TI NÄMÄ näin kwelate ye ngwane, monsotre ben ti rikaba kena kwelate ye arabe ben ti nämä näin jankunu kwelate nememe kwela nämä krüte nuen ye ngwane. Ñodre, kä yekänti nun jökrä ie ja nämä gare kwin.

Kä jondron nire ngübakäre aune i nökakäre ye nämä kä Liberty ye bäre ta. Ti därebare ye ngwane, kä yekänti ti rün nämäne sribire ni iti sribi bökänkä ye kräke. Aisete, ti nämä monsore ye ngwane, tikwe ja kitaba tractor mikakäre nen o ngwankäre aune ti nämä sribi mada nuainne.

Ti rün namanina umbre. Ti därebare ye ngwane, ti meyebiti kä nämäne 35 aune ti rün abokänbiti kä nämäne 56. Akwa, ti rün nämäne dite, nga kuin aune kräre ngrabare bätä ñaka bren. Niara nämäne sribire krubäte aune nun rabadre sribire krubäte ye drieba kwe nuen arato. Niara ñaka nämäne ngwian ganainne krubäte, akwa ju, dän aune mrö nämäna nunkwe. Käre niara nämä nun dimike. Ti rünbiti kä rababara 93 ye ngwane krütaba aune ti meye abokänbiti kä rababara 86 ye ngwane krütaba. Niaratre nibu käkwe ñaka Jehová mikani täte. Akwa, kä 1972 yete ja känenkäre nükebe kä nengwane ti eteba iti tä sribire ni umbre ji ngwanka ye erere aune tä Jehová mike täte metre.

Ti meye nämä kukwe bautista ye mike täte krubäte aune bämän kratire kratire nämä niken nun ngwena  iglesia bautista yete. Kä nämä 12 tibiti ye ngwane, Ni Nimä Ngöböre Itibe yebätä blita nämä ye tikwe kukwe nuaba aune tikwe ngwantariba ti meye ie: “¿Ñokänti Jesús ye raba nemen Monso aune Rün arabe?”. Niarakwe nieba tie: “Kukwe ye mika ñaka raba gare jire tikän. Ñaka raba nüke gare nie”. Aune erametre kukwe ye ñaka nämä gare tie. Akwa kä nämä 14 tibiti ye ngwane, ñö chi känti ti ngökaba ñöte aune köbö ye näire ti ngökaba bämä jire ñöte: bati ni Rün käbiti, bati abokän Monsoi käbiti aune bati abokän üai deme käbiti.

Ti nämä colegiote ye ngwane, ja ketamuko nämä tikwe ye nämä ja mete aune ti töi mikaba kwe ja mete arato. Ye medenbätä, ti jataba ja kite ja metakäre aune nitre nämä ja ükaninte ja metakäre abokän kädeka nämä Golden Gloves yete tikwe ja kä bianba siba. Tikwe ja metaba nitre ruäre ben, akwa ja meta ñaka nämä gare kwin tie yebätä tikwe tuanmetreba. Ye bitikäre, nitre Estados Unidos rükä ye rikaba ti ngwena rükäre aune ti jänrikaba kwetre Alemania. Ti nämä yete ngwane, nitre ti jie ngwanka käkwe ti juanba ja kite rükäre, ñan ñobätä aune ti raba nemen ji ngwanka rababa tuin ietre. Niaratre tö rababa ti tuai nemen ni rükä ye kwrere. Akwa, kä 1956 yete tikwe ja kitaba kä kubu te ye bitikäre, ti ñaka törbaba sribi ye nuaindi yebätä tikwe ñaka ja kitaba jankunu. Akwa ye bitikäre kä rikaba braibe ta yete, tikwe ja mikaba nitre rükä kukwe ja üairebiti yekri.

Kä ye näire, “ni brare jai” nieta nitrekwe ye erere ja rababa ruin tie. Nitre bä mika nämä película yete aune nitre ye nämä ni mada töi mike ja erebe yekwe ti töi kwitaba. Ti kräke, nitre nämä kukwe driere ye ñaka ni ie ja ruin ni brare ye erere rababa ruin tie. Akwa, kukwe ruäre jataba nemen gare tie yekwe ti dimikaba ja töi kwite. Bati, ti rikaba jutate karo tain bä nuäre tikwe yete ngwane, monsotre merire nibu käkwe köbö kwin nieba tie. Niaratre nämäna gare tie; niaratre nibu ye ti duan ngwai köre. Aune niaratre nibu ye abokän testiko Jehovakwe. Köbö ye känenkri niaratre täräkwata La Atalaya aune ¡Despertad! ye mikatebara tie, akwa täräkwata La Atalaya yebätä kukwe nämä tikani ye ñaka nuäre rükadre gare rababa tuin tie. Akwa köbö yete, Ja Tötika Täräbätä Konkrekasionte yebätä ti nübaiba kwetre, gätä ye nuain nämä niaratre gwirete bätä yete ja tötika nämä Bibliabätä aune blita nämä arato. Ti näin gätäbätä tikwe nieba ietre. Kötare kwärä ngwantariba kwetre tie: “¿Metre?”. Aune tikwe nieba ietre: “Jän, ti näin”.

Tikwe kukwe käbämikaba ietre yebätä ja rababa ruin ngite tie, akwa ti ñan törbaba niaratre ngökai. Aisete köbö yete deu ti janama gätäbätä. Monsotre kia ie kukwe Bibliabätä nämä gare krubäte yekwe ti töi mikaba ñan krütare. Ti nämä nemen bä kabre iglesiate ti meye ben, akwa kukwe Bibliabätä ye ñaka nämä gare bäsi tie. Akwa ye ngwane, ti töi rababa kwatibe kukwe mikabätä gare bäri jai aune tikwe ja tötika Bibliabätä ka ngäbitiba. Bengwairebe Ngöbö Bäri Dite Krubäte ye kädekata Jehová rababa gare tie. Kä rikaba ruäre ta yete, nitre testiko Jehovakwe ye abokän nire tikwe ngwantariba ti meye ie ye ngwane, niarakwe nieba tie: “Niaratre tä ni umbre kädekata Jehová ye mike täte”. Akwa ye ngwane, dänkwä ti okwäbiti diankaba ye kwrere ja raba tuin tie.

Kukwe metre rababa gare tie ye ngwane, ti ririaba jötrö kukwe ja üairebiti. Ti janama kena gätäbätä ye bitikäre, sö rikaba krä ökän ta ye ngwane, sö marzo kä 1957 yete tikwe ja ngökaba ñöte. Ti töi nämä ño käne ye erere ti töi ñaka rababara. “Ni brare jai” nieta ye erere ja nämä nemen ruin käne tie yebätä tita nemen töbiketa ngwane, ni ie ja ruin ni brare ye töita ño drieta Bibliakwe namani gare tie ye tä kä mike juto krubäte tibätä. Jesús ye töi nämäne metre. Niara nämäne bäri  dite nitre brare mada ye kräke. Akwa ñaka nikwitani jire jabätä nitre madabe, ñakare aune mikani gare ye erere, ja tuanimetre kwe “nuaindre tare” rüe ie (Is. 53:2, 7). Ni nänkä metre Jesús jiebiti ye rabadre ‘ja kete jäme ni jökräbe’ namani gare tie (2 Tim. 2:24).

Kä 1958 yete, ti jataba sribi prekursor nuainne. Akwa kä rikaba braibe ta yete, tikwe tuanmetreba kä ruäre te. ¡Tikwe ja töi mikaba ja mäkete! Aune tikwe ja mäkäteba Gloria ben, ye abokän monsotre merire nibu käkwe ti nübaiba gätäbätä ye iti ben tikwe ja mäkäteba. Tikwe ja töi mikaba ja mäkete niarabe yebätä ti ñaka ja töi kwite, ñan ñobätä aune Gloria ye nämä jondron ütiäte krubäte ye erere ti kräke aune täbe tuin kore tie. Ti kräke, niara ye diamante bä nuäre krubäte ye kwrere aune tikwe ja mäkäninte ben ye käita juto krubäte tibätä. Nengwane Gloria bike kukwe mike gare chi jabätä muen:

“Ti rün aune ti meye monsoi namani 17. Ti meye Ngöbö mikani täte metre aune kä nämä 14 tibiti ngwane krütaba. Ye ngwane, ti rün jataba ja tötike Bibliabätä. Ti meye krütabara, yebätä ti rün blitaba ni ji ngwanka kwelate ben kukwe keteiti nuainkäre. Ti eteba umbre jatabara ngedenkä colegiote, yebätä ni ji ngwanka kwelate ye raba ti eteba ye tuenmetre niken köböiti kwelate aune ti rikadre köbö madate kwelate o ñakare ye ti rünkwe ngwantariba ie. Ni ji ngwanka kwelate käkwe jän nieba nuen aune ye erere nunkwe nuainba nememe ti eteba gediankaba colegiote ye ngwane. Bati ti rababa niken kwelate ye ngwane, ti eteba rababa nemen gwi nun ngwaitre aune nun etebatre köre ngübare bätä mrö rien ti rün ngäbiti kwetadre gwairebe. Nitre Testiko nibu käkwe nun tötikaba Bibliabätä aune ti ngwai bätä ti etebatre 10 aune ti, nunkwe ja mikaba testiko Jehovakwe. Käre kä jürä nämä nemen krubäte tibätä, akwa kukwe drie ye nämä tuin kwin tie. Akwa kä kwati krubäte nikanina ta yete Sam ti dimikanina krubäte”.

Gloria aune ti, nunkwe ja mäkäteba sö febrero kä 1959 yete. Nun nämä kä jutobiti sribi prekursor nuainne. Nun tö nämä sribidi central mundial yete, yebätä julio kä ye arabe te nunkwe ja kä tikaba nänkäre Betelte. Ja mräkä Simon Kraker käkwe blitaba nunbe. Akwa niarakwe nieba nuen, Betelte nitre gure ñaka ka ngäbiti nämä. Aune nun töi nämä jankunu sribibätä Betelte, akwa kä rikaba kwati krubäte ta ye ngwane batibe nun nübaiba.

Central mundial yei nunkwe kukwe tikaba, nun juandre medente kwetre ja mräkätre dimike ye ngwantarikäre ietre. Nun rikadre Pine Bluff, Arkansas nieba kwetre nuen. Kä ye ngwane, konkrekasion nämä ketebu, keteiti ja mräkätre kwata ngwen kräke aune keteiti abokän ja mräkätre kwata drüne kräke. Konkrekasion ja mräkätre kwata drüne kräke te nitre kukwe driekä nämä 14 näre yekänti nun juanba.

Ñobätä konkrekasion nitre testiko Jehovakwe ye nämäne ñäkäninbiti nitre kwata bä jene jene ye ererebätä ye munta ngwentari jai raba ruin tie. Ñan ñobätä aune nun tuanmetre ñaka nämä ja ükökrö keteitibe. Nitre nämä nemen kwati yekänti nitre kwata bä jene jene rabadre nemen keteitibe ye gobrantre nämä ñäkäire aune ye köböite ja mräkätre nuain raba tare ye jürä nämä nunbätä. Kä keta kabre känti, ja mräkätre aune ja ngwaitre kwata ngwen bätä kwata drüne yekwe gätä nuaindre keteitibe ye köböite Ju Ja Ükarakrö kwetre ye juan raba ngwarbe jürä nämä nemen bätätre. Aune kukwe ye nämäna nemen bare. Nitre Testiko kwata drüne yekwe kukwe driedre nitre kwata ngwen ie ye ngwane, buko dai raba kain ngite aune raba nuainne tare. Ye medenbätä, nun rabadre kukwe driere yekäre, gobrantre nämä kukwe ükete ye nun nämä mike täte aune kukwe ye rabai ükaninte ja känenkäre ie nun nämä tö ngwen.

Ñaka nämä nemen nuäre nun kräke kukwe driekäre. Ruäre ngwane, nitre kwata drüne nämä nüne yekänti nun nämä kukwe driere ye ngwane, batibe nun rababa nemen nitre kwata ngwen nämä nüne yekänti. Ye ngwane, nunkwe kukwe driedre jötrö ietre o bäri kwin nun rikadreta mento yebätä nun nämä nemen töbike. Kukwe ye erere nämä nemen bare kä ye näire.

Akwa, ja ngübakäre nun nämä sribire krubäte. Sribi jökrä bäsi nun nämä nuainne köböiti ye ütiä bian nämä kun ti nuen. Gloria nämä sribire ju ruäre te aune ti tuanmetre nämä niara dimike ju kwati te ne kwe sribi krütadre bäri jötrö ie. Nun jämi nikenta ye känenkri, mrö rianina bian nämä nuen ye nun nämä kwete. Bämän kratire kratire, Gloria nämä dän bä sökö nitre ja mräkäre kräke aune ti nämä kriblü ükete jubäre, ventana bätete aune sribi mada mada nuainne. Nitre ja mräkäre kwata ngwen gwirete, Gloria nämä ventana bätete kä terikri aune ti nämä bätete kä bätärikri. Nun nämä sribire nememe dere, yebätä mrö bian nämä kwetadre nuen. Gloria nämä mröre kä terikri, akwa ñaka nitre ja  mräkäre kwata ngwen yebe aune ti abokän nämä mröre karo mikate nämä kwetre yekänti. Ti ñaka nämä töbike kukwe yebätä. Ñodre, mrö ye nämä bänänte krubäte. Nitre ja mräkäre ye töi nämä kwin nun kräke, akwa gobrantre köböite niaratre töi nämä ñaka rababätä keteitibe nitre kwata drüne yebe. Bati, nun rikaba gasolina kökö. Gasolina kekaba ünä karote nuen ye bitikäre, Gloria raba niken kä narakrö yete o ñakare ye tikwe ngwantariba ni gasolina rürübäinkä ie. Ti mikaba ñärärä rubune kwe aune nieba kwe tie: “Tä dikani”.

Nun nämä keteitibe ja mräkätre ben ye nämä kä mike juto nunbätä. ¡Aune kukwe drie ye nämä tuin ütiäte krubäte nuen! Nun rababa Pine Bluff ye ngwane, ja mräkä nämä kädekani siervo konkrekasionte ye gwirete nun rikaba nüne. Ja mräkä ye muko ñaka Testiko aune Gloria jataba tötike Bibliabätä. Ye bätäräbe, ngängän aune duana kwetre jataba ja tötike Bibliabätä tibe. Meri ye aune ngängän kwe ja töi mikaba Jehová mike täte aune ja ngökö ñöte.

Ja mräkätre kwata ngwen nämä konkrekasionte ye nämä ja kete kwin nunbe. Niaratre nämä nun nübaire mröre jakänti, akwa nitre madakwe ñaka nun tuadre keteitibe yekäre nun nämä niken deu niaratre känti. Nitre nämä ja ükaninte sribikäre jabe kädeka nämä Ku Klux Klan, nämä nitre kwata bä jene ñäkebiti jene jene ye köböite nitre kwata drüne nuain nämä tare ye nämä krubäte kä ye näire. Nitre nämä ja ükaninte sribikäre jabe kädeka nämä Ku Klux Klan nämä ja ngwäkite ye erere, deu fiesta Halloween käi ngwan nämä juto jabätä ye näire ni iti nämä täkäni kä nänkäre gwi yekänti dän ngwen kitani jabätä nememe dokwäbiti kuin ye törö tie. Akwa kukwe yebiti ta ja mräkätre töi nämä kwin ja kräke kwärikwäri. Kä nämä ngire krubäte ye näire, nun nämä ngwian ribere jai nänkäre gätä kri yebätä, aisete kä 1950 yete nunkwe karo kökani jai ye ja mräkä iti käkwe kökaba nuen ne kwe nun rikadre gätä yebätä. Sö rikaba krati ta ye ngwane, nun janama kukwe driere aune nitre ruäre tötike ye bitikäre nun nämä nainte krubäte kä ngire kisete rükabata gwi. ¡Karo rürübäinba nunkwe ara nämä jubäre jutuaba nuen yebätä nun töi rababa ñan krütare! Karo yebätä kukwe ne nämä tikani: “Tita karo munkwe ne bienta muen. Tita bienta ngwarbe muen. Mun mräkä”.

Kukwe mada kwin rababa bare nun kräke yebätä ti töi rababa ñan krütare. Kä 1962 yete, juta South Lansing, Nueva York yekänti Kwela Sribi Ngöbökwe Jie Ngwankäre yebätä ti nübaiba. Ye abokän kwela nuainba sö krati te nitre circuito bätä distrito tuabitikä aune nun nämä konkrekasion jene jene jie ngwen ye kräke. Akwa ti nübaiba ye ngwane, ti ñaka nämä sribire aune ngwian ñaka nämä krubäte nunkwe. Kä Pine Bluff yekänti nitre sribikä teléfono yebätä käkwe blitaba tibe sribi biankäre tie. Niaratre sribi biandre tie ngwane, ti abokän ni kwata drüne rabadre sribire kena niaratre ben. Mrä mada, niaratre sribi biain tie nieba kwetre tie. ¿Tikwe dre nuaindre? Ngwian ñaka nämä tikwe nänkäre Nueva York. Tikwe ja töi mikaba kwatibe sribi ye kain ngäbiti aune ñaka niken kwela yete. Ñodre, ti ñaka rikai kwela yebätä mikakäre gare ti jababara tärä tike ye ngwane, kukwe ñan tuabare rababa bare ye ñaka käi rikwitaikä jire tibiti.

Ja ngwai iti konkrekasionte nämä ja mäkäninte ni ñaka Testiko ben, rükaba jukwe mete dekä nuen aune ngwian nämä mikani ere täräkwatate bianba kwe nuen.  Niara aune monsotre kia kwe ye ruäre nämäne niken dekä sribire algodón yebätä. Ngwian yebiti ti raba niken Nueva York namanintre nütüre. Ja ngwai yekwe nieba tie: “Nän kwela yete, mäkwe kukwe mika gare krubäte jai aune mä rükata ye ngwane, dre dre namani gare mäi ye jökrä mäkwe mika gare nuen”. Ye bitikäre, ti raba sribire bämän rikadre krärike ta yete o ñakare ye tikwe ngwantariba nitre sribikä teléfono yebätä ie, akwa niaratre ñakare nieba tie. Tikwe ja töi mikabara kukwe keteiti nuainne yebätä tikwe ñaka töibikaba. Tikwe ñaka sribi ye ka ngäbitiba yebätä kätä juto krubäte tibätä.

Nunkwe kukwe driebare ño kä Pine Bluff yekänti ye Gloria bike mike gare nie: “Kä ye rababa tuin kwin krubäte kukwe driekäre tie. Ti nämä nitre 15 o 20 tötike Bibliabätä. Dekä nun nämä niken kukwe driere ju ju te aune derekri nun nämä niken nitre tötike. Ruäre ngwane, nemen 11 deu nun nämä nitre tötike ünä. ¡Nun nämä kukwe driere kä jutobiti! Ti törbaba kukwe driei kärekäre yete aune ti raba niere metre nun juan ñaka circuito tuinbiti akräke nun tädre kukwe driere jankunu yete. Akwa Jehová törbaba nun tuai sribi mada nuainne”. ¡Aune ye erere rababa bare metre nun kräke!

Nun nämä sribi prekursor nuainne kä Pine Bluff yekänti ngwane, nunkwe ja kä tikaba prekursor especial nuainkäre. Ni distrito tuabitikä törbaba nun tuai niken sribi prekursor especial nuainne konkrekasion nämä keteiti Texas dimikakäre yebätä nun juain prekursor especial ye rababara gare nuen. Nun töi nämä krubäte sribi ye erere nuainbätä. Nun juain prekursor especial ye nun nämä ngübare krubäte... Akwa käre correo yete kukwe juan ñaka nämä nuen. Akwa, kä 1965 yete tärä juanba nuen. ¡Nun juanba konkrekasion tuinbiti! Kä ye arabe te, ja mräkä Leon Weaver kädekaba ni circuito tuabitikä arato, nengwane niara tä ni Sukursal Jie Ngwanka Estados Unidos.

Ti rabadre ni circuito tuabitikä yebätä ti rababa nemen töbike ye ngwane, kä jürä rababa nemen krubäte tibätä. Kä rikaba kwati ta ye känenkri, ti nämä ño kukwe ja üairebiti yebätä James Thompson nämä distrito tuinbiti käkwe blitaba tibe. Ti rabadre ni circuito tuabitikä töi kwin yekäre, kukwe meden ruärebätä ti rabadre ja töi ükete aune ti töi meden meden rabadre kwin ye nieba kwe tie. Ti rababara konkrekasion tuinbiti ye ngwane, kukwe nieba kwe tie ye ütiäte krubäte rükaba gare tie. Ti kädekaba ni circuito tuabitikä ye bitikäre, ja mräkä Thompson ni distrito tuabitikä ye janama kena nun tuinbiti. Ja mräkä töi nämä krubäte kukwe ja üairebätä ye köböire kukwe rababa gare krubäte tie.

Kä ye ngwane, nitre circuito tuabitikä ye tötika ñaka nämä krubäte. Ni circuito tuabitikä nämä konkrekasion tuinbiti ño ye mikakäre gare jai ti rikaba bämän krati ben aune bämän mada yebätä ti rikaba konkrekasion tuinbiti ye ngwane niara rikaba tibe mada aune kukwe ruäre nieba kwe tie ti dimikakäre. Ye bitikäre, nun jataba konkrekasion tuinbiti kaibe Gloria ben. Tikwe kukwe ne ngwantariba Gloria ie ye törö tie: “¿Ñobätä niara bikera nikenta?”. Akwa, ye bitikäre, kukwe ütiäte  rükaba gare tie: nikwe ja tuanemetre dimikadre ja mräkätre ie ngwane, ja mräkätre töi kwin täi käre ni dimikakäre. Ja mräkätre ruäre nämä mekerabe kukwebätä käkwe ti dimikaba ye täbe törö tie. Ñodre, ja mräkä James Brown nämä konkrekasion tuinbiti aune Fred Rusk nämä sribire Betelte.

Kä ye näire, nitre kwati krubäte jataba ñaka nitre kwata bä jene ye kain ngäbiti ja erebe. Bati, kä keteiti juta Tennessee yekänti tuabiti nämä nunkwe ye ngwane, nitre nämä ja ükaninte sribikäre gwairebe jabe abokän kädeka nämä Ku Klux Klan käkwe ja ükateba marcha nuainkäre yete. Köbö madate, nun nämä kukwe driere ja mräkätre ben aune mrö rürübäin käi yekänti nun rikaba jondron kwete ye törö tie. Ti rikaba narakrö käi yekänti ngwane, ni iti kä krubäte ngwärebätä aune ni kwata bä jene ka ngäbiti ñaka ye nämä tikani niara ngrabare ye tikwe gaba. Akwa ja mräkä iti kwata ngwen, abokän bäri kri aune dite ni ye kräke rikaba nun jiebiti. Niarakwe ngwantariba tie: “¿Mätä jäme, ja mräkä Herd?”. Ni ye rikaba jötrö mento aune ñaka rikaba kä narakrö yekänti. Kä kwati krubäte nikanina ta yete, niena gare tie, ni kwata bä jene ye ñaka aibätä ja ka ngäbiti ñaka ja erebe, ñakare aune Adán ja mikani ngite ye köböite kukwe ye tä nemen bare. Niena gare tie arato, ja mräkä iti kwata bä jene akwa ye ja mräkä kukwebätä nibe aune raba ja nire bien ni ütiäre.

Kä 33 rikaba ta yete nunkwe circuito aune distrito tuabitiba. Kä ye ngwane, kukwe kwin keta kabre rababa nunkwe. Akwa kukwe mada kwin nämä ja känenkäre nun kräke. Nun töi nämä kukwe meden nuainbätä ye rababa bare nun kräke sö agosto kä 1997 yete. ¡Nun nübaiba sribire Betel kä Estados Unidos yete! Aisete, kä 38 näre nikani ta yete nunkwe kukwe ye ngübaba, ye bitikäre nun jataba sribire Betelte. Ja mräkätre ji ngwanka yete ye törbaba nun tuai sribire kä braibe te kä yekänti ti rababa nütüre, akwa ñaka rababa bare ye erere.

Kenanbe tikwe sribiba Oficina Känti Kukwe Drie Jie Ngwanta yekänti. Yete kukwe rababa gare krubäte tie, ñan ñobätä aune nitre umbre ji ngwanka aune ja mräkätre circuito tuabitikä tätre kukwe ñaka nuäre ngwentari ye ja mräkätre ji ngwanka yete ye tätre mike gare. Niaratre ti dimikani ño aune diribare bätärekä kwetre tie yebätä tita mike tuin ütiäte krubäte jai. Ti juandreta sribire oficina yekänti ngwane, ti tädre kukwe mike gare jankunu jai raba ruin tie.

Nunta sribire Betelte ye tuin kwin krubäte ti aune Gloria ie. Käre nunta nüke dekä ngwäte aune ye ütiäte krubäte sribikäre nete. Kä rikaba kwati näre ta yete, ti rababa sribire Nitre Dianinkä Kukwe Drie Jie Ngwankäre yebe aune kä 1999 yete ti kädekaba siba Nitre Braibe Konkrekasion Jökrä Ngübabitikä. Kukwe jökrä namanina gare tie Betelte ye ngätäite kukwe bäri ütiäte namanina gare tie ye abokän, Jesukristo tä konkrekasion kristiano jie ngwen aune ñan ni kä nebätä tä jie ngwen.

Ti nämä dre dre nuainne yebätä tita nemen töbiketa ye ngwane, Amós ni Ngöbö kukwei niekä ye erere jata nemen ruin ruäre ngwane tie. Ni oveja ngübaka töi bobre nämäne higo sicómoro ngokwä däkete ye Jehovakwe dianinkä sribikäre ja kräke. Kri ye ngokwä nitre bobre aibe nämäne kwete nie nämäne. Ngöbökwe niara kädekani ni Ngöbö kukwei niekä aune kukwe kwin keta kabre mikani nemen bare kwe kräke (Amós 7:14, 15). Ye erere arato, ti ni bobre sribikä kä Liberty yekänti ngobo ne Jehovakwe dianinkä aune kukwe kwin keta kabre mikani nemen bare kwe ti kräke abokän ñaka raba nemen täinbare tie (Prov. 10:22). Ti ngübabare bobre, akwa Jehovakwe kukwe kwin keta kabre mikanina nemen bare ti kräke kukwe ja üairebiti ruin tie.