Tödeka ye abokän kukwe keteiti tädre nikwe Jehovakwe ni kadre ngäbiti yekäre. Akwa “ñan ni jökrä tä tödeke Gobran kribiti” nieta Bibliakwe (2 Tes. 3:2). Pablokwe kukwe ye tikani ngwane nämäne blite nitre ja mikaka niara rüere, “nitre ja ngwen käme aune töi käme” yebätä niara mikadre kwäre yekäre. Akwa, kukwe niebare Pablokwe tödeka yebätä ye erere nitre kwati kä nengwane ñan tödeke. Ñodre, Ngöbö ye metre aune ara käkwe jondron jökrä sribebare, ye nitre ñan töta nemen mikai era jai (Rom. 1:20). Ni tärä iti abokän bäri kri krubäte ni kä tibienbätä jökrä kräke ye nitre ruäre ñan töta nemen niei. Akwa kukwe mikata era jai aune nie ñaka ni madai ye ngwane nita tödeke nie ñan raba.

Ngöbökwe ni kadre ngäbiti yekäre niara ye metre aune nire tä tödekebiti ye ie tädre gare metre, Jehovakwe kukwe kwin mikadi nemen bare kräke (Heb. 11:6). Tödeka ye abokän töi keteiti kite Ngöbökri. Ye medenbätä, ni tö üai deme ye tuai jakwe ngwane, nikwe kärädre orasionte Jehovai (Luc. 11:​9, 10, 13). Nikwe ñäkädre Bibliabätä ye ütiäte krubäte arato, Biblia ye abokän Ngöbö töi tikani üai deme köböire. Nita ñäke Bibliabätä ngwane töbikadretaribätä aune ja di ngwandre mikakäre täte. Ye aibe ngwane, üai deme rabai nibiti aune ni dimikai kwe tödeke Jehovabiti.