Kukwe rababa bare tibätä ye köböire ti ñan jataba nüne käne erere ñobätä ñan aune, Ni ni sribekä ye ti jataba känenentari mada. Kukwe rababa bare tibätä kä iko bedare te ye mikakäre gare munye ye känenkri, ti nämä monsore ngwane tikwe nünanba ño, ye köböite ti jataba töbike ño aune ye käkwe ti dimikaba Ni ni sribekä känenentari mada ye tibike mike gare munye.

Ti däreba kä 1937 ye ngwane kä kädekata Guesnain yekänti, kä ye nemenkä Francia ngwitärikri yete. Ti rün nämä sribire mina yebätä aune sribidre balente ye ütiäte krubäte drieba kwe tie. Kukwe ñaka ükateta metre ye nikwe ñaka kadre ngäbiti drieba kwe tie arato. Nitre sribikä minabätä nämä sribire kä kämekäme te ye niara tö nämä dimikabätä, yebätä nitre nämä ja ükaninkrö ne kwe kukwe kwin nuaindre nitre sribikä minabätä kräke yekri nämä aune nämä ja mike huelga yete siba. Ne madakäre, nitre sacerdote nämä nüne nun käite ye nämä ja bämike jerekäbe ye ñan nämä nemen debe ti rün kräke. Nitre sacerdote kwati nämä nüne kwin, akwa nämäntre ngwian aune mrö kärere nitre sribikä minabätä jondron nämä dökai kwetre ye ie. Nitre sacerdote nämä ja ngwen ño ye nämä nemen  käme krubäte ti rün kräke, yebätä kukwe ñan drieba jire kwe tie iglesia yebätä. Ne madakäre, nun ñaka nämä blite jire Ngöbö yebätä.

Ti jataba nirien ngwane kukwe ñaka metre nuainta ye bäri ñan jataba tuin kwin tie. Nitre menteni nämä nüne Francia yebätä töbika nämä jene ye ñan nämä nemen debe ti kräke. Nitre juta madate nämä nüke nüne Francia ye monsoitre ben ti nämä ja kete, ye käi nämäne nemen juto tibätä aune ti nämä jadenkä fútbol bentre. Ne madakäre, ti meye abokän Polonia, nitre kwata bätäkä ngwarbe ye jökrä mikadre ütiäte jai aune nünandre jäme jabe ye ie ti tö nämä.

Ti käräba rübätä kä 1957 ye ngwane, ye medenbätä ti nämä kä ikote ngutuä Argelia yekänti abokänbätä tikwe blitani kena. Tikwe “Ngöbö tikwe, ti dimike” nieba ye bitikäre ti gätäba burro känsenta yebe aune ñaka ni rükä ti rüere yebe. ¡Angwane batibe ti töi rababa jäme! Akwa drekäre ni sribebare ye ti jataba ngwentari bäri jai, kukwe rababa bare ne aune rü ye köböite. Ñodre: ¿Drekäre ni ta nete? ¿Ngöbö töita nibätä? ¿Ni raba nüne jäme ja känenkäre?

Kä bianba ngwarbe tie ye köböire ti nämä ti rün gwirete aune yete ni testiko Jehovakwe iti rababa gare tie. Niarakwe La Sainte Bible nitre Católico käkwe kwitani kukwe Francés yebiti ye bianba tie. Ti rababata Argelia ngwane ti rikaba ñäkebätä. Texto keteiti käkwe ti mikaba töbike ye abokän Apocalipsis 21:3, 4, yekänti nieta: “Ju Ngöbökwe tä nitre kä tibienbätä ben. [...] Aune niaratre okwä ñöi sökadite jökrä kwe aune gata ñaka rabaira, ni ñan rabai ulire, ja muaire aune ja tare nike jire”. * Kukwe ye kwrerebätä ti ñaka ñäkäbare jire, yebätä kukwe ye metre o ño ye ti rababa ngwentari jai. Ye ngwane kukwe ñaka nämä gare tie Ngöböbätä aune Bibliabätä.

Kä 1959 ye ngwane ti ja nämä ünä rübätä, ye bitikäre ni testiko kädekata François ye rababa gare tie. Kukwe metre Bibliabätä keta kabre mikaba gare kwe tie. Ñodre, Ngöbö kädekata Jehová ye mikaba gare kwe tie arato (Sal. 83:18) Ne madakäre, kukwe ñaka metre nuainta käbiti tibien ye Jehovakwe diainkä, kä tibien kwitai bä nuäre aune kukwe kwin käbämikata Apocalipsis 21:3, 4 ye mikai nemen bare kwe ye mikaba gare kwe tie.

Kukwe metre ne rababa tuin era tie aune mataba ti brukwäte aune ti brukwä rababa rubun nitre sacerdote kräke, ñobätä ñan aune kukwe metre nieta Bibliakwe ye erere niaratre ñaka nämä driere ye ti tö rababa mikai gare. Ti nämä töbike ti rün kwrere aune ti tö rababa kukwe ükaite jötrö ngwarbe.

François aune ja mräkätre mada mada käkwe ti dimikaba ja töi gobraine. Nikwe ñaka ñäkädre ni mada rüere, ñakare aune nikwe kukwe kwin gobran Ngöbökwe yebätä driedre ietre ye ja ketamukotre ne käkwe drieba tie. Sribi ye nuainbare Jesukwe aune nitre ja totikaka kwe käkwe nuaindre niebare kwe (Mat. 24:14, TNM; Luc. 4:43 TNM). Nitre tä kukwe meden mike täte akwa yebiti ta mikadre ütiäte jai aune blitadre jäme bentre yebätä tikwe ja kitaba. Biblia tä niere: “Ni sribikä ni Dänkienkwe abko ñan tädre ja kwete ni mda mdabe, akwa ni dirikä ye abko tädre ja gete jäme ni jökräbe” (2 Tim. 2:24).

Tikwe ja töi ükadrete drebätä ye ererebätä tikwe ja töi ükateba. Aune ti ja ngökaba ñöte ni testiko Jehovakwe erere gätä kri circuito kä 1959 yete.  Yete ja ngwai bati kädekä nämä Angèle rababa gare tie, niarai ti rababa nain krubäte. Ti rikaba niken mike ñärärä konkrekasion kwete aune kä 1960 ye ngwane nunkwe ja mäkäteba. Angèle ye ja ngwen kwin krubäte, töi keta kabre bä nuäre ye tärä kwe aune niara ye abokän jondron ütiäte ye kwrere Jehovakwe biani tie (Prov. 19:14).

Mekerabe nükebe kä nengwane kukwe ütiäte ja töi kräke namanina gare tie nitre ünä kukwe ja üairebiti yebätä. Ñodre, sribi ñaka nuäre biandre nuaindre nie ye nikwe nuaindre kwin yekäre, nikwe ja töi mikadre bobre ye namanina gare tie. Aune kukwe nieta Proverbios 15:22 ye nikwe mikadre täte. Yete nieta: “Nitre kwati tä blite jabe kukwe ükatekäre ye köböire kukwe kwin ta nemen bare”.

Kä 1964 ye ngwane kukwe nieta proverbios yebätä ye ütiäte jataba nüke gare bäri kwin tie. Ñobätä ñan aune ti kädekaba ni circuito tuabitikä aune ti nämä konkrekasion tuinbiti ja mräkätre dimikakäre aune mikakäre dite kukwe ja üairebiti. Akwa kä nämä krire 27 tibiti yebätä kukwe ñan nämä gare krubäte tie. Aisete kukwe nämä nainte tie akwa kukwe ye rababa ja töi kräke tie aune metrere ja mräkätre ie kukwe nuain gare aune kukwe gare krubäte yekwe mäträba tibätä yebätä kukwe ütiäte ja töi kräke rababa gare tie.

Keteiti raba nüketa törö tie. Ti jataba konkrekasion tuinbiti kenanbe París yete ngwane, ja mräkä iti ünä kukwe ja üairebiti raba blite tibe kaibe o ño ye ngwantariba kwe tie: “Jän raba”, tikwe nieba ie.

“Louis Doctor iti tä nüke ju kwati te ngwane, ¿tä nire tuenbiti?”, ngwantariba kwe tie.

“Nitre bren”, tikwe nieba.

“Ye kore, nieba kwe tie. Akwa mätä ja kete bäri ja mräkätre ünä kukwe ja üairebiti yebe tuin tie, ñodre ni superintendente konkrekasion yebe. Ja mräkätre kwati konkrekasionte tä krire kukwebätä, ñan blite krubäte aune tä di nekä. Mäkwe kä diantrekä jai niaratre kräke, mä rikadre gwirete aune mäkwe mrödre bentre ye käkwe dimikai krubäte ruin tie”.

¡Ja eteba tare tikwe ne käkwe mäträkä kwin tibätä! Oveja Jehovakwe nämä tare kwe ye käkwe ti töi mikaba niä. Aisete tikwe ñan bikaba kri mada aune kukwe nieba kwe tie ye ti jataba mike täte bengwairebe. Ja mräkätre niara kwrere ye tärä, yebätä tita debe bien krubäte Jehovai.

Kä 1969 aune 1973 ye ngwane Departamento de Alimentos ye mikaba ti kisete tuabitikäre gätä kri internacional nuainba Colombes, Paris yekänti. Gätä kri kä 1973 ye ngwane nunkwe nitre 60,000  näre ye ie mrö bianba köbörike te. Ti rababa nikenkä krubäte ja jiebiti yekäre kukwe ñaka kwen tie mikakäre gare munye. Mada bati, sribi rabadre bare kwin nie yekäre kukwe nieta Proverbios 15:22 ye tikwe mikaba täte. Jä mräkätre ünä kukwe ja üairebiti aune kukwe gare krubäte ietre sribi nuaindre tikwe yebätä ye ie tikwe ja di käräbä. Ja mräkätre sribikä ngribätä, jondron nökabätä, unkwe riabätä aune kukwe gare krubäte ietre jondron kökabätä yebe tikwe blitaba. Niaratre käkwe ti dimikaba ye köböire sribi kri krubäte ye rababa bare nunye.

Kä 1973 ye ngwane ti aune ti muko nun nübaiba sribire Betelte Sukursal Francia yete. Sribi mikaba nuaindre kena tie ye ñan rababa nuäre ti kräke nuainkäre ñobätä ñan aune tikwe dre dre erere nuaindre täräkwata biankäre ja mräkätre nünanka Camerún ye ie nieba tie. Camerún ye juta keteiti África, sribi nuainta munkwe ye ñäkäibare kä 1970 nükebe kä 1993 ye ngwane. Ja ñan rababa nüke törö tie. Ja rababa ruin ño tie ye rükaba gare ja mräkä nämä sribi Ngöbökwe nuainta Francia jie ngwen kä ye ngwane ie, yebätä ti dimikakäre nieba kwe: “Ja mräkätre Camerún tä mrö ja üaire ribere gwä ngwarbe jai. ¡Ani mrö bien ietre!”. Ye erere munkwe nuainba.

Juta meden meden ngätäi jai juta Camerún yebe, yekänti ti rikaba bä kabre ja ükakrökäre nitre umbre ji ngwanka konkrekasionte Camerún yebe. Ja mräkätre ne ñan kä jürä ngwen jabätä aune töbike kwin ja käne yekwe ti dimikaba krubäte, ne kwe tikwe dre dre nuaindre täräkwata juankäre käre ja mräkätre Camerún ye kräke. Nunkwe ja di ngwanba ye köböire Jehovakwe kukwe kwin mikaba nemen bare. Ñodre kä 20 näre te ja mräkätre Camerún ye ie täräkwata La Atalaya aune täräkwata kädeka nämä Nuestro Servicio del Reino sö kratire kratire kräke, ye käre nämä nemen kisete.

Ti jataba Angèle mike gare jai ngwane niara töi kwin keta kabre ye jataba tuin tie. Akwa nunkwe ja mäkäteba ye bitikäre niara töi kwin keta kabre ye bäri jataba tuin niarabätä tie. Ñodre, köbö te  nunkwe ja mäkäteba ye ngwane deu tikwe oradre Jehovai ribeba kwe tie aune nun tö nämä sribibätä krubäte Jehová kräke tikwe niedre Jehovai orasionte nieba kwe tie aune Jehovakwe nun kukwe nuaba.

Angèle ti dimikanina tö ngwen bäri Jehovai. Ñodre, kä 1973 ye ngwane nun nübaiba sribire Betelte, akwa nun rikadre o ño yebätä ti rababa töbike ñobätä ñan aune circuito tuadrebiti ye nämä tuin kwin tie. Akwa nunkwe ja dianinkä mento Jehová kräke ye Angèle kä ngwanba törö tie. Yebätä juta Ngöbökwe dre ribedre nuaindre nunye ye nun tädre juto biare nuainkäre nieba kwe tie (Heb. 13:17). Ti ngwanba kwekebe kwe ja käne. Aisete nun nübaiba Betelte ye nunkwe kai ngäbitiba aune nun rikaba sribire Betelte. Mekerabe nükebe kä nengwane ti muko tä ja ngwen töbätä, tä töbike kwin ja käne aune kukwe miketari ñärärä kwin kukwe ja üairebiti, ye käkwe nun dimikanina nüne kwin jabe aune kukwe kwin den nuaindre jai.

Nengwane nun niena umbre, akwa Angèle täbe ja ngwen kwin krubäte aune täbe ti dimike. Ñodre, juta Ngöbökwe tä kwela keta kabre bien, tä bien kukwe inglerebiti. Aisete nun rikadre kwela keteitibätä yekäre, nunkwe ja töi mikaba ja kite bäri kukwe inglerebiti. Yekäre nun rikaba konkrekasion blite kukwe inglerebiti yete ye ngwane kä rababara 75 nunbiti. Tita sribire ni comité sukursal Francia ye erere, yebätä kä ñan rababa nemente krubäte tie ja kitakäre blite kukwe madabiti, akwa Angèle aune ti nunkwe ja dimikaba kwärikwäri. Matare nengwane kä niena 80 biti bäri nunbiti, akwa nun täbe ja ükete gätä kräke kukwe inglere aune francés yebiti. Nunta ja di ngwen konkrekasion nunkwe dimikakäre gätäbätä aune kukwe driebätä. Nunta ja di ngwen blitakäre kukwe inglerebiti, yebätä Jehovakwe kukwe kwin mikanina nemen bare nun kräke.

Kä 2017 ye ngwane Jehovakwe kukwe kwin mikaba nemen bare nun kräke. Ti aune Angèle nun rikaba kwela nitre Comité sukursal aune muko kwe kräke yebätä. Kwela ye nuainta Centro Educativo de la Watchtower, Patterson Nueva York yete.

Erametre Jehová ye ni tötikaka bäri kri (Is. 30:20). Ye medenbätä, nitre Jehová mikaka täte umbre o bati ye tötikata bäri kwin kwela mada mada ye kräke (Deut. 4:5-8). Monsotre bati tä Jehová, ja etebatre aune ja ngwaitre yei kukwe gare krubäte ye kukwe nuin ngwane, ye köböire tätre kukwe kwin den nuaindre jai aune tätre ja ngwen ni kristiano metre erere ye niena gare tie. Proverbios 9:9 tä niere erere: “Ni töbätä ye mäkwe tötika aune rabai bäri töbätä. Ni kukwe metre nuainkä ie mäkwe diri aune kukwe rabai gare bäri ie”.

Kä nikanina 60 ta yete kukwe rababa bare tibätä kä iko bedare te deu juta Argelia yete, yebätä tita nemen töbiketari ruäre ngwane. Tikwe nünain kä jutobiti ye ti ñan nämä bämike jire ja töite. ¡Tikwe ja kitanina krubäte nitre madabätä! Jehovakwe ti aune Angèle mikanina nüne kwin aune kä jutobiti. Ye medenbätä nun töita kwatibe ja kitabätä jankunu nun rün kä kwinbiti yebätä aune ja etebantre aune ja ngwaitre tä Jehová tarere aune kukwe gare krubäte ietre yebätä.