Nitre kristiano ruäre tä tecnología yebiti blite mräkätre kwetre ben aune ja ketamukotre kwe ben. Akwa ni ünä ja üairebiti tä kukwe ne mike täte: “Ni töbikaka kwin ja käne tä kukwe tare gain ngwane, tä ja rükente, akwa nitre töi ñaka tä niken ja käne aune ye köböite tä ja tare nike” (Prov. 27:12).

Jehová tö ni kriemikabätä ye gare nie. Yebätä ni ñaka tö ja ketabätä nire tä ni mada ñäkebiti yebe, nire kitaninkä kukwebätä yebe aune nire kukwe bä jene driere yebe (Rom. 16:17; 1 Cor. 5:11; 2 Juan 10, 11). Ni ruäre tä ja ükekrö nibe gätäte ye ñaka tä kukwe Bibliabätä mike täte raba ruin nie (2 Tim. 2:20, 21). Nikwe ja ketadre metre kore ni iti ben o ño ye tä nemen nuäre ni kräke mikakäre gare jai, akwa ye erere ñaka tä nemen bare aplicación kukwe juankäre yebiti.

Ni tö ja tuai grupo kri ye kwrere te ngwane, nire nire ben nikwe ja ketai ye nikwe ngwandretari jai. Ja mräkätre ruäre tärä nemen grupo ye kwrere te aune kukwe ñaka kwin tärä nemen bare bätätre. Nitre kwati krubäte tä grupote ngwane, ¿ja ngübabiti raba ño? Niaratre ye nire aune tätre ño kukwe ja üairebiti ye ñaka raba nemen gare nie. Salmo 26:4 tä niere: “Nitre ni ngökö krubäte yebe ti ñaka ja kete aune nitre ja bämikaka jerekäbe ye tita kwitebiti”. Nire gare metre kore nie yebe blitadre ye bäri kwin.

Nita kukwe meden juen aune drebätä blitata yebätä nikwe ja ngübadrebiti grupo kiakia yete arato. Kukwe meden medenbätä kukwe juandre aune blita tädre jankunubätä, akwa ye jökräbätä nikwe kukwe mikadre gare ye ribe ñaka nie. Nire blite ngwarbe aune ja mike kukwe ni madakwe te yebe Timoteo ñaka ja ketadre Pablokwe niebare ie (1 Tim. 5:13). Ye raba nemen bare arato Internet yebiti.

Ñäkäta ni madabätä o kukwe bäinbätä blitata, yete ni kristiano ünä ja üairebiti ñan ja mike jire (Sal. 15:3; Prov. 20:19). Kukwe meden nieta biti bäri aune ñaka namani bare metre kädrieta ye ñaka kukwe nuata kwetre (Efes. 4:25). Mrö ja üairebiti aune kukwe kwin mikata gare krubäte nie jw.org aune JW Broadcasting^® yete.

Nitre testiko ruäre tä aplicación kukwe juankäre yebiti jondron rürübäine, kökö, jondron mike gare o sribi driere. Kukwe ye nuainta ngwian ganainkäre jai aune ye keta ñaka raba Jehová mikata täte yebe. Ni kristiano meden ñan tö ngwian taredi ye tä ja ngübarebiti ñaka ja mräkätre yebiti kukwe nuainne ngwian ganainkäre jai (Heb. 13:5).

Aune aplicación yebiti ngwian kärädre ja mräkätre dimikakäre o kukwe tare rakadrekä ye ngwane, ¿yebätä dre nie raba? Ja mräkätre tare nikwe yebätä tätre ja di ribere ngwane, ni töta nemen dimikai (Sant. 2:15, 16). Akwa nikwe nuaindi grupo krikri kukwe juankäre yebiti ngwane, sribi nuaindre sukursalkwe o nitre umbre ji ngwanka yekwe ye jiete nita ja mike bä rabadre. Metrere, sukursal o konkrekasion raba sribi ye nuainne bäri kwin nikwe nuaindre ye kräke (1 Tim. 5:3, 4, 9, 10, 16). Ni aibe mikani ja mräkätre ngübakäre ye ni kristiano metre ñaka tö bämikai jabätä.

Kukwe kwin meden nikwe nuaindre ye ni tö nuain Ngöbö käikitakakäre (1 Cor. 10:31). Aisete aplicación kukwe juankäre yebiti o tecnología yebiti ni törbadre kukwe nuaindi ngwane, kukwe tare meden raba nemen bare yebätä nikwe töbikadre aune töbikadre kwin ja käne.