Nitre tä kukwe ngwentari
Salmo 12:7 yete blitata “nitre tä ja tare nike” yebätä (bersikulo 5 mikadre ñärärä) aune “ñaka Ngöbö kukwei yebätä” (bersikulo 6 mikadre ñärärä) ¿ye ñobätä nie raba?
Nita ñäke texto nebätä ngwane tä nüke gare nie, bersikulo ye tä blite nibätä.
Tärä Salmo 12: 1-4 yete, David tä niere “nitre ja ngwanka metre ye ñan niena” jire. Biti kukwe ngwantarita Salmo 12:5-7 yete yebätä ani ja kite.
“‘Nitre mikata ja tare nike krubäte yebätä,
Nitre bobre tä ja töibikaire yebätä,
Ti rükai krö aune tikwe mä dimikai’, nieta Jehovakwe.
‘Nitre tä mike tuin ngwarbe jai ye ngänikaire tikwe mikai kwäre’.
Jehová kukwei ye metre;
Ye abokän, horno sribebare dobrobiti yebiti ngwian ükateta mrebe bä keta kükü jire ye kwrere.
Mäkwe ngübaibiti, oh, Jehová;
Mäkwe niaratre itire itire kriemikai kä jökrä ngwane aune käre”.
Dre nuaindi Ngöbökwe nitre tä ja tare nike kräke ye bersikulo 5 tä mike gare, niarakwe mikadi kware.
“Ngöbö kukwei ye metre; ngwain ükateta mrebe ye kwrere”, bersikulo 6 tä mike gare. Kukwe niebare ne metre ye gare ni kristiano ja ngwanka metre ie (Sal. 18:30; 119:140).
Bersikulo 6 yete blitata “Jehová kukwei” yebätä, aisete bersikulo 7 yete blitata Jehová kukweibätä arato nütü raba nemen. Bersikulo 7 ye känenkri blitata “Jehová kukwei” yebätä, aisete nitre raba nütüre Ngöbö tä kukwe kwe ye ngübarebiti. Aune gare nie Ngöbö tä kukwe kwe (Biblia) ye ngübare o kriemike nitre tä ja mike rüere abokän tä ñäkäire aune töita gatebätä ye ngänikaire (Is. 40:8; 1 Ped. 1:25).
Akwa kukwe nieta bersikulo 5 ye metre arato. “Nitre mikata ja tare nike” ye Jehová tä dimike aune mike kwäre aune käre nuaindi kwe (Job 36:15; Sal. 6:4; 31:1, 2; 54:7; 145:20).
Nire kriemikata Jehovakwe nieta bersikulo 7, ¿nitre o niara kukwei?
Nita ja kite bäri nguseta texto nebätä ngwane tä nüke gare nie, bersikulo ye tä blite nibätä.
Nitre ja ngwanka metre Jehovai ngökani nitre töi käme yekwe yebätä blitata Salmo 12:1 yete. Biti bersikulo 3 yete nitre tä ja tidrä yebiti kukwe blo nuainne ye rüere Jehová ja mikadi mikata gare. Tärä salmo tä mike gare metre ta nie, Ngöbökwe juta kwe ye kriemikadi ñobätä ñan aune niara kukwei ye metre.
Aisete nitre tä ja tare nike nitre käme kisete ye kriemikai Jehovakwe mikata gare bersikulo 7 yekänti.
Akwa, ¿ñobätä bersikulo ye nüke gare jene nitre ie? Ñobätä ñan aune Escrituras Hebrea tikani kirabe yete pronombre (niara/ niaratre) tä mikani ye abokän blitata Ngöbö Kukweibätä aune nitrebätä ye kwrere raba nüke gare. Akwa, Biblia Septuaginta tikani Griegore yete nieta krörö: “Niarakwe ni ükai” aune “Niarakwe ni kriemikai”. Ye medenbätä nitre ja ngwanka metre mikata ja tare nike yebätä blitata. Niaratre ye kriemikai “nitre kä ne näire” abokän ja ngwanka blo yebätä (Sal. 12:7, 8). Escrituras Hebreos kwitani kukwe arameobiti yebätä bersikulo ye tä niere krörö arato: “Mä, oh Jehová, mäkwe nitre ja ngwanka metre ye kriemikai aune mäkwe ükai kärekäre nitre kä ne näire yebätä”. Aisete kukwe nieta Salmo 12:7 ye ñan tä blite Ngöbö kukweibätä ye nemen gare metre ta kukwe jökrä nebätä.
Ye medenbätä, Ngöbökwe nitre “ja ngwanka metre” ye dimikai ye ie raba tö ngwen mikata gare bersikulo nebätä.
