NITRE hebreo nämäne nüne kä käbämikani ie yekänti ngwane, kä ükate nämäne tibien aune nura nöka nämäne yebiti kä kwatire kwatire kömika nämäne ye abokän nengwane septiembre-octubre.

Sö nämäne kiteta kwin aune nämäne ngidienta ye köböi nämäne niken 29 o 30 ta yebiti sö kratire kratire täin nämäne. Aune kä kwatire kwatire ye täin nämäne ñänä yebiti. Akwa sö 12 täin nämäne kratire kratire söbiti abokän nämäne nemen kä kwati näre ye ñaka ja närebe kä kwati täin nämäne ñänänbiti yebe. Rabadre ja näre yekäre köbö ruäre o so kräti mada mika nämäne. Kä kwati mada kömika jämi känenkri sö mada krati mika nämäne raba ruen nie. Ye köböire kä ño näire jondron nöka nämäne aune jondron ngwä öta nämäne ye erere arato calendario nämäne ükaninte.

Moisés näire, kä kwati deme ye kömikadre sö abib, o nisán yete, ye Jehovakwe niebare juta israelita ie, kä nengwane ye abokän nemenkä marzo-abril yete (Éx. 12:2; 13:4). Sö yebätä cebada ngwä mrä ye bian nämäne Ngöböye aune käi ngwan nämäne juto jabätä (Éx. 23:15, 16).

Ni ja tötikaka kukwe kirabätä Emil Schürer tä niere: “Ñongwane sö mada mikadre ye nämäne nemen nuäre rabakäre gare, ñobätä ñan aune sö nämäne nemen bolore Nisán (14 de Nisán) yete ngwane Pascua käi ngwan nämäne juto jabätä ye nämäne nemen bare käre equinoccio de primavera ye bitikäre […]. Akwa, Pascua käi ngwandre juto jabätä ye käi matai equinoccio de primavera ye känenkri nämäne nüke gare ietre ngwane, nämäne sö mada mike sö Nisán ye känenkri” (Historia del pueblo judío en tiempos de Jesús 175 a. C. - 135 d. C., traducción de J. Cosgaya y A. Piñero).

Kä 14 Nisán Dänkien mröbare abokän marzo o abril, ye ñongwane metrere rabadre gare nun testiko Jehovakwe ie yekäre, nunta ja jie ngwen calendario hebreo yebiti. Jesukwe ja nire biani käi ngwandre juto jabätä ye köböi jämi nüke ye känenkri mikata gare konkrekasion kä jökräbiti tibien ie. *

¿Akwa ñongwane sö krati mika nämäne krüte aune mada kömika nämäne ye nämäne nemen gare nitre hebreo ie? Kä nengwane calendario täräre o telefononte ye nikwe mikadre ñärärä köböire raba nemen gare nie, akwa kä ye ngwane ñaka nämäne nemen nuäre rabakäre gare.

Noé näire sö kratire kratire yete köbö nämäne 30 näre (Gén. 7:11, 24; 8:3, 4). Kä nikani ta ye bitikäre, calendario hebreo ye ükaninte aune sö kratire kratire ye jökrä ñaka nämäne köbö 30 näre. Sö mrä nämäne kite krire kwin ngwane, sö mada ye täin nämäne kite, ye abokän sö mada köböi nämäne niken 29 o 30 ta ye bitikäre sö mada ye kömika nämäne meden gärätä.

Bati, David aune Jonatán nämene blite sö kratibätä ngwane, niebare kwetre: “Jetebe sö mrä tädi” (1 Sam. 20:5, 18). Aisete, siklo once Kristo känenkri ye ngwane, sö täindre ño ye nämänena gare nitre ie. ¿Akwa sö mada kömikadre ñongwane ye ñokänti nämäne nemen gare nitre israelita ie? Kukwe ye mikata gare tärä Misná abokän tä blite nitre judiobätä yebätä. Yete mikata gare nitre israelita jänikani ja dibiti kä mada kokwäre ye bitikäre, nitre kukwe ükatekä bäri kri judío nämäne ja ükekrö sö krä kükü te köbö 30 dekä yete fiesta nuain nämene ye ngwane, ne kwe sö mada kömikadre ñongwane ye mikakäre gare jai. ¿Dre köböire kukwe ye ükate nämäne nemen kwetre?

Kä ruäre ükaninte Jerusalén yete yekänti nitre ruäre juan nämäne kä kwinta ye mikakäre ñärärä deu. Aune krire sö mrä ye nämäne tuin nitre ye ie ngwane, bengwaire nämänentre mike gare nitre Sanedrín ye ie. Aune sö mada kömika nämäne ye niaratre nämäne mike gare. Akwa muta nämäne jübente ye köböite sö ñaka nämäne tuin ngwane, ¿dre nämäne nemen bare? Sö yete köbö nämäne 30 aune jetebe se kwrere  sö mada kömika nämäne ye niaratre nämäne mike gare.

Ngutuä Olivo nämäne Jerusalén ken aune ngutuä mada mada Israel yete, ñukwä okwä bukaka nämäne ne kwe tribunal judío käkwe kukwe meden ükaninte ye rabadre gare nitre ie. Akwa biti ñaka ñukwä okwä bukaka nämäne, ñakare aune nitre ruäre juan nämäne kukwe ye mikakäre gare. Ye köböire nitre judío nämäne nüne Jerusalén o kä mada mada yekänti ye ie, sö mada kömika nämäne ye nämäne gare kwin ietre aune nämänentre fiesta käi ngwen juto jabätä.

Kukwe mikata gare nebätä recuadro tä mikani, yete fiesta nuain nämäne aune kä nämäne ño ye erere arato calendario hebreo ye nämäne ükaninte ye raba tuin yete nie.