1. ¿Jondron sribe jatani kena ye ngwane sribibare ño jabe?

JONDRON sribe jatani kena ye ngwane sribita gwairebe. Jehová aune Jesús tä käre sribire gwairebe. Jesús ye sribebare kena Jehovakwe. Ye bitikäre, Jesukwe sribibare “niara ken ni sribikä kwin krubäte kwrere” (Proverbios 8:30). Ye erere, nitre Ngöbö mikaka täte ye tä käre sribire gwairebe sribi biani kwe ye nuainkäre. Ñodre, Noé aune mräkätre kwe ye sribibare gwairebe arka sribekäre. Kä nikani kwati krubäte ta ye bitikäre, nitre israelita sribibare gwairebe tabernáculo ye sribekäre, dikantekäre aune ngwankäre kä jene jene känti kä ngwarbe nötare yete. Templo sribebarera ye ngwane, nitre israelita kantabare aune jondron musika ngö mikara yebiti kansion keta kabre bä nuäre ngö mikani kwetre Jehová käikitakakäre. Nitre Ngöbö mikaka täte tä käre keteitibe aune tätre sribire gwairebe ye köböire jondron ye jökrä nuainta kwetre (Génesis 6:14-16, 22; Números 4:4-32; 1 Crónicas 25:1-8).

2. a) ¿Nitre kristiano siklo kena yebätä dre tuin ütiäte nie? b) ¿Drebätä nibike ja tötike kukwe ja tötikara nekänti?

 ² Nitre kristiano siklo kena ye sribibare gwairebe jabe arato ye tuin ütiäte nie. Apóstol Pablo niebare nitre kristiano yei sribi jene jene nuain nämene gare aune sribi keta kabre nuain nämene kwetre, akwa nämenentre keteitibe ñobätä ñan aune nämenentre näin Jesukristo jiebiti. Pablokwe niaratre ye bämikani ni ngrabare ye kwrere, ñobätä ñan aune ni ngrabare ye kiakia akwa jökrä tä sribire gwairebe (ñäkädre 1 Corintios 12:4-6, 12 yebätä). ¿Aune ni? Ni tädre keteitibe kukwe driere, konkrekasionte aune ni mräkäbe, ¿yekäre nikwe dre nuaindre? Nibike ja tötike kukwe yebätä kukwe ja tötikara nekänti.

3. ¿Dre mikani tuare apóstol Juan ie?

³ Ángel ni kükü nämene trompeta ngö mike ye Jehovakwe mikani tuare bati apóstol Juan ie. Ángel nirikekäre käkwe trompeta ngö mikani ye ngwane, “muke [...] näma[ne] kä käinbti betaninkära timon nüke kä temen nebtä” ye Juankwe tuani. Kä timo mente nguse aune kä iko te yete jukwe nämene ye “muke” tikani llavebiti, kämäkä ye kädekata “Kä Timonbti”. Ye ngwane, kämäkä kri krubäte mobe nguse yete ngübü jatani nen krubäte kunkwäre. Aune ngübü yete ta tröda jatani kwati krubäte. Akwa tröda ye käkwe ñaka kri o kri mu keta kabre ye kwetani, ñakare aune nire nire kübenbätä “Ngöbö kä ñakare ketaninkä” ye kwetani kwe (Apocalipsis 9:1-4). Tröda ye raba kukwe tare mike nemen bare ye nämene gare Juan ie, namani bare Moisés näire Egipto ye erere (Éxodo 10:12-15). Tröda tuani Juankwe ye nämene nitre kristiano dianinkä nänkäre kä kwinbiti ye bämike, abokän tä kukwe tare mike gare kukwe keta kabre ngwarbe mikata täte ye rüere. Aune nitre kwati krubäte tä tö ngwen nüna kärekäre Kä tibienbätä ie ye tä niaratre dimike kukwe drie yebätä. Kukwe drieta köböire nitre kwati niena nemen kwäre kukwe keta kabre ngwarbe mikata täte aune Satana tä gobrane yebätä. Sribi ye niaratre jökrä tä nuainne gwairebe.

4. a) ¿Sribi meden tä nuaindre ni kristiano ie? b) ¿Dre aibe köböire ni raba nuainne?

⁴ Jehovakwe sribi kri krubäte biani nie. Kä krütai rükai ye känenkri, nikwe kukwe kwin Gobran Ngöbökwe yebätä driedre nitre jökrä ie (Mateo 24:14; 28:19, 20). Nitre jökrä ie tomana ye nikwe nübaidre “ñö ni mikakrä nüne kärekäre” ye ñain. Ye abokän nitre jökrä tö kukwe mikai gare jai yei nikwe kukwe metre Bibliabätä driedre (Apocalipsis 22:17). Ye nuainkäre ni tädre keteitibe aune nikwe sribidre gwairebe konkrekasion yebe (Efesios 4:16, Ngöbö Täräe [NGT], tärä okwä ükaninte).

5, 6. ¿Ni testiko Jehovakwe tä sribire gwairebe kukwe driekäre ye dre dre tä bämike?

⁵ Kukwe mikakäre gare nitre kwati krubäte ie, ni tädre ja ükaninte kwin nuainkäre. Kukwe nieta ni tötikakäre konkrekasionte ye köböire raba nemen bare nie, ñodre gätä nuainta kukwe driekäre yete ni tötikata. Kukwe nieta ni tötikakäre ye köböire ni raba kukwe driere Gobran Ngöbökwe yebätä nitre jökrä ie aune ni raba tärä aune täräkwata ye driere krubäte. Ne madakäre, kukwe ükateta kukwe driekäre bäri ye ngwane, nikwe kukwe driedre siba ribeta nie ruäre ngwane. Nita sribi ye nuainne angwane, nita sribire gwairebe ja mräkätre kwati krubäte  kä jökräbiti tibien tä kukwe drieta nikwe arabe driere yebe. Nita sribire angeletre yebe arato, ñobätä ñan aune niaratre tä ni dimike kukwe driere (Apocalipsis 14:6).

⁶ Erametre, kä jökräbiti tibien kä kwatire kwatire te nita kukwe driere ño mikata gare Anuario yebätä ye tä kä mike juto krubäte nibätä. Gätä krikri regional nuainta ye tä ni dimike nemen keteitibe arato. Kä kwatire kwatire gätä kri ye nuain jämi känenkri, nita gwairebe nitre nübaire nemen gätä yebätä. Aune gätä yete, ni jökrä tä kukwe kädrieta ye arabe kukwe nuin. Kukwe kädrieta, kukwe bämikata aune kukwe namani bare kira kädrieta Bibliabätä abokän bämikata ye tä ni dimike sribire bäri kwin Jehová kräke. Jesús Ja Nire Biani Ngwanta Törö Jai kä kwatire kwatire te ye tä ni dimike nemen keteitibe arato, ye nuainta köbö 14 nisán sö nitre judiokwe yete (1 Corintios 11:23-26). Gätä ütiäte ye nuain jämi känenkri bämän kabre te, ni jökrä tä niken nitre nübaire gätä ütiäte krubäte ye kräke. Aune Ñänä tä niken nekä ye bitikäre, köbö yete ni jökrä tä ja ükökrö gätä ye nuainkäre. Ye erere nita Jesús kukwe biani nuaindre ye mike täte aune nita bämike Jehovai niarakwe kukwe nuainbare ni kräke yebätä nita debe bien ie.

7. ¿Nita sribire gwairebe ye köböire dre dre namanina bare?

⁷ Tröda ye kwatibe ñaka raba drekwa nuainne. Ye erere arato, ni ñaka raba kaibe kukwe driere nitre kä jökräbiti tibien ie. Akwa tröda ye kwrere nita sribire gwairebe. Ye köböire nita nitre kwati krubäte ben blite Jehovabätä aune nita niaratre dimike Jehová käikitekä bätä mike ütiäte jai.

8, 9. a) ¿Ütiäte krubäte ni tädre keteitibe ye mikakäre gare Pablo kukwe meden bämikani? b) ¿Nitre konkrekasionte tädre keteitibe yekäre nikwe dre nuaindre?

⁸ Konkrekasion tä ja ükaninte ño ye apóstol Pablo mikani gare nitre kristiano Éfeso yei aune kukwe ne niebare kwe mäträkäre bätätre: “[Nikwe] ja ngwandre nirien jire jökrä” (ñäkädre Efesios 4:15, 16 yebätä). * Ni kristiano jökrä raba konkrekasion dimike nemen keteitibe aune näin Jesús tä ji dokwäre ni kräke ye jiebiti, ye bämikakäre niarakwe blitabare ni ngrabare yebätä. Pablo niebare, ni ngrabare kiakia ye jökrä tä sribire gwairebe ni möröka ye köböire. Ye medenbätä, ni tä bati o ni niena umbre, nita kwin o nita bren, ¿akwa ni raba dre nuaindre ne kwe konkrekasion tädre keteitibe?

⁹ Jesukwe nitre umbre kädekani konkrekasion jie ngwankäre. Aune nikwe niaratre mikadre ütiäte jai bätä kukwe nieta kwetre nie ni jie ngwankäre ye nikwe mikadre täte ie Jesús tö (Hebreos 13:7, 17). Erametre, ruäre ngwane ye ñaka nuäre nuaindre. Akwa nikwe ja di käräi Jehovai angwane, niarakwe üai deme kwe biain nie aune ni dimikai kwe nitre umbre ji ngwanka ye kukwei mike täte. Ni töi bobre aune nita sribire gwairebe nitre umbre ji ngwanka yebe angwane, ni rabai ütiäte nitre konkrekasionte kräke. Ni jökrä täi keteitibe aune nikwe ja taredi bäri kwärikwäri köbö kwatire kwatire te.

10. ¿Nitre sribikä konkrekasionte tä sribire ye tä konkrekasion dimike ño nemen keteitibe?

¹⁰ Nitre sribikä konkrekasionte ye tä konkrekasion  dimike nemen keteitibe arato. Niaratre tä ja di ngwen nitre umbre ji ngwanka ye dimikakäre, aune tätre nitre ji ngwanka dimike yebätä nita debe bien krubäte. Ñodre, tärä bätä täräkwata tädre debe näre kukwe driekäre nie ye tätre mike gare kwin jai. Ne madakäre, nitre tä nüke Ju Ja Ükarakrö yete ye tätre kain ngäbiti kä jutobiti. Aune Ju Ja Ükarakrö ükateta bätä sökakata yebätä tätre sribire arato. Nita sribire gwairebe nitre sribikä konkrekasionte yebe angwane, nita konkrekasion dimike nemen keteitibe aune sribire gwairebe Jehová kräke (kukwe ye erere bäsi kwain mäi Hechos 6:3-6 yekänti).

11. ¿Konkrekasion tädre keteitibe yekäre ja mräkätre bati rabadre dre nuainne?

¹¹ Kä kwati krubäte te nitre umbre ji ngwanka ye ruäre käkwe ja di ngwanina krubäte sribikäre konkrekasionte. Akwa niaratre kitra umbre aune ñaka raba sribire krubäte käne ye erere raba ruin nie. Ja mräkätre bäri bati ye raba sribire kwin krubäte konkrekasionte. Nitre umbre käkwe monsotre bati ye tötikadre angwane, niaratre raba sribi keta kabre nuainne konkrekasionte. Ne madakäre, nitre sribikä konkrekasionte ye tätre ja di ngwen sribikäre ne kwe ja känenkäre rabadre ni umbre ji ngwanka erere ye kwin krubäte (1 Timoteo 3:1, 10). Nitre umbre konkrekasion jie ngwanka ruäre tä bati ye tä nirien jötrö kukwe ja üairebiti yebätä nengwane niaratre tä ni circuito tuabitikä aune tä ja mräkätre bätä ja ngwaitre konkrekasion keta kabre te ye dimike. Ja mräkätre bati tätre juto biare nitre mada dimikakäre yebätä ni jökrä tä debe bien (ñäkädre Salmo 110:3 * aune Eclesiastés 12:1 yebätä). *

12, 13. ¿Ni ja mräkäre tädre keteitibe yekäre rabadre dre nuainne?

¹² ¿Ni ja mräkäre tädre keteitibe yekäre rabadre dre nuainne? Ütiäte krubäte nikwe käre bämän kratire kratire Ngöbö mikadre täte ni mräkäbe. Nitre rüne aune meyere bätä monsotre käkwe kä diainkä jai rabakäre keteitibe ja kitakäre Jehovabätä angwane, niaratre jatai ja tarere bäri. Köbö ye näire niaratre dre niei kukwe driekänti yebätä raba ja kite. Ye käkwe niaratre dimikai nemen bäri juto kukwe driekäre. Nitre ja mräkäre tätre blite Jehovabätä jabe aune niaratre tö Jehová taredi bätä mikai täte tä nemen tuin ietre ye ngwane, jökrä tätre nemen bäri keteitibe.

¹³ ¿Ni brare aune meri gure tädre keteitibe yekäre rabadre dre nuainne? (Mateo 19:6). Niaratre nibu tä Jehová tarere aune mike täte gwairebe ye ngwane, ja mäkäninte kwetre ye rabai bäri dite aune nünain kä jutobiti kwetre jabe. Abrahán aune Sara, Isaac aune Rebeca, bätä Elqaná aune Ana ja tarebare ye erere, niaratre nibu rabadre ja tarere aune ja töi mike kwin ja kräke kwärikwäri ye ütiäte krubäte (Génesis 26:8; 1 Samuel 1:5, 8; 1 Pedro 3:5, 6). Ye köböire niaratre täi keteitibe aune rabai ja kete  kwin Ngöböbe (ñäkädre Eclesiastés 4:12 yebätä). *

14. Mä muko ñaka Jehová mike täte angwane, ¿mä raba dre nuainne mätä ja mäkäninte ye mikakäre dite?

¹⁴ Ni ñaka Jehová mike täte yebe nikwe ñaka ja mäkädrete nieta metre Bibliakwe (2 Corintios 6:14). Akwa yebiti ta, ja mräkätre aune ja ngwaitre ruäre tätre ja mäkäninte ni ñaka testiko Jehovakwe yebe. ¿Ñobätä? Niaratre ruäre ye nämenena ja mäkäninte ye bitikäre ja mikani Testiko kwetre raba ruin nie, akwa muko kwe ye ñaka kukwe metre kani ngäbiti. Mada abokän käkwe ja mäkäninte ni Testiko ben akwa ye bitikäre muko kwe ye kukwe metre tuanimetre raba ruin nie. Kukwe ye erere tä ni kisete angwane, ¿nikwe dre nuaindre nita ja mäkäninte ye mikakäre dite? Biblia tä kukwe niere mäträkäre nibätä ye ruäre ngwane ñaka rabadre nuäre nuaindre ni kräke, akwa nikwe mikadre täte. Ani blite Mary aune muko kwe kädekata, David yebätä. Niaratre nibu nämene Testiko, akwa ye bitikäre David ñaka jatani niken gätäbätä. Mary ja di ngwani ja ngwen kwin muko ie aune ja töi mikani kwe ni kristiano erere. Kukwe driebare kwe Jehovabätä monsotre kwe ni ti yei aune nämene niken jankunu gätä aune gätä krikri yebätä. Kä nikani ta, aune monsotre kwe ririabare bätä kä mikaninkä kwetre gwi. Ñaka namani nuäre Mary kräke Jehová mikakäre täte kaibe, akwa ja ngwani metre kwe Ngöböi. Nämene täräkwata Ni Mikaka Mokre bätä ¡Despertad! ye mikete gwi muko kwe kräke. Bati David jatani ñäke täräkwata yebätä. Ja känenkäre David jataninta niken gätä ruäre yebätä. David bräi nämene iti abokänbiti kä nämene kwä ti ye käre nämene täkärä denkä kräke Ju Ja Ükarakrö yete. Aune David ñaka nämene nemen ye ngwane, monso chi ye nämene niere ie: “Rua, ti täni mä uliere krubäte gätäte”. Kä nikani 25 ta ye bitikäre, David namaninta Jehová mike täte. Kä nengwane, David aune Mary tä Jehová miketa täte gwairebe aune tätre nüne kä jutobiti jabe.

15. ¿Nitre ja mäkäninte mekerabe ye raba nitre ja mäkäninte bitinkä ye dimike ño?

¹⁵ Satana tä ja mike nitre ja mräkäre ye rüere. Yebätä nitre ja mäkäninte tä Jehová mike täte ye rabadre nemen bäri keteitibe. Niaratre ja mäkäninte mekerabe o bitinkä, akwa raba dre  nuainne aune dre niere ja mäkäninte kwetre mikakäre bäri dite yebätä rabadre töbike. Nitre ja mäkäninte mekerabe ye rabadre kukwe kwin bämike nitre ja mäkäninte bitinkä ye käne. Nitre ruäre ja mäkäninte bitinkä ye niaratre rabadre nübaire nane nane jabe Ngöbö mika täte ni mräkäbe nuainta kwetre ye kräke. Ye köböire nitre ja mäkäninte bitinkä yei rükai gare kä rikai kwati krubäte ta, akwa tädre jankunu keteitibe aune ja tarere kwärikwäri (Tito 2:3-7).

16, 17. ¿Kukwe meden meden kwin tä ja känenkäre ni kräke?

¹⁶ Nitre israelita nämene niken Jerusalén fiesta käi ngwankäre juto jabätä ye ngwane, niaratre jökrä nämene sribire gwairebe. Dre dre ribe nämene kwetre jai ngwandre ye jökrä mika nämene juto kwetre ye bitikäre jondron ye ngwankäre nämenentre ja dimike kwärikwäri ji ngrabare. Niaratre jökrä nämene nemen templote ye ngwane, nämenentre Jehová mike täte aune käikitekä gwairebe (Lucas 2:41-44). Ni abokän tä ja mike juto nünankäre kä mrä yete. Aisete ütiäte krubäte ni tädre keteitibe aune nikwe sribidre gwairebe arato. ¿Kukwe madabätä ni raba sribire bäri gwairebe ja mräkätre aune ja ngwaitre ben?

¹⁷ Nitre kä nebätä tätre ja ñäkäninbiti aune tätre rüre jabe kukwe jökräbätä. Akwa Jehová tä ni dimike ye köböire, nita nüne jäme jabe aune Biblia tä dre driere ye nüke gare nie. Erametre nita debe bien krubäte Jehovai, ¿ñan ererea? Kä jökräbiti tibien, ni Ngöbö mikaka täte tä Ngöbö mike täte niara tö ie ye erere. Ne madakäre, kä krüte nete nita bäri keteitibe. Isaías aune Miqueas niebare ye erere, ni jökrä tä niken gwairebe “ngutuä Jehovakwe” kokwäre (Isaías 2:2-4; ñäkädre Miqueas 4:2 yebätä). * Ni täi keteitibe angwane, jondron kwin keta kabre tä ni kräke ja känenkäre. Gwäune ni jökrä käkwe Jehová mikai täte gwairebe Kä tibienbätä ye nikwe tuai.