1, 2. ¿Nitre testiko kwati tä ja tuin kukwe meden meden ben?

APÓSTOL Pablo käkwe Timoteo töi mikani kukwe driere jankunu aune kukwe ye ni kristiano kä nengwane kräke arato (2 Tim. 4:5). Ni jökrä tä ja di ngwen kukwe ye mikakäre täte akwa ñaka tä nemen nuäre ni kräke. Ja mräkätre ruäre ñaka rabadre kä jurä ngwen jabätä kukwe driekäre ye tätre ribere jai (2 Tim. 4:2). Ñodre, kä ruäre känti kukwe drie ye ñäkäita, akwa yebiti ta ja mräkätre tä kukwe driere yebätä mika raba ngite yebätä ani töbike.

² Nitre Jehová mikaka täte tätre ja tuin kukwe keta kabre tare ben aune ye köböite raba di nekä. Ja mräkätre kwati tä sribire krubäte akwa dre ribeta mräkrätrekwe jai ye aibe raba bien ietre. Niaratre tö kukwe driei krubäte akwa bämä tä kite krüte ngwane niaratre tä nemen nainte krubäte. Mada abokän tä ja tuin bren tare ben, niena umbre o ruäre tä ketaninkä gwi yebätä ñaka raba sribire krubäte Jehová kräke. Aune ja mräkätre ruäre ie ja ruin ngwarbe yebe tätre ja tuin. Meri testiko nünanka Oriente Medio kädekata Mary * tä niere: “Ja ruin ngwarbe tie yebe tita ja tuin aune ye kukwe kri krubäte kwrere ti kräke, yebätä tita nemen nainte krubäte aune ye bitikäre jata nemen ruin ngite tie, ñobätä ñan aune töbikabätä kukwe yebätä kä ñaka tä nemente tie aune ja ñaka tä nemen ruin dite tie kukwe driekäre”.

3. ¿Nibike dre mike gare jai kukwe ja tötikara nekänti?

³ Kukwe meden ben ni tädre ja tuin akwa yebiti ta Jehovakwe ni dimikai kä ngwankäre nüke jai aune ye köböire ni raba sribire ño niara kräke ye erere nikwe nuaindi. Jehová tä ni dimike ño ye nibike mike gare jai kukwe ja tötikara nekänti. Akwa ye känenkri, Pablo aune Timoteo ye dimikani ño Jehovakwe kukwe driekäre jankunu kukwe tare yebiti ta ye ani mike gare jai.

4. ¿Pablo ja tuani kukwe taretare meden ben?

⁴ Kukwe keta kabre tare krubäte ben Pablo ja tuabare. Ñodre, metani, täkäni jäbiti aune kitani ngite, ye ngwane dimikadre ye nämäne ribere bäri jai (2 Cor. 11:23-25). Pablo ñaka nämä töbike kwin jabätä ruäre ngwane ye niara ñaka namani jakaire mikakäre gare (Rom. 7:18, 19, 24). Ne madakäre “kri tukwä” nämä niara ngrabare abokän nämä niara ngwen ja tare nike yebätä bä kabre ja di käräbare kwe Ngöböi ne kwe niarakwe diandrekäbätä (2 Cor. 12:7, 8).

5. ¿Pablo ja tuani kukwe keta kabre ben akwa dre nuainbare kwe?

⁵ Jehovakwe Pablo dimikani ne kwe rabadre kukwe driere jankunu kukwe tare yebiti ta. Pablokwe dre dre nuainbarera yebätä ni raba töbike. Ñodre niara nämäne kitani ngite ja gwirete Roma yete ngwane, kukwe meden mika nämäne täte kwe ye mikani gare kä jutobiti kwe nitre judío ji ngwanka kukwebätä ngwärekri aune nitre sribikä gobranbe ütiäte ütiäte ye ngwärekri arato (Hech. 28:17; Filip. 4:21, 22). Ne madakäre, guardiatre aune nitre jökrä nämäne nüke tuinbiti ye ie kukwe driebare kwe (Hech. 28:30, 31, TNM; Filip. 1:13). Kä ye arabe näire Jehovakwe Pablo töi mikani tärä tike üai deme yebiti aune tärä ye käkwe nitre kristiano kä ye näire dimikani aune täbe nitre kristiano kä ne näire dimike arato. Aune Pablo kukwe kwin bämikani ye köböire ja mräkätre konkrekasion Roma ie ja namani ruin dite aune ñaka kä jurä ngwani kwetre jabätä blitakäre kukwe Ngöbökwe yebätä (Filip. 1:14). Pablo tö namani dre nuain ye erere ñaka namani bare ie, akwa käre nämäne ja di ngwen sribikäre Jehová kräke aune kukwe namani barebätä ye köböire kukwe kwin ye namani gare nitre kwati ie niebare kwe (Filip. 1:12).

6. 2 Corintios 12:9, 10 tä niere erere, ¿dre käkwe Pablo dimikani kukwe driere jankunu?

⁶ Pablo nämäne sribi nuainne Jehová kräke ye ñaka nämä nemen bare ja di jeñebiti ie, ñakare aune Ngöbö nämäne ja di bien ie ye nämäne gare ie yebätä tikabare kwe ‘ni bobre di ñakare yebätä abokän Ngöbö di kri tuata’ (ñäkädre 2 Corintios 12:9, 10 yebätä). Üai deme yebiti Jehovakwe Pablo dimikani ne kwe ja mikani Pablo rüere, kitani ngite aune kukwe mada mada yebiti ta niara rabadre kukwe driere jankunu.

7. ¿Timoteo kukwe driebare ngwane kukwe meden meden ben ja tuani kwe?

⁷ Timoteo bati akwa Ngöbökwe dimikadre kukwe driere jankunu ye ribebare kwe jai. Ñodre,  Pablo nämäne niken sribi misionero nuainne kä mente känti, ye ngwane niara nämä niken siba ben. Ne madakäre, ruäre ngwane Pablo nämäne Timoteo juen konkrekasion tuinbiti aune dimike (1 Cor. 4:17). Sribi ye kri krubäte Timoteo kräke nämäne nütüre raba ruin nie. Yebätä “Timoteo bati akwa nitre ñaka käkwe mikadre tuin ngwarbe jai” ye bämikadre kwe niebare Pablokwe ie (1 Tim. 4:12, TNM). Ne madakäre, kri tukwä ye kwrere nämäne Timoteo ngrabare kä ye näire arato ñobätä ñan aune Timoteo nämäne nemen bren gwä gwä mikata gare Bibliabätä (1 Tim. 5:23). Akwa üai deme yebiti Jehovakwe niara dimikai kukwe driere jankunu aune sribire ja mräkätre kräke ye nämäne gare ie (2 Tim. 1:7).

8. ¿Jehová tä ni dimike ño kä nengwane?

⁸ Kä nengwane Jehová tä ja “di kri bä nuäre” yebiti ni dimike ne kwe ni rabadre sribire jankunu kräke (2 Cor. 4:7). Kukwe ketabokä yebiti Jehová tä ni mike dite aune ni dimike jankunu ja ngwen metre ye ani mike gare jai. Ye abokän: orasion, Biblia, ja mräkätre aune kukwe drie.

9. ¿Orasion ye raba ni dimike ño?

⁹ Orasion. Efesios 6:18, (TNM), yete Pablokwe niebare: “Kä jökrä ngwane mun tädre orare”. Nita ye erere nuainne ngwane Jehovata ni mike dite. Jonnie tä nüne Bolivia abokän käkwe ja tuani kukwe keta kabre tare ben ye ngwane, Jehovakwe dimikani nükani gare ie. Rün aune meye bätä muko kwe näkäni bren gwairebe. Ñan namani nuäre jire kräke niaratre ye ngübakäre. Meye krütani aune muko kwe bätä rün kwe ñaka namaninta nökröta jötrö. Jonnie tä niere: “Ja ñaka nämä nemen nuaindre tie ngwane ja nämä ruin ño tie ye ti nämä niere metre ta orasionte”. Jehovakwe ja di biani ie kä ngwankäre nüke jai. Juta ye arabe känti ni umbre ji ngwanka kädekata Ronald niara meyebätä cáncer nämäne namani gare ie, meye namani bren ye bitikäre sö nikani krati ta ngwane krütani. ¿Dre käkwe niara dimikani? Niara tä niere: “Orasion ye köböire dre nämä ti brukwäte ye ti nämä niere jökrä Jehovai. Ja ruin ño tie ye nüke gare bäri kwin Jehovai ti kräke ye gare kwin tie”. Ruäre ngwane nita ja töibikaire krubäte o nikwe dre niedre orasionte ye ñaka tä nemen gare nie aune ja ruin ño nie ye nikwe mikadre gare ño ye ñaka tä nemen gare nie, akwa yebiti ta Jehová tö blitamana jabe nie (Rom. 8:26, 27).

10. Hebreos 4:12 tä niere erere, ¿nikwe ñäkädre Bibliabätä aune töbikadretaribätä ye ñobätä ütiäte krubäte?

¹⁰ Biblia. Pablo erere, nita ñäke Bibliabätä ngwane ni raba nementa dite aune ni töi raba nementa jäme (Rom. 15:4). Nita ñäke texto keteitibätä aune nita töbiketaribätä ngwane, kukwe ye raba ni dimike ño ye Jehová raba mike gare nie üai deme kwe yebiti (ñäkädre Hebreos 4:12 yebätä). Ronald abokän kädrite párrafo käne yebätä tä niere: “Tikwe ja töi mikaba ñäke käre deu Bibliabätä ye käi juto tibätä. Jehová töi keta kabre aune nitre niara mikaka täte ye ie niara tä ja tare bämike ño yebätä tita töbiketari. Kukwe ye tä ti miketa dite”.

11. ¿Meri testiko iti nämäne ja tare nike ye ngwane Biblia käkwe dimikani ño?

¹¹ Nita töbiketari kukwe Ngöbökwe yebätä ngwane, nita nemen töbiketari kwin kukwe tä ni kisete yebätä. Meri testiko iti kän muko krütani yebätä dre namani bare ye ani mike gare jai. Niara käkwe ñäkädre tärä Job yebätä ye ribebare ni umbre ji ngwanka yekwe ie aune kukwe ye käkwe niara dimikai ye mikani gare kwe ie arato. Kömikani kwe ngwane Job töbikabare ño ye ñan namani debe kräke. Aisete namani niere ja töite: “Job, ¿ñobätä mä ñan töbike kwin?”. Akwa niara nämäne töbike bäsi Job ye erere nükani gare ie. Kukwe ye käkwe niara dimikani töbike kwin ja käne aune namani dite ja tuakäre jankunu kukwe tare yebe.

12. ¿Ja mräkätre yebiti Jehovata ni dimike ño?

 ¹² Ja mräkätre. Ja mräkätre konkrekasionte yebiti Jehovata ni dimike arato. Pablo tö namani ja mräkätre tuaita ja dimikakäre kwärikwäri niebare kwe (Rom. 1:11, 12). Aune Mary kädrite párrafo ketebukäre yete ye töta nemen rabai gwairebe ja mräkätre konkrekasionte ben. Niara tä niere: “Kukwe meden ben ti nämä ja tuin ye ñaka nämä gare ja etebatre aune ja ngwaitre ie, akwa niaratre yebiti Jehovakwe ti dimikanina. Niaratre tä kukwe niere o tärä tike tie aune bä kabre kukwe ye ara tita ribere jai. Aune ja etebatre käkwe ja tuani kukwe ye erere ben aune tä ja tuin ño ben yebe tita blite ye tä ti dimike krubäte. Ne madakäre, ti ütiäte ja mräkätre konkrekasionte kräke ye nitre umbre ji ngwanka tä niere käre tie”.

13. ¿Ni raba ja dimike ño kwärikwäri gätäte?

¹³ Ni raba ja dimike kwärikwäri gätäte. Nita niken gätäte ngwane, nikwe ja töi mikadre ja mräkätre dimikakäre. Niaratre tä dre nuainne yebätä ni raba debe bien ie aune niaratre tare nikwe ye ni raba niere ietre. Ñodre, gätä känenkri ni umbre ji ngwanka kädekata Peter käkwe kukwe ne erere niebare ja ngwai iti abokän muko ñan kukwebätä ie: “Mätä gätäte nunbe ye tä nun dimike krubäte ñobätä ñan aune monsotre ni ti mäkwe ye tä käre juto gätä kräke aune mätä niaratre kite blitakäre gätäte ye tuin nunye”. Muare kwärä niarakwe debe biani aune niebare kwe: “Kukwe ye erere niedre tie ye ti täni ribere krubäte jai matare”.

14. ¿Kukwe drie ye raba ni dimike ño?

¹⁴ Kukwe drie. Nitre tä ni kukwe nuin o ñakare akwa yebiti ta kukwe drie ye köböire ja raba nemen kwin nie aune tä ni dimike (Prov. 11:25). Kukwe ye namani bare meri testiko kädekata Stacy yebätä. Niara mräkä iti kitaninkä kukwebätä ngwane namani tare krubäte ie aune yebätä niara namani niere jai, tikwe kukwe mada nuaindre ne kwe ñaka kitadrekä kukwebätä näre. Kukwe ye aibebätä niara nämäne töbike metrere. ¿Akwa dre käkwe niara dimikani? Kukwe drie. Niara jatani kukwe driere bäri ngwane, niarakwe nitre dimikadre nitre nämäne ribere jai yebätä jatani ja töi mike bäri. Niara tä niere: “Kä ye näire ni ja tötikaka iti abokän jataba nirien jötrö kukwe ja üairebiti ye Jehovakwe bianba tie ye käkwe ti dimikaba krubäte. Aune kukwe drie ye tä ti dimike nünenkä bäri dite ja tuakäre kukwe tare yebe”.

15. ¿Mary käkwe kukwe niebare ye tä dre driere nie?

¹⁵ Kukwe ben nita ja tuin ye köböite ni ñaka raba kukwe driere krubäte raba ruin nie. Akwa nita ja di ngwen kukwe driekäre ngwane, ye käi rabai juto Jehovabätä ye nikwe ngwandre törö jai. Mary abokänbätä blitanina ye ja kwitani konkrekasion blitaka kukwe madabiti yete ngwane, niara ñaka raba konkrekasion dimike krubäte nämäne nütüre. Tä niere: “Kenanbe ti nämä kukwe driere ngwane ti nämä blite chi, ñäke texto keteitibätä o täräkwata chi bien jerekäbe”. Nitre meden nämäne blite kwin kukwe yebiti, ye täte niara ie ja nämäne nemen ruin ngwarbe. Akwa niarakwe ja töi kwitani kukwe yebätä ñobätä ñan aune niara ñaka blite kwin kukwe yebiti, akwa niara yebiti raba nitre mada dimike ye nükani gare ie. Tä niere: “Kukwe Bibliabätä ye nuäre rükakäre gare aune tä kukwe kwin mike nemen bare nitrebätä”.

16. ¿Nire ñaka raba niken kwäräkwärä ye dre raba dimike?

¹⁶ Ni ñaka raba niken kwäräkwärä akwa ni tö kukwe drie jankunu ye tuin Jehovai aune ütiäte niara kräke. Ruäre ngwane ni raba kukwe driere ni ni ngübaka ie o nitre sribikä hospitalte ie. Ni nämäne dre nuainne käne ye nikwe ketai kukwe nuainta kä nengwane nikwe yebe ngwane, ni rabai ulire krubäte. Akwa Jehová tä ni dimike ño kä nengwane yebätä nikwe töbikai ngwane ni rabai bäri dite ja tuakäre kukwe keta kabre tare yebe aune käre kä täi juto nibätä.

17. Eclesiastés 11:6 tä niere erere, ¿ñobätä ni rabadre kukwe driere jankunu kukwe kwin ñaka nemen bare tuin nie yebiti ta?

 ¹⁷ Kukwe metre ye nura kwrere, yebätä ñongwane ngwätri rabai nitre brukwäte aune ririai ye ñaka gare nie (ñäkädre Eclesiastés 11:6 yebätä). * Ñodre, meri testiko kädekata Barbara kä 80 biti tä käre tärä tike aune teléfono yebiti kukwe driere. Tärä tikabare kwe yekänti täräkwata Ni Mikaka Mokre 1 Marzo 2014 kädekata, ¿Ngöbökwe dre nuainbare mä kräke? ye mikani kwe. Akwa tärä ye juani kwe nitre gure ñaka namanina testiko Jehovakwe ye ie, akwa ye ñaka nämäne gare ie. Niaratre käkwe ñäkäbare bati bobu tärä yebätä. Jehová nämäne blite metre ta brare gure ye ie nämäne ruin ie. Niaratre nibu käkwe ja töi mikani nikenta gätäbätä aune namaninta testiko Jehovakwe kä nikani 27 ta ye bitikäre. Barbara käkwe tärä keteitibe tikani ye köböire kukwe kwin namani bare aune ja namaninta ruin dite ie ye ni raba bämike ja okwäte.

18. ¿Jehovakwe ni dimikadre yekäre ni rabadre dre nuainne?

¹⁸ Kukwe keta kabre yebiti Jehová raba ni dimike ye nibira gare nie. Nikwe Jehová tuadremetre ja dimike orasion, Biblia, ja mräkätre aune kukwe drie yebiti. Nikwe ye erere nuaindi ngwane Jehová die tärä aune niara tö ni dimikai ye ie nita tö ngwen ye nikwe bämikai. Nikwe ja ketadrete dime ni rün kä kwinbiti yebätä ñobätä ñan aune niara tä juto biare “ja die mikakäre tuare nitre tä niara mike täte ja brukwä tätebiti ye ütiäre” (2 Crón. 16:9).