1, 2. a) ¿Ñobätä mä raba niere ja ngöka ñöte ye abokän nuaindre töi bökänbiti? b) ¿Mä jämi ja ngökö ñöte ye känenkri mäkwe dre mikadre gare kwin jai?

¿MÄ TÄ bati aune mä tö ja ngökai ñöte? Ja ngökadre ñöte ye kukwe ütiäte krubäte ni raba nuainne. Kukwe ja tötikara käne yekänti rababa gare nie ye erere, ja ngöka ñöte ye nuaindre töi bökänbiti. Mäkwe ja ngökai ñöte ye ngwane, mäkwe ja dianinkä mento Jehová kräke ye mäkwe bämikai nitre madai. Ye abokän, mäkwe Ngöbö mikai täte kärekäre aune ye rabai bäri ütiäte mä kräke ye mäkwe bämikai ietre. Mä jämi ja ngökö ñöte ye känenkri, mä niena ünä, mä tö töi bökänbiti ja ngökai ñöte aune ja diandrekä mento Ngöbö kräke ye dre gärätä nüke gare kwin mäi ye mäkwe mikadre gare kwin käne jai. Mäkwe kukwe ye käbämika metre Ngöböi.

² ¿Mä niena juto ja ngökakäre ñöte raba ruin mäi? Mä jämi juto raba ruin mäi. O mä niena juto raba nemen ruin mäi, akwa mä rün aune mä meye käkwe niedre mäi mä rabadre ünä aune kukwe rabadre gare krubäte mäi ye bitikäre mäkwe nuaindre. Akwa mäkwe ñaka ja ngwan di nekä. Mäkwe ja di ngwan nirien bäri kukwe ja üaire yebiti ne kwe gwäune mä rabadrera juto ja ngökakäre ñöte. Kukwe ja tötikara ne käkwe mä dimikai kukwe den nuaindre jai kukwe ketamä nekänti. Kena, kukwe mikata era mäkwe jai. Ketebukäre, kukwe nuainta mäkwe.  Aune ketamäkäre, mä töita ño Jehová kräke.

3, 4. ¿Monsotre bati raba dre mike gare jai Timoteo yebätä?

³ Mäkwe kukwe ne ngwantari jai: “¿Ngöbö tärä ye ñobätä era ti kräke? ¿Biblia ye kite Ngöbö yekri ye ñokänti gare metre tie? ¿Ñobätä Ngöbökwe kukwe ükaninte ye tita mike täte aune kukwe ükaninte nitre kä nebätä yekwe ye ti ñaka mike täte?”. Mäkwe kukwe ye ngwaintari jai angwane, mä dimikai kwe Pablo kukwe niebare mäträkäre nibätä ne mike täte: “Jändrän kuin Ngöbökrä amne jändrän nuäre Ngöbökrä amne jändrän era metre Ngöbö okwäbti, Ngöbö tö dreye, ye rüka gare munye” (Romanos 12:2). Kukwe ne tä mike gare Ngöböta dre niere ye mä rabadre nuainne ye bäri kwin mä kräke ye mä rabadre mike nüke gare akwle jai. ¿Ñobätä mäkwe kukwe ye mikadre nüke gare akwle jai?

⁴ Töbike monso bati Timoteo yebätä. Kukwe Ngöbökwe ye nämene gare kwin ie ñobätä ñan aune meye bätä mölöi käkwe driebare ie. Akwa Pablo niebare ie: “Kukwe namani gare mäi aune namani era mä kräke ye mäkwe nuain jankunu” (2 Timoteo 3:14, 15, TNM). Timoteo kräke “kukwe [...] namani era” niebare Pablokwe ye ngwane, kukwe niebare kwe ye abokän kukwe metre nämene Ngöbö kukweibätä ye namani gare kwin Timoteo ie gärätä. Akwa ¿ñobätä kukwe ye nämene gare kwin ie? ¿Meye aune mölöi käkwe kukwe ye metre niebare ie ye aibätä nämene gare ie? Ñakare. Niara “töi [namani] metre Ngöbö mikakäre täte” yebätä nämene gare kwin ie. Ye abokän, Timoteo töbikabare akwle kukwe namani gare ie yebätä aune kukwe ye metre namani gare kwin ie (ñäkädre Romanos 12:1 yebätä). * Erametre, monsotre bati raba kukwe mike gare krubäte jai Timoteo yebätä.

5, 6. ¿Ñobätä ütiäte mäkwe ja kitadre töbikakäre aune kukwe mikakäre gare biarebe?

⁵ ¿Timoteo kukwe kwin bämikani yebätä mä raba dre mike gare jai? Kukwe drieta Bibliabätä ye namanina gare mäi kä nikanina ruäre ta yete raba ruin nunye. Ye erere ngwane, Timoteo dre nuainbare ye erere mä raba nuainne aune ñobätä mätä kukwe ye mike era jai yebätä mä raba töbike. Kukwe mikata era mäkwe jai ye metre rabai gare mäi angwane, tödeka mäkwe ye rabai bäri dite. Ne madakäre, nitre ja ketaka mäbe aune nitre kä nebätä tä dre niere nuaindre mäi bätä mä töita ño yei mäkwe ñaka ja tuametre töi kwitadre.

⁶ Mä “töi rabadre metre Ngöbö mikakäre täte”, o mäkwe töbikadre akwle kukwe ye nuainkäre ye ütiäte krubäte. ¿Ñobätä? Ñobätä ñan aune ye köböire nitre ja ketaka mäbe kukwe ne erere ngwandretari mäi angwane mä raba mike gare ietre, ñodre: “¿Ngöbö tärä ye ñokänti gare metre mäi? Ngöbö ja tarekä, ¿se ñobätä tä kukwe käme tuenmetre nakainkä? Ngöbökwe jondron jökrä sribebare angwane, ¿nirekwe niara sribebare?”. Mä “töi rabadre metre Ngöbö mikakäre täte” ye rabai gare kwin mäi angwane, kukwe ngwantarita ye käkwe ñaka mä mikai töbike kukwe mikata era mäkwe jai ye metre o ñakare yebätä. Ñakare aune, ye käkwe mä töi mikai ja tötike bäri kwin Bibliabätä.

7-9. Kukwe ja tötikara ¿Qué enseña realmente la Biblia? tä Internet yete ye raba tödeka mäkwe mike ño dite ye mä raba niere.

⁷ Mäkwe ja tötikai kwin Bibliabätä angwane,  kukwe ngwaintari mäi ye mä rabai mike gare, kukwe tä mä mike töbike ye rabai gare bäri kwin mäi aune mätä dre mike era jai ye rabai gare kwin mäi (Hechos 17:11). Nun Testiko yekwe tärä aune täräkwata tä keta kabre abokän raba mä dimike kukwe ye jökrä nuainne. Ñodre, täräkwata El origen de la vida aune tärä ¿Existe un Creador que se interese por nosotros? yekwe monsotre bati kwati dimikanina. Sección tä jw.org yekänti kädekata “¿Qué enseña realmente la Biblia?” yekwe monsotre mada kwati dimikanina arato. Sección ye tä mikani ENSEÑANZAS BÍBLICAS > JÓVENES nieta yekänti. Ja tötikadre ño ye tä mikani yete mä dimikakäre ne kwe kukwe keta kabre drieta Bibliakwe ye rabadre nüke gare bäri kwin mäi.

⁸ Mä niena ja tötike Bibliabätä, yebätä kukwe ngwantarita kukwe ja tötikara yebätä ye ruäre niena gare mäi raba ruin nunye. Akwa ¿kukwe mikata gare ye metre mä kräke? Kukwe ja tötikara ye käkwe mä dimikai töbiketari kwin kukwe tä Bibliabätä ye ruärebätä aune mä töi mikai kwe kukwe mikata era mäkwe jai ye tike täräbätä. Ne madakäre, nitre madai mä raba kukwe ye mike gare ño yebätä mä dimikai kwe töbike. Internet tärä mäkwe angwane kukwe ja tötikara yebätä mäkwe ja tötika, aune kukwe nemen gare mäi Bibliabätä yei mäkwe tö ngwain bäri.

⁹ Kukwe jökrä Bibliabätä namani gare mäi ye era mä kräke ye mäkwe mikadre gare akwle jai ye ütiäte krubäte. Ye käkwe mä dimikai nemen juto ja ngökakäre ñöte. Meri bati Testiko käkwe niebare: “Ti jämi ja töi mike ja ngökö ñöte ye känenkri, tikwe ja tötikaba krubäte Bibliabätä aune kukwe rababa gare tie ye käkwe mikaba gare metre tie kukwe ye metre”. Niara kukwe diani nuaindre jai ye metre tä nemen gare ie köbö kwatire kwatire tä niken ta yete nieta kwe.

10. Ni ja ngökabarera ñöte tä tödeke ye bämikadre kwe dre nuainta kwe yebiti, ¿ye ñobätä tö ngwandre ie?

¹⁰ Biblia tä niere “nita tödeke [...] nita niere, akwa ni jändrän kuinkuin nuene ñakare tödeka Jesubti ye bä mikakrä, ye ngwane nita kukwe [...] niere ngwarbe” (Santiago 2:17). Ye medenbätä, mätä tödeke aune mätä kukwe mike era jai ye metre mä kräke angwane, mäkwe bämikadre dre nuainta mäkwe yebiti. “Ja ngwandre kwin  deme aune Ngöbö mikadre täte” nieta Bibliakwe ye erere mäkwe nuaindi (ñäkädre 2 Pedro 3:11 yebätä). *

11. “Ja ngwandre kwin deme” nieta, ¿ye dre gärätä?

¹¹ “Ja ngwandre kwin deme” nieta, ¿ye dre gärätä? Ye abokän nikwe nünandre kwin meden gärätä. Ñodre, sö krä ti nikani bitinkä ta yete mäkwe dre nuainbare yebätä mä raba töbike. Mä nuaninte ye ngwane, ¿kukwe meden kwin aune kukwe meden käme ye nükani gare metre mäi? (Hebreos 5:14, TNM). Kukwe ruärebiti mä nuaninte o monsotre mada käkwe mä töi mikani kukwe ruäre nuainne ye ngwane, ¿mäkwe kä ngwani nüke jai ye törö mäi? ¿Mätä ja ngwen kwin kwelate? ¿Jehová tä kukwe niere mäi ye nuainta mäkwe o monsotre nänkä kwelate mäbe tä kukwe niere mäi ye nuainta mäkwe ne kwe ñaka mä kötaidre kwetre? (1 Pedro 4:3, 4). Erametre, ni jökrä ngite. Nitre tä Ngöbö mike täte kä kwati krubäte te ye arato ruäre ngwane raba nemen jakaire niekäre niaratre abokän testiko Jehovakwe. Akwa nire tä ja denkä mento Ngöbö kräke aune tä nemen testiko Jehovakwe yei ja rabadre ruin ütiäte bätä rabadre bämike tätre nüne kwin yebiti.

12. a) “Ngöbö mikadre täte” nieta, ¿ye abokän dre dre gärätä? b) ¿Kukwe ye rabadre tui ño mäi?

¹² “Ngöbö mikadre täte” nieta, ¿ye abokän dre dre gärätä? Ye abokän mätä sribire gwairebe konkrekasion mäkwe yebe, ñodre, mätä niken gätäbätä aune kukwe driere. Akwa kukwe ruäre abokän mätä nuainne kaibe, ñodre mätä orare Jehovai aune ja tötike Bibliabätä ye gärätä arato. Nire tä ja denkä mento Jehová kräke ye tä kukwe ye nuainne kä jutobiti aune ñaka tä nuainne ribeta ie yebätä. Ja namani ruin ño David ie ye erere jata nemen ruin ie, niarakwe niebare: “Ngöbö tikwe, mä tö dre nuain, tita nuainne ye tä kä mike juto tibätä, aune kukwe mäkwe ye tä ti brukwäte” (Salmo 40:8).

13, 14. a) “Ngöbö mikadre täte” nieta, ¿ye dre käkwe mä dimikai nuainne? b) ¿Kukwe ye käkwe monsotre bati kwati dimikanina ño?

¹³ “Ngöbö mikadre täte” nieta, ¿ye dre raba mä dimike nuainne? Mä raba kukwe ruäre ne ngwentari jai aune mikata gare ño ye mä raba tike täräbätä jai, ñodre: “¿Mä tö drei metrere ye mätä kädekete orasionte? ¿Mätä dre niere yebiti mätä mike gare Jehová tare mäkwe?”, “¿Mätä ja tötike kaibe ye ngwane kukwe medenbätä mätä ja tötike?” aune “¿Mä rün aune mä meye ñaka tä niken kukwe driere akwa mä abokän tä niken kukwe driere?” ^[1] (kukwe ja tötikara nekänti nota tä mikani mrä ngösöri mikadre ñärärä). Mä tö dre nuain ne kwe mäkwe orasion nuaindre bäri kwin, ja tötike kaibe Bibliabätä aune mä raba kukwe driere ño bäri kwin ye mä tika täräbätä jai arato.

¹⁴ Monsotre bati kwati tö ja ngökai ñöte ye dre nuaindre tä tike täräbätä jai ye käkwe dimikanina nieta kwetre. Meri bati Testiko kädekata Tilda tä mike gare niara töi nämene dre nuainbätä ye nämene tike täräbätä jai ye köböire kukwe keteitire keteitire jatani nemen bare ie aune kä nikani kwati ta yete namanina juto ja ngökakäre ñöte. Monso mada bati Testiko kädekata Patrick tä kukwe ye erere bäsi mike gare. Tä niere: “Ti töi nämä kukwe ruäre nuainbätä, akwa tikwe tikaba täräbätä jai ye käkwe ti dimikaba ja di ngwen bäri nuainkäre”.

15. ¿Ja diankata mento Ngöbö kräke ye ñobätä tä gare ni aibe ie?

 ¹⁵ Kukwe mada ngwantarita ne mä raba ngwentari jai: “Mä rün aune mä meye o ja ketamuko mäkwe käkwe kukwe metre tuanemetre ye ngwane, ¿mäkwe Jehová mikadre täte jankunu?”. Ja diandrekä mento Ngöbö kräke ye tä gare mä aibe ie ye mäkwe ngwan törö jai. Mäkwe ja diainkä mento Jehová kräke aune mä ja ngökai ñöte ye ngwane, mä rabai ja kete akwle ben bätä mäkwe dre nuaindi ye ererebätä kukwe ükaite kwe mäbe. Aisete mäkwe dre nuaindi Jehová kräke ye mäkwe ñaka nuaindi mä rün aune mä meye o nitre mada käkwe nuaindi ye aibätä. Kä nengwane mäkwe ja ngwain kwin deme aune mäkwe Ngöbö mikai täte, yebiti mäkwe bämikai kukwe ye metre mä kräke aune Ngöbökwe kukwe ükaninte ye mä tö mikai ütiäte jai. Ye köböire, gwäune mä rabaira juto ja ngökakäre ñöte.

16, 17. a) Nire tö ja ngökai ñöte aune ja mikai kristiano angwane, ¿rabadre nuainne töi ñobiti? b) ¿Dre mä dimikai ni kökanintari ye mike bäri ütiäte jai? Mä raba mike gare kukwe bämikata keteiti yebiti.

¹⁶ Bati, Kukwe Biani Ngöbökwe Moisés ie ye nämene gare kwin ni brare iti ie, ye käkwe ngwanintari Jesús ie kukwe biani Ngöbökwe ye meden bäri ütiäte. Jesukwe kukwe ne niebare ie: “Mäkwe Jehová Ngöbö mäkwe taredre ja brukwä tätebiti, ja nire tätebiti aune ja töi tätebiti” (Mateo 22:35-37, TNM). Nibira gare nie ye erere, nire tö ja ngökai ñöte aune ja mikai kristiano, rabadre  nuainne Jehová tare kwe yebätä. ¿Jehová tare mäkwe ye mä raba mike ño bäri dite? Jesús ni kökanintari yebätä mäkwe töbikadre ye köböire raba nemen bare mäi (ñäkädre 2 Corintios 5:14, 15 aune 1 Juan 4:9, 19 yebätä). Mäkwe kä diainkä jai töbikakäre jondron ütiäte biani Ngöbökwe mäi yebätä angwane, ye rabai bäri ütiäte mä kräke aune mä törbai debe biain ie.

¹⁷ Töbike kukwe nebätä. Mä jatadre murie nötökä ñöte aune ni mada käkwe mä diandretari ye bämike ja töite. ¿Mäkwe dre nuaindre? ¿Mä rikadreta ja gwirete dän mada kite jabätä aune mäkwe ñaka debe biandre ni mä diantarikä yei? Ñakare. Erametre, mäkwe debe biandre käre ie. Ye erere arato nita murie nötökä ñöte ye kwrere nita ngite aune gata ye kisete. Akwa Jehová aune Jesús yekwe ni tare krubäte yebätä ni kökanintari kwetre. ¡Niaratre ni mikaninta kwäre! Niaratre ye köböire nüna kärekäre kä bä nuäre te Kä tibienbätä yei nita tö ngwen. Erametre nikwe debe biandre krubäte ietre, ¿ñan ererea?

18, 19. a) ¿Ñobätä mäkwe ñaka kä jürä ngwandre jabätä ja denkä mento Jehová kräke? b) Mäkwe ja töi mikai Ngöbö mike täte ye ngwane, ¿ñobätä mä rabai nüne bäri kwin?

¹⁸ ¿Jehová jondron nuainbare mä kräke yebätä mä tö debe biain ie? Ye erere angwane, mäkwe ja diandrekä mento Ngöbö kräke aune mäkwe ja ngökadre ñöte ye bäri kwin. Nibira gare mäi ye erere, ja diandrekä mento Ngöbö kräke ye abokän niara tö dre dre ie ye erere mäkwe nuain käre ye mäkwe käbämikai ie meden gärätä. Akwa mäkwe ñaka kä jürä ngwan jabätä kukwe ye käbämikakäre ie. ¿Ñobätä? Ñobätä ñan aune Jehová tö jondron kwin ie mä kräke, aune nire nire käkwe niara mikai täte ye kräke niarakwe jondron kwin mikai nemen bare käbämikata kwe (Hebreos 11:6). Mäkwe ja diainkä mento Ngöbö kräke aune mä ja ngökai ñöte ye ngwane kukwe blo ñaka rabai bare mäbätä. ¡Mäkwe nünain bäri kwin! Ni Testiko nämene monsore angwane ja ngökani ñöte kwe abokän nengwane kä niena 24 biti tä niere: “Tikwe kä mikadre niken raire ta akräke ti nämä dre nuainne ye rabadre gare bäri kwin tie, akwa tikwe ja ngökabare ñöte ye käkwe ti kriemikani kukwe blo kä nete yebätä”.

¹⁹ Mirira gare ye erere, Jehová tö jondron bäri kwin ie mä kräke. Akwa Satana kräke ye ñaka ütiäte, ñobätä ñan aune niara töita ja aibebätä. Satana tö dre ie ye mäkwe nuaindi angwane ñaka jondron kwin biain kwe mäi. Jondron kwin ñaka jire kwe biandre, ¿se dre biandre kwe? Kukwe kwin ñaka jire kwe ja känenkäre nitre kräke. Jondron kwin ñaka tärä kwe mä kräke kä ja känenkäre yete, ñobätä ñan aune jondron kwin ñaka tärä jire niara kräke ja känenkäre (Apocalipsis 20:10).

20. ¿Mä raba dre nuainne ja mikakäre juto ne kwe mä ja diandrekä mento Jehová kräke aune ja ngökakäre ñöte? (Recuadro “Kukwe mä dimikakäre ja kete bäri kwin Ngöböbe” mikadre ñärärä arato).

²⁰ Mäkwe ja diandrekä mento Jehová kräke ye kukwe bäri kwin mäkwe diandre nuaindre jai. ¿Mä niena juto kukwe ye diankäre nuaindre jai? Ye erere angwane, mäkwe ñaka kä jürä ngwan jabätä. Akwa mä jämi juto raba ruin mäi angwane, kukwe nieta mäträkäre kukwe ja tötikara nekänti ye mäkwe nuain. Ja mräkätre konkrekasion Filipos ye rabadre nirien jankunu kukwe ja üairebiti niebare Pablokwe ietre (Filipenses 3:16). Kukwe ye erere mäkwe nuaindi angwane, gwäune mä rabaira juto ja diankakäre mento Jehová kräke aune ja ngökakäre ñöte.