Ni iti käkwe ñäkädre kukwe namani bare nebätä aune ñaka töbikadretaribätä kwe ngwane, raba kukwe ne erere ngwentari jai. Akwa nitre nibu kädeka nämäne Mefibóset. Nikwe ñäkädi kukwe namani bare nebätä ngwane kukwe keteiti ütiäte rabai gare nie ja töi kräke.

Rei Saúl ngobo namani ni kükü aune ngängän nibu, ngobo mubai kädeka nämäne Jonatán. Ye bitikäre, meri mada kwe kädeka nämäne Rizpá yebe Saúl ngobo mada namani abokän kädekani Mefibóset. Aune Jonatán ngobo mubai kädekani Mefibóset arato. Aisete Saúl ngobo iti kädekani Mefibóset aune bräi iti kädekani Mefibóset arato.

¿Akwa ñobätä Davidkwe nitre ruäre biani murie ketakäre? Bati Saúl mätä jatani nitre gabaonita nämäne nüne nitre israelita ngätäite ye kräke aune tö namani murie ketai. Aisete nitre gabaonita kwati murie ketani kwe ye ni raba niere. Tö namani kukwe nuainne ye ñaka kwin, ñobätä ñan aune nitre gabaonita ye käkwe kukwe ükaninte nitre ji ngwanka israelita ben ne kwe nünandre jäme kwetre (Jos. 9:3-27).

Kukwe ükaninte ye mika nämene täte Saúl näire. Akwa niara ñaka mikani ütiäte jai aisete tö namani nitre gabaonita ye murie kete. Yebätä Saúl aune mräkätre kwe yekwe ja mikani “ngite nitre däri ianintebätä” (2 Sam. 21:1). David namani reire ye ngwane nitre gabaonita namaninte nire ye käkwe ja driebare jökrä ie. Saúl käkwe kukwe tare nuainbare nitre gabaonitabätä ye ütiä biankäreta ietre, yekäre David raba dre nuainne kräketre ye niarakwe ngwanintari ietre ne kwe Jehová raba kukwe kwin mike nemen bare juta kwe kräketa. Nitre gabaonita ñaka ngwian ribebare David ie, ñakare aune nire tö namani niaratre gaite ye monsoitre ni kükü biandre kämikadre kribätä ye ribebare kwetre (Núm. 35:30, 31). Dre ribebare David ie ye erere nuainbare kwe (2 Sam. 21:2-6).

Ye ngwane Saúl aune Jonatán murie ketabarera rubätä. Akwa Jonatán ngobo Mefibóset abokän nämäne nire. Mefibóset nämäne chi ye ngwane juruainbare tare yebätä ñan nämäne dikekä kwin aisete ruai kwe Saúl rübare nitre gabaonita ben ngwane, niara ñaka nämene siba yete. Davidkwe ja ketabare kwin Jonatán ben yebätä ja kukwei kitaninkä kwetre jai ye abokän rükadi Mefibosét ye näire (1 Sam. 18:1; 20:42). Kukwe nieta krörö Davidbätä “Saúl ngobo Jonatán, ye monsoi Mefibóset reikwe mikani tuin bobre jai, ñobätä ñan aune David aune [...] Jonatán yekwe ja kukwei kitaninkä jai Jehová okwäbiti” (2 Sam. 21:7).

Nitre gabaonita kukwe ribebare David ie ye nuainbare kwe. Saúl ngobo nibu iti kädeka nämäne Mefibóset aune bräi nirike biani kwe nitre gabaonita ie (2 Sam. 21:8, 9). Yebiti därie ianinte yebätä kukwe tare nämäne nemen bare juta Israelbätä ye mikani krüte Davidkwe.

Ne tä kukwe ütiäte mike gare nie. Saúl ngobo nibu aune bräi nirike yekwe ñaka ja mikadre ngite akräke, Jehovakwe ñaka kukwe nuainbare bätätre ye kadre ngäbiti. Ñobätä ñan aune nitre rüne nämäne ja mike ngite ye ñaka ngie diandrekä monsotre kwebiti nie nämäne Ngöbö kukweibätä. Kukwe ye arabe känti mika nämäne gare: “Ni itire itire murie ketadre tä ja mike ngite ye ererebätä” (Deut. 24:16). Saúl mräkätre ni kükü yekwe kukwe ruäre nuainbare nitre gabaonita jökrä murie ketakäre raba ruin nie. Aisete kukwe nuainbare kwetre yebätä mikani ja ngie nuin.

¿Dre nemen gare nie kukwe nebätä? Kukwe nuain mananta nie yebätä nita kukwe nuainne ye ni ñaka raba töbike o niere kukwe mikakäre jabiti kukwe käme nuainta nikwe ngwane. Ñaka aune dre nuainta nikwe ye köböite kukwe meden rakadrekä ye nikwe kadre ngäbiti. Proverbios tä kukwe ütiäte mike gare ye erere ni rabadre mike täte ye bäri kwin: “Ji nänkäre mäi ye mäkwe ükate metre aune ji ye jökräbiti mäkwe nändi jäme. Mä ñaka rika kise ruinkri aune kise ngeberekri. Kukwe käme yebätä mäkwe kä mikaka” (Prov. 4:24-27; Efes. 5:15).