1, 2. a) ¿Jesús murie keta jämi ye känenkri drebätä blitabare kwe nitre ja tötikaka kwe yebe? (Üai bämikani kena mikadre ñärärä). b) Ñobätä nita kukwe driedre jankunu rabadre gare nie, ¿ye ñobätä ütiäte krubäte? c) ¿Drebätä nibike ja tötike?

JESÚS murie keta jämi ye känenkri deu, blitabare raire kwe nitre apóstol ben. Niara nämäne niaratre tarere krubäte niebare kwe ietre. Aune nikwe mikaba gare jai kukwe ja tötikara käne yebätä erere, niarakwe ja bämikani uva krie yebätä. Ye köböire, nitre ja tötikaka kwe ye dimikani kwe ‘sribi kuinkuin nuainne’ jankunu, ye abokän Gobran Ngöbökwe kukwei driedre jankunu kwetre ye meden gäräbare kwe (Juan 15:8).

² Akwa niaratre dre nuaindre ye ñan aibe niebare kwe ietre, ñakare aune ñobätä rabadre nuainne ye niebare kwe ietre arato. Ñobätä niaratre rabadre kukwe driere jankunu ye niebare kwe ietre. Ñobätä nita kukwe driedre jankunu rabadre gare nie ye ütiäte krubäte. Yekwe ni töi mikai kukwe ‘driere jankunu kä jökräbiti tibien’ (Mat. 24:13, 14, TNM). Ye medenbätä, kukwe ketabokäbätä nita kukwe driere abokän Biblia tä niere ye nibike mike gare jai. Aune Jehová tä kukwe ketabokä bien nie sribi kwin nuainkäre ye nibike mike gare jai arato.

3. a) ¿Ñobätä nita kukwe driere nieta Juan 15:8 yekänti? b) ¿Jesukwe uva yebiti dre bämike aune ñobätä kukwe ye bämikata kwin kwe?

³ Kukwe drieta nikwe yebiti nita Jehová käikitekä aune kä ye mike deme ye abokän bäri ütiäte (ñäkädre Juan 15:1, 8 yebätä). Texto nekänti Jesukwe Rün kwe ye bämikani ni uva nökaka kwrere. Niarakwe ja bämikani uva krie yebätä aune nitre nänkä niara jiebiti ye abokän bämikani kwe uva küdei yebätä (Juan 15:5). Aisete nitre kristiano tä Gobran Ngöbökwe kukwei driere ye bämikata kwin uva yebätä. Jesukwe niebare nitre apóstol ie: “Munkwe sribi kuinkuin nuendi, [...] amne ti Rün rabadi käikitaninkä”. Uva ngwäta nemen kwin ye ngwane, ni sribikä uva yebätä käikitakata, ye erere arato nita ja di ngwen Gobran Ngöbökwe kukwei driere ye ngwane nita Jehová käikitekä (Mat. 25:20-23).

4. a) ¿Nita Ngöbö kä ye mike ño deme? b) ¿Mätä Ngöbö kä ye mike deme yebätä ja ruin ño mäi?

⁴ Nibira gare nie ye erere, nita kukwe driere ye ngwane, nita Ngöbö kä ye mike deme arato. ¿Nita nuainne ño? Erametre ni ñaka raba niara kä ye mike bäri deme, ñan ñobätä aune niena deme. Akwa Isaías ni Ngöbö kukwei niekä dre niebare ye ani mike gare jai: “Jehová nitre rükä jie ngwanka... niara aibe munkwe mikadre tuin deme jai” (Is. 8:13). Aisete, nikwe Ngöbö aibe kä ye mikadre tuin ütiäte jai yebiti nikwe mikai deme aune nikwe nitre mada dimikadre niara kä deme ye mike nüke gare jai (Mat. 6:9, TNM). Ñodre, Jehová töi keta kabre kwin aune tä kukwe käbämike ni kä nebätä ie yebätä nita blite ngwane, Satana tä ni ngökö aune kukwe ngwarbe niere Ngöböbätä ye rüere nita ja mike (Gén. 3:1-5). Jehová “aibe mikadre kri jai aune käikitadrekä, bätä [...] aibe ngöräbe die kri” ye nita mike gare nitre ie ye ngwane, nita niara kä ye mike deme arato (Rev. 4:11, TNM). Rune niena sribi prekursor nuainne kä 17 te, tä niere: “Ti namani Testiko ni jondron jökrä Sribekä yekwe yebätä tita debe bien krubäte ie. Aune ye tä ti töi mike kukwe driere jankunu”.

5. a) ¿Ñobätä nita kukwe driere nieta Juan 15:9, 10 yekänti? b) Nikwe kä ngwandre nüke jai ye ütiäte krubäte, ¿ye Jesús mikani gare ño?

⁵ (Ñäkädre Juan 15:9, 10 yebätä). Kukwe mada ütiätebätä nita kukwe driere ye abokän Jehová aune Jesús tare krubäte nikwe yebätä nita nuainne (Mar. 12:30, TNM; Juan 14:15). Nitre ja tötikaka Jesukwe rabadre niara tarere ye ñan aibe niebare kwe ietre, ñakare aune niara taredre jankunu kwetre niebare kwe ietre. ¿Ñobätä? Ñan ñobätä aune kä kwatire kwatire te ni rabadre ni kristiano metre erere yekäre, ütiäte krubäte nikwe kä ngwandre nüke jai. Juan 15:4-10 yekänti Jesukwe jankunu niebare bä kabre yebiti mikani gare kwe kä ngwandre nüke jai ye ütiäte krubäte.

6. ¿Ni tö Kristo taredi jankunu ye nita bämike ño?

⁶ Ni tö Kristo taredi jankunu aune niarakwe ni kadre ngäbiti jankunu ie ni tö, ¿ye nita bämike ño? Kukwe ribebare nuaindre kwe nie ye nikwe nuaindre. Ye abokän nikwe niara kukwei mikadre täte. Erametre, niara ñaka tä kukwe ribere nuaindre bäri nie, ñan ñobätä aune niebare kwe: “Ti Rün kukwei mikata täte metre tikwe, abtä ti Rünta ti tarere kärekäre”. Niarakwe kukwe ye bämikani metre ni kräke (Juan 13:15).

7. ¿Nita Jehová aune Jesús mike täte aune tarere ye ñobätä ja erebe?

⁷ Jesukwe kukwe niebare nitre apóstol ie nebiti mikani gare metre kwe, niara mikadre täte aune taredre ye ja erebe: “Tita kukwe bien nuendre, ye nire nire tä kaen ngäbti abko erere tä mike täte, ni ye tä ti tarere era metre” (Juan 14:21). Ne madakäre, nikwe kukwe driedre ribebare Jesukwe ye nita nuainne ngwane, Ngöbö tare nikwe ye nita  bämike arato. ¿Ñobätä? Ñobätä ñan aune Kristo tä kukwe ribere nuaindre nie ye erere Rün kwe töita (Mat. 17:5; Juan 8:28, TNM). Nita Jehová aune Jesús tarere yebätä tätre ni tarere jankunu.

8, 9. a) ¿Kukwe medenbätä mada nita kukwe driere? b) Ezequiel 3:18, 19 aune 18:23 yekänti kukwe nieta, ¿ye ñobätä tä ni töi mike kukwe driere jankunu?

⁸ Kukwe ketamäkärebätä nita kukwe driere jankunu ye abokän ni tö nitre mada mikai mokre. Biblia tä niere, Noé “nämane nüne metre abko kwrere nämane dirire ni mda mdaye” (ñäkädre 2 Pedro 2:5 yebätä). Ngöbökwe nitre kukwe blo nuainkä gaite ye Noé mikani gare. ¿Ñokänti ye gare nie? Jesukwe dre niebare ye ani mike gare jai: “Kä ye ngwane abko ñü ngämi näkäen temen, känenkri abti Noé nikani rute, ye ngwane ni jökrä tö namani nünai ño, erere nämane nüne, aisete nämane mröre, dö ñaen amne nämane ja mike gure. Ne aisete nämane jäme, te batibe ñü jatani jobe temen, käkwe ñö mikani niren kri abko nikani nitre ye ngwena jökrä abko müre neketani ñöte, ñobtä ñan angwane niaratre kwani jäme ñüye, ye kwrere arato ti Ni Kä Nebtä Ngobo ne jatadita angwane, kukwe rakadikä kore arato” (Mat. 24:38, 39). Nitre ñaka tö namani Noé kukwe nuai, akwa sribi mikani kisete nitre mikakäre mokre ye nuainbare täte kwe.

⁹ Kä nengwane, nita Gobran Ngöbökwe kukwei driere ne kwe Ngöbö töita ño ni kä nebätä kräke ye rabadre gare nitre ie. Jehová ye erere, ni tö niaratre tuai kukwe drieta ye kukwe nuin aune nünandre jankunu kwetre ie ni tö (Ezeq. 18:23). Nita kukwe driere ju ju te aune nitre tä nüke kwati yekänti ngwane, Gobran Ngöbökwe käkwe nitre kukwe blo nuainkä gaite ye nita mike gare nitre kwati krubäte ie (Ezeq. 3:18, 19; Dan. 2:44; Apoc. 14:6, 7).

10. a) ¿Ñobätä nita kukwe driere nieta Mateo 22:39 yekänti? b) Pablo aune Silas ni nitre ngite ngübabitikä Filipos dimikani ño ye mä raba mike gare.

¹⁰ Kukwe mada ütiätebätä nita kukwe driere jankunu ye ani mike gare jai: nitre mada tare nikwe (Mat. 22:39). Nitre tä ja tuin kukwe tare ben ye ngwane raba ja töi kwite ye gare nie. Niaratre tare nikwe ye tä ni töi mike kukwe driere jankunu. Apóstol Pablo aune Silas yebätä dre namani bare juta Filipos yekänti ye ani mike gare jai. Nitre ja mikani niaratre rüere yekwe niaratre kitani ngite. Akwa batibe, kä ruäre deu dobo kri mata nükani ngite käi yekänti aune jukwe jökrä ngitiani. Nitre nämäne ngite ye ngitiani namani ruin ni nitre ngite ngübabitikä yei, yebätä bäsi ja murie ketani kwe. Akwa ñaka nuaindre kwe Pablo niebare ja dibiti ie. Ni nitre ngite ngübabitikä yebätä kä jürä namani, käkwe ngwanintari ietre: “¿Ja mräkä, tikwe ja nuendre amne ti rabadre dianintari?”. Niaratre niebare ie: “Tödeke ni Dänkien Jesubti angwane, ma rabadi dianintari” (Hech. 16:25-34).

11, 12. a) Ni nitre ngite ngübabitikä abokänbätä kukwe namani bare, ¿ye tä dre driere nie kukwe drieta yebätä? b) ¿Ñobätä ni tö kukwe driei jankunu?

¹¹ Ni nitre ngite ngübabitikä abokänbätä kukwe namani bare, ¿ye tä dre driere nie kukwe drieta yebätä? Dobo kri mata nükani ye  bitikäre ni nitre ngite ngübabitikä yekwe ja töi kwitani aune ja di käräbare kwe yebätä ni raba töbike. Ye erere arato, nitre ruäre käkwe ñaka kukwe Bibliabätä kani ngäbiti ye kisete kukwe tare rabadre ye ngwane, raba ja töi kwite aune raba ja di kärere nie. Ñodre, nitre ruäre kitakata sribibätä, muko tä tuenmetre, bren tare tä kwen bätätre o mräkätre tare kwetre tä krüte ye ngwane, tätre nemen di nekä. Kukwe ye erere tä nemen bare ngwane, ñokäre nita nüne ye nitre ruäre tä ngwentari jai. Ni nitre ngite ngübabitikä kukwe ngwanintari jai ne erere tätre ngwentari jai raba ruin nie: “¿Ja mräkä, tikwe ja nuendre amne ti rabadre dianintari?”. Nitre ye erere tä kwen nie kukwe drieta nikwe yekänti ngwane, kukwe drieta nikwe ye niaratre raba kukwe nuin.

¹² Aisete, nikwe kukwe driei jankunu ngwane, nitre törbai kukwe mikai gare jai ye nikwe töi mikai jäme (Is. 61:1). Charlotte, niena kä 38 te sribire köbö täte Ngöbö kräke, tä niere: “Kä nengwane nitre töita kukwe madabätä. Nikwe kukwe driedre niaratre ie”. Aune meri Testiko kädekata Ejvor abokän niena kä 34 te sribi prekursor nuainne, tä niere: “Nengwane nitre tä töbike bäri. Ti tö niaratre dimikai aune ye tä ti töi mike kukwe driere”. Erametre, nitre mada tare nikwe ye tä ni töi mike kukwe driere jankunu.

13, 14. a) ¿Kukwe meden bianta Ngöbökwe nie abokänbätä Juan 15:11 tä blite? b) ¿Ñokänti kä raba nemen juto nibätä Jesús erere? c) ¿Kätä nemen juto nibätä ye tä ni dimike ño kukwe driere?

¹³ Jesús murie keta jämi ye känenkri deu, Jehovata kukwe keta kabre bien nie ye kädekaninte kwe nitre apóstol ie abokän käkwe niaratre dimikani sribi kwin nuainne. ¿Ye abokän kukwe meden meden? Aune ¿tä ni dimike ño kä nengwane?

¹⁴ Kätä nemen juto nibätä. Nikwe kukwe driedre ribebare Jesukwe nie, ¿ye ribi nuaindre? Ñakare. Jesús blitabare uva yebätä ye bitikäre mikani gare kwe, nikwe Gobran Ngöbökwe kukwei driei ye ngwane, niara erere kä rabai juto nibätä (ñäkädre Juan 15:11 yebätä). ¿Ñobätä? Nibira gare nie ye erere, Jesús ja bämikani uva krie yebätä aune nitre ja tötikaka kwe ye abokän uva küdei ye kwrere niebare kwe. Uva küdei ye tä neketaninkä uva krie yebätä ngwane, tä nemen nire jankunu. Ye erere arato, käre nikwe Ngöbö mikai täte aune nikwe ja ketai jankunu ben bätä nikwe näin jankunu jiebiti ngwane, kä rabai juto nibätä Jesús erere (Juan 4:34; 17:13; 1 Ped. 2:21). Hanne, niena kä 40 biti bäri te sribi prekursor nuainne, tä niere: “Tita niken kukwe driere ye bitikäre käre kätä nemen juto tibätä ye tä ti dimike Jehová mike täte jankunu”. Ye erere, nitre ñaka ni kukwe nuin yekänti nita kukwe driere, akwa kätä nemen juto krubäte nibätä ye tä ni dimike kukwe driere jankunu (Mat. 5:10-12).

15. a) ¿Kukwe meden bianta Ngöbökwe nie abokänbätä Juan 14:27 tä blite? b) ¿Ni töita jäme ye tä ni dimike ño sribi kwin nuainne?

¹⁵ Ni töita nemen jäme (ñäkädre Juan 14:27 yebätä). Köbö ye arabe te deu, Jesukwe niebare nitre apóstol ie: “Kä jäme jen tikwe [...] ti bike bien munye”. ¿Niara töi jäme ye tä ni dimike ño sribi kwin nuainne? Nita kä ngwen nüke jai kukwe driekäre ngwane, Jehová aune Jesús tä ni kain ngäbiti ye gare nie. Aune ye tä ni töi mike jäme kärekäre (Sal. 149:4; Rom. 5:3, 4; Col. 3:15). Ja mräkä Ulf niena kä 45 te sribire köbö täte Ngöbö kräke, tä niere: “Tita niken kukwe driere ye bitikäre tita nemen nainte krubäte, akwa tita kukwe driere ye köböire jata nemen ruin kwin tie aune ti ñaka tä nüne ngwarbekäre tä nemen gare tie”. Erametre, ni töita nemen jäme kärekäre yebätä nita debe bien krubäte.

16. a) ¿Kukwe meden bianta Ngöbökwe nie abokänbätä Juan 15:15 tä blite? b) ¿Nitre apóstol dre nuaindre ja ketakäre jankunu Jesube?

 ¹⁶ Nita nemen ja kete Jesube. Jesús tö namani kä tuai juto käre nitre apóstol yebätä niebare kwe ietre ye bitikäre, niaratre ja taredre metre mikani gare kwe ietre (Juan 15:11-13). Ye bitikäre, niebare kwe ietre: “Mun abko ti kukwe muko [o ja ketamuko, TNM] tikwe, tita niere”. ¡Nita ja kete Jesube ye bäri ütiäte! Aune nitre apóstol ja ketadre jankunu Jesube yekäre, ¿dre namani nuaindre ietre? Sribi kwin namani nuaindre jankunu ietre (ñäkädre Juan 15:14-16 yebätä). Jesús kukwe ne biani niedre nitre apóstol kwe ie: “Ngöbö kebera nüke gobrane nibti” (Mat. 10:7). Aisete, Jesús murie keta jämi ye känenkri niebare kwe nitre apóstol ie, niaratre rabadre kä ngwen nüke jai aune kukwe driere jankunu (Mat. 24:13; Mar. 3:14). Jesús kukwe biani nuaindre ye ñaka namani nuäre nuaindre nitre apóstol kräke, akwa nuainbare kwetre aune ye köböire ja ketabare jankunu kwetre Jesube. Aune Jehovakwe kukwe mada biani ietre abokän käkwe niaratre dimikani.

17, 18. a) ¿Kukwe meden bianta Ngöbökwe nie abokänbätä Juan 15:16 tä blite? b) ¿Kukwe yekwe nitre ja tötikaka Jesukwe dimikai ño? c) ¿Kukwe meden bianta Jehovakwe nie abokän tä ni dimike kä nengwane?

¹⁷ Ngöböta orasion nikwe kain ngäbiti. Jesukwe niebare nitre apóstol ie, käre niaratre dre käräi niara käbiti Jehovai ngwane biain kwe ietre (Juan 15:16). Jesús kukwe käbämikani ietre yekwe niaratre dimikani krubäte. * Kä namanina braibe Jesús murie ketakäre ye ñaka namani nüke gare kwin nitre apóstol ie. Akwa Ngöbökwe niaratre dimikani jankunu. Jehovakwe niaratre dimikadre Gobran Ngöbökwe kukwei driere ye ribebare kwetre ie ngwane, niaratre kukwei kani ngäbiti kwe. Ñodre, kä nikani braibe ta yete, Jehovakwe niaratre kukwei kani ngäbiti ño ye namani gare ietre (Hech. 4:29, 31).

¹⁸ Ye erere tä nemen bare kä nengwane. Nikwe sribi kwin nuaindi jankunu ngwane, nikwe ja ketai jankunu Jesube. Ne madakäre, kukwe medenbe nikwe ja tuadre kukwe driekänti ye ngwane, Jehovakwe ni dimikadre ja tuin kukwe yebe nikwe ribei ie ye kai ngäbiti kwe (Filip. 4:13, TNM). Jehovata orasion nikwe kain ngäbiti aune nita ja kete Jesube yebätä nita debe bien krubäte. Jehovata kukwe bien nie ye tä ni dimike sribi kwin nuainne jankunu (Sant. 1:17).

19. a) ¿Ñobätä nita kukwe driere jankunu? b) ¿Dre ni dimikai Ngöbökwe sribi biani nuaindre nie ye mike nemen bare täte?

¹⁹ Nikwe miri gare jai kukwe ja tötikara nekänti ye erere, ni tö Jehová käikitaikä aune kä ye mikai deme, nita Jehová aune Jesús tarere ye ni tö bämikai, ni tö nitre jökrä mikai mokre aune nita ni mada tarere ye ni tö bämikai yebätä nita kukwe driere jankunu. Ne madakäre, Jehová tä kä mike juto nibätä, ni töi mike jäme, tä ni mike ja kete Jesube aune tä orasion nikwe kain ngäbiti ye tä ni dimike sribi biani nuaindre kwe nie ye mike nemen bare täte. Nita ja brukwä tätebiti ja di ngwen ‘sribi kuinkuin nuinkäre’ jankunu ye käi rabai juto krubäte Jehovabätä.