BATI Jesús niebare: “Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hech. 20:35). Nita ja kete Jehovabe ye ngwane kukwe ye tä nemen bare metre. ¿Ñobätä nita ye niere? Niara tä jondron keta kabre bien nie ye tä kä mike juto nibätä, akwa nikwe jondron biain ie ye käkwe kä mikai bäri juto nibätä. ¿Ni raba dre bien ie? Proverbios 3:9 tä niere: “Mäkwe Jehová käikitaka jondron ütiäte mäkwe yebiti”. Kä diankata jai, dre nuain gare nie, ni die, jondron tärä nikwe ye abokän “jondron ütiäte” gärätä. Jondron tä nikwe ye nita bien sribi Ngöbökwe nuainkäre ye ngwane nita jondron bien Jehovai aune ye tä kä mike bäri juto nibätä.

¿Jondron tä nikwe ye nikwe biandre Jehovai ye dre käkwe ni dimikai ñaka käi kwitekä jabiti? Apóstol Pablo niebare nitre Corinto ie, niaratre rabadre jondron denkä jenena biankäre sribi Ngöbökwe kräke (1 Cor. 16:2). Juta te mätä nüne yekänti ngwian biandre ño ye mä törba mikai gare bäri jai ngwane, mä raba recuadro tä mikani ngösöri ye mike ñärärä.

Juta ruäre känti ngwian biandre Internet yebiti ye ñaka nuäre. Akwa jw.org yete kukwe mikata gare bäri ngwian biandre ño jene jene yebätä. Juta ruäre känti ngwian biandre ño ye kräke kukwe ngwantarita ye mikata gare Internet käi nikwe yekänti.