¿Ne gare mäi?
Nitre romano nämene nitre mete kribätä nuainbare Jesubätä erere ngwane, ¿nämene tuenmetre doboi mete?
JESÚS metani kribätä nitre kukwe käme nuainkä yebe gwaire ye gare nitre bäsi jökrä ie (Mat. 27:35-38, TNM). Jesús krütani ye bitikäre, niara ngwäkä ükaninte doboi metakäre aune mikani dobote nieta (Mar. 15:42-46, TNM). Akwa kukwe nieta Bibliabätä ne nitre ruäre ñan tä mike era jai.
Nitre romano nämene ni kukwe käme nuainkä ye tuenmetre doboi mete kwin, ye nitre tärä Evangelio tuaka ñan tä mike era jai. Ni ngwakarebätä kukwe mada bä jene nuain nämene ye nieta kwetre. Ñobätä nitre tä töbike kore ye periodista Ariel Sabar mikani gare täräkwata Smithsonian yebätä. Tikabare kwe: “Nitre bäri kukwe käme nuainkä ye aibe jäkä nämene krusobätä, ni ja ngwanka ne kwrere ye doboi metadre kwin ye kräke nitre romano kä mikadre kräketre, ye tuen ngwarbe nitre ja kitaka kukwe nebätä ie”. Nitre nämäne kribätä ye mikadre bäri yakrä jai yei nitre romano tö nämäne tuai. Aisete bäsi käre nämäne ni ngwakare tuenmetre kribätä kwin ne kwe jondron känsenta käkwe kwetadre ye bitikäre niaratre krä kita nämäne jräte ruin nie.
Akwa kukwe ne kwrere ñan namani bare nitre judío ruäre murie ketani yebätä ye mikata gare ni arqueologokwe. Kä 1968 yete ni murie ketani siklo kena ye krä ruäre kwe kwani Jerusalén kenta kä ni judío doboi mikara känti. Ni krä ruäre nämäne osario te abokän mrü ni krä mikakäre yete. Krä ye ngätäite krä ngoto üe nämäne abokän nämäne metani kribätä klabu hierrore 11.5 centímetro (4.5 pulgada) ngare yebiti. Sabar tä niere: “Ngoto üe ye abokän ni iti kädeka nämäne Jehohanankwe, Jesús doboi mikani nieta tärä Evangeliokwe erere ye era o ñakare ye ñaka nämäne gare metre ta kä kwati te, akwa ngoto üe nebiti mikani gare merebe”. Ne ütiäte, ñobätä ñan aune “Jesús näire nitre romano nämäne nitre metani krusobätä ye tuenmetre doboi mete kukwe ükaninte nitre Judiokwe erere ye nükani gare metre ngoto üe Jehohanankwe yebiti”.
Ngoto üe krä kwani ye käkwe nitre kwati ngwani töbike jene jene ño Jesús nämäne metani kribätä yebätä. Akwa kukwe ne gare metre, nitre kukwe käme nuainkä meta nämäne kribätä ye ruäre doboi meta nämäne kwin aune ñan kita nämäne kä mäkä nitre kukwe käme nuainkä mada ye ngätäite, aisete Jesús doboi mikani ño mikata gare Bibliabätä ye era. Jesús ngwaka doboi mikani kwin aune kukwe kwani yebiti nemen gare.
Aune ne bäri ütiäte Jesús doboi mikai kä ni jondron bäkänenkwe yete ye Jehovakwe mikani gare. Aune ni iti jire ñan raba kukwe niebare Ngöbökwe ye ketebätä (Is. 53:9; 55:11).