1. ¿Kukwe meden ñaka nuäre ben ni Ngöbö mikaka täte tä ja tuin?

¿KUKWE ñaka nuäre ben mätä ja tuin? Ñodre, ja mräkä iti konkrekasionte käkwe kukwe ñaka nuäre nuainbare mäbätä (Sant. 3:2). Nitre sribi muko mäbe aune nän muko kwelate mäbe tä mä mike yakrä jai mätä Jehová mike täte yebätä (1 Ped. 4:3, 4). Mätä näin gätäbätä aune kukwe driere yebätä mä mräkätre tä ja mike mä rüere (Mat. 10:35, 36). Ye tä mä mike ja tare nike ngwane, bäri kwin mäkwe ñaka Jehová mikadre täte ye raba ruin mäi. Akwa kukwe ñaka nuäre ben mätä ja tuin yebätä Jehovakwe mä mikai töbätä aune ja di biain kwe mäi ja tuakäre ben.

2. Romanos 15:4 tä niere erere, ¿nita ñäke Bibliabätä ye raba ni dimike ño?

² Ni töi ngite käkwe ja tuani kukwe ñaka nuäre ben ye Jehovakwe tikamana Bibliabätä ne kwe ni rabadre ja kitebätä. Kukwe ye ara Pablokwe tikabare Romanos 15:4 yete (ñäkädrebätä). Kukwe ye raba ni töi mike jäme aune tödeke. Akwa ye rabadre bare yekäre nikwe ñaka ñäkädre jerekäbebätä, ñakare aune rabadre ni töi kwite aune nemen ni brukwäte. Kukwe ñaka nuäre ben nita ja tuin yebätä nita ja di ribere, yekäre ni raba kukwe ketabokä ne nuainne: kena, oradre, ketebu, kukwe bämikadre ja töite, ketamä, töbikadretari aune ketabokä, nuaindre. Kukwe ketabokä ye dre gärätä ye nikwe mikai gare jai. Biti, kukwe ketabokä nebiti nikwe kukwe mikai gare jai rei David aune apóstol Pablo yebätä.

3. Ni jämi ñäke Bibliabätä ye känenkri, ¿nikwe dre nuaindre aune ñobätä?

 ³ Kena, nikwe oradre. Ni jämi ñäke Bibliabätä ye känenkri nikwe ja di kärädre Jehovai ne kwe drebätä nita ñäke yebätä kukwe rabadre gare nie. Ñodre, nikwe ja di kärädre Jehovai kukwe ja jie ngwankäre ye känene ne kwe nikwe dre nuaindre ye rabadre gare nie (Filip. 4:6, 7; Sant. 1:5).

4. ¿Kukwe Bibliabätä rabadre tuin bäri metre nie yekäre nikwe dre nuaindre?

⁴ Ketebu, kukwe bämikadre ja töite. Jehovakwe ni töi sribebare ne kwe kukwe bämikadre ja töite. Nitre kirabe ie ja namani ruin ño aune dre tuani kwetre ye erere ja rabadre ruin nie yekäre, nikwe ja bämikadre yete ne kwe kukwe Bibliabätä ye rabadre tuin bäri metre nie.

5. ¿Nikwe töbikadretari drebätä aune nuaindre ño?

⁵ Ketamä, töbikadretari. Töbikadretari ye abokän nita ñäke drebätä aune raba ni dimike ño yebätä töbikadretari kwin aune raba ni dimike nita ñäke drebätä ye mike nüke gare kwin jai. Ñäkäta Bibliabätä aune ñan töbikataritabätä ye abokän mrö sribe tä bänänte aune jondron bänänte ükadrekrö jökrä, akwa ñan kitadre te ye kwrere. Akwa töbikadretari ye abokän mrö rabadre bänänte yekäre jondron bänä ye jökrä kitadre te ye kwrere. “¿Nitre kirabe käkwe dre nuainbare kukwe nämäne kisete ye ükatekäre? ¿Jehovakwe niaratre dimikani ño? ¿Kukweta nemen gare niaratrebätä tie, ¿ye raba ti dimike ño ja tuakäre kukweta ti kisete yebe?”, kukwe ngwantarita nebätä nita kukwe känene mikakäre gare jai ngwane, raba ni dimike töbiketari kwin.

6. ¿Kukwe tä nemen gare nie ye ñobätä nikwe nuaindre?

⁶ Ketabokä, nuaindre. Nita drebätä ja tötike aune ñan nuainta ye abokän ni ju mikaka ümanbiti ye kwrere niebare Jesukwe. Ja di ngwani krubäte kwe akwa ngwarbekäre ñobätä ñan aune ñü muriebe minimini jatadre ngwane, ju ye raba niken tibien (Mat. 7:24-27). Ye erere arato, nikwe oradi, kukwe bämikai ja töite aune töbikaitaribätä akwa nikwe ñaka nuaindi ngwane, ja mikai ni rüere aune kukwe ñan nuäre ben nikwe ja tuin ngwane, tödeka nikwe ñan täi dite ja tuakäre kukwe yebe. Akwa, nita drebätä ja kite ye nikwe nuaindre ngwane, ni töi raba nemen jäme aune tödeka nikwe täi dite aune nikwe kukwe kwin diain nuaindre jai (Is. 48:17, 18). Ani ja kite kukwe ketabokä nebätä kukwe mikakäre gare jai rei David yebätä.

7. ¿Kukwe meden namani bare Bibliabätä abokän nibike mike gare jai?

⁷ ¿Kukwe ngüba ñaka mäkwe ye mä mräkä tä nuainne mäbätä? Ye erere ngwane, Absalón, rei David monsoi tö namani gobran diainkä David kän yebätä ni raba kukwe mike gare jai (2 Sam. 15:5-14, 31; 18:6-14).

8. ¿Drebätä ni raba ja di kärere Jehovai?

⁸ Kena, oradre. Kukwe kira ye nikwe ngwandre törö jai aune kukwe nuainbare nibätä yebätä ja ruin ño nie ye nikwe mikadre gare metre Jehovai (Sal. 6:6-9). Biti, ni dimikadre kwe kukwe ja jie ngwankäre ye känene ne kwe nikwe dre nuaindre rabadre gare nie yebätä nikwe ja di kärädre ie.

9. ¿Absalón töi nämäne ño David kräke?

⁹ Ketebu, bämikadre ja töite. Kukwe kira yebätä nita ñäke ngwane, ja namani ruin ño rei David ie yebätä nikwe töbikadretari. Kä kwati krubäte te Absalón nämäne nitre töi denkä jakri (2 Sam. 15:7). Niara rabadre gobrane ye käi nükani namani ruin ie ngwane, nitre juani kwe juta jökrä Israel känti ne kwe niaratre ye käkwe niara kadre ngäbiti rei erere. Ahitofel, ja ketamuko Davidkwe aune dimikaka ye töi dianinkä kwe jakri arato. Biti,  ja kädekani akwle reire kwe aune tö namani David murie ketai, ye ngwane David nämäne bren raba ruin nie (Sal. 41:1-9). Kukwe ye namani gare David ie ngwane, ngitiani mentokwäre Jerusalén yete. Mrä mada, nitre rükä Absalonkwe yekwe rübare nitre ja ngwanka metre Davidkwe yebe. Akwa nitre rükä Absalonkwe ye nianinte aune Absalón murie ketani.

10. ¿David törbadre akräke dre nuaindre kwe?

¹⁰ ¿Ja namani ruin ño David ie raba ruin mäi? Absalón aune Ahitofel nämäne tare kwe, akwa niaratre tö namani murie ketai. Kukwe ngüba ñaka kwe ye Absalón aune Ahitofel käkwe nuainbarebätä ye namani tare ie. Ye erere ja ketamuko mada kwe käkwe ja mikadre niara rüere rabadre nütüre raba ruin nie. Törbadre akräke, käbube kämikadrekä kwe Jerusalén o ja di ngwandre nekä kwe. Akwa ye erere ñaka nuainbare kwe, ñakare aune ja tuani kwe kukwe yebe. ¿Nuainbare ño kwe?

11. Kukwe tare nuainbare Davidbätä ye ngwane, ¿dre nuainbare kwe?

¹¹ Ketamä, töbikadretari. ¿Kukwe ja jie ngwankäre meden raba nemen gare nie kukwe kira yebätä? Kukwe ne ngwandretari jai: “¿Davidkwe dre nuainbare ja dimikakäre?”. Ñaka ja tuanimetre kwe ganaindre kä jürä ie aune ñan kukwe diani nuaindre jötrö ngwarbe kwe jai, ñakare aune ja di käräbare kwe Jehovai aune ja ketamuko kwe ie. Niara nämäne kukwe den nuaindre jai ye erere nämäne nuainne jötrö ngwarbe. Kukwe nuainbarebätä ye namani tare ie, akwa ñaka nitre mada ye bämikani blo ja okwäte kwe, ñakare aune tö ngwani kwe Jehovai aune ja ketamuko metre kwe ye ie.

12. ¿Jehovakwe David dimikani ño?

¹² ¿Jehovakwe David dimikani ño? Nikwe ja kitai bäri kukwe yebätä ngwane, kukwe tare ben David nämäne ja tuin yebätä Jehovakwe niara dimikani ño ye rabai gare nie (Sal. 3:1-8; encabezamiento). Davidkwe kukwe diani nuaindre jai ye Jehovakwe mikani nemen bare kwin kräke aune nitre ja ngwanka metre nämäne rüre David kriemikakäre ye Jehovakwe dimikani arato.

13. Kukwe ñaka nuäre nuaindre nibätä ngwane, ¿ni raba ja ngwen ño David erere? (Mateo 18:15-17).

¹³ Ketabokä, nuaindre. Ni raba kukwe ne ngwentari jai: “¿Ti raba ja ngwen ño David erere?”. Kukwe meden tä ni kisete ye nikwe ükadrete jötrö. Jesukwe kukwe niebare Mateo 18:15-17 ye erere nikwe nuaindre metre o nikwe ja jie ngwamana ie kukwe ükatekäre (ñäkädrebätä). Nita rubun o nita ulire yebätä nikwe ñaka kukwe ye diandre nuaindre jötrö ngwarbe jai, ñakare aune Jehovakwe ni töi mikadre jäme aune ni mikadre töbätä kwe kukwe ye ükatekäre ye nikwe kärädre ie. Nikwe tödekadre jankunu ja ketamuko nikwe ie aune tä ni dimike ye nikwe kadre ngäbiti (Prov. 17:17). Aune bäri ütiäte, Jehovata mäträre kukwe kwe yebiti ye nikwe nuaindre jankunu (Prov. 3:5, 6).

14. ¿Kukwe meden känti 2 Timoteo 1:12-16; 4:6-11, 17-22 ye raba ni dimike?

¹⁴ ¿Nita Jehová mike täte yebätä ni mräkätre tä ja mike ni rüere? ¿O nita nüne yekänti Jehová mikata täte ye ñäkäita? Ye erere ngwane, nikwe ñäkädre 2 Timoteo 1:12-16; 4:6-11, 17-22 ye raba ni dimike. Pablo nämäne ngite ngwane, kukwe ye tikani kwe.

15. ¿Drebätä ni raba ja di kärere Jehovai?

¹⁵ Kena, oradre. Ni jämi ñäke bersikulo yebätä känenkri kukwe meden tä ni kisete aune ja ruin ño nie ye nikwe mikadre gare  metre Jehovai. Biti, Pablokwe kukwe tikani yete kukwe ja jie ngwankäre raba ni dimike ye kwandre nie yekäre nikwe ja di kärädre Jehovai.

16. ¿Kukwe medenbe Pablokwe ja tuani?

¹⁶ Ketebu, bämikadre ja töite. Ani töbike Pablo yebätä. Niara nämäne ngite Roma. Ruäre niara mikanina ngite akwa nengwane ñaka mikaita kwäre ye nämäne gare ie. Nitre nänkä ben ruäre käkwe mikaninte kaibe aune niara namani di nekä (2 Tim. 1:15).

17. ¿Pablo törbadre akräke dre nuaindre kwe?

¹⁷ Pablo törbadre akräke kukwe namani bare yebätä rabadre ja töi mike. Aune kukwe mada diandre nuaindre kwe jai akräke ñaka kadre ngite. Nitre Asia käkwe niara mikaninte kaibe yebätä rabadre rubun jankunu aune ñaka tö ngwandre ja ketamuko kwe ie. Akwa ye erere ñaka nuainbare kwe. ¿Ñobätä tö ngwani jankunu kwe Jehovai aune ja ketamuko kwe ie?

18. ¿Kukwe ñaka nuäre ben Pablo nämäne ja tuin yebätä töbikabare ño kwe?

¹⁸ Ketamä, töbikadretari. Ne ngwentari jai: “¿Pablokwe dre nuainbare ja dimikakäre?”. Niara murie keta köböra ye nämäne gare ie, akwa bäri ütiäte Jehová käikitadrekä kwe ye ñaka käi kwitaninkä jabiti kwe. Ne madakäre, nämäne nitre mada dimike jankunu aune orare töi kwatibebiti Jehovai (2 Tim. 1:3). Nitre ruäre käkwe niara mikaninte kaibe yebätä ñaka namani töbike krubäte, ñakare aune nitre ja ketamuko kwe käkwe niara dimikani yebätä debe biani krubäte kwe. Aune namani ja tötike jankunu Ngöbö Kukwei yebätä (2 Tim. 3:16, 17; 4:13). Arato, Jehová aune Jesús käkwe ñaka niara mikaite kaibe, ñakare aune niara nämäne tare kwetre aune niara nämäne ja ngwen metre yebätä kukwe kwin nuaindi kräke ye nämäne gare metre ie.

19. ¿Jehovakwe Pablo dimikani ño?

¹⁹ Pablokwe ja mikani kristiano yebätä ja mikai rüere ye Jehovakwe mikani gare ie (Hech. 21:11-13). ¿Jehovakwe Pablo dimikani ño? Pablo nämäne orare ye Jehovakwe kukwe nuani aune bätärekä bätärekä nikani Pablo miketa dite (2 Tim. 4:17). Kukwe meden rabai Pablokwe kräke nämäne ja di ngwen ye rabai kwe ye Jehovakwe mikani gare ie. Arato Jehovakwe ja ketamuko metre Pablokwe ye töi mikani Pablo dimike.

20. Romanos 8:38, 39 tä niere erere, ¿ni raba ja ngwen ño Pablo erere?

²⁰ Ketabokä, nuaindre. Ngwentari jai: “¿Ti raba ja ngwen ño Pablo erere?”. Pablo nämäne tödeke Ngöböi yebätä ja mikani rüere, ye erere nita tödeke yebätä ja mikai ni rüere ye gare metre nie (Mar. 10:29, 30). Nikwe ja ngwandre metre yekäre nikwe oradre töi kwatibebiti Jehovai aune ja tötikadre kwin Kukwe kwe yebätä. Kukwe bäri ütiäte ye abokän nikwe Jehová käikitadrekä ye nikwe ñaka käi kwitadrekä jabiti. Jehovakwe ñaka ni tuainmetre kaibe aune ni ñakare jire iti käkwe niara ketaibätä ni tarebätä jankunu (ñäkädre Romanos 8:38, 39 yebätä; Heb. 13:5, 6).

21. ¿Dre käkwe Aya aune Hector dimikani ja tuakäre kukwe nämäne kisete yebe?

²¹ Kukwe tä ni kisete yebätä nitre kädekateta Bibliabätä ye raba ni dimike. Ñodre, prekursora iti nünanka Japón kädekata Aya tä niere, kukwe namani bare Jonabätä ye käkwe niara dimikani kukwe driere ni jökrä ngwärekri. Monso bati  nünanka Indonesia kädekata Hector tä Jehová mike täte akwa rün aune meye ñaka testiko. Niara tä niere, Rut käkwe kukwe kwin bämikani ye käkwe niara dimikani Jehová mike gare jai aune mike täte.

22. Video, tärä aune kukwe Bibliabätä grababare, ¿ye raba mä dimike ño ja tötike bäri kwin?

²² ¿Medente ni raba kukwe mike gare bäri jai nitre kirabe yebätä ja mikakäre dite? Video, kukwe Bibliabätä grababare aune tärä kädekata Mäkwe tödeka niaratre erere ye raba mä dimike kukwe ye bämike metre ja okwäte. Ni jämi kukwe ye tuin, kukwe nuin aune ñäkebätä känenkri kukwe meden ütiäte raba ni dimike ye Jehovakwe ni dimikadre mike gare jai ye nikwe ribedre ie. Ni tädre nitre ye täte ye bämikadre ja töite. Dre nuainbare kwetre aune Jehovakwe dimikani ño ja tuakäre kukwe nämäne kisete yebe, yebätä töbikadretari. Biti, kukwe rabadre gare nie ye nikwe mikadre täte ja tuakäre kukweta ni kisete yebe. Jehovakwe ni dimikanina yebätä nikwe debe biandre ie. Aune Jehovakwe ni dimikanina ye erere ni raba nitre mada töi mike jäme aune dimike ño yebätä nikwe töbikadre.

23. Isaías 41:10, 13 tä niere erere, ¿Jehovata dre käbämike nie?

²³ Kä gobrainta Satanakwe te nita nüne yebätä ruäre ngwane ñaka tä nemen nuäre ni kräke. Ruäre ngwane nikwe dre nuaindre ye ñan tä nemen gare nie (2 Tim. 3:1). Akwa nikwe ñaka kä jürä ngwandre jabätä. Nita ja tuin kukwe meden ben ye gare Jehovai. Nikwe ja di ribedi ie ngwane, niara kise ruinkri dite yebiti ni dimikai kwe tä käbämike nie (ñäkädre Isaías 41:10, 13 yebätä). Jehovakwe ja di biain nie aune Biblia yebiti ni dimikai kwe ja tuakäre kukwe jökrä ben ye gare metre nie.