KUKWE JA TÖTIKARA 10
Debe bianta Jehovai aune tareta ye tä ni töi mike ja ngökö ñöte
“¿Dre köböite ti ñaka ngöka raba ñöte?” (HECH. 8:36, TNM).
KANTIKO 37 Tikwe sribidi ja brukwä tätebiti Jehovakrä
KUKWE NEBÄTÄ JA TÖTIKAI *
1, 2. Hechos 8:27-31, 35, 36, 38 tä niere erere, ¿ñobätä ni etíope käkwe ja ngökani ñöte?
¿MÄ TÖ ja ngökai ñöte nänkäre Kristo jiebiti? Nitre kwati tä Jehová tarere aune tä debe bien ie kukwe kwin yebätä, yekwe töi mikanina ja ngökö ñöte. Ñodre ni sribikä reina Etiopía kräke käkwe kukwe bämikani yebätä töbike.
2 Ja ngökadre ñöte kwe nükani gare ie Ngöbö Kukwei köböire ngwane, erere nuainbare kwe (ñäkädre Hechos 8:27-31, 35, 36, 38 yebätä). ¿Dre käkwe töi mikani ja ngökö ñöte? Ngöbö Kukwei nämäne ütiäte kräke yebätä nuainbare kwe, ñan ñobätä aune nämäne näin karetate ngwane nämäne ñäke tärä Isaías yebätä. Aisete Jesukwe kukwe kwin nuainbare kräke ye Felipekwe mikani gare ie ngwane, mikani ütiäte krubäte kwe jai. Ne madakäre, ni etíope ye nämänena Jehová tarere ñan ñobätä aune nämäne Jerusalén Jehová mikakäre täte nikaninta jakwäre. Ye tä mike gare, kukwe mika nämäne täte kwe ye tuanimetre kwe aune ja mikani kwe juta Ngöbökwe yekri. Nämäne Jehová tarere yekwe töi mikani ja ngökö ñöte aune nemen ja tötikaka Jesukwe (Mat. 28:19).
3. ¿Kukwe meden meden ñaka raba ni tuenmetre ja ngökö ñöte? (Recuadro “ ¿Mä brukwä kä meden kwrere?” mikadre ñärärä).
3 Jehová tare mäkwe ye raba mä töi mike ja ngökö ñöte. Akwa kukwe mada tareta mäkwe ye ñaka raba mä tuenmetre ja ngökö ñöte. Ñodre, mä mräkä aune ja ketamuko mäkwe ñan Testiko ye tare mäkwe aisete mäkwe ja ngökai ñöte ngwane niaratre ñaka rabai mä tarere jankunu ye jürä raba nemen mäbätä (Mat. 10:37). Arato kukwe tuin blo Ngöböi ye ñaka nemen nuäre mä kräke tuametrekäre (Sal. 97:10). O fiesta kite kukwe ngwarbe yekri ye mä nämäne käi ngwen juto jabätä ye tä kukwe kwin ngwen törö mäi aisete ñaka nemen nuäre mä kräke fiesta tuin blo Jehovai ye tuanmetrekäre (1 Cor. 10:20, 21, TNM). Ye medenbätä mäkwe ngwandretari jai: “¿Tikwe dre o nire taredre bäri?”.
¿NIRE TAREDRE BÄRI?
4. ¿Kukwe meden bäri ütiätebätä ja ngökadre ñöte?
4 Jondron keta kabre mätä tarere aune tuin ütiäte mäi ye kwin krubäte. Ñodre, mä jämi ja tötike nitre testiko Jehovakwe ben ye känenkri mä nämänena Biblia mike tuin ütiäte jai o mä nämänena Jesús tarere. Aune nengwane mätä ja kete nitre testiko Jehovakwe ben ye käi juto mäbätä. Akwa ye ñan aikwe mä töi mikai ja denkä mento Jehová kräke aune ja ngökö ñöte. Ja ngökakäre ñöte ütiäte krubäte Ngöbö taredre. Niara rabai bäri tare mäkwe ngwane, mäkwe ñaka ni o jondron mada tuainmetre nemen ja jiete niara mikakäre täte. Aisete, Jehová tareta ye tä ni töi mike ja ngökö ñöte aune tä ni dimike näin jankunu ji kwe yebiti.
5. ¿Dre rabai gare nie kukwe ja tötikara nekänti?
5 Jehová taredre ja brukwä tätebiti, ja nire tätebiti, ja töi tätebiti aune ja di tätebiti niebare Jesukwe (Mar. 12:30, TNM). ¿Ñokänti ni raba ye erere nuainne? Jehovata ni tarere ño yebätä töbikadretari ye köböire raba nemen bare nie (1 Juan 4:19). Aisete mäkwe dre nuaindre Jehová tarekäre aune ja ngökakäre ñöte ye rabai gare mäi kukwe ja tötikara nekänti.
6. Romanos 1:20 tä niere erere, ¿ni raba dre nuainne Jehová mikakäre gare jai?
6 Kukwe mikakäre gare jai Jehovabätä mäkwe töbikatari jondron sribebare kwe yebätä (ñäkädre Romanos 1:20 yebätä; Apoc. 4:11). Ngöbö töbätä käkwe kri mu, jondron nire känsenta aune ni nire sribebare kwin yebätä mäkwe töbika aune ja tötikabätä (Sal. 139:14). Töbike kukwe nebätä arato, Jehovakwe ja di mikani ñänänte köböire ngire krubäte, akwa ye ñan ngöräbe, ñänä tuin nie ye kwrere mada tärä kwati krubäte arato (Is. 40:26). * Kukwe yebätä mäkwe töbikaitari ngwane, Jehová jatai tuin bäri ütiäte mäi. Jehová ye töbätä aune dite krubäte rabadre gare mäi ye ütiäte krubäte ja ketakäre ben. Akwa niara tarekäre ja brukwä ngöibiti mäkwe kukwe mada mikadre gare jai niarabätä.
7. ¿Jehová tarekäre ja brukwä ngöibiti mäkwe dre mikadre era jai?
7 Jehová töita mäbätä ye mäkwe mika era jai. ¿Ngöbö kä kwin aune kä tibien Sribekä ye kräke mä ütiäte ye ñan nuäre mä kräke mikakäre era jai? Ye erere ngwane, Jehová “tä känime ni jökrä ken. Niara ñan tä mente” ye mäkwe ngwan törö jai (Hech. 17:26-28). Davidkwe niebare Salomón ie: “Jehová tä ni jökrä brukwä tuinte”. Aisete mäkwe känäin ngwane kwaintari mäi käbämikata kwe (1 Crón. 28:9). Jeremías 31:3 tä niere erere, mätä ja tötike Bibliabätä ye tä bämike Jehová jatani mä ngwena ja kokwäre. Jehovakwe kukwe kwin nuainbare mä kräke yebätä mäkwe kukwe mikai gare bäri jai ngwane mäkwe taredi bäri.
8. ¿Jehovata mä tarere yebätä mätä debe bien ye mä raba bämike ño?
8 Mätä orare Jehovai ngwane, tä mä tarere yebätä mätä debe bien ie ye mätä bämike. Kukwe kwin nuainta kwe mä kräke ye jökräbätä mäkwe debe bian ie. Arato kukweta mä ngwen töbike ye jökrä mäkwe mika gare ie. Ye erere mäkwe nuaindi ngwane, mä jatai niara tarere bäri aune tä orasion mäkwe kukwe nuin ye köböire mä jatai ja kete bäri kwin ben (Sal. 116:1). Ja ruin ño mäi ye nüke gare Ngöböi rabai gare mäi. Akwa rökrakäre bäri Jehová ken, ütiäte krubäte niara töita ño aune tä kukwe ribere nuaindre mäi ye mäkwe mikadre gare jai. Yekäre, mäkwe ja tötikadre Bibliabätä.
Ja tötikadre Bibliabätä ye bäri kwin ja ketakäre Ngöböbe aune niarata dre ribere nuaindre nie ye mikakäre gare jai (Párrafo 9 mikadre ñärärä) *
9. ¿Biblia ütiäte mä kräke ye mä raba bämike ño?
9 Mäkwe Ngöbö Kukwei mika tuin ütiäte jai. Jehová töita ño mä kräke aune kukwe metre niarabätä ye Biblia aibe tä mike gare. ¿Ngöbö Kukwei ye ütiäte mä kräke ye mä raba bämike ño? Mantre jetebe mäkwe ñäkädrebätä, mäkwe ja ükadrete ja tötika känenkri aune kukwe nüke gare mäi ye mäkwe mikadre täte (Sal. 119:97, 99; Juan 17:17). ¿Mätä ñäke Bibliabätä mantre jetebe?
10. ¿Ñobätä Biblia ye ñaka tärä mada erere?
10 Nitre käkwe Jesús tuani ja okwä jeñebiti käkwe kukwe mikani gare ye tä tikani Bibliabätä, yebätä Biblia ñaka tärä mada ye erere. Jesukwe dre nuainbare mä kräke ye Biblia aibe tä mike gare metre. Jesukwe kukwe nuainbare aune kukwe niebare ye rabai gare mäi ngwane, mä törbai ja ketai ben.
11. ¿Dre käkwe mä töi mikai Jehová tarere bäri?
11 Mäkwe ja di ngwan Jesús tarere. Ye käkwe mä dimikai Jehová tarere bäri ñan ñobätä aune Jehová töita ño ye erere Jesukwe bämikani kwin (Juan 14:9). Ye medenbätä kukwe rabai gare bäri mäi Jesubätä ngwane, Jehová ye ño rabai gare bäri kwin mäi aune mäkwe taredi bäri. Nitre bobre, bren aune di ñakare ye mika nämäne tuin ngwarbe jai akwa Jesukwe mikani tuin bobre jai yebätä töbike. Arato kukwe kwin ja jie ngwankäre tä driere mäi ye mäkwe mikai täte ngwane, mäkwe nünain bäri kwin yebätä töbike (Mat. 5:1-11; 7:24-27).
12. ¿Kukwe rabai gare Jesubätä mäi ngwane mä törbai dre nuaindi?
12 Jesukwe ja nire biani mä ütiäre ngite juankäre ta mäbiti yebätä mäkwe töbikaitari ngwane, mä jatai niara tarere bäri (Mat. 20:28). Jesús nämäne juto ja nire biankäre mä ütiäre ye rükai gare mäi ngwane, ye käkwe mä töi mikai ja töi kwite aune Jehová känenentari ngite juankäre ta jabiti (Hech. 3:19, 20; 1 Juan 1:9). Mäkwe Jehová aune Jesús taredi bäri ngwane, nitre tä niaratre tarere yebe mä törbai ja ketai.
13. ¿Dre raba nemen mäkwe Jehová köböire?
13 Nitre tä Jehová tarere ye mäkwe taredre. Ñobätä mä tö Ngöbö mikai täte ye ñaka nüke gare mä mräkä aune ja ketamuko mäkwe ie ye köböite raba ja mike mä rüere. Akwa Jehovakwe mä dimikai ye köböire mä mräkä kukwe ja üairebiti rabai mäkwe. Mä täi keteitibe bentre ngwane, mä taredi kwetre aune mä dimikai kwetre (Mar. 10:29, 30; Heb. 10:24, 25). Aune ja känenkäre mä mräkätre jeñe mäkwe raba Jehová mike täte aune nüne kukwe ükaninte kwe ye ererebätä (1 Ped. 2:12).
14. 1 Juan 5:3 tä niere erere, ¿kukwe ükaninte Jehovakwe yebätä dre namanina gare mäi?
14 Kukwe ükaninte Ngöbökwe ye mäkwe mikadre täte aune mikadre ütiäte jai. Kukwe nämäne tuin ño mäi ye erere mä nämäne ja ngwen, akwa Jehová namani gare mäi ngwane, kukwe ükaninte kwe ye bäri kwin mikadre täte nükani gare mäi (Sal. 1:1-3; ñäkädre 1 Juan 5:3 yebätä). Kukwe ja jie ngwankäre tä Bibliabätä nitre brare aune merire gure kräke, nitre rüne aune monsotre kräke yebätä töbike (Efes. 5:22–6:4). ¿Kukwe ye mikata täte mäkwe köböire mätä nüne bäri kwin tuin mäi? ¿Mätä ja kete nitre töi kwin aibe ben ye köböire mätä ja ngwen bäri kwin ruin mäi? ¿Kätä bäri juto mäbätä? (Prov. 13:20; 1 Cor. 15:33). Kukwe ngwantarita yebätä mä raba jän niere, ¿ñan ererea?
15. ¿Kukwe Bibliabätä ja jie ngwankäre mikakäre täte mäkwe dre nuaindre?
15 Kukwe ja jie ngwankäre Bibliabätä mikadre ño täte ye ruäre ngwane ñan raba nüke gare mäi. Aisete Jehovata juta kwe yebiti tärä sribere mä dimikakäre kukwe meden kwin aune kukwe meden käme ye mikakäre gare jai (Heb. 5:13, 14). Mäkwe ja tötikaibätä ngwane, kukwe ye raba mä dimike kukwe keta kabre känti rabai gare mäi. Ye köböire mä törbai ja tuai juta Jehovakwe yete.
16. ¿Jehovakwe juta kwe ükaninte ño?
16 Mäkwe kukwe mika gare bäri jai juta Jehovakwe yebätä aune sribi ben. Jehovakwe konkrekasion jene jene ükaninte ye Jesús tä jie ngwen (Efes. 1:22; 5:23). Aune nitre kristiano dianinkä üai demebiti ye braibe Jesukwe kädekani sribi Ngöbökwe jie ngwankäre kä nengwane. Nitre kristiano ye Jesukwe kädekani “ni klabore ie tö ngwan raba bätä töbätä”. Sribi ütiäte mikani niaratre kisete, aisete mä dimikadre kwetre aune mä kriemikadre kwetre kukwe ja üairebiti ye tätre ja di ngwen nuainne kwin (Mat. 24:45-47, TNM). Nitre kristiano ye tä ja mräkätre ruäre ie kukwe gare ye kädeke ji ngwankäre konkrekasionte mä ngübakäre kukwe ja üairebiti (Is. 32:1, 2; Heb. 13:17; 1 Ped. 5:2, 3). Nitre umbre ji ngwanka ye tä juto mä töi mikakäre jäme aune mä dimikakäre ja kete bäri kwin Jehovabe. Mä tötikata kwetre Jehová mikakäre gare ni madai ye kukwe bäri ütiäte nuainta kwetre mä kräke (Efes. 4:11-13).
17. Romanos 10:10, 13, 14 tä niere erere, ¿ñobätä nita blite Jehovabätä ni madabe?
17 Mäkwe nitre mada dimika Jehová tarere. Nitre ja tötikaka ye rabadre Ngöbö mike gare nitre madai niebare Jesukwe ietre (Mat. 28:19, 20). Kukwe ye mikadre täte gare mäi yebätä mä rabadre mike täte. Akwa Jehová rabai tare mäkwe ngwane, mä töi rabai apóstol Pedro aune Juan erere, niebare kwetre: “Kukwe nakaninkä ño ño [...] nunkwe tuaba ja okwä jenbti amne [...] nunkwe kukwe nuaba, ye abko nunkwe kädriedi janknu” (Hech. 4:20). Nita ni mada dimike Jehová tarere ye tä kä mike juto krubäte nibätä. Felipekwe ni etíope dimikani kukwe metre mike gare jai aune ja ngökö ñöte yebätä kä namani jutobätä ye mä raba bämike ja okwäte. Mäkwe ja ngwain Felipe erere aune Jesukwe kukwe drie mananbare ye mäkwe mikai täte ngwane, mä tö ja mikai testiko Jehovakwe ye mäkwe bämikai (ñäkädre Romanos 10:10, 13, 14 yebätä). * Aisete, ni etíope kukwe ngwanintari ye erere mäkwe ngwaintari: “¿Dre köböite ti ñaka ngöka raba ñöte?” (Hech. 8:36, TNM).
18. ¿Dre rabai gare nie kukwe ja tötikara mada yekänti?
18 Mäkwe ja töi mikai ja ngökö ñöte ye kukwe bäri ütiäte mäkwe diain nuaindre jai. Kukwe ye ütiäte krubäte, aisete mäkwe töbika kwin kukwe yebätä. Ye medenbätä, ¿ja ngöka ñöte yebätä dre rabadre gare mäi? ¿Mä jämi ja ngökö ñöte känenkri mäkwe dre nuaindre? ¿Aune ye bitikäre mäkwe dre nuaindre? Kukwe ye mikai gare jai kukwe ja tötikara mada yekänti.
KANTIKO 2 Mä kä Jehová
^ párr. 5 Nitre ruäre tä Jehová tarere akwa ja ñan ruin juto ietre ja ngökakäre ñöte rabakäre testiko Jehovakwe. ¿Ja ruin ye erere mäi? Ye erere ngwane kukwe ruäre mä raba nuainne ja ngökakäre ñöte, ye kukwe ja tötikara ne käkwe ngwain törö mäi.
^ párr. 6 Täräkwata ¿Es la vida obra de un Creador? aune El origen de la vida. Cinco cuestiones dignas de análisis yebätä kukwe raba kwen bäri mäi.
^ párr. 17 Romanos 10:10, 13, 14, (TNM): “Ñobätä ñan aune tödeka ye bämikata ja brukwäbiti kätä niken ni ngwena kukwe metre kokwäre, akwa ja kadabiti kukwe nieta ni jökrä ngwärekri köböire ni raba nemen kwäre... Ñobätä ñan aune “ni jökrä käkwe Jehová kädekaite ja di käräkäre ie ye mikai kwäre”. Akwa, ¿ñaka tödeke ie ngwane ño kädekaite kwetre? ¿Kädrie ñaka olote ngwane ño tödekai kwetre ie? ¿Ni kukwe driekä ñaka ngwane ño kukwe juruai ietre?”.
^ párr. 61 KUKWE MIKATA GARE ÜAIBÄTÄ. Meri Testiko tä jondron kökö ye tä täräkwata chi bien meri bati ie.
