KUKWE JA TÖTIKARA 20
KANTIKO 67 “Mäkwe kukwe drie”
Ja tare yekwe ni töi mikadre kukwe driere jankunu
“Kä ne ngämi niken ta, känenkri kukwe kuin tibtä, ye rabadi diribare ni kä jökräbtiye angwane batibe ti jatadita” (MAR. 13:10).
KUKWE NEBÄTÄ JA TÖTIKAI
Ño ni raba ja tare yebiti kukwe driere kä jutobiti aune ja brukwä tätebiti.
1. ¿Dre rababa gare nie gätä anual 2023 yete?
¡GÄTÄ anual 2023 yete kukwe ütiäte mikaba gare! a Kukwe nämä nüke gare jene nie yebätä blitaba aune kukwe ütiäte mikaba gare kukwe drie yebätä. Ñodre, Babilonia Kri gaite ye bitikäre nitre ruäre käkwe ja mikadi Jehovakri ye mikaba gare nie. Arato, sö noviembre 2023 yete ja käne ni ñan rabaira informe bien sö kratire kratire ye mikaba gare. ¿Kukwe drie ye ñan niena ütiäte o ñan nuaindre ye ai gärätä kukwe nebiti? ¡ye ñan ai gärätä!
2. ¿Ñobätä kukwe drie ye bäri ütiäte krubäte kä nengwane? (Marcos 13:10).
2 Kukwe drie ye bäri ütiäte kä nengwane. ¿Ñobätä? Ñobätä ñan aune kä käme te nita nüne ne gate köböra. Kukwe drieta yebätä dre rabai bare kä krüte näire mikani gare Jesukwe Marcos 13:10 yebätä ani töbike (ñäkädrebätä). Kukwe ye ara niebare tärä Mateobätä ngwane, Jesukwe kukwe ne niebare, kukwe kwin Gobran Ngöbökwebätä ye driei kä jökräbiti tibien ye ngwane, “kä mrä” rükai (Mat. 24:14). Kukwe nieta nebiti kä käme gobrainta Satanakwe ne ngwain krüte jökrä meden gärätä. “Köbö mdente amne ñänä okwä nuäi” ye niena gare Jehovai (Mat. 24:36; 25:13; Hech. 1:7). Kätä niken kwatire kwatire ta ye ngwane köbö ye tä nüke bäri ja ken (Rom. 13:11). Kä mrä ye jämi nüke ngwane, nikwe kukwe driedre jankunu.
3. ¿Ñobätä nita kukwe driere?
3 Kukwe keteiti ütiäte krubäte abokän ni jökrä rabadre ngwentari jai: ¿ñobätä nita kukwe driere? Ja tare ye tä ni töi mike kukwe driere ni raba niere. Kukwe kwin Gobran Ngöbökwebätä ye tare nikwe, nitre tare nikwe yebätä nita kukwe driere ietre aune Jehová aune kä kwe ye dre gärätä tare nikwe yebätä. Kukwe ketamä ne ani mike gare keteitire keteitire jai.
KUKWE KWIN GOBRAN NGÖBÖKWEBÄTÄ YE TARE NIKWE
4. ¿Kukwe kwin mikata gare nie ngwane, nita dre nuainne bengwairebe?
4 Kukwe mrä mikani gare mäi yebätä töbike. Mä mräkä itikwe monso namani o sribi mä nämä ngübare kisere jai ye biani mäi. ¿Ja namani ruin ño mäi? Kukwe ye käi namani juto mäbätä yebätä mä tö namani mikai gare mä mräkätre ie, ¿ñan ererea? Ye erere namani bare kukwe kwin Gobran Ngöbökwebätä namani gare mäi ye ngwane.
5. ¿Mä nämäne ja tötike Bibliabätä ye ngwane ja namani ruin ño mäi? (Üai mikadre ñärärä).
5 Mä nämäne ja tötike Bibliabätä ye ngwane, kukwe ruäre namani gare mäi yebätä ja namani ruin ño mäi, yebätä töbike. Kukwe ne erere namani gare mäi aune mada. Ñodre, Jehovakwe mä tare, mä tädre juta kwe te ye ie tö aune ja tare nika ye niarakwe diainkä aune kä mrä bä nuäre yete mä mräkä tare mäkwe ye gaikröta kwe tä käbämike (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Kukwe metre ne jökrä matani mä brukwäte (Luc. 24:32). Kukwe metre namani gare mäi ye namani tare mäkwe aune mä tö namani mikai gare nitre jökrä ie (Jeremías 20:9 mikadre ñärärä).
Kukwe metre namani gare nie yekwe kä mikani juto krubäte nibätä ye medenbätä ni tö namani mikai gare nitre jökrä ie (Párrafo 5 mikadre ñärärä)
6. ¿Ernest aune Rose bätä kukwe namani bare ye tä dre driere mäi?
6 Ja mräkä Ernest yebätä ani blite. b Niarabiti kä nämäne 10 ye ngwane, rün krütani. Niara tä niere: “Ti nämä ngwentari jai: ‘¿Ti rün nikani kä kwinbiti o nikanina kärekäre?’. Monsotre madakwe rün nämä nire yebätä ti nämä bätä ngwen”. Kä kabre te niara nämä nemen bäsi köbö kwatire kwatire dobobiti, nämä nemen ngdokwäre rün doboi metani yekänti aune nämäne orare: “Ngöbö, ti rün tä medente ye ti tö mikai gare jai”. Kä namani 27 biti ngwane, ja tötika Bibliabätä driebare ie aune kani ngäbiti kwe. Nitre krütani ye abokän kä ñan ruinbiti tä jadükani ngüseta ye kwrere aune kä rükai ngwane, niaratre gaikröta namani gare ie käkwe töi mikani niä (Ecl. 9:5, 10; Hech. 24:15). Kukwe nämäne niara töi nike ye namani gare ie Bibliabätä yekwe kä mikani juto krubätebätä. Bitikäre mada muko kwe Rose, yekwe ja tötika Bibliabätä kömikani, kukwe nämäne nemen gare ie ye käi nämäne jutobätä. Aune kä 1978 ye ngwane, niaratre nibu ja ngökani ñöte. Kä jutobiti niaratre kukwe metre namani gare ie ye mikani gare ja ketamuko kwetre ie, mräkätre kwetre ie aune nire tö rabadre kukwe mikai gare jai yei arato. Ye köböire, Ernest bätä Rose nitre 70 jire dimikani ja ngökö ñöte kä nikani ta yete.
7. ¿Kukwe metre Bibliabätä ye tä nemen tare krubäte nikwe ngwane, ni töita nemen dre nuainbätä? (Lucas 6:45).
7 Kukwe metre ye tä nemen tare krubäte nikwe ngwane, ni töta nemen blitaibätä nitre madabe (ñäkädre Lucas 6:45 yebätä). Nitre ja tötikaka siklo kena Jesukwe yekwe kukwe ne niebare: “Kukwe nakaninkä ño ño Jesubtä nunkwe tuaba ja okwä jenbti amne dre dre niebare kwe abko nunkwe kukwe nuaba, ye abko nunkwe kädriedi janknu”, niaratre ye erere ja ruin nie (Hech. 4:20). Kukwe metre ye tare krubäte nikwe ye medenbätä ni tö mikai gare nitre kwati krubäte ie.
NITRE TARE NIKWE YEBÄTÄ NITA KUKWE DRIERE
8. ¿Dre tä ni töi mike niken kukwe metre ye driere nitre ie? (Recuadro “ Nitre taredre tötikakäre” ye mikadre ñärärä; üai mikadre ñärärä).
8 Jehová aune Jesús erere, nita nitre tarere (Prov. 8:31; Juan 3:16, TNM). Nitrekwe Ngöbö ñaka aune tödekara ñaka kwetre ye nita mike tuin bobre jai (Efes. 2:12). Niaratre kitera niken ngwarbe kä käme kä nebätä ne kisete akwa kukwe niaratre diantarikäre ye tä nikwe: ye abokän kukwe kwin Gobran Ngöbökwebätä. Ja tare aune nitre mikata tuin bobre jai ye tä ni dimike ja di ngwen kukwe jökräbiti ta kukwe metre ye mike gare nitre ie. Jondron ütiäte nita bien ietre ne kwe tödekara tädre kwetre aune nünandre kä jutobiti kwe gwäune aune ja känenkäre. Arato “ja nire erametre” ye rabadre kwe ja känenkäre yekäre (1 Tim. 6:19).
Ja tare aune nitre tuin bobre nie ye tä ni töi mike kukwe ño erere nuainne ne kwe nitre jökrä ie kukwe metre ye rabadre gare (Párrafo 8 mikadre ñärärä)
9. ¿Drebätä nita nitre mike mokre aune ñobätä? (Ezequiel 33:7, 8).
9 Kä käme te nita nüne ne kebera krüte nita mike gare nitre ie ñobätä ñan aune tare nikwe (ñäkädre Ezequiel 33:7, 8 yebätä). c Nitre käbiti tibien aune ni mräkä ye ie dre kebera nemen bare ñan gare, ye tä ni mike ulire. “Kä dätebare kena angwane ja tare nika ñakare krübäte kore abko erere ja tare nikadi kri krübäte kä ye ngwane. Yebti ñan ja tare nikadreta mda ye kwrere” mikata gare Mateo 24:21 yete. Kukwe ükaite Jehovakwe ye ngwane, kukwe ngwarbe drieta ye niarakwe gaite jökrä, bitikäre kä käme te Satana tä gobrane ne mikai krüte kwe (Apoc. 16:14, 16; 17:16, 17; 19:11, 19, 20). Nitre kwati ja töi mikadre sribire aune ja töi mikadre Jehová mike täte ye nita ribere ie. ¿Ni mräkätre aune nitre mada ie nita kukwe driere ñan tä kain ngäbiti yebätä dre rabai bare?
10. ¿Nikwe nitre mikadre mokre ye ñobätä ütiäte krubäte?
10 Namani gare nie kukwe ja tötikara känebätä erere, Babilonia kri gaite ye ngwane nitre ruäre käkwe ja töi mikadi Jehová mike täte aune ye Jehovakwe ja töi mikai mikete kwäre. Kukwe nemen gare nie nebiti nikwe nitre mikadre mokre ye ütiäte krubäte. ¿Ñobätä? Töbike kukwe nebätä: nikwe dre niedi ietre kä nengwane, ye ai rükaita törö ietre kä ye näire (Ezequiel 33:33 mikadre ñärärä). Nita niaratre mike mokre ye raba nüketa törö ie aune raba ja töi kwite kä tä nuainkäre ye ngwane. Ñodre, dobo kri nakaninkä ye ngwane, ni iti Filipo nitre ngite käi ngübabitikä yekwe ja töi kwitani ye erere. Babilonia kri gaite ye ngwane nitre raba ja töi kwite (Hech. 16:25-34).
JEHOVÁ TARE NIKWE AUNE NIARA KÄ ÜTIÄTE NI KRÄKE YEBÄTÄ NITA KUKWE DRIERE
11. ¿Ño nita Jehová “käikitekä, mike ütiäte jai aune ja di bien ie”? (Apocalipsis 4:11; üai mikadre ñärärä).
11 Jehová tare nikwe aune niara kä ütiäte ni kräke yebätä nita kukwe driere. Kukwe drie ye tuin ütiäte krubäte nie ñobätä ñan aune yebiti nita Jehová mike täte aune tare nikwe nita bämike. Jehová ‘aibe ngöräbe käikitadrekä amne mikadre ütiäte amne aibe di kri’ ye erere nita mike tuin jai (ñäkädre Apocalipsis 4:11 yebätä). ¿Nita Jehová käikitekä ño? Jondron jökrä sribebare Jehovakwe aune niarakwe ja nire biani nie ye nita juto biarebe mikakäre yebiti. ¿Aune nita ja di bien ño ie? Nita nuainne kä, ja di nikwe aune jondron nikwe yebiti, kukwe drieta ye ngwane (Mat. 6:33; Luc. 13:24; Col. 3:23). Kukwe braibebiti ni raba niere, Ngöbö tare nikwe yebätä nita kukwe driere. Akwa, metrere niara kä aune dre gärätä ye ni tö mikai gare. ¿Ñobätä?
Nita ja di bien jökrä Jehovai ye abokän nita kä denkä jai ja di nikwe aune dre dre tä nikwe yebiti kukwe driere kä jutobiti raba nemen bare nie ye erere ngwane (Párrafo 11 mikadre ñärärä)
12. ¿Nita kukwe driere ngwane, Jehová kä mikata ño deme?
12 Jehová tare nikwe ye medenbätä ni tö kä kwe ye mikai deme (Mat. 6:9). Ni tö Jehová kä mikai deme, kukwe ngwarbe nieta Satanakwe niarabätä yebätä (Gén. 3:1-5; Job 2:4; Juan 8:44). Ye medenbätä, ni töita kukwe driebätä aune ni jökrä tö ni kukwe nuai ye ie ni tö Jehová kä mikai gare. Jehová ye ja tare bämikaka ye ni tö mikadi gare nitre ie, niara ye gobranka kwin aune Gobran kwe ye köböra kukwe tare ye denkä jökrä aune kä jäme ye rabai aune ni mikai nüne kä jutobiti kwe (Sal. 37:10, 11, 29; 1 Juan 4:8). Kukwe jökrä nuaindi nikwe nebiti nikwe Jehová kä mikadi deme. Aune ni testiko kwe tä sribi nuainne kräke ye käi juto nibätä. ¿Ñobätä nita ne niere?
13. ¿Ni kädekadre testiko Jehovakwe ye ñobätä ütiäte krubäte ni kräke? (Isaías 43:10-12).
13 Jehovakwe ni dianinkä testiko jakrä (ñäkädre Isaías 43:10-12 yebätä). d Carta keteitibiti Nitre Braibe Konkrekasion Jökrä Ngübabitikä käkwe mikani gare: “Kukwe ñaka jire bäri ütiäte ni kädekadre testiko Jehovakwe ye kräke”. e Ani bämike krörö: ni kärädre lei ngwärekri nikwe kukwe käme nuainbare niebare yebätä, akwa yekäre ni testiko ribedre iti jai ne kwe blitadre kwe ni diäre. Akwa ni iti gare nie, nita tö ngwen ie, blitata kwinbätä ye känändre nikwe ye köböire blitadre kwe ye mikadre era jai. Ye medenbätä, Jehovakwe ni dianinkä jakrä mikakäre gare niara abokän Ngöbö metre, ñobätä ñan aune ni gare ie aune tä tö ngwen nie. Ni testiko Jehovakwe ye kwin aune ütiäte krubäte ni kräke, ye medenbätä ñongwane erere nita juto biarebe niara kä ye mikakäre gare aune ye köböire kukwe ñan metre nietabätä ye nita mike gare. Aune yebiti ni abokän testiko Jehovakwe nita mike gare (Sal. 83:18; Rom. 10:13-15).
NIKWE KUKWE DRIEDI JANKUNU NEMEME MRÄ
14. ¿Kukwe meden ütiäte krubäte kebera nemen bare?
14 ¡Kukwe kwin krubäte rabai bare ja känenkäre ye nita ngübare! Ja tare nikadi kri ye känenkri nitre kwati käkwe ja mikadi Jehovakri ye kukwe kwin Jehová mikai nemen bare ngübata nikwe. Ne madakäre, ja tare nikadi kri ye näire nitre kwati raba ja töi mike Jehová mike täte aune kä käme Satana tä gobrane ne tuenmetre aune ja töi mikai kwatibe kwetre Jehová käikitekä ye ni tö tuai nemen bare (Hech. 13:48).
15, 16. ¿Nikwe dre nuaindi jankunu aune ñongwane nuaindi mrä?
15 Akwa ngübakäre kukwe keteiti ütiäte krubäte aune ngöräbe tä nuaindre nie. Ye abokän kukwe driedre nitre ie kä jökräbiti tibien Gobran Ngöbökwe yebätä. Aune nita kukwe driere ye ngwane, ni rabadre nitre mike mokre, ñobätä ñan aune kä krüte ye nükera bäri ja ken. Kä krüte ye rükai ngwane, nikwe kukwe mikani gare ietre ye jatani Jehovakri ye rükaita törö ietre (Ezeq. 38:23).
16 Aisete, ¿ni töita kwatibe dre nuainbätä? Nita kukwe kwin Gobran Ngöbökwebätä tarere, nitre tarere, Jehová tarere aune niara kä ye ütiäte ni kräke, ye medenbätä ni töita kukwe driebätä aune ñaka kä juanbätä ta. Aune nita nuainne kä jutobiti nememe “¡ñan kukwe driedre!” jankunu niei Jehovakwe nie ye ngwane.
KANTIKO 54 “Ji ne ara”
a Gätä anual 2023 ye rababa bare 7 octubre ju ja ükarakrö gätä kri nuainkäre ni testiko Jehovakwe kä Newburgh yete, nemenkä Nueva York (Estados Unidos) yete. Ye bitikäre, gätä ye mikani JW Broadcasting® aune ñäkänintubu ketebu, kena ye mikaba tuare noviembre 2023 aune ketebu enero 2024.
b Kukwe “Biblia niara töi kwitani: Biblia tä kukwe mike gare merebe aune metre yekwe ti töi mikaba ñan krütare”, tä Ni Mikaka Mokre 1 febrero 2015 yebätä, ye mikadre ñärärä.
c Ezequiel 33:7, 8: “Mä, ni kä nebätä monsoi, ju Israel yete tikwe mä mikani ni mikaka mokre; aune tita kukwe niere mäi ye mäkwe kukwe nua bätä mäkwe ti kukwei ye mika gare ietre. Ni ja ngwanka käme ie tikwe niedre ‘mä ja ngwanka käme ¡ni ye krütadre!’ akwa mäkwe ñan ni ye mikadre mokre ja töi kwitadre kwe abokonkäre ngwane, niara ye krütai ja mikani ngite kwe yebätä, akwa niara krütai ye ngie näin mäbiti”.
d Isaías 43:10-12: “Mun testiko tikwe nieta Jehovakwe, jän, sribikä tikwe, tikwe mun dianinkä ja kräke, ne kwe ti rabadre gare munye aune munkwe tödekadre tibiti, ne kwe rükadre gare munye ti ne abokän arabe. Ti ne känenkri Ngöbö mada ñaka sribebare aune ti bitikäre Ngöbö mada ñakare jire. Ti, ti abokän Jehová, aune ni mada ñaka mun mikaka kwäre ti erere”. “Ti ara kätä mike gare aune tita mun mike kwäre bätä tita niemana, ngöbö mada ñaka nämene munkwe ye ngwane. Ye medenbätä, mun testiko tikwe nieta Jehovakwe aune ti abokän Ngöbö”
e Anuario de los testigos de Jehová 2007, página 3 ye mikadre ñärärä.