre? Kukwe ketebubiti raba nemen bare nie ye ani mike gare jai. Kena, kukwe nieta nikwe yebiti. Ketebu, ja ngwanta ño nikwe yebiti. Biti, nire ben ni raba ja ngwen kwin aune ja tare bämike ye nikwe mikai gare jai.
NIKWE BLITADRE “KUKWE KWIN” YE EREREBÄTÄ
Proverbios kapitulo 31 yete blitata meri töi kwin ja mäkäninte yebätä aune “kukwe kwin nuaindre ye tä tidräte” mikata garebätä (Prov. 31:26). Kukwe nieta kwe aune nieta ño kwe ye tä nuainne kukwe nieta yete ye ererebätä. Nitre rüne tä blite monsotre kwetre ben ngwane, rabadre kukwe ye erere nuainne arato. Nitre rüne tä blite rubune monsotre kwe ben ngwane, tä nemen tare monsotre kwe ie ye gare niaratre kwati ie. Nitre rüne ñaka blite krubäte aune ñaka monsotre kwetre töi mike nüke gare jai ngwane, monsotre ñaka raba kain ngäbiti kwin. Akwa ja tare bämikadi kwetre monsotre ie aune blitai töi kwinbiti kwe bentre ngwane, rabai bäri nuäre monsotre kräke kukwe nuakäre aune kukwei mikakäre täte.
Ni rüne o ñakare, ¿akwa kukwe kwin ye ererebätä ni raba blite ño? Proverbios 31:26 kena yete ye raba ni dimike. Yete nieta: “Ni töbätä erere blitata kwe”. Nikwe dre niedi aune nikwe niedi ño yebätä nikwe töbikadre ye meden gärätä. Nitre tä rubun ngwane ni raba kukwe ne erere ngwentari jai: “¿Tikwe kukwe niedi ye käkwe mikai bäri rubun o dimikai nemen töi jäme?” (Prov. 15:1). Erametre, ni jämi blite ye känenkri nikwe töbikadre kwin kukwe nieta nikwe yebätä ngwane nita ja ngwen töbätä.
Proverbios mada tä kukwe niere krörö: “Blitata okwä kware ye ngitrabiti ni nuainta tare ye kwrere” (Prov. 12:18). Nikwe dre niedi aune nikwe niedi ño yebätä nikwe töbikaitari kwin käne ngwane, nikwe dre niedi yebätä nikwe ja ngübaibiti. “Kukwe kwin” ye ererebätä nikwe blitadi ngwane, kukwe käme aune tare ye nikwe ñaka niedi (Efes. 4:31, 32). Ni töi aune kukwe käme nieta nikwe ye nikwe kwitai töi kwin aune blita jäme yebätä. Kukwe jökrä nekänti Jehovata kukwe kwin bämike ni käne. Kä jürä nämäne krubäte ni Ngöbö mikaka täte Eliasbätä ngwane, ángel Jehovakwe ‘käkwe blitabare jäme aune tiebe’ niara dimikakäre (1 Rey. 19:12). Akwa ni töi kwin ye nikwe ñaka bämikadre kukwe nieta nikwe ye aibebiti. Ñakare aune, ja ngwanta ño nikwe yebiti. Nuain raba ño ye ani mike gare jai.
NIKWE JA NGWANDRE KWIN MATADRE KWIN NITREBÄTÄ YEKÄRE
Ja ngwandre Jehová erere ye abokän kukwe kwin niedre aune kukwe kwin nuaindre nitre mada kräke (Efes. 4:32; 5:1, 2). Nitre testiko töi kwin ye Lisa, abokän kädrite párrafo kena yete ye käkwe tuabare ja okwä jeñebiti. Niara tä niere: “Bati, jötrö ngwarbe nunkwe ja kwitadre ju madate ngwane, nitre ja mäkäninte testiko nibu käkwe kä diankaba ngwarbe jai sribi käite nun dimikakäre tribe ükete. Aune ye ngwane ti jämi ja tötika Bibliabätä kömike”. Kukwe kwin nuainbare kwetre ye käkwe Lisa töi mikani kukwe metre ye mikabätä gare bäri jai.
Nitre testiko tä ja töi mike kwin ye jutuabare Anne ie, abokän kädrite párrafo kena yete arato. Niara tä niere: “Nitre kä nebätä kite ja ngwen bäri käme kä nengwane. Ye medenbätä, ti ñaka nämä tö ngwen nitre ie aune ñaka nämä nemen nuäre ti kräke. Dre töire nitre testiko nämä kukwe nuainne yebätä ti nämä töbike krubäte. Aune ñobätä nämä kukwe kwin nuainne ti kräke ye ti nämä ngwentari jai. Akwa ni ti tötikaka Bibliabätä ye nämä ti tarere töi bökänbiti ye rükaba gare tie, ye köböire ti jataba tö ngwen ie”. ¿Kukwe ye matani ñobätä? Niara tä niere: “Kä rikaba ta ye bitikäre, drebätä ti nämä ja tötike yebätä ti jataba ja töi mike bäri”.
Nitre testiko ja töi mikani kwin aune kukwe kwin nuainbare ye namani tuin ütiäte krubäte meritre testiko nibu ne ie ye tä ni töi mike niä. Kukwe ye käkwe niaratre töi mikani kukwe metre ye mike gare bäri jai. Ja mräkätre
konkrekasionte käkwe ja töi mikani kwin aune kukwe kwin nuainbare kwetre, ye käkwe niaratre dimikani tö ngwen bäri juta Ngöbökwe ie.JEHOVÁ TÖI KWIN YE NIKWE BÄMIKADRE NI MADAI
Kötadre aune ja töi mikadre kwin ye nemen bäri nuäre nitre ruäre kräke ñobätä ñan aune nierare niaratre kore o tä nüne medente yete nitre tä ja ngwen ye erere. Kukwe ye kwin krubäte. Akwa ye aibe köböire nita ja ngwen kore ngwane, Jehová töi kwin ye ni ñaka tä bämike (Hechos 28:2 mikadre ñärärä).
Erametre, nita ja töi mike kwin aune ja ngwen kwin ni madabe ye üai deme Ngöbökwe tä ni töi mike kore (Gál. 5:22, 23). Ni tö ja ngwain Jehová aune Jesús ererebätä ni tö töi kwin ne bämikai ngwane, ni rabadre üai deme ye tuenmetre sribire ja töite aune nita ja ngwen ño yebätä. Aune nita näin Jesús jiebiti, yebätä ni rabadre ja töi mike bökän ni madabätä ñobätä ñan aune nita Jehová aune ni mada tarere. Ja tare ye tä ni töi mike kukwe nuainkäre ngwane, töi bökänbiti nita ja töi mike kwin aune ja ngwen kwin ni madabe, ye kwin krubäte aune tä kä mike juto Jehovabätä.
NIRE KRÄKE NIKWE JA TÖI MIKADRE KWIN AUNE JA NGWANDRE KWIN
Tä nemen bäri nuäre ni kräke ja ngwankäre kwin ni gare nie aune nire käkwe ja töi mikani kwin ni kräke yebe (2 Sam. 2:6). Kukwe nuainta kwetre yebätä nita debe bien krubäte (Col. 3:15). Akwa nikwe ñaka ja töi mikadre kwin ni iti kräke rabadre ruin nie ngwane, ¿dre raba nemen bare?
Ani töbike kukwe nebätä. Ñaka ja töi mikadre kwin nitre kräke akwa Ngöböta nuainne. Aune ni mada ñaka ye erere nuainne jire. Kukwe yebätä Biblia tä kukwe ütiäte driere nie. Kukwe tikani griegore yebätä kukwe ñaka nuain bä ni kräke akwa nuainta ni kräke ye kädekateta bä kabre. ¿Ngöböta kukwe ne bämike ño?
Nitre kwati krubäte tä dre dre ribere jai ye Jehovata bien ie, yebiti tä ja töi kwin bämike ietre yebätä ni raba töbike (Mat. 5:45). Ne madakäre, niara jämi gare nie ye känenkri nämänena ja töi kwin ye bämike nie (Efes. 2:4, 5, 8). Ñodre, jondron bäri ütiäte nämäne kwe ye biani kwe ni jökrä ütiäre, ye abokän monso ngöräbe kwe. Kukwe nuain ñaka bä ni kräke akwa nuainta Ngöbökwe ni kräke, ye köböire Jesukwe ja nire biani yebätä kukwe kwin raba nemen nikwe mikani gare Pablokwe (Efes. 1:7, TNM). Ne madakäre, nita ja mike ngite Ngöbö rüere aune nita mike ulire, akwa yebiti ta tä ni jie ngwen jankunu. Töi kwinbiti tä kukwe driere aune kukwe niere nie ye ñü ye kwrere (Deut. 32:2). Kukwe kwin nuainta kwe ni kräke ye ni ñaka raba ütiä bien jire ie aune metrere kukwe kwin rabai bare ja känenkäre ye abokän niara töi kwin ye köböire (1 Pedro 1:13 mikadre ñärärä).
Jehová töi kwin ye tä ni töi mike nökrö niara ken aune tä ni töi mike kukwe nuainne, ¿ñan ererea? Ye medenbätä, ni ñaka tö ja töi mikai kwin nitre ruäre aibe kräke. Ñakare aune, Jehovata ja töi mike ño ni mada kräke ye erere ni tö ja di ngwain nuainkäre (1 Tes. 5:15). Käre nikwe ja töi mikai kwin ni mada kräke ngwane, kä tibo ye ngwane ñukwä okwä bukakata ye kwrere ni rabai ni mada kräke. Ni mräkätre jeñe nikwe, ja mräkätre konkrekasionte, nitre sribikä nibe aune nitre nünanka ni bäre ye ie ja rabai ruin kwin ni ken.
¿Mä mräkä o ja mräkä tärä iti konkrekasionte abokän kräke mä raba ja töi kwin o kukwe kwin niere ie? Ñodre, ja mräkä konkrekasionte kräke ju ngübadre, kä ükadrete jubäre, jänrikadre jondron kökö o jänrikadre kä mada mada känti ye tä ribere jai raba ruin nie. ¿Töi kwin ye ni raba bämike ño kukwe driekänti? Nire tä ja di ribere ye dimikadre.
Nikwe ja ngwandre käre Jehová erere, kukwe nieta nikwe aune nita ja ngwen ño ye nikwe nuaindre “kukwe kwin” ye ererebätä.
^ Nitre kä kwitani.