1. ¿Kukwe tare tare tä nemen bare yebiti ta, dre raba ni dimike Jehová mike täte jankunu?

 KUKWE rabadi nakainkä taretare krubäte ye näire nita nüne nieta Bibliakwe (2 Tim. 3:1). Kä te nita nüne nete ni jökrä tä ja tuin kukwe tare ben. Ne madakäre ni Ngöbö mikaka täte ye ie tä ja tuadre kukwe tare ben aune ja mikata rüere yebe arato. ¿Dre raba ni dimike Ngöbö mike täte jankunu? Jehová metre aune tä nire ye nikwe ngwandre törö jai (Jer. 10:10; 2 Tim. 1:12).

2. ¿Jehová ye abokän Ngöbö nire metre ye tä bämike ño nie?

² Jehová ye abokän ñan kukwe bämikata ja töite ye aibe, ñakare aune niara ye Ngöbö metre aune Ngöbö nire. Aune nita ja tuin kukwe tare ben ye ngwane, niarata ni dimike. Ne madakäre ñongwane raba ni dimike ye erere tä nuainne (2 Crón. 16:9; Sal. 23:4). Niara abokän Ngöbö nire ye erere mikadre tuin jai ngwane, raba ja di bien nie ja tuakäre kukwe tare yebe. Ye erere namani bare rei Davidbätä ye ani mike gare jai.

3. ¿Jehová ye Ngöbö metre niebare Davidkwe ngwane, dre gäräbare kwe?

³ David ie Jehová nämäne gare kwin yebätä nämäne tö ngwenbiti, aune nitre rükä bätä Saúl tö namani niara nuain tare ye ngwane, niarakwe ja di käräbare Jehovai (Sal. 18:6). Jehovakwe orasion Davidkwe kukwe nuani, ye namani gare ie ngwane, niebare kwe: “¡Jehová ye metre aune tä nire!” (Sal. 18:46). Kukwe niebare kwe yebiti Ngöbö ye abokän metre ye ñan aibe tö namani mikai gare, ñakare aune tärä kukwe känänkäre tä mike gare (obra de consulta); niara nämäne tö ngwen  kwatibe Jehovabiti aune Jehová ye Ngöbö nire abokän tä juta kwe dimike bati bobu ye tö namani mikai gare. Jehová nämäne David dimike ye tuani kwe yekwe niara dimikani Jehová mike täte aune käikitekä jankunu (Sal. 18:​28, 29, 49).

4. ¿Jehová Ngöbö metre aune nire ye erere mikadre tuin jai ye köböire dre kwin raba nemen nikwe?

⁴ Jehová ye abokän Ngöbö nire tädre gare metre nie yekwe ni dimikai sribire kä jutobiti kräke. Ye köböire ni täi dite ja tuakäre kukwe tare yebe aune ni töi rabai ja di ngwen jankunu sribire kräke, ye käkwe ni dimikai nökrö bäri niara ken.

NGÖBÖ NIRE YEKWE JA DI BIAIN MÄI

5. ¿Kukwe tare tä nemen bare yebe ja tuakäre drekwe ni dimikai? (Filipenses 4:13).

⁵ Jehová ye abokän Ngöbö nire aune käre tädi juto biare ja di biankäre nie ye ngwandre törö jai ye käkwe ni dimikai ja tuin kukwe tare yebe. Metrere kukwe ñaka tare kri krubäte Jehová kräke. Niara ye abokän Dänkien Kri Krubäte aune niarakwe ja di ye bian nie nikwe ribe jai ye ngwane (ñäkädre Filipenses 4:13 yebätä). Aisete kukwe keta kabre tärä nie tö ngwankäre kwatibe Jehovabiti. Kukwe kiakia yebiti niara tä ni dimike ye erere arato nuaindi kwe kukwe tare kri rabai bare nibätä ye ngwane ye ie tö ngwandre.

6. ¿David nämäne bati ngwane, dre niara dimikani tö ngwen bäri Jehovai?

⁶ Kukwe ketebu namani bare Davidbätä käkwe dimikani tö ngwen bäri Jehovai aune mike gare jai. David nämäne bati ye ngwane nämäne oveja rünkwe ngübare ye ngwane kwra lion jababare oveja kwete ye niarakwe kriemikani aune köbö madate oso jatani ngwane oveja kriemikani kwe arato. Bobu jire ñaka kä jürä ngwani jabätä kwe aune nikani oveja rüe ye jiebiti oveja mikakäre kwäre. Jehovakwe ja di biani ie nämäne gare ie yebätä ñaka ja käikitaninkä akwle kwe (1 Sam. 17:​34-37). Kukwe namani bare Davidbätä ye ñaka käi nikwitaninkä jirebiti. Töbikataribare kwe bätä aune Jehová niara dimikai ja känenkäre ye ie nämäne tö ngwen kwatibe.

7. ¿Drebätä ja töi mikani Davidkwe aune yekwe dimikani ño ja tuin Goliat yebe?

⁷ Ye bitikäre David nämäne bati raba ruin nie ye ngwane nikani campamento nitre rükä israelitakwe yekänti basare ngwane. Nitre rükä ye nämäne grükekä jutuabare ie, ñobätä ñan aune ni iti kri krubäte kädeka nämäne Goliat ye nämäne niere: “¡Matare tita mun rükä Israel ye kötaire!” (1 Sam. 17:​10, 11). Goliat ni ñan chi kwin aune nämäne dre niere ietre ye käkwe kä jürä ngwani nitre rükä yebätä (1 Sam. 17:​24, 25). David abokän käkwe kukwe ye mikataribare ñärärä kwin. Aune Goliat nämäne kukwe tare niere ye nämäne niere Ngöbö nire ye ie aune ñaka nitre rükä israelita ye aibe ie (1 Sam. 17:26). Jehovakwe niara dimikani ñan kä jürä ngwen jabätä oveja rüe kämikakäre, ye erere Jehovakwe niara dimikadi rüe yebätä ye ie nämäne tö ngwen kwatibe. Aune Jehová köböire ja tuani kwe Goliat ben aune nitre filisteo ganainbare kwe ye gare metre nie (1 Sam. 17:​45-51).

8. ¿Nita ja tuin kukwe tare ben ye ngwane, dre raba ni dimike tö ngwen bäri Jehovai? (Üai mikadre ñärärä).

⁸ Ngöbö nire tä juto biare ni dimikakäre ye ngwandre törö jai ngwane, ni raba ja tuin kukwe tare yebe David erere (Sal. 118:6). Dre nuainbarera kira Jehovakwe yebätä töbikaitari ngwane, nita tö ngwen ye rabai bäri dite. Ñodre, nitre Jehová mikaka täte kirabe mikani ño kwäre kwe yebätä töbikatari raba (Is. 37:​17, 33-37). Ne madakäre, kukwe mikata gare jw.org yete, känti nengwane Jehovakwe ja mräkätre dimikanina ño yebätä töbikatari raba. Aune Jehovakwe mä dimikanina  ño yebätä mä raba töbike. Oso aune kwra lion kämikani Davidkwe ye erere kukwe ñan nemen bare mäbätä raba ruin mäi ngwane, mäkwe ñan ja töibika. Metrere Jehovakwe mä dimikanina keta kabre, ñodre, nemen ja ketamuko kwe (Juan 6:44). Niara aibe köböire kukwe metre ye tä mäkwe. Jehovakwe orasion mäkwe kukwe nuani aune kukwe kwin mikani nemen bare kwe mä kräke, arato kukwe kwin nämäne nemen bare mäbätä ye ngwane mä dimikani kwe o kukwe tare ben mä nämäne ja tuin ye ngwane ja di biani kwe mäi, ye mä dimikadre kwe ngwenta törö jai mäkwe ribe ie. Kukwe keta kabrebätä Jehovata mä dimike yebätä mäkwe töbikadretari ngwane, mäkwe tö ngwandi bäri niarabiti.

9. ¿Kukwe tare ben ja tuata ye mikadre tuin ño jai? (Proverbios 27:11).

⁹ Jehová ye abokän Ngöbö nire gare nie ye tä ni dimike kukwe mike tuin jai niara tä mike tuin ño jai ye erere. Kukwe tä nemen bare ye abokän Satana tä nuainne Jehová rüere. Nikwe ja tuai kukwe tare ben ngwane nikwe Jehová tuainmetre nieta Satanakwe (Job 1:​10, 11; ñäkädre Proverbios 27:11 yebätä). a Mäkwe ja ngwain metre ye ngwane, Jehová tare mäkwe aune Satana abokän ni ngökö ngwarbe ye mäkwe bämikai. Gobrantre tä ja mike mä rüere, ngwian ñakare mäkwe, mä ñan töita nemen kukwe driebätä krubäte, ¿o kukwe mada ben mätä ja tuin? Kukwe tare ne erere tä nemen bare mäbätä ngwane mä tö kä tuai juto Jehovabätä mä raba bämike ie. Kukwe ben mä ñaka raba ja tuin kaibe yebe niara ñaka mä tuainmetre ye mä ngwan törö jai (1 Cor. 10:13). Niarakwe ja di biandi mäi kä ngwankäre nüke jai.

NGÖBÖ METRE AUNE NIRE YEKWE KUKWE KWIN MIKAI NEMEN BARE MÄ KRÄKE

10. ¿Ngöbö nire aune metre ye käkwe dre nuaindi ni niara mikaka täte ye kräke?

¹⁰ Nire tä Jehová mike täte ye kräke tä kukwe kwin mike nemen bare (Heb. 11:6). Nengwane  tä kä jäme aune kä juto ye bien nie, aune ja känenkäre ja nire käre biandi kwe nie. Jehová kukwe kwin mikadi nemen bare ni kräke aune die tärä nuainkäre ye gare metre nie. Nita tö ngwen kukwe ne ie ye tä ni dimike sribire bäri kräke, nitre niara mikaka täte metre kirabe käkwe nuainbare ye erere. Ani kukwe mike gare jai Timoteobätä (Heb. 6:​10-12).

11. ¿Dre käkwe Timoteo töi mikani sribire ja di ngöibiti konkrekasionte? (1 Timoteo 4:10).

¹¹ (Ñäkädre 1 Timoteo 4:10 yebätä). Ngöbö nire yebiti Timoteo tö ngwani. Aune niarakwe kukwe kwin mikai nemen bare kräke ye ie nämäne tö ngwen kwatibe. ¿Dre nuainbare kwe? Apóstol Pablo niara töi mikani nemen dirikä kwin aune kukwe driekä kwin krubäte aune kukwe kwin bämikadre kwe nitre umbre aune monsotre bati ye okwäbiti ribebare ie Pablokwe. Ñodre, mäträdre kwe metre aune töi jämebiti nitre madabätä ye ribebare ie (1 Tim. 4:​11-16; 2 Tim. 4:​1-5). Timoteo nämäne sribire ye ñaka nämäne tuin ni mada ie o mikai ñaka nämäne ütiäte jai, akwa Jehová kräke nämäne ütiäte aune kukwe kwin mikai nemen bare kwe kräke nämäne gare metre ie (Rom. 2:​6, 7).

12. ¿Dre käkwe nitre umbre töi mikai sribire ja di ngöibiti? (Üai mikadre ñärärä).

¹² Timoteo erere nitre umbre tä sribire ye tuin Jehovai aune tä mike ütiäte jai ye gare ietre. Tätre kukwe driere, ja mräkätre dimike ja üairebiti, ni mada tötike arato tätre sribire construcción yebätä, labores de socorro yebätä. Mada abokän tä nitre bren tä hospitalte ye tuinbiti o sribire Comité de Enlace con los Hospitales yebe. Konkrekasion ye Jehovakwe aune ñan ni kä nebätä yekwe ye gare nitre umbre ie. Ye medenbätä tätre sribire ye tä nuainne ja di ngöibiti aune Jehovakwe kukwe kwin mikai nemen bare kräketre ye gare metre ie (Col. 3:​23, 24).

13. ¿Nita ja di ngwen Jehová mikakäre täte ngwane, jata nemen ruin ño ie?

¹³ Ni jökrä ñaka raba nemen ni umbrere  konkrekasionte, akwa ni jökrä raba kukwe ütiäte nuainne Jehová kräke. Nikwe ja di ngwain kukwe kwin nuainne ye tä mike ütiäte jai. Ñodre, kukwe drieta kä jökräbiti tibien dimikata nikwe ütiäte krubäte Jehová kräke, nita kukwe nuainne chi tä nemen ruin nie yebiti ta. Aune ja di ngwanta kise garekä kwin kä jüräbiti ta ye tä kä mike jutobätä. Arato nita ngite kite ni madabiti ta ye käita nemen jutobätä. Mä ñan tä kukwe nuainne krubäte Jehová kräke raba ruin mäi, akwa Jehová kräke mäta dre nuainne ye ütiäte krubäte ye mäkwe ngwan törö jai. Mä tare kwe aune kukwe kwin mikadi nemen bare kwe mä kräke (Luc. 21:​1-4).

NGÖBÖ METRE AUNE NIRE YE KEN NI TÄDRE

14. ¿Ni täi Jehová ken yekwe ni dimikai ja ngwen metre ie ye ñobätä nie raba? (Üai mikadre ñärärä).

¹⁴ Jehová tuin metre nie ye ngwane, rabai nuäre ni kräke ja ngwankäre metre. Ye erere nuainbare Josekwe. Jehová nämäne tuin metre ie ye medenbätä ja töi mikani kwe ñaka ja mike ngite rüere (Gén. 39:9). Jehová rabadre tuin metre nie yekäre nikwe oradre aune ja tötikadre Kukweibätä. Ye köböire nita ja kete ben ye jatai nirien bäri kwin. José erere ni ja ketadi kwin Jehovabe ye ngwane, ni ñaka töi rabai jire kukwe blo nuainbätä niara rüere (Sant. 4:8).

15. ¿Nitre israelita nämäne kä nötare te ye ngwane ja ngwani blo kwe ye tä dre driere nie? (Hebreos 3:12).

¹⁵ Nire ie Jehová ñaka tuin metre ye kräke rabai nuäre kä mikakakäre Jehovabätä. Ñodre, ani töbike nitre israelita nämäne kä nötare yete yebätä. Niaratre ie Jehová nämäne gare, akwa Jehovakwe ñan dimikai namani nütüre aune namanintre ngwanintari jai “¿Jehová tä ni ngätäite o ñakare?” (Éx. 17:​2, 7). Mrä mada niaratre ja mikani Jehová rüere ye gare nie, ni ñaka tö ja ngwain niaratre ye erere jire (ñäkädre Hebreos 3:12 yebätä).

16. ¿Dre raba tödeka nikwe nuinte?

¹⁶ Kukweta nakainkä käbiti tibien yebätä  ñan nuäre ni kräke rabakäre kwekebe Jehová ken. Aune Ngöbö ñaka ye nitre kwati tä niere. Niaratre ñaka kukwe Ngöbökwe ye nuainne yebiti ta kä juto bätätre ye raba tödeka nikwe nuinte. Metrere Ngöbö ñaka jire ye ni ñan nütüdi. Akwa niarakwe ni dimikai o ñakare ye ni raba kite ngwentari jai. Kukwe ye erere bäsi namani bare ni Salmo 73 tikaka yebätä. Nitre nämäne ja ngwen käme aune ñaka Ngöbö kukwei mike täte ye nämäne nüne kä jutobiti nämäne tuin ie. Ye medenbätä Ngöbö mikadre täte ye ütiäte o ñakare ye jatani ngwentari jai mada (Sal. 73:​11-13).

17. ¿Dre ni dimikai Jehová mike täte käre?

¹⁷ ¿Dre käkwe salmista dimikani ja töi kwite? Nitre ñaka Ngöbö mike tätebätä dre raba nemen bare yebätä töbikataribare kwe (Sal. 73:​18, 19, 27). Arato, dre kwin raba nemen nikwe Jehová mikabätä täte yebätä töbikabare kwe (Sal. 73:24). Kukwe kwin keta kabre Jehová bianina nie niara mikabätä täte abokän nikwe ñan mikadre täte ngwane kukwe kwin ye ñan tädre nikwe yebätä töbikadretari. Nikwe ne erere nuaindi yekwe ni dimikai ja ngwen metre Jehovai aune ni raba kukwe niebare salmistakwe ye erere niere: “Rökradre Ngöbö ken ye kwin tikrä” (Sal. 73:28).

18. ¿Ñobätä tö ngwan raba kwatibe kä ja känenkäre ie?

¹⁸ Kukwe keta kabre kri ben ni raba ja tuin ñobätä ñan aune nita sribire “Ngöbö Ngöbö nire era metre” (1 Tes. 1:9). Niara töita nibätä aune niara tä juto ni dimikakäre ye tädre gare metre nie. Niara nuainbarera kira ni niara mikaka täte ye kräke. Ye erere raba nuainne nengwane arato. Ja tare nikadi kri ñaka tuabarera jire ye köböra nakainkä, akwa ni ñan tädi kaibe (Is. 41:10). Ye medenbätä ni raba niere töi kwatibebiti: “Ngöbö abko ti die mikaka, aisete nire nire tö raba kukwe nuein blo ti rüere abko jürä ñakare tibtä” (Heb. 13:​5, 6).