1, 2. ¿Nire nire raba ni ja tötikaka dimike ja ngökö ñöte?

AMY nünanka Fiyi tä niere: “Kukwebätä ti nämä ja tötike ye nämä nemen tuin kwin tie. Kukwe ye nämä era ti kräke, akwa ñan nämä nemen nuäre ti kräke ja töi kwitakäre kukwe ruärebätä. Ja keta ja mräkätre ben ye käkwe ti dimikaba ja töi kwite kukwe yebätä aune ja ngökö ñöte”. Ni itire itire konkrekasionte raba ni ja tötikaka dimike ja ñäte ne kwe ririadre kukwe ja üairebiti aune ja ngökadre ñöte kwe, ye nemen gare metre nie kukwe namani bare nebiti.

² Ni jökrä konkrekasionte ni ja tötikaka dimikadre (Efes. 4:16). Prekursora iti kädekata Leilani nünanka Vanuatu tä niere: “Kukwe ne nie tärä krubäte: juta keteiti ribeta monso iti ngübakäre. Ye erere, ni ja tötikaka dimikadre tuin tie. Ni jökrä konkrekasionte sribidre gwairebe, ni mada dimikakäre kukwe metre kain ngäbiti”. Monso dimikadre nemen ünä yekäre, mräkä kwe, ja ketamuko ruäre aune nitre dirikä ribeta dimikakäre. Ye erere arato, ni ja tötikaka dimikadre ja ngökö ñöte yekäre, ni jökrä konkrekasionte rabadre kukwe niere ie dimikakäre, mäträrebätä aune kukwe kwin bämike käne (Prov. 15:22).

3. ¿Ana, Dorín aune Leilani tä kukwe ütiäte meden niere?

³ ¿Ñobätä nikwe ja mräkätre mada tuanemetre ni ja tötikaka nikwe ye dimike siba? Ñobätä ye ütiäte, ye prekursora especial kädekata Ana nünanka Moldavia tä niere: “Dre dre ribeta jai ni ja tötikaka yekwe ye kaibe käbube ni ñaka raba nuainne”. Prekursora especial kädekata Dorín nünanka Moldavia arato tä ne niere: “Kukwebätä ti ñan töbikabare jire ye ja mräkätre  mada tä niere ni ja tötikaka tikwe ie ye tä mate mente brukwäte nguse”. Leilani tä kukwe mada ütiäte niere arato: “Ja mräkätre madakwe ja tare bämikadre ni ja tötikaka ie ye köböire kukwe ne metre rükai gare ietre” (Juan 13:35).

4. ¿Kukwe meden mikai gare nie kukwe ja tötikara nekänti?

⁴ Ni ja tötikaka ye ñaka ja tötikaka nikwe ngwane, ¿ni raba dre nuainne dimikakäre? Ni rikadre ja mräkä mada mukore ni mada tötike ngwane, nikwe ni ja tötikaka dimikadre ño aune ni ja tötikaka rükadre gätäbätä ngwane, ni raba dimike ño ye rabai gare nie kukwe ja tötikara nekänti. Nitre umbre ji ngwanka raba ni ja tötikaka dimike ño ja ngökö ñöte yebätä blitai arato.

5. ¿Drekäre ni nübaita jabe ni mada tötike?

⁵ Nireta dirire ni ja tötikaka ie, ni ye ara käkwe Kukwe Ngöbökwe mikadre gare kwin ni ja tötikaka ie. Akwa ni dirikä ye käkwe ni nübaidre jabe ni ja tötikaka ye tötike ngwane, ni nübaita kwe ja dimikakäre (Ecl. 4:9, 10). ¿Akwa ni raba nuainne ño?

6. Ni nübaita ni mada tötike jabe ngwane, ¿kukwe nieta Proverbios 20:18 ye ni raba mike ño täte?

⁶ Nikwe ja kitadre kwin. Ni dirikä käkwe kukwe kiakia mikadre gare nie ni ja tötikaka yebätä ye nikwe ribedre ie (ñäkädre Proverbios 20:18 yebätä). * Ni raba kukwe ne erere ngwentari dirikä ie: “¿Ni ja tötikaka ye tä ja tuin kukwe ño ben? ¿Kukwe medenbätä ja tötikai aune dre mika tö gare ie? ¿Ti raba dre niere aune dre nuainne? ¿Ti ñaka raba dre niere aune dre nuainne?”. Bäkänä, kukwe bäin bäin ni ja tötikaka yekwe ye dirikä ñaka käkwe niedi nie, akwa kukwe meden niedre kwe nie ye nikwe ketadrete kwin ja töite. Kukwe ye erere misionera kädekata Joy tä niere ja mräkä tä niken ben ni tötike yei. Niara tä niere: “Ye köböire ja mräkä tä ja töi mike ni ja tötikaka yebätä aune dre niedre kwe tä nemen gare biarebe ie”.

7. ¿Ja ükadrete kwin ja tötika kräke ye ñobätä ütiäte?

⁷ Ni nübaidre ni mada tötike jabe ngwane, nikwe ja tötikadre kwin känenkri (Esd. 7:10). Dorín kädrite párrafo ketamä yekänti tä niere: “Ja mräkä rikadre tibe ni mada tötike ngwane, ja kitadre kwin kwe ye köböire raba kukwe ütiäte niere ye tä nemen kwin ti kräke”. Ni dirikä aune ja mräkä rikadre ni dirikä mukore yekwe ja tötikadre kwin yebiti kukwe kwin bämikai kwetre ni ja tötikaka ye käne. Nane ni ñaka raba ja tötike kwin ja tötika ye kräke, akwa kukwe meden mikata gare metrere ye mikadre gare jai.

8. Ni mada tötikata ngwane, ¿dre käkwe ni dimikai orare kwin?

 ⁸ Orasion nuaindre ye ütiäte nitre mada tötikakäre, ye medenbätä nikwe orasion nuaindre ribedre nie ye känenkri nikwe töbikadre kwin nikwe dre niei yebätä (Sal. 141:2). Hanae nünanka Japón ye tötika nämäne ngwane, meri nänkä dirikä kwe mukore nämäne orare ño ye törö ie. “Nämä orare ño yebiti nämä ja kete kwin Jehovabe nämä nemen gare tie aune ti tö nämä ja ngwain niara erere. Ne madakäre, nämä ti kädekete orasionte yebiti ti tare kwe nämä nemen gare tie”.

9. Santiago 1:19 tä niere erere, ¿ni dirikä tä ni mada tötike ngwane nikwe dre nuaindre?

⁹ Nikwe dirikä dimikadre. Prekursora especial kädekata Omamuyovbi nünanka Nigeria tä niere: “Ni nänkä ni mukore ye tä ni kukwe nuin kwin aune tä kukwe ütiäte niere ye ütiäte krubäte. Aune ñan blite krubäte ñobätä ñan aune ja tötika ye tä dirikä ye kötärä ye gare ie yebätä”. Meden kisete, ¿ñongwane blitadre aune dre niedre ye ñokänti raba nemen gare nie? (Prov. 25:11). Nikwe dirikä aune ni ja tötikaka ye kukwe nuadre kwin (ñäkädre Santiago 1:19 yebätä). * Ye köböire ni rabadre blite rabadre ruin nie ngwane nikwe blitadre. Akwa nikwe töbikadre kwin käne ñan blitakäre krubäte, ñan ñäkäkäre ni dirikä kukweite ta o ñan blitakäre kukwe madabätä. Ni raba kukwe chi mike gare, kukwe keteiti bämike aune kukwe ngwentari kukwe mikakäre gare kwin. Kukwe ñan kwen nie niekäre raba ruin nie ruäre ngwane. Akwa ni raba kukwe ütiäte niere ni ja tötika ie aune ja töi mike bökänbätä, ye köböire raba nirien kukwe ja üairebiti.

10. ¿Kukwe namani bare nibätä ye niedre ni ja tötikaka ie ye raba dimike ño?

¹⁰ Kukwe namani bare nibätä ye nikwe niedre. Kukwe metre namani gare ño nie, nikwe ja tuani ño kukwe tare ben aune Jehovakwe ni dimikanina ño ye nikwe niedre (Sal. 78:4, 7). Kukwe ye ni ja tötikaka tä ribere jai raba ruin nie. Ye raba tödeka kwe mike dite, ja töi mike ja ngökö ñöte aune ja tuin kukwe tare ben (1 Ped. 5:9). Kukwe meden käkwe prekursor kädekata Gabriel nünanka Brasil dimikani nämäne ja tötike ngwane mikata gare kwe: “Kukwe namani bare ja mräkätrebätä ye nämä niere tie, yebiti kukwe medenbe nita ja tuin ye gare Jehovai rükaba gare tie. Niaratre kä ngwani nüke jai kukwe tare yebätä, ye erere ti raba nuainne arato tuin tie”.

11, 12. ¿Ñobätä nikwe ni ja tötikaka kadre ngäbiti kwin gätäte?

¹¹ Ni ja tötikaka Bibliabätä ye ja ngökadre ñöte aune ririadre kukwe ja üairebiti yekäre,  kwandre käre gätäbätä aune kukwe meden nemen gare ie gätäte ye mikadre täte kwe (Heb. 10:24, 25). Ni ja tötikaka rikadre kena gätäbätä, dirikä kwe käkwe nübaibare yebätä raba ruin nie. Akwa yete ja käne ni jökrä konkrekasionte raba nübaire nüke gätäbätä. ¿Akwa ni raba nuainne ño?

¹² Ni ja tötikaka kadre ngäbiti kwin gätäte (Rom. 15:7). Nikwe kai ngäbiti kwin gätäte ngwane, tö rabai jatai jankunu gätäbätä. Nikwe köbö kwin niedre ie aune mikadre gare ja mräkätre madai, akwa ñan mikadre ja gaire. Dirikä kwe o ja mräkätre mada niena blite ben ye nikwe ñaka nütüdre ñobätä ñan aune dirikä kwe jämi nüke o tä sribi mada nuainne raba ruin nie. Ni tädre blite ben ngwane, nikwe kukwe nuadre kwin aune ja töi mikadre bökänbätä. ¿Kukwe ye tä mate ño ni ja tötikaka yebätä? Ja mräkä kädekata Dimitri, ja ngökani bitinkä kwe ñöte aune niena siervo ministerial. Niara tä niere: “Ti janama kena gätäbätä ngwane, ti rababa kwekebe jukwetari. Eteba iti ie ti jutuaba aune töi jämebiti ti jänrikaba gwä kwe. Ja mräkätre jökrä käkwe kise ngökaba tie ye ti töi mikaba ñan krütare. Yebätä gätä nuaindre köbö kwatire kwatire ie ti tö rababa. Ja rababa ruin kwin tie ñan nemen bare tibätä erere”.

13. ¿Ja ngwanta ño mäkwe ye raba ni ja tötikaka dimike ño?

¹³ Nikwe kukwe kwin bämikadre. Nita ja ngwen ño ye köböire kukwe meden metre rükai gare ni ja tötikaka ye ie (Mat. 5:16). Prekursor kädekata Vitali nünanka Moldavia tä niere: “Ja mräkätre nämä nüne ño, töbike ño aune ja ngwen ño ye köböire nitre testiko Jehovakwe ye Ngöbö mike täte metre rükaba gare tie”.

14. ¿Nita kukwe kwin bämike ye raba ni ja tötikaka dimike ño?

¹⁴ Ni ja tötikaka törbadre ja ngökai ñöte yekäre, rabadre kukwe Bibliabätä ye mike täte. Ñaka rabai nuäre, akwa nita kukwe Bibliabätä mike täte ye köböire nita nüne kwin ye jutuai ie ngwane, tö rabai nuaindi arato (1 Cor. 11:1). Hanae, kädrite párrafo keta kwä tä niere: “Kukwe medenbätä ti nämä ja tötike ye erere ja mräkätre nämä nuainne ti okwäbiti. Ye köböire, ti jataba ni mada dimike, ngite juen tabiti aune tarere. Käre nämäntre kukwe kwin niere ja mräkätre madabätä aune ye erere ti tö rababa nuaindi siba”.

15. Proverbios 27:17 tä niere erere, ¿ñobätä nikwe ja ketadre ni ja tötikaka tä niken gätäbätä yebe?

¹⁵ Ja ketadre ni ja tötikaka yebe. Niara rükadre batire batire gätäbätä ngwane, nikwe ja töi mikadre bökänbätä (Filip. 2:4). Mikakäre gare kwin jai, ni rabadre mräkätre kwe ngwentari ie, sribi aune tä nemen ño jabätä ja tötika yebe ye ngwentari ie. Ja töi kwitanina kwe kukwe ruärebätä yebätä kukwe kwin niedre ie. Akwa nikwe ñan ja mikadre kukwe kwete,  ye köböire nikwe ja ketai ni ja tötikaka yebe. Ye käkwe dimikai nirien kukwe ja üairebiti aune ja ngökö ñöte (ñäkädre Proverbios 27:17 yebätä). * Hanae niena prekursora regular. Niara nikani kena gätäbätä ngwane, ja namani ruin ño ie ye mikata gare kwe: “Ja ketamuko mada mada jataba kwen gätäte tie ngwane, ti töi jataba jankunu niken gätäbätä. Ti nämä nemen dräre, akwa yebiti ta ti ñan nämä gätä juen ja bäre. Ja ketamuko kwin kwanba tie ye käi nämä nuäre tibätä, ye käkwe ti dimikaba ñaka ja kete nire ñan kukwe mike täte yebe mada. Ti tö rababa ja tuabätä Jehová ken aune ja mräkätre ken, yebätä tikwe ja töi mikaba ja ngökö ñöte”.

16. ¿Ni ja tötikaka ie ja rabadre ruin kwin konkrekasionte yekäre nikwe dre nuaindre?

¹⁶ Ni ja tötikaka tä nirien ja üairebiti tuin nie ngwane, nikwe kukwe ruäre nuaindre kräke ne kwe niena konkrekasionte siba ye erere ja rabadre ruin ie. Ñodre, ni rabadre ja töi mike mantiame kräke (Heb. 13:2). Denís tä sribi Ngöbökwe nuainne Moldavia. Niara nämäne ja tötike ngwane, dre nuainbare kräke ye törö ie: “Ja mräkätre nämä ti aune ti muko nübaire kukwe ruäre nuainne kä ngwankäre juto jabätä. Jehovakwe niaratre dimikani ño ye nämä mike gare nunye ngwane, ye nämä nun mike dite. Ye käkwe nun dimikaba ja töi mike Jehová mike täte aune kukwe kwin keta kabre rabai nunkwe rükaba gare nunye”. Ni ja tötikaka jatadre kukwe driere ngwane, nübaidre jabe kukwe driere. Ja mräkä Diego nünanka Brasil tä niere: “Ja mräkätre kwati nämä ti nübaire jabe kukwe driere. Ye köböire rababa gare bäri kwin tie. Jehová aune Jesús jataba nüke gare bäri kwin tie aune ti jataba nökrö bäri ken”.

17. ¿Nitre umbre ji ngwanka dre nuaindre ni ja tötikaka dimikakäre?

¹⁷ Kä diandrekä jai ni ja tötikaka kräke. Nitre umbre ji ngwanka, munkwe ni ja tötikaka taredi aune ja töi mikai bökänbätä ngwane, ye käkwe dimikai ja ngökö ñöte. Mäkwe kä dianka jai niara kräke gätä kwatire kwatire te. Tä blite gätäte ngwane, kä ño ye tädre mä töite, yebiti mä töitabätä rükai gare ie. ¿Mä raba kä ükete jai rikakäre ja mräkä mukore tä niken ni ja tötikaka ye tötike ngwane? Mäkwe ye nuain ngwane, ye käkwe ni ja tötikaka dimikai krubäte. Jackie nünanka Nigeria tä niere: “Ja ngwai tä niken ti mukore ye ni ji ngwanka tä nemen gare ni ja tötikaka tibe ie ngwane, töita nemen niä. Bati ni ja tötikaka iti käkwe nieba tie: ‘Pastor tikwe ñan raba ye nuainne. Ni ngwian bökäne aibe gwirete tä niken aune  ütiä bianta ie ngwane’”. Ni ja tötikaka ye niena nüke gätäbätä.

18. ¿Hechos 20:28 ye nitre umbre ji ngwanka raba mike ño täte?

¹⁸ Kukwe kwin niedre ja mräkätre ie aune tötikadre. Ja mräkätre tötikadre kukwe driekäre kwin aune ni mada tötikakäre kwin, sribi ye tä nitre umbre ji ngwanka ye kötärä (ñäkädre Hechos 20:28 yebätä). Ja mräkäbätä kä jürä rabadre ni mada tötikakäre mä okwäbiti ngwane, mä raba nuainne ye mäkwe nie ie. Jackie, kädrite párrafo käne yebätä, tä niere: “Nitre ja tötikaka tibe ye tua ño ye nitre umbre ji ngwanka tä ngwentari tie. Kukwe meden ñaka tä nemen nuäre ti kräke, yebätä kukwe nieta kwetre tie ti dimikakäre”. Nitre umbre ji ngwanka raba kukwe kwin niere ja mräkätre ie aune dimike ñaka ja di ngwandre nekä kwetre yekäre (1 Tes. 5:11). Jackie tä niere mada: “Tita ja di ngwen ni mada tötikakäre yebätä nitre umbre ji ngwanka tä kukwe kwin niere tie ye tä nemen ütiäte ti kräke. Kukwe kwin nieta kwetre tie ye abokän ñö tibo bianta nie kä ngire te ye kwrere. Kukwe ye tä ti mike tö ngwen bäri aune kä mike juto tibätä nitre mada tötikakäre” (Prov. 25:25).

19. ¿Dre käkwe kä mikai juto ni jökräbätä?

¹⁹ Ni ñaka ni mada tötike gwä ngwane, akwa ni raba ni ja tötikaka dimike nirien kukwe ja üairebiti. Ja mräkä iti mukore ni tädre ni mada tötike ngwane, nikwe ñan blitadre krubäte, akwa nikwe kukwe chi niedre ni ja tötikaka dimikakäre. Ni ja tötikaka rükadre gätäbätä ngwane, nikwe ja ketadre ben aune kukwe kwin bämikadre okwäte. Aune nitre umbre ji ngwanka raba kä denkä jai ni ja tötikaka dimikakäre aune ja mräkätre ie kukwe kwin niekäre aune tötikakäre. Ni jökrä raba kukwe kiakia nuainne ja ñäte ni ja tötikaka dimikakäre Jehová tarere aune mike täte ye käkwe kä mikai juto nibätä.