KUKWE JA TÖTIKARA 27
“Mäkwe tö ngwan Jehovai”
“Mäkwe tö ngwan Jehovai; mäkwe ja ngwan dite aune mäkwe ja brukwä mika dite” (SAL. 27:14).
KANTIKO 128 Nikwe kä ngwandre nüke jai nükebe mrä
KUKWE NEBÄTÄ JA TÖTIKAI *
1. a) ¿Tödekara meden Jehovata bien nie? b) ¿Nita tödeke Jehovai ye ni raba bämike ño? (Nota mikadre ñärärä).
NI JÖKRÄ tä tödeke Jehovai ye ie niara tä kukwe kwin käbämike. Bren, ja muaita, gata ye niara kebera denkä (Apoc. 21:3, 4). Ni jökrä töi kwin tä Jehová mike täte ye niarakwe dimikadi kä tibien ne kwite bä nuäre krubäte (Sal. 37:9-11). Aune nita ja kete Jehovabe kä nengwane, akwa ja känenkäre ni itire itire rabadi ja kete bäri kwin Jehovabe. ¡Tödekara bä nuäre krubäte! Ye medenbätä, kukwe käbämikata Ngöbökwe aune mikadi nemen bare metre kwe, ¿ye ñobätä nita tö ngwen ie? Ñobätä ñan aune, käre tä ja kukwei mike nemen bare. Aisete kukwe tärä nie tö ngwankäre Jehovai (Sal. 27:14). * ¿Kukwe käbämikata kwe ye ie nita tö ngwen ye nita bämike ño? Kukwe käbämikata kwe ye mikai nemen bare täte kwe ye ngübare bätärekä aune kä jutobiti (Is. 55:10, 11).
2. ¿Jehovakwe dre nuainbarera?
2 Jehovata kukwe niere ye tä mike nemen bare metre ye bämikanina kwe. Ñodre, keteiti ütiäte ye ani mike ñärärä. Ni bätäkä ngwarbe aune ni nünanka juta bätäkä ngwarbe tädi keteitibe aune kukwe metre mike täte kä nengwane ye mikani gare kwe tärä Apocalipsis yebätä. Nitre tädi keteitibe ye kädekata kä nengwane ni “nämä kwati kwati krubäte” (Apoc. 7:9, 10). Nitre kwati ye ngätäite nitre brare, merire, monsotre, nitre nünanka kä jene jene känti, blite jene tätre nüne keteitibe aune jäme (Sal. 133:1; Juan 10:16). Ne madakäre, tä kukwe driere kä jutobiti, tödekara tä kwetre kä ja känenkäre kwin ie yebätä tä blite nitre meden tö kukwe nuai ye ie (Mat. 28:19, 20; Apoc. 14:6, 7; 22:17). Mäta nitre kwati ne ngätäite ngwane, tödekara ne ütiäte krubäte mä kräke raba ruin nunye.
3. ¿Satana tö dre nuainbätä?
3 Tödekara tä nikwe ye Satana tö diainkä nikän. Jehová ñaka töita nibätä aune kukwe käbämikata kwe ye ñaka mikadi nemen bare kwe, ye erere nikwe töbikadre ie Satana tö. Satanakwe tödeka nikwe diainkä nikän ngwane, ni ñan rabadi dite aune nikwe ñaka Jehová mikadi täte jankunu. Tödekara nämäne Jobkwe ye Satana tö namani diainkä kän ne kwe ñaka rabadre Jehová mike täte jankunu ye rabadi gare nie.
4. ¿Dre rabadi gare nie kukwe ja tötikara nekänti? (Job 1:9-12).
4 Kukwe meden meden nuainbare Satanakwe ne kwe Job ñaka ja ngwandre metre Jehovai ye rabai gare nie kukwe ja tötikara nekänti (ñäkädre Job 1:9-12 yebätä). * Job kukwe kwin bämikani yebätä dre raba nemen gare nie aune Jehovata ni tarere aune kukwe käbämikata kwe ye mikadi nemen bare kwe ye nikwe ngwandre törö jai, ye ñobätä ütiäte krubäte ye rabai gare nie kukwe ja tötikara nekänti arato.
TÖDEKARA NÄMÄNE JOBKWE YE SATANAKWE JA DI NGWANI DIANKAKÄRE KÄN
5, 6. ¿Dre namani bare jötrö ngwarbe Jobbätä?
5 Job nämäne kwin aune ja kete kwin Jehovabe, mräkätre nämäne kabre kwe aune nämäne nüne jäme, jondron nämäne ere kwe arato (Job 1:1-5). Akwa köböitibe jondron nämäne kwe ye nianinte bäsi jökrä kän (Job 1:13-17). Ñodre, jondron nämäne kwe ye nianinte kän, monso ni jätä kwe tu neketani. Ani töbike ken Job yebätä. Nitre rüne kän monso iti tä krüte ngwane, brukwä tä nötöte, ye erere Job aune muko kwe kän monso ni jätä tu neketani ye ngwane, namani ulire krubäte aune brukwä nötaninte. ¡Job namani ulire, yebätä dän ötaninte jabätä kwe aune nikani ngitiekä ngükodokwäbiti tibien, ñobätä nuainbare kwe nemen gare! (Job 1:18-20).
6 Bitikäre, Satanakwe Job mikani bren aune bämikani käme kwe nitre okwäbiti (Job 2:6-8; 7:5). Nitre nämäne Job känene krubäte mäträkäre jabätä aune mika nämäne tuin ütiäte jai (Job 31:18). Akwa nengwane kä mikaninkäbätä aune ñan töibika namani. Mräkätre kwe, ja ketamuko kwin kwe aune sribikä kwe ñan namani kai ngäbiti mada (Job 19:13, 14, 16).
Kukwe tare namani bare Jobbätä ye nüke gare kwin ja mräkätre kwati ie nengwane (Párrafo 7 mikadre ñärärä) *
7. a) ¿Ñobätä kukwe tare nämäne nemen bare Jobbätä nütübare kwe aune ja töi mikani kwatibe kwe dre nuainne? b) ¿Kukwe tare ben Jobkwe ja tuani ye erere ben ni kristiano raba ja tuin? (Üai párrafo 7 kräke mikadre ñärärä).
7 Jehová ñan nämäne Job kain ngäbiti ye niara rabadre nütüre yekäre, Satanakwe murie kri mikani mate kä känti monsotre Jobkwe nämäne kä ngwen juto jabätä yekänti aune niaratre jökrä murie ketani (Job 1:18, 19). Ñukwä kä kwinbiti mikani näkäin kä tibienbätä kwe jondron nire Jobkwe ye ñan aibe murie ketakäre, ñakare aune nitre sribikä ye murie ketakäre arato (Job 1:16). Murie kri aune ñukwä kä kwinbiti ye ñan namani bare ja töbiti ye nükani gare Job ie. Job ñaka kukwe kwin nuainbare Jehová okwäbiti yebätä Jehová nämäne kukwe ye mike nemen bare namani nütüre. Akwa yebiti ta, niara ñaka ja töi mikani kukwe käme niere Jehovabätä. Jehovakwe kukwe kwin keta kabre Jehová nuainbarera kräke ye niarakwe kani ngäbiti aune ye erere arato kukwe käme ye niarakwe kadre ngäbiti niebare kwe. Yebätä niebare kwe: “Jehová käikitadrekä jankunu” (Job 1:20, 21; 2:10). Job mikani ja tare nike ngrabarebiti, ja töibiti aune jondron ñan namani kwe, akwa yebiti ta niarakwe ja töi mikani jankunu ja ngwen metre Jehovai. Satana ñaka ja di ngwani nekä.
8. ¿Kukwe meden mada nuainbare Satanakwe Job rüere?
8 Kukwe mada tare nuainbare Satanakwe Job rüere. Job ñaka ütiäte ye rabadre ruin ie yekäre, ja ketamuko nimä Jobkwe ñaka metre yebiti Satanakwe nuainbare. Jobkwe kukwe käme nuainbare yebätä kukwe tare nämäne nemen barebätä ye niaratrekwe niebare ie (Job 22:5-9). Niarakwe ñaka kukwe käme nuaindre aune ja di ngwandre krubäte kwe kukwe kwin nuainne, akwa yebiti ta ñaka raba kä mike juto Jehovabätä ye Job rabadre nütüre, ie niaratre tö namani arato (Job 4:18; 22:2, 3; 25:4). Jehová ñaka nämäne Job tarere, ngübare aune Jehová mikadre täte ye ñaka tä kä mike juto nibätä ye Job rabadre nütüre, ye ie niaratre tö namani. Kukwe tare nämäne nemen bare Jobbätä ne ñaka raba nemen ükaninte, Jobkwe nütübare kukwe niebare ie yebiti raba ruin nie.
9. ¿Dre käkwe ja di biani Job ie aune mikani dite?
9 Ani kukwe ye bämike ja töite. Job tä täkäni ngübrünte ja tare nike dibire rare. Ja ketamukotre kwe tä kukwe tare niere ie ne kwe bä rabadre käme. (Job 2:8). Kukwe keta kabre tä nemen bare Jobbätä nebätä tä nemen ulire krubäte aune monso kwe murie ketani yebätä brukwä tä nötöte arato. Kenanbe tä käbube (Job 2:13–3:1). Tä käbube yebätä ñaka Jehová mikadi täte jankunu kwe ja ketamukotre kwe tä nütüre, akwa ngwarbe töbikata kwetre. Job tä ja ketamuko kwe mike ñärärä aune tä niere ie: “¡Tikwe ja ngwain metre Ngöböi, nememe ti krütai ye ngwane!” (Job 27:5). Kukwe tare nämäne nemen bare Jobbätä ngwane, ¿ñobätä di nämäne jankunu aune ja ngwani dite kwe? Ñobätä ñan aune kukwe tare nämäne nemen barebätä ye ngwane, Rün kwe tarekä käkwe dimikai ye ie nämäne tö ngwen kwatibe. Krütadre, akwa Jehovakwe ja nire biainta ie ye nämene gare ie (Job 14:13-15).
NI RABA JA NGWEN ÑO JOB ERERE
10. ¿Kukwe namani bare Jobbätä ne tä dre driere nie?
10 Satana ñaka raba ni mike ja dibiti ñaka Jehová mike täte aune dre dre tä nemen bare nibätä ye gare jökrä Jehovai, ye kukwe namani bare Jobbätä ne tä mike gare nie. Job nünanbare ño aune kukwe bämikani kwe, yebätä kukwe ütiäte mada raba nemen gare nie. Ruäre ye ani mike gare jai.
11. Käre nikwe tö ngwain kwatibe Jehovai ngwane, ¿dre tädre gare metre nie? (Santiago 4:7).
11 Nikwe tö ngwandi Jehovai ngwane, kukwe tare ñokwa ben nikwe ja tuadi, akwa nikwe kä ngwandi nüke jai aune ja mikadi Satana rüere ye kukwe namani bare Jobbätä ne tä mike gare nie. ¿Ye köböire dre raba nemen bare? Biblia tä mike gare Satana gitiadi nibätä (ñäkädre Santiago 4:7 yebätä).
12. ¿Nitre gaikröta ye ie Job nämäne tö ngwen ye käkwe dimikani ño?
12 Nitre gaikröta ye ie tödekadre kwatibe. Kukwe ja tötikara känebätä nikwe mikaba gare jai ye erere, gata ye jüräta nemen nibätä yebiti Satana tä ni töi mike ñaka Jehová mike täte jankunu. Kukwe namani bare Jobbätä yebätä ani töbike. Niara ñaka Jehová mikadi täte aune kukwe ñokwa nuaindi kwe ne kwe ñaka krütadre ye Satanakwe niebare. ¡Akwa ngwarbe töbikabare kwe! Kukwe tare kri ben ja tuani Jobkwe aune bäsi krütani, akwa niara ñaka Jehová tuanimetre. ¿Ño köböire kä ngwani nüke krubäte kwe jai? Ñobätä ñan aune Jehová ye töi kwin aune ja känenkäre kukwe jökrä ükaite kwe ye ie niara nämäne tö ngwen kwatibe. Jehová ñan Job dimikai nämäne nire ye ngwane, akwa ja känenkäre raba ja nire bienta ie ye ie nämäne tö ngwen kwatibe. Nitre gaikröta ye nämäne metre Job kräke. Ye erere nikwe tö ngwandi ngwane, ni rä ötai akwa yebiti ta nikwe ja ngwandi metre käre Jehovai.
13. Kukwe meden nuainbare Satanakwe Job rüere ye nikwe mikadre gare jai, ¿ye ñobätä ütiäte krubäte?
13 Kukwe meden meden nuainbare Satanakwe Job rüere yebätä nikwe töbikadre ye ütiäte krubäte, ñobätä ñan aune kukwe ye erere tä niere ni jökrä rüere. Kukwe meden niebare kwe Job rüere aune ye erere niebare kwe ni jökrä rüere ye ani mike gare jai. Niebare kwe: “Ni nire käkwe jondron jökrä kwe ye biain ja nire kwe mikakäre kwäre” (Job 2:4, 5). Ni ñaka tä Jehová tarere ja brukwä tätebiti aune ni rä ötai ngwane, ni ñaka Jehová mikai täte jankunu ye Satana tö namani mikai gare. Jehová ñan tä ni tarere aune nita kukwe nuainne ye ñan ütiäte Jehová kräke ye Satana tä niere. Nire nire tä tö ngwen kwatibe Jehovai ye Satana ñaka raba ngökö, ñobätä ñan aune kukwe meden nuainta kwe ni rüere ye garera nie.
14. Nita ja tuin kukwe tare ben ngwane, ¿dre raba nemen gare jabätä nie aune kukwe bämikata meden raba ni dimike kukwe ne mike nüke gare jai?
14 Kukwe tare tä nemen bare nibätä yebiti ni raba ja trä tuin. Jobkwe ja tuani kukwe tare ben ngwane, rabadre ja töi ükete kukwe ruäre känti ye namani gare jabätä ie. Ñodre, rabadre ja töi mike bobre (Job 42:3). Ye erere arato, kukwe tare rabadre bare nibätä ngwane, kukwe ruäre känti ni raba ja töi ükete ye raba nemen gare nie. Kukwe ye erere namani bare Nikolaibätä, * niara nämäne bren krubäte, akwa kitani ngite. Niara tä niere: “Ni kitata ngite ngwane, nita niken doctor känti ja trä tuin ye kwrere; ni kristiano töita ño ye raba nemen gare ie”. Kukwe meden känti ni ñaka dite tä nüke gare jabätä nie ngwane, ni raba ja töi ükete.
15. ¿Nikwe nire kukwe nuadre aune ñobätä?
15 Nikwe ñaka ni rüe ye kukwe nuadre, ñakare aune Jehová kukwe nuadre. Jehová blitabare Job ben ngwane, Jobkwe kukwe nuabare kwin. Mikakäre töbike, Jehovakwe kukwe ne kwrere ngwanintari ie: “¿Jondron jökrä sribebare tikwe yebätä mäkwe ti die tuanina? Jondron jökrä gare tie. ¿Ti ñan raba mä ngübare ruin mäi?”. Job nämäne debe bien kukwe kwin Jehová nuainbare kräke yebätä aune töi bobrebiti Jehová kukwei kani ngäbiti krörö kwe: “Mäbätä blitarera ti olote, akwa nengwane mä tuin ja okwä jeñebiti tie” (Job 42:5). Job nämäne täkäni ngübrünte känime ngwane kukwe ne niebare kwe raba ruin nie aune kwata träinträin jökrä aune monsotre kwe krütani ye muai nämene kwe. Kukwe tare ye näire Jehová nämäne Job tarere aune kain ngäbiti ye mikani gare metre kwe Job ie (Job 42:7, 8).
16. Isaías 49:15, 16 tä niere erere, ¿nita ja tuin kukwe tare ben ngwane nikwe dre ngwandre törö jai?
16 Kä nengwane, nitre raba kukwe tare niere nibätä aune ni ñaka ütiäte ye erere raba ni mike tuin jai. Ni aune juta Jehovakwe bämikakäre käme, niaratre “tä kukwe käme bätäkä ngwarbe” niere ni rüere (Mat. 5:11). Nikwe ja tuadi kukwe tare ben ngwane, ni raba ja ngwen metre yei Jehovata tö ngwen, ye kukwe namani bare Jobbätä tä driere nie. Jehovata ni tarere aune nire nire tä tö ngwen ie ye niara ñaka käi kwitaikä jabiti (ñäkädre Isaías 49:15, 16 yebätä). * Nitre ja mikaka Ngöbö rüere tä kukwe ngwarbe niere ye nikwe ñaka töibikadre. Ja mräkä kädekata James, nünanka Turquía yebätä ani blite. Niara aune mräkätre kwe käkwe ja tuani kukwe tare ben, tä niere: “Kukwe ngwarbe nie nämä juta Ngöbökwe yebätä, yebätä nunkwe ja töi mikadre, nun di riaikä ye rababa gare nunye. Yebätä nunkwe ja töi mikaba kwatibe Gobran Ngöbökwe yebätä aune nunkwe kukwe ja üaire mikaba nuaindre jai ye köböire kä nämä juto käre nunbätä”. Kukwe bämikani Jobkwe ye erere ni raba nuainne, käre Jehová kukwe nuadre. ¡Nitre ja mikaka ni rüere tä kukwe ngwarbe niere ye käkwe ñaka tödeka nikwe diandrekä nikän!
TÖDEKARA YE KÄKWE NI DIMIKAI KÄ NGWEN NÜKE JAI
Job ja ngwani metre yebätä Jehovakwe kukwe kwin keta kabre mikani nemen bare kräke. Job aune muko kwe ye Jehovakwe mikani nüne kä jutobiti aune kä kwati te. (Párrafo 17 mikadre ñärärä) *
17. Nitre brare aune merire ja ngwanka metre kädekateta Hebreo kapitulo 11 yete, ¿yebätä dre raba nemen gare nie?
17 Job ye ñan aibe käkwe ja ngwani dite aune kä ngwani nüke jai kukwe tare ye näire. Ñakare aune, Pablokwe kukwe tikabare nitre hebreo ie ye ngwane, nitre kwati ja ngwanka metre Ngöböi ye kädekaninte kwe, niaratre ye abokän “testiko kri krubäte tä ni bäre ta müta kwrere” niebare kwe (Heb. 12:1, NGT). Niaratre ja tuani kukwe tare krubäte ben, akwa käre ja ngwani metre kwe Jehovai (Heb. 11:36-40). ¿Ngwarbekäre niaratre ja ngwani dite aune kä ngwani nüke jai? Ñakare. Ngöbökwe kukwe käbämikani ye ñaka namani bare niaratre kräke, akwa käre tö ngwani kwe Jehovai. Aune Jehová nämäne kain ngäbiti yebätä Jehová raba kukwe käbämikani ye mike nemen bare, ye ie niaratre nämäne tö ngwen kwatibe (Heb. 11:4, 5). Kukwe nuainbare kwetre yebätä nikwe töbikadre ngwane, raba ni dimike tö ngwen kwatibe käre Jehovai.
18. ¿Kukwe ñokwa rakadrekä akwa yebiti ta nikwe dre nuaindre? (Hebreos 11:6).
18 Nitre kite ja ngwen bäri käme (2 Tim. 3:13). Satana tä ja di ngwen nitre ja ngwanka metre Ngöböi ye nuinte kukwe tare yebiti. Kukwe ñokwa rabadi bare ja känenkäre akwa nikwe ja töi mikadre kwatibe sribikäre ja brukwä tätebiti Ngöbö kräke, ñobätä ñan aune “Ngöbö nire, bti nita tödeke” yebätä (1 Tim. 4:10). “Ngöbö abko moto kuin nikrä amne nita nebe ruentari tare ie” ye nemen gare metre nie kukwe namani bare mräkäre Jobbätä yebiti (Sant. 5:11). Job erere nikwe ja ngwandre metre käre Jehovai ñobätä ñan aune nire tä niara känene, ye kräke niarakwe kukwe kwin mikadi nemen bare gare nie yebätä (ñäkädre Hebreos 11:6 yebätä).
KANTIKO 150 Jehovakwe mä mikai kwäre
^ Ni iti käkwe ja tuani kukwe tare ben yebätä nita töbike ngwane, Job raba nüke törö nie. ¿Ni Ngöbö mikaka täte nebätä dre raba nemen gare nie? Satana ñaka raba ni mike ja dibiti trö kwite Jehovai. Aune dre dre tä nemen bare nibätä ye gare kwin Jehovai ye tä nemen gare nie. Aune mrä, kukwe tare namani bare Jobbätä ye Jehovakwe mikani krüte, ye erere kukwe tare tä nemen bare nibätä ye Jehovakwe mikadi krüte arato. Kukwe nuainta nikwe yebiti kukwe ne metre ni kräke nita bämike ye ngwane, nita tö ngwen Jehovai nie raba.
^ KUKWE MIKATA GARE: Kukwe hebreore kwitata “tö ngwan raba kukwe keteiti ie” ye abokän kukwe keteiti ngibiata kisere aune tö ngwan raba ni iti ie ye meden gärätä (Sal. 25:2, 3; 62:5).
^ Job 1:9-12: “Yebätä Satanakwe niebare Jehová ie: ‘¿Akräke ngwarbe Job tä Ngöbö jürä ngwen jabätä ya? Mä ñan jondron mike niara, ju kwe aune jondron jökrä kwe ye bäre, ¿kriemikakäre ya? Sribi nuainta kwe ye mätä mike nemen bare kwin kräke aune jondron nire kwe niena kä ñäre tibien. Akwa kise ngököte aune jondron kwe ye jökrä denkä kän aune erametre ñäkäi kwe mä rüere mä ngwärebätä’. Ye medenbätä Jehovakwe niebare Satana ie: ‘¡Mike ñärärä! Jondron jökrä kwe ye tä mä kisete. ¡Akwa niarabätä mäkwe ñaka kisemika!’. Ye bitikäre, Satana nikani mento Jehová yebätä”.
^ Nitre ruäre kä kwitani.
^ Isaías 49:15, 16: “¿Ni meyere raba monso kwe ye käi kwitekä jabiti o monso kwe ye ñaka raba tuin bobre ie? Ni meyere ye raba monso kwe käi kwitekä jabiti, akwa tikwe ñaka mä käi kwitaikä jire jabiti. ¡Mike ñärärä! Tikwe mä kä tikanina ja kise teri. Ki mäkwe ye tä käre ti känenkri”.
^ KUKWE MIKATA GARE ÜAIBÄTÄ: Job aune muko ngäbriänkä tu neketani jökrä, yekänti Job aune muko kwe nü.
^ KUKWE MIKATA GARE ÜAIBÄTÄ: Kukwe tare namani bare Jobbätä akwa niara kä ngwani nüke jai nememe mrä. Kukwe kwin keta kabre Jehovakwe mikani nemen bare kräke aune mräkä kwe kräke yebätä niara aune muko kwe tä töbiketari.