1. Mateo 24:9 tä niere erere, ¿ja mikata ni rüere ye ñobätä ñan rabadre ni töi mike niä?

JEHOVAKWE ni sribebare ne kwe nikwe ni mada taredre aune ni madakwe ni taredre arato. Aisete, ja mikata ni rüere ye tä nemen tare nie aune kä jürätä nemen nibätä. Ñodre, Georgina nünanka Europa tä niere: “Ti nämä Jehová mike täte yebätä ti meye ja mikaba ti rüere. Kä nämä 14 tibiti, ja ñaka nämä ruin ütiäte tie aune ‘¿ti ni käme ya?’ ti jataba ngwentari jai”. * Danilo käkwe kukwe ne tikani: “Ni rükä iti käkwe ti metaba, ñäkäba tare tie aune ti rä ötakaba Jehová mikabätä täte, ye ngwane kä jürä rababa krubäte tibätä aune ja rababa ruin ngwarbe tie”. Ja mikata ni rüere ye tä nemen tare nie, akwa ñan tä ni töi mike niä ñobätä ñan aune ye rakaikä nibätä niebare Jesukwe (ñäkädre Mateo 24:9 yebätä).

2, 3. ¿Ñobätä nitre tä ja mike ni rüere?

² Jesús ñaka ja mikani nitre kä nebätä yekri yebätä ja mikani rüere, ye erere arato ni ñaka ja mike nitre kä nebätä yekri yebätä ja mikata ni rüere (Juan 15:17-19). Nita gobrantre mike ütiäte jai, akwa ni ñaka tä ja mike política yete, bandera saludare bätä himno kantaire, ñakare aune nita Jehová aibe mike ngöböre jai. Jehová aibe rabadre nitre kä tibienbätä gobraine yekri nita ja mike, akwa Satana aune nitre ja mikaka niarakri tä ja mike kukwe ye rüere (Gén. 3:1-5, 15). Gobran Ngöbökwe aibe käkwe kukwe ben nitre kä tibienbätä tä ja tuin ye ükaite aune nitre tä ja mike rüere ye gaite kwe drieta nikwe (Dan. 2:44; Apoc. 19:19-21). Ye kukwe kwin nitre ja ngwanka kwin ye kräke, akwa käme nitre blo ye kräke (Sal. 37:10, 11).

 ³ Kukwe Ngöbökwe yebiti nita ja jie ngwen yebätä nitre tä ja mike ni rüere aune ni ñaka ja ngwen niaratre erere yebätä. Ja mika gure kämekäme nämäne tuin kwin nitre Sodoma aune Gomorra ie yebätä Jehovakwe ganinte, ye erere tuin kwin nitre kä nengwane ie arato (Jud. 7). Nitre kwati tä ni mike yakrä jai aune ni abokän ni mada kitete nieta kwetre ñobätä ñan aune nita kukwe Bibliabätä mike täte yebätä (1 Ped. 4:3, 4).

4. ¿Dre raba ni dimike kä ngwen nüke jai ja mikata ni rüere yebätä?

⁴ Ja mikata ni rüere aune ñäkäta tare nie, ¿yebätä dre käkwe ni dimikai kä ngwen nüke jai? Jehovakwe ni dimikai yei ni tädre tödeke kwatibe. Tödeka ye abokän escudo kwrere tä ni dimike buko jutra ngitiekä Diablukwe ye ötöte (Efes. 6:16). Ne madakäre, nita ja tare ye ribere arato. Ja tare ye köböire ni ñaka nemen rubun jötrö ngwarbe aune kukwe jökrä tä ni ngwen ja tare nike yebätä tä ni dimike kä ngwen nüke jai (1 Cor. 13:4-7, 13). Aisete, Jehová tareta, ja mräkätre tareta aune ni rüe tareta ye tä ni dimike ño kä ngwen nüke jai ja mikata ni rüere ye ngwane ye rabai gare nie.

5. ¿Jesús nämäne Jehová tarere ye käkwe dimikani ño?

⁵ Jesús murie ketadre rüekwe ye känenkri deu niebare kwe nitre ja tötikaka kwe ie: “Tita ti Rün tarere abko nitre nünanka Ngöbö rüere ie rabadre gare metre, [...] erere tita nuainne täte jökrä” (Juan 14:31). Jesús nämäne Jehová tarere ye käkwe dimikani ja tuakäre kukwe namani barebätä yebe. Ye erere arato Jehová tare nikwe ye käkwe ni dimikai.

6. Romanos 5:3-5 tä niere erere, ¿ja mikata ni rüere ye ngwane jata nemen ruin ño nie?

⁶ Ni Jehová mikaka täte yebätä rüeta nakainkä ngwane, nita Jehová tarere ye käkwe ni dimikanina kä ngwen nüke jai. Ñodre, tribunal judío käkwe kukwe drie ñäkäibare nitre ja tötikaka Jesukwe ie ngwane, niaratre nämäne Jehová tarere yebätä niebare kwetre: “Nunkwe Ngöbö mikadre täte, akwa mun abko ñan kukwei mikadre täte nunkwe” (Hech. 5:29; 1 Juan 5:3). Gobrantre töi käme tä ja mike ja mräkätre rüere, akwa ja tare ye arabe tä niaratre dimike ja ngwankäre metre. Aisete, ja mikata ni rüere ngwane, ni ñan tä nemen di nekä, ñakare aune kätä nemen juto nibätä (Hech. 5:41; ñäkädre Romanos 5:3-5 yebätä).

7. Ni mräkä ja mikadre ni rüere, ¿akwa nikwe ja töi mikadre ño kräke?

⁷ Akwa, ni mräkä tä ja mike ni rüere ye ngwane bäri ñan tä nemen nuäre ni kräke. Ni tö Jehová mikai gare jai tä nemen gare ietre ngwane, ni ngökata o kä ngwarbe ni dokwäbiti tä nemen ruin ietre (Marcos 3:21 mikadre ñärärä). Ruäre raba ni nuainne tare. Akwa ye ñaka käkwe ni töi mikadre niä ñobätä ñan aune nitre gwi nibe ye ara käkwe ja mikai ni rüere niebare Jesukwe (Mat. 10:36). Ja töi mikai ño kwetre ni kräke, akwa nikwe ñaka ja mikai niaratre rüere ñobätä ñan aune nita Jehová tarere bäri ngwane, bäri nita ni mada tarere (Mat. 22:38, 39). Akwa, kukwe ñäkäita Bibliabätä ye nikwe ñaka nuaindi aune kukwe ja jie ngwankäre tä tikanibätä ye nikwe ñaka kitai tibien jerekäbe kä ngwankäre nuäre ni madabätä.

8, 9. Meri iti ye rüere ja mikani ngwane, ¿dre käkwe dimikani kä ngwen nüke jai?

⁸ Georgina kädrite párrafo kena yekänti ye rüere meyekwe ja mikani krubäte, akwa niarakwe ja ngwani dite. Niara tä niere: “Ti aune ti meye nun jataba ja tötike Bibliabätä. Akwa, sö rikaba krä ti ta ti törbaba näin gätäbätä ngwane, niarakwe ja töi mikaba jene. Nämä blite nitre apóstata ben rababa gare tie. Nitre ye nämä dre niere ie töi kwitakäre ye erere niara nämä niere tie ti töi kwitakäre. Arato, nämä  ñäke tare tie, nämä ti jäke dokwäbiti, nämä ti roro kekete aune nämä täräkwata kitekä tikän. Akwa yebiti ta kä rababa 15 tibiti ngwane, tikwe ja ngökaba ñöte. Tikwe ñaka Jehová mikadre täte jankunu yekäre, ti meyekwe ti juanba monsotre merire ja ngwanka käme aune droga duaka ngüba nämä yekänti. Ni mräkä ni tarekä aune ni ngübaka ye ara tä ja mike ni rüere ngwane, bärira jire ñan tä nemen nuäre ni kräke ja tuakäre kukwe yebe”.

⁹ ¿Dre käkwe Georgina dimikani? Niara tä niere: “Ti meye jataba ja mike bäri ti rüere ye ngwane, tikwe ñäkäbara täte Bibliabätä. Kukwe metre kwanba tie aune ja nämä ruin Jehová ken tie. Ti nämä orare ie aune niara nämä ti kukwe nuin. Ti juanba yekänti ti nämä ngwane, bati ja eteba iti käkwe ti nübaiba ja tötike Bibliabätä ja gwirete. Ja mräkätre ti dimikaba krubäte aune ti niara mräkätre ye erere ja rababa ruin tie. Nire nire ja mikadre ni rüere, akwa Jehová bäri dite kräke ye rababa gare tie”.

10. Ja mikata ni rüere ngwane, ¿ñobätä ni raba tö ngwen Jehovai?

¹⁰ Jondron ñan tärä Jehová ketabätäkäre ni tarekäre ye apóstol Pablo mikani gare (Rom. 8:38, 39). Ruäre ngwane nikwe ja tare nikai, akwa Jehovakwe ñaka ni tuainmetre kaibe jire, ñakare aune käre ni töi mikai jäme kwe aune ni dimikai kwe. Jehovakwe ja mräkätre dimikani Georgina dimike ye erere raba ni dimike arato.

11. Juan 15:12, 13 tä niere erere, ¿nitre ja tötikaka käkwe ja taredre kwärikwäri niebare Jesukwe ye käkwe niaratre dimikani ño? Mä raba bämike keteiti.

¹¹ Nitre ja tötikaka Jesukwe ye rabadre ja tarere ye Jesukwe niebare ietre niara murie keta jämi ye känenkri (ñäkädre Juan 15:12, 13 yebätä). Ye köböire ja mikai niaratre rüere ngwane, täitre keteitibe aune kä ngwandi nüke kwetre jai ye nämäne gare ie. Ani töbike ja mräkätre Tesalónica yebätä. Kenanbe ja mikani niaratre rüere aune nänbare kisere jiebiti. Akwa yebiti ta, niaratre käkwe ja tarebare, ja ngwani metre aune kä ngwani nüke kwetre jai yebiti kukwe kwin bämikani kwetre (1 Tes. 1:3, 6, 7). Nämänentre ja tarere, akwa Pablokwe niaratre töi mikani ja tarere bäri (1 Tes. 4:9, 10). Nämänentre ja tarere ye köböire rabadre nitre ulire aune di ñakare ye dimike (1 Tes. 5:14). Dre niebare Pablokwe ietre ye erere nuainbare kwetre. Yebätä kä nikani kwati ta ye bitikäre tärä 2 Tesalonicenses yete Pablokwe kukwe ne tikani ietre: “Mun itire itire käta ja tarere bäri kwärikwäri” (2 Tes. 1:3-5). Nämänentre  ja tarere yekwe dimikani ja tuakäre ja mikani rüere aune kukwe namani kisete yebe.

12. Juta keteiti känti rü nakaninkä ngwane, ¿ja mräkätre käkwe ja tarebare ño?

¹² Dre namani bare Danilo kädrite párrafo kena yete aune muko kwe yebätä ye ani mike gare jai. Niara käite rü nakaninkä ngwane, ja töi mikani jankunu kwe näin gätäbätä, kukwe driere aune dre nämäne kwe ye döräire jabiti ja mräkätre ben. Bati, nitre rükä nükani Danilo gwirete. Niara tä niere: “Tikwe ñaka Jehová mikadre täte ye ribeba kisere kwetre tie. Akwa tikwe ñaka nuainba yebätä krü ñäkäba kwe ti dokwäte, akwa krükwä kitaba ti dokwäbiti ta kwe. Niaratre kwainta bobukäreta ngwane, ti muko mikai ja dibiti kwe jabe nieba kwe tie. Bengwairebe ja mräkätre käkwe nun juanba trente juta madate. Niaratre nun tarebare krubäte ye ñan käi rikwitaikä nunbiti. Nun rababa juta mada yete ngwane, ja mräkätre nun ka ngäbitiba kwin, mrö bianba kwe nuen aune ti dimikaba kwetre sribi känene aune ju känänbätä. Ye köböire, ja känenkäre ja mräkätre mada nämä ngitie rü ngäniene ngwane, nunkwe dimikaba arato”. Kukwe ye tä mike gare nita ja tarere kwärikwäri ye raba ni dimike kä ngwen nüke jai ni rüe rakadrekä ye ngwane.

13. Nitre tä ja mike ni rüere ye ngwane, ¿üai deme tä ni dimike ño Jehová mike täte jankunu?

¹³ Ni rabadre ni rüe tarere arato niebare Jesukwe (Mat. 5:44, 45). Üai deme Ngöbökwe ye tä ni töi mike ja tarere, ni mada ngübare bätärekä, ja töi mike kwin, ja töi mike jäme aune ja töi gobraine aune ye raba ni dimike kä ngwen nüke jai ja mikata ni rüere ye ngwane (Gál. 5:22, 23). Nitre tä ja mike ni rüere ye ruäre käkwe ja töi kwitanina ñobätä ñan aune muko kwe, monso kwe o ni nünanka käite käkwe kukwe kädrite ye bämikani yebätä. Niaratre ruäre ja mikani kukwebätä. Aisete, nitre tä ja mike ni rüere Jehová mikabätä täte ye ñan tä nemen nuäre ni kräke tarekäre ngwane, nikwe üai deme kärädre Jehovai (Luc. 11:13). Erametre, Jehová tä dre nuainmana nie ye erere nita mike täte ngwane, kukwe kwin tä nemen bare (Prov. 3:5-7).

14, 15. Yasmín muko ye nämäne ja mike niara rüere, ¿akwa Romanos 12:17-21 ye käkwe niara dimikani ño muko tarere jankunu?

¹⁴ Dre namani bare Yasmín yebätä ye ani mike gare jai. Niara ja mikani testiko Jehovakwe ngwane, niara ngöka nämäne ye muko  namani nütüre yebätä ja di ngwani kwe Yasmín töi mike Jehová tuenmetre. Ñäkäbare tare kwe ie aune Yasmín nämäne mräkätre ñäketubu ye mräkä kwe, ni ji ngwanka iglesiate iti aune sukia iti töi mikani kwe nierebätä. Bati gätä näire muko kwe janamane aune namani ñäke rubune ja mräkätre ie. Ñan nämäne ja töi mike kwin Yasmín kräke yebätä bä kabre Yasmín nämäne nemen muen.

¹⁵ Yasmín nämäne niken gätäbätä ngwane, ja mräkätre nämäne dimike aune töi mike jäme. Nitre umbre ji ngwanka käkwe niara dimikani aune kukwe nieta Romanos 12:17-21 ye niara rabadre mike täte ribebare kwetre ie (ñäkädrebätä). Yasmín tä niere: “Kukwe tä Bibliabätä ye ñan rababa nuäre ti kräke mikakäre täte, akwa tikwe ja di käräba Jehovai aune tikwe ja di ngwanba nuainne. Nierare ti muko nämä kä mike käme gwita, ye ngwane ti nämä miketa merebe, nämä ñäke tare tie ngwane, ti nämä ja töi mike jäme kräke aune nämä nemen bren ngwane, ti nämä ngübare”.

16, 17. ¿Kukwe ben Yasminkwe ja tuani ye tä dre driere mäi?

¹⁶ Yasmín käkwe muko kwe tarebare ye köböire kukwe kwin namani bare. Niara tä niere: “Ti muko jataba tö ngwen bäri tie ñobätä ñan aune ti ñan ni mada ngökö gare ie yebätä. Niara jataba ti mike ütiäte jai aune nun nämä blite Ngöbö kukweibätä ngwane, nämä ti kukwe nuin bökän. Aune nunkwe nünandre jäme jabe ye rababa tuin kwin ie. Nengwane, tä ti töi mike näin gätäbätä. Aune nunta nüne bäri kwin jabe aune jäme. Ja känenkäre niarakwe kukwe metre kadre ngäbiti aune nunkwe Ngöbö mikadre täte gwairebe ie tita tö ngwen”.

¹⁷ Yasmín kukwe kwin bämikani ye tä mike gare nie, ja tare ye köböire ni di raba nemen kukwe jökrä kräke, ni raba ni mada ngübare bätärekä aune kukwe jökräbätä ni raba kä ngwen nüke jai (1 Cor. 13:4, 7). Ja mikata ni rüere ye tä ni ngwen di nekä, akwa ja tareta ye tä ni mike bäri dite. Ja mikata ni rüere ye tä nemen tare nie, akwa nita ni mada tarere ngwane, niara raba ja töi kwite. Nita ni mada tarere ngwane, nita kä mike juto Jehovabätä. Akwa ja mikadre jankunu ni rüere yebiti ta ni raba kä ngwen juto jabätä.

18. Ja mikata ni rüere, ¿akwa yebiti ta kä raba nemen ño juto nibätä?

¹⁸ Ja mikadi ni rüere ye ngwane kä rabadi nuäre nibätä niebare Jesukwe (Luc. 6:22). Ebäkänä, ja mikata ni rüere aune ni murie ketadre  Ngöbö mikabätä täte ye ni ñan känene akwle ja kräke, ¿se ñokänti abokän ja mikata ni rüere yebiti ta ni raba kä ngwen juto jabätä? Ani ketamä mike gare jai. Kena, nita kä ngwen nüke jai ye köböire Ngöböta ni kain ngäbiti (1 Ped. 4:13, 14). Ketebukäre, tödeka nikwe tä nemen bäri dite (1 Ped. 1:7). Ketamäkäre, jondron ütiäte krubäte rabai nikwe, ye abokän ja nire kärekäre (Rom. 2:6, 7).

19. Nitre apóstol nuainbare tare, ¿akwa ñobätä kä nämäne juto bätätre?

¹⁹ Jesús ganinkröta ye bätäräbe nitre ja tötikaka kwe yebätä kä rabai juto niebare kwe ietre ye erere ja namani ruin ietre. Niaratre metani aune kukwe drie ñäkäibare ietre, akwa yebiti ta kä nämäne juto bätätre ñobätä ñan aune “niaratre namani ütiäte Ngöbö ngwärekri ja tare nikabtä Jesu kräke” (Hech. 5:40-42). Nitre ja mikaka rüere ye jürä nämäne bätätre, akwa yebiti ta Dirikä nämäne bäri tare kwetre. Yebätä kukwe driebare jankunu kwetre. Kä nengwane ja mräkätre kwati tä ja tuin kukwe ñan nuäre ben, akwa yebiti ta tätre Jehová mike täte jankunu. Jehová tare kwetre aune tätre sribire kräke ye ñan käi rikwitaikä Jehovabiti ye gare metre ietre (Heb. 6:10).

20. ¿Dre rabai gare nie kukwe ja tötikara ja känenkäre yebätä?

²⁰ Nitre ñaka Ngöbö mikaka täte täi kä tibienbätä ngwane, ja mikai jankunu ni rüere (Juan 15:18, 19). Akwa jürä ñaka rabadre nibätä ñobätä ñan aune Jehovakwe ni niara mikaka täte ye kriemikai aune dimikai kwe käbämikata kwe, ye rabai gare nie kukwe ja tötikara ja känenkäre yete (2 Tes. 3:3). Yebätä, ani Jehová aune ja mräkätre ye tarere jankunu aune ni rüe ye tarere arato. Ye erere nikwe nuaindi ngwane, ni täi keteitibe aune dite ja üairebiti, nikwe Jehová käikitaikä aune ja tare ye bäri dite ja mikata ni rüere ye kräke ye nikwe bämikai.