KÄ KWATI krubäte nikanina ta yete kä Brookings (Dakota del Sur, Estados Unidos) yekänti kä nämä tibo krubäte dekä ye törö tie. Yebätä Nieve käi rababara nüke nämä nemen ruin tie. Kä tibo krubäte jondron nire ngübakäre yekänti ti nämä nitre ruäre ben aune nun jökrä nämä grükekä. Jondron kri ñö ngwäre te ñö nämä ere aune nämä tibo krubäte ye ken nun nämä. Tibike kukwe mike gare jabätä munye ne kwe ñobätä nun nämä yete ye rükai gare munye.

Ti däreba köbö 7 marzo kä 1936 yete. Nun nibokä jai akwa ti abokän mrä köre. Kä Dakota del Sur kädrikri yete kä chi jondron nire ngübakäre yekänti nun nämä nüne. Kä jondron nire ngübakäre yekänti nun nämä sribire ye ti mräkätre nämä mike tuin ütiäte krubäte jai, akwa niaratre ñaka nämä sribi ye mike tuin bäri ütiäte jai. Ti rün aune ti meye ja mikani testiko Jehovakwe. Kä 1934 yete ja ngökani ñöte kwetre. Niaratre ja dianinkä mento Jehová kräke, ye medenbätä Ngöbö mikadre täte ye nämene bäri ütiäte kräketre. Ti rün kädeka nämene Clarence. Ti rün kädekani käne siervo de compañía konkrekasion chi nunkwe Conde (Dakota del Sur) yete aune ye bitikäre ti grü kädekani arato. Siervo de compañía nie nämene ye abokän kä nengwane ni gätä nitre umbrekwe köböikitaka nieta.

Ti mräkätre nämene niken nitre testiko Jehovakwe nämene gätä nuainne yete aune nämenentre kukwe driere ju ju te blitakäre nitre ben kukwe kwin krubäte käbämikata Bibliakwe yebätä. Ti rün aune ti meye kukwe kwin bämikani nun käne aune diribare kwetre nunye yekwe nun dimikani Jehová tarere. Ti aune ti ngwai Dorothy yebiti kä rababa 6 ye ngwane, nunkwe ja mikaba kukwe driekä. Kwela Sribi Ngöbökwe Kräke kömika jataba krire ye ngwane, kä 1943 yete tikwe ja kä bianba kwela ye kräke.

 Gätä krikri nuain nämä ye nun nämä mike tuin ütiäte krubäte jai. Kä 1949 yete gätä kri nuainba Sioux Falls (Dakota del Sur) yekänti ye törö tie. Gätä kri yete, ja mräkä Grant Suiter kukwe ne kädrieba: “¿Nitre blo gaite ye käi nibira ja ken raba ruin mäi?”. Nitre kristiano ja dianinkä mento Ngöbö kräke ye jökrä rabadre kukwe kwin Gobran Ngöbökwe yebätä driere nieba kwe. Gätä kri nuainba ye bitikäre tikwe ja diankaba mento Ngöbö kräke. Ja känenkäre gätä kri köböbu nuainba ye ngwane, tikwe ja ngökaba ñöte köbö 12 noviembre kä 1949 yete kä Brookings yekänti. Ye medenbätä ti nämä nitre nimä ben kä tibo krubäte jondron nire ngübakäre tikwe nini käne yekänti. Jondron ñö ngwäre yete nun jababa ja ngökö ñöte.

Ye bitikäre tikwe ja töi mikaba sribi prekursor nuainne. Kä rababa 15 tibiti ye ngwane, tikwe sribi prekursor ye kömikaba köbö 1 enero kä 1952 yete. Biblia tä niere: “Nire tä näin nitre töbätä ben ye rabai töbätä arato” aune ti mräkätre ngätäite nitre töbätä nämä kwati krubäte, abokän ie ti törbaba sribi prekursor nuaindi ye rababa tuin kwin (Proverbios 13:20). Ti grü Julius, abokänbiti kä nämä 60 yebe käre ti nämä kukwe driere. Niara bäri umbre ti kräke, akwa nun nämä kukwe driere jabe ye käi nämä nemen juto nunbätä. Kukwe nämä gare krubäte ie yebätä kukwe rababa gare krubäte tie. Kä rikaba braibe ta yete ti ngwai Dorothy ja mikaba prekursora arato.

Ti nämä chi ye ngwane, ti rün aune ti meye nämä käre nitre circuito tuabitikä aune muko kwetre ye nübaire nemen jakänti. Jesse Cantwell aune muko kwe Lynn käkwe ti dimikaba krubäte. Niaratre töi nämä krubäte tibätä aune nämä ti dimike. Niaratre nämä konkrekasion nun bäre ye tuinbiti angwane, ruäre ngwane nämenentre ti nübaire kukwe driere jabe. Ti nämä näin bentre ye käi nämä nemen juto krubäte tibätä. Ti törbaba Jehová mikai täte niaratre erere aune ja mikai prekursor arato.

Ja mräkä Bud Miller ye rababa circuito nunkwe tuinbiti mada. Muko kwe kädeka nämä Joan. Kä nämä 18 tibiti ye ngwane, niaratre konkrekasion nunkwe tuabitiba. Kä ye ngwane rababa nändre tie oficina ja kitakäre rübätä yekänti, yete nire nire rikadre rübätä ye mika nämä gare. Nitre sribikä oficina yete törbaba ti tuai kukwe nuainne abokän ñaka ja erebe Jesukwe kukwe niebare yebe rababa tuin tie, ye abokän nikwe ñaka ja mikadre kukwe gobrankwe yete niebare Jesukwe (Juan 15:19, TNM). Akwa ti abokän törbaba kukwe kwin Gobran Ngöbökwe yebätä  driei. Aisete niaratre ti mikadre tuin jai ni kukwe driekä erere tikwe ribeba ietre.

Ja mräkä Miller näin tibe oficina ja kitakäre rübätä yekänti nieba kwe tie ye ngwane kä rababa juto krubäte tibätä. Niara yebätä kä jürä ñaka nämä aune nitre mada jürä ñaka nämäbätä. Ne madakäre, Ngöbö Kukwei nämä gare krubäte ie. Niara nämä tibe kä yekänti yekwe ti dimikaba krubäte. ¿Ye köböire dre rababa bare? Kä 1954 jatabara krüte ye ngwane, oficina ja kitakäre rübätä yekänti ti mikadre tuin jai ni kukwe driekä erere tikwe ribeba ietre ye ka ngäbitiba kwetre. Ye köböire, kä rababa tie sribikäre bäri Jehová kräke.

Ye bätäräbe, Kä Jondron Kwetadre Nökara Watchtower kä Staten Island (Nueva York) yekänti ti nübaiba sribire Betel. Kä komä näre tikwe sribiba yete. “Nitre töbätä” kwati krubäte ben tikwe sribiba yebätä kukwe kwin rababa gare tie.

Emisora WBBR ye nämä kä jondron kwetadre nökara yekänti. Kä 1954 nemen 1957 yete nitre testiko Jehovakwe kukwe drieba emisora yebiti. Nun betelita 15 o 20 nämä sribire kä jondron kwetadre nökara yekänti. Nun jökrä bäsi ye monsotre bati aune kukwe ñaka gare krubäte nunye nämä sribire yete, akwa ni iti dianinkä nänkäre kä kwinbiti kädeka nämä Eldon Woodworth ye nämä sribire nunbe. Nun nämä niara mike tuin jai nun rün ye erere aune kukwe keta kabre drieba kwe nunye. Kukwe nämä nemen jabätä nunye ye ngwane, käre ja mräkä Woodworth nämä niere: “Erametre, jondron ñaka krubäte, akwa yebiti ta ni Däkien sribi keta kabre nuainbarera ye tä ni töi mike ñan krütare”.

Ja mräkä Frederick Franz nämä nunbe arato aune nun dimikaba krubäte kwe. Niara ye ni töbätä aune kukwe Bibliabätä nämä gare krubäte ie. Niara töi nämä nun itire itirebätä. Harry Peterson nämä mrö rien nun kräke. Apellido metre kwe ye abokän Papargyropoulos, akwa Peterson ye nämä nemen bäri nuäre niedre nun kräke. Niara ye nämä ni dianinkä nänkäre kä kwinbiti arato aune nämä kukwe driere kä jutobiti. Niara nämä sribi kwe nuainne kwin krubäte Betelte aune nämä käre kukwe driere. Sö kratire kratire nämä täräkwata mikete ere nitre ie. Arato kukwe Bibliabätä nämä gare krubäte ie aune kukwe keta kabre nun nämä ngwentari ie ye nämä mike gare nunye.

Kä jondron kwetadre nökara yekänti nun nämä kri ngokwä aune jondron mada kwetadre ye mike latate ne kwe ñaka rikadre ngwarbe. Kä kwatire kwatire lata  45,000 näre te jondron mika nämä bäsi litro krati ja mräkätre Betel kräke. Ti nämä sribire Etta Huth ja ngwai töbätä krubäte ben. Kri ngokwä aune jondron mada kwetadre ye mikadre ño latate ye niarakwe ükateba. Ja ngwaitre kwati konkrekasion nun bäre yete nämä nüke sribire nunbe aune Etta nämä niaratre dimike kukwe ükete jai sribibätä. Sribi ye nämä gare kwin Etta ie, akwa kä jondron kwetadre nökara yekänti ja mräkätre nämä ji ngwen ye käre Etta nämä mike ütiäte jai. Nämä kukwe kwin bämike nun jökrä käne.

Angela Romano (Angie) nämä nüke nun dimike sribibätä. Etta niara dimikani Jehová mike gare jai. Tikwe ja mäkäteba Angie ben sö abril kä 1958 yete aune kä 58 nikanina ta yete nunkwe sribibarera Jehová kräke. Angie tä ja ngwen metre Jehovai yekwe nun dimikanina nüne kwin jabe. Niara ye meri töbätä aune dre dre raba nemen bare akwa ti raba tö ngwen täte ie.

Kä 1957 yete emisora WBBR nämä Staten Island rürübäinba ye ngwane, tikwe sribiba kä braibe te Betel Brooklyn yekänti. Tikwe ja mäkäteba Angie ben ye ngwane, tikwe sribi Betelte ye tuametreba. Nunkwe sribi prekursor nuainba kä komä te Staten Island yekänti. Kä ruäre te tikwe sribiba nitre rababa mrä emisora bökäne ye kräke, niaratre käkwe emisora ye kädekaba WPOW.

Tikwe nünanba jondron braibebiti Angie ben, ne kwe kä meden meden känti nun ribe rabadre sribire Ngöbö kräke yekänti nun rikadre. Ye köböire, kä 1961 yete nun nübaiba prekursor especial nuainne Falls City (Nebraska) yekänti ye nunkwe ka ngäbitiba. Nun rababara yete ye bätäräbe, nun nübaiba sö krati te Kwela Sribi Ngöbökwe Jie Ngwankäre yebätä South Lansing (Nueva York) yekänti. Nun tötikaba kwela yete ye käi rababa juto krubäte nunbätä aune kwela ye bitikäre nun näinta Nebraska ye nunkwe nütüba. Akwa nun juanba sribi misionero nuainne Camboya yebätä nun töi rababa ñan krütare. Juta Camboya bä nuäre krubäte nemenkä sureste kä Asia yekri yekänti nunkwe jondron mrä tuaba, kukwe nuaba aune bänä nuaba. Nun törbaba ja brukwä tätebiti kukwe kwin Gobran Ngöbökwe yebätä driei juta yekänti.

Akwa gobran Camboya jataba kukwe mada ükete, yebätä nun rikaba nüne Vietnam del Sur yekänti. Ye bitikäre kä rikaba kubu ta yete ti rababa bren krubäte, yebätä nun rikabata Estados Unidos. Ti ñaka rababata räre jötrö ngwarbe. Ja rababata ruin kwin tie ye ngwane, nun jatabata sribi prekursor nuainne.

Sö marzo kä 1965 yete, ti kädekaba ni ni tuabitikä konkrekasionte. Tikwe Angie ben circuito aune distrito tuabitiba bätä kukwe ükate nämä gätä krikri nuainkäre yekänti nunkwe sribiba arato kä 33 näre te. Sribi ye nämä tuin kwin krubäte tie, ñan ñobätä aune käre tita gätä krikri ye mike tuin ütiäte jai. Konkrekasion jene jene nämä Nueva York aune mada nämä känime ye nunkwe tuabitiba kä ruäre te aune gätä krikri ruäre ye nuainba kä jadakakäre nitre Yankees ie yekänti.

Sribi keta kabre Ngöbö kräke abokän ñaka nuäre ye bianba nuaindre nunye kä kwati krubäte rikaba ta yete. Kä 1995 yete, Kwela Känti Nitre Tötikata Sribi Ngöbökwe Jie Ngwankäre ye kräke ti nübaiba nitre tötike. Kä rikaba komä ta ye bitikäre nun nübaiba sribire  Betel. Kä rikaba 40 ta ye bitikäre ti rükabata sribikäre Betel ye käi rababa juto krubäte tibätä, ñan ñobätä aune yete ti jataba kena sribire köbö täte Ngöbö kräke. Oficina Känti Kukwe Drie Jie Ngwanta yekänti tikwe sribiba kä ruäre te aune tikwe nitre tötikaba kwela keta kabre ükaninte yebätä. Kä 2007 yete, Nitre Braibe Konkrekasion Jökrä Ngübabitikä yekwe Oficina Kwela Köböikitakäre ye ükateba kwela keta kabre nuain nämä Betelte ye jie ngwankäre. Kä ruäre te tikwe Oficina Kwela Köböikitakäre ye jie ngwanba.

Kwela keta kabre nuain nämä ño Betelte ye erere nuain ñaka niena kä nengwane. Kwela Nitre Umbre Konkrekasionte kräke ye nuain jataba kä 2008 yete. Ye bitikäre kä rikaba kubu ta yete, nitre umbre ji ngwanka 12,000 biti bäri janama kwela yebätä Patterson aune Betel Brooklyn yekänti. Kwela ye nuain täbe kä mada mada känti. Kä 2010 yete, Kwela Känti Nitre Tötikata Sribi Ngöbökwe Jie Ngwankäre ye kädeka jataba Kwela Nitre Brare Kaibe Tötikakäre Bibliabätä aune kwela mada ükaninte abokän kädekaba Kwela Nitre Kristiano Gure Tötikakäre Bibliabätä.

Sö septiembre kä 2014 yete, kwela ketebu ye ükaninte keteitibe aune kädekata Kwela Nitre Gobran Ngöbökwe Kukwei Driekä kräke. Kä nengwane nitre gure, nitre brare aune merire kaibe raba niken ja tötike kwela yete. Kwela ye nuain rabai juta keta kabre te namani gare ja mräkätre aune ja ngwaitre kä jökräbiti tibien ie ye käi namani juto bätätre. Ja mräkätre aune ja ngwaitre mada kwati krubäte näin ja tötike kwela yete gare tie ye tä kä mike juto tibätä. Ja mräkätre aune ja ngwaitre kwati krubäte käkwe kukwe ükaninante jai nänkäre ja tötike kwela yete niena gare tie ye tä kä mike juto tibätä.

Kä tibo krubäte jondron nire ngübakäre yekänti tikwe ja ngökaba ñöte yete ja känenkäre nükebe kä nengwane tikwe nünanbarera ño yebätä tita töbike angwane, nitre kwati krubäte töbätä namani gare tie yebätä tita debe bien Jehovai. Niaratre ti dimikani Ngöbö mike gare jai aune mike täte bäri kwin. Niaratre ye ruäre nämä bäri bati ti kräke aune mada abokän bäri umbre. Niaratre ye kwati krubäte nünanka kä madakänti. Akwa niaratre nämä dre nuainne yekwe mikaba gare tie nämenentre Ngöbö tarere metre. Ja ketamuko töbätä kwati krubäte tä tikwe juta Jehovakwe yete abokänbätä ti raba ja kite ye tä kä mike juto tibätä.