KUKWE JA TÖTIKARA 47
Kukwe jökräbitita munkwe ñan kä mikaka Jehovabätä
“Oh, Jehová, tita tö ngwen mäi” (SAL. 31:14).
KANTIKO 122 ¡Kä ngwen nüke jai!
KUKWE NEBÄTÄ JA TÖTIKAI a
1. ¿Jehová tö rökrabätä ni ken ye ñokänti gare nie?
JEHOVÁ tä ni nübaire krötö niara ken (Sant. 4:8). Niara tö rabai Ngöbö nikwe, ni rüne aune ja ketamuko nikwe. Tä orasion nikwe kukwe nuin aune nita ja tuin kukwe tare ben ye ngwane, tä ni dimike. Ne madakäre, tä dirire nie aune ni ngübare juta kwe ye köböire. Akwa, ¿ni raba dre nuainne rökrakäre niara ken?
2. ¿Ni raba nökrö ño Jehová ken?
2 Ni raba nökrö Jehová ken nita orare ie, ñäke Kukweibätä aune töbiketaribätä ngwane. Ye köböire, ni jatai niara tarere bäri aune ni tö rabai debe bien krubäte niarai. Ni tö rabai niara mikabätä täte aune käikitaikä niara tä ribere jai Ye erere (Apoc. 4:11). Niara jatai nemen gare bäri nie ngwane, ni jatai tö ngwen bäri ie aune juta kwe mikani kwe ni ngübabitikä yei.
3. a) ¿Kukwe ñobiti Satana tä ja di ngwen ni diankakäre meto Jehovabätä? b) ¿Nita dre ribere jai ñaka kämikakäre jire Jehovabätä aune juta kwe yebätä? (Salmo 31:13, 14).
3 Akwa, Diablu tö ni diainkä mento Jehovabätä ja tuata kukwe tare ben ye ngwane tä nuainne bäri. ¿Tä nuainne ño? Nita tö ngwen Jehovai aune juta kwe ie, yebätä niara tä ja di ngwen ngwankäre di nekä. Akwa ni raba ja tuin kukwe jökrä yebe. Tädeka nikwe täi dite aune tö ngwanta kwatibe ngwane ni ñaka kä mikaikä jire Jehovai aune juta kwebätä (ñäkädre Salmo 31:13, 14 yebätä). b
4. ¿Drebätä nikwe blitai kukwe ja tötikara nekänti?
4 Kukwe ja tötikara nekänti, kukwe ketamä tä nemen bare konkrekasion bäre yebätä nikwe blitai, abokän raba nita tö ngwen Jehovai aune juta kwe ie ye juen ngwarbe. ¿Kukwe nemen bare ne raba ni denkä ño mento Ngöbö nikwe yebätä? Aune ¿ni raba dre nuainne ja tuakäre kukwe nuainta Satanakwe ni rüere yebe?
NITA JA TUIN KUKWE TARE BEN NGWANE
5. ¿Ño kukwe tare ben ja tuata ye raba nita tö ngwen Jehovai aune juta kwe ie ye juen ngwarbe?
5 Ruäre ngwane, ni mräkätre tä ja mike ni rüere o sribi tä nete nikän yebe ni raba ja tuin. ¿Nita tö ngwen juta Jehovakwe ie ye kukwe tare ben ja tuata raba juen ngwarbe ño aune ni denkä mento niarabätä? Kukwe tare keteiti tä nemen nuin raire ngwane, kukwe ye ükate ñan raba nita nemen nütüre aune nita kite di nekä. Kukwe ye kwrere köböire Jehová ñan niena ni tarere ni jatadre nütüre ie Sataná tö. kukwe tare ben nita ja tuin ye yebätä Jehová aune juta kwe ye ngite ya,ye ni jatadre ngwentari jai ie Sataná tö. Kukwe ye erere bäsi namani bare nitre israelita ruäre nämäne Egipto yebätä. Kenanbe, Jehovakwe Moisés aune Aarón dianinkä niaratre nämäne ngite Egipto mikakäre kwäre ye nämäne mike era jai (Éx. 4:29-31). Akwa, faraonkwe kukwe bäri tare krubäte nuainbare bätätre ngwane, nitre ye käkwe ngite kitani Moisés aune Aarónbiti aune niebare kwe ietre: “Mun köböite faraón aune nitre sribikä niara kräke brukwäta bäri nun kräke aune munkwe ngitra mikani niaratre kisete nun murie ketakäre” (Éx. 5:19-21). Nitre Ngöbö mikaka täte metre yebiti ngite kitani ¡ye kukwe tare krubäte! Kä kwati krubäte te mäta kä ngwen nüke jai ja tare nikabätä ngwane, ¿mä raba dre nuainne tö ngwankäre jankunu Jehovai aune juta kwe yei?
6. ¿Kukwe namani bare Habacucbätä ye tä dre driere nie? (Habacuc 3:17-19).
6 Dreta ni brukwäte ye nikwe mikadre gare jökrä Jehovai aune nikwe ja di ribedre ie. Kukwe ne erere bäsi namani bare Habacucbätä niara ja tuabare kukwe tare ben. Ruäre ngwane, Jehová ñan töi ñan nämäne niarabätä namani ruin ie. Ye ngwane, ja nämäne ruin ño ie ye niebare kwe jökrä Jehovai. Niara niebare: “Oh, Jehová ¿Bäbe tikwe ja di käräi mäi aune mäkwe ti kukwe nuai? […] ¿Nitre ngwanta ja tare nike ye ñobätä mätä tuenmetre nakainkä?” (Hab. 1:2, 3). Jehovakwe orasion ni ja ngwanka metre yekwe kukwe nuani aune ñäkäbare kwe käre (Hab. 2:2, 3). Jehovakwe juta kwe mikani ño kwäre yebätä, Habacuc töbikataribare ngwane kä namaninta jutobätä. Aune Jehová töi nämäne niarabätä nükani gare ie aune niarakwe dimikai ja tuakäre kukwe tare ben ye nükani gare ie arato (ñäkädre Habacuc 3:17-19 yebätä). c ¿Kukwe net ä dre driere nie? Nita ja tuin kukwe tare ben ngwane, nikwe oradre Jehovai, ja ruin ño nie ye nikwe niedre ie aune nikwe ja di ribedre ie. Jehovakwe ja di biain nie ja tuakäre kukwe tare yebe ye tädre gare metre nie. Aune niara täi ni dimike ño ye jutuai nie ngwane, tödeka nikwe ye rabai bäri dite.
7. ¿Shirley kukwe meden mikadre era jai ie mräkätre tö namani aune dre käkwe niara dimikani tö ngwen jankunu Jehovai?
7 Kukwe ja üaire ye mäkwe ñaka tuanmetre jire. Kukwe ye ara käkwe meri testiko iti nünanka Papúa Nueva Guinea kädekata Shirley ye dimikani nämäne ja tuin kukwe tare ben ye ngwane. d Niara mräkä ye abokän bobre aune ñan nämäne nuäre niaratre kräke mrö känänkäre. Mräkätre käkwe kukwe nuainbare niaratre nämäne tö ngwen Jehovai ye ngwankäre di nekä, niebare kwe ie: “Mäta käre niere, üai deme ye tä nun dimike. Akwa ¿üai deme ye tä medente? Mun täbe bobre jankunu. Ngwarbe munta kä juen ta kukwe driebätä”. Shirley tä mike gare: “Ruäre ngwane ti nämäne ngwentari jai ¿erametre Jehová töita tibätä aune ti mräkätre yebätä? Tä niere: “Bengwairebe tikwe oraba Jehovai aune ja drieba ie. Ti nämä ñäke jankunu Bibliabätä aune täräkwata yebätä aune tikwe ñaka kukwe drie aune gätä ye tuanmetreba jire”. Jehová nämäne Shirley mräkätre ngübare ye gani bengwairebe kwe, ñan namanina mrö nike aune kä nämäne juto bätätre. Tä niere: “Jehovakwe orasion tikwe kukwe nuabare ye gare metre tie” (1 Tim. 6:6-8). Mäkwe ja üaire mikai nuaindre jankunu jai ngwane, aune kukwe tare ben mäta ja tuin ye ñaka mä diainkä jire mento Jehovabätä.
JA MRÄKÄTRE KISETE SRIBITÄ NGWANTA JA TARE NIKE NGWANE
8. ¿Ja mräkätre kisete sribitä juta Ngöbökwe yete yebätä dre raba nemen bare?
8 Medio de comunicación aune redes sociales yebiti, ni rüe tä kukwe ngwarbe döräire aune kukwe ngwarbe niere ja mräkätre kisete sribitä juta Jehovakwe yete ye rüere (Sal. 31:13). Ja mräkätre ruäre kisete sribitä ye bianta ni kukwe käme nuainkä ye kwrere. Kukwe ye erere bäsi namani bare siklo kena ye ngwane. Apóstol Pablo ye rüere kukwe ngwarbe niebare aune niara kitani ngite. ¿Nitre kristiano kä ye näire käkwe dre nuainbare?
9. ¿Apóstol Pablo nakani ngite ngwane nitre kristiano ruäre käkwe dre nuainbare?
9 Pablo nämäne kitani ngite Roma ngwane, nitre kristiano ruäre käkwe niara tuanimetre kaibe (2 Tim. 1:8, 15). ¿Pablo kädeka nämäne ni kukwe käme nuainkä kwrere yebätä namanintre ja gaire? (2 Tim. 2:8, 9). ¿O ja mika nämäne Pablo rüere ye erere ja mikadre niaratre rüere aune nändre jiebiti ye jürä namani bätätre? Ja namani ruin blo krubäte Pablo ie, ñan ñobätä aune niara nämäne kä ngwen nüke jai. Arato niara käkwe ja nire kwe ye mikani kukwe tare te niaratre ütiäre yebätä (Hech. 20:18-21; 2 Cor. 1:8). Apóstol Pablo nämäne ja di ribere ye ngwane nitre kristiano ruäre käkwe tuanimetre kaibe ni ñaka tö ja ngwain jire chi nitre kristiano ye erere¿Ja mräkätre kä nengwane kisete sribi tä mikani ye rüere ja mikadre ngwane, ¿ni rabadre dre ngwen törö jai?
10. ¿Ja mräkätre kisete sribi tä ye rüere ja mikata ngwane, nikwe dre ngwandre törö jai aune ñobätä?
10 Ñobätä ja mikata ni rüere aune nire tä kukwe ye nuainne ye nikwe ngwandre törö jai. 2 Timoteo 3:12 yete kukwe nebätä nita ñäke: “Nire nire tö nünain kwin deme Ngöbökrä Kristo Jesuben gwairebe abokän käkwe ja tare nikadi rüe kisete”, (TNM). Ja mräkätre kisete sribi tä yebätä, Sataná tä ja töi mike metrere ye käkwe ñan ni töi mikadre niä.Niaratre ye ñaka ja ngwandre metre jankunu Jehovai aune nikwe ja ngwandre di nekä ie Satana tö (1 Ped. 5:8).
Pablo nämäne kitani ngite yebiti ta, Onesíforo käkwe ñaka kä jürä ngwani jabätä aune Pablo dimikani kwe. Ye erere kä nengwane ja mräkätre tä ngite ye ja ngwaitre aune ja etebantre tä dimike, bämikata üai nekänti erere. (Párrafo 11 aune 12 mikadre ñärärä).
11. ¿Dre raba nemen gare nie Onesíforo yebätä? (2 Timoteo 1:16-18).
11 Ja mräkätre kisete sribi tä ye nikwe dimikadre metre jankunu (ñäkädre 2 Timoteo 1:16-18 yebätä). Siklo kena ye ngwane, ni kristiano iti käkwe kukwe kwin nuainbare Pablo nämäne kitani ngite ye ngwane. Niara ye kädeka nämäne Onesíforo. Pablo niebare niarabätä: “Ti nämane ngite, akwa Onesíforo abko rababa ti gaire ñakare ”. Ñakare aune, Onesíforo ja di ngwani Pablo känäntarikäre. Pablo kwani ie ngwane, dimikani kwe aune nämäne dre ribere jai ye biani kwe ie. ¡Aune ja nire mikani kukwe tare te kwe! ¿Dre nemen gare nie kukwe nebätä? Nitre mada jüräta nemen nibätä yebätä ni ñan tö tuenmetre ja ketebätä ja mräkätre tä kä ngwen nüke jai ja tare nikabätä ye dimikakäre, ñakare aune nikwe ja di ngwandre kwatibe ja mräkätre dimikabätä aune kriemikakäre (Prov. 17:17). Nikwe ja mräkätre ye taredre aune dimikadre ye tädre ribere jai.
12. ¿Dre nemen gare nie ja etebantre aune ja ngwaitre Rusia yebätä?
12 Ja ngwaitre aune ja etebantre Rusia mräkätre kristiano juanta niken ngite ye ngwane, niaratre tä dre nuainne yebätä töbike. Ja mräkätre ye juanta niken gobran ngwärekri ye ngwane, ja etebantre aune ja ngwaitre kwati tä niken tribunal yete kukwe kwin niekäre ietre niaratre dimikakäre. ¿Ne tä dre driere nie? Ja mräkätre kisete sribita, yebätä kukwe ngwarbe nieta, kitata ngite, ja mikata rüere ye ngwane ni ñaka rikadrekä Nikwe oradre kräketre, mräkätre kwe ye ngübadre nikwe aune ni raba niaratre dimike ño yebrä nikwe kukwe känändre dimikakäre (Hech. 12:5; 2 Cor. 1:10, 11).
NI MIKAITA KÖTAIKRÄ JAI NGWANE
13. ¿Ni kötaita ye raba nita tö ngwen Jehovai aune juta kwe ie ye juen ngwarbe ño?
13 Ni mräkätre ñaka kukwebätä aune sribikä nibe o nänkä kwelate nibe ye raba ni kötaire nita kukwe Ngöbökwe ye driere yebätä aune nita Ngöbö kukwei mike täte niara töi ye erere yebätä (1 Ped. 4:4). Raba niere nie: “Mä ja ngwen ño ye tuin kwin tie, akwa kukwe mikata täte mäkwe ye ribi krubäte aune kukwe ye kirabe”. Ruäre ngwane, nita nitre kitaninkä kukwebätä mike tuin ño jai yebätä ñäkä raba nibätä aune nie raba nie: “¿Ño mä raba niere mäta ni mada tarere?”. Kukwe ne kwrere nieta ye raba ni mike töbike aune kukwe ngwentari jai: “¿Jehovata kukwe ribere bäri tie? Aune juta kwe tä kukwe nuainmana, ¿ye ribi nuainkäre?”. Mäta ja tuin kukwe ne kwrere ben ngwane, ¿mä raba dre nuainne ñaka kämikakakäre Jehovabätä aune juta kwe yebätä?
Ja ketamuko ngwarbe Jobkwe käkwe kukwe ngwarbe niebare ie ye ñaka mikani era kwe jai. Ja töi mikani kwatibe kwe ja ngwen metre Jehovai. (Párrafo 14 mikadre ñärärä).
14. ¿Nita Jehová mike täte yebätä ni kötaita ngwane nikwe ja töi mikadre ño? (Salmo 119:50-52).
14 Kukwe ükaninte Jehovakwe mikakäre täte ye mikadre täte ja töi kwatibebiti. Job ja töi mikani Jehová kukwe ükaninte mikakäre täte ye mike täte ja töi kwatibebiti niara kötaibare yebiti ta. Ja ketamuko ngwarbe kwe ye käkwe niebare ie dre kwin Ngöbö kräke aune niara kukwe ükaninte mikakäre täte ye ñaka ütiäte kräke yebätä töi mikani kwe (Job 4:17, 18; 22:3). Kukwe ngwarbe nie nämäne Job ie ye ñaka mikani täte kwe. Nämä gare metre ie dre tuin kwin Jehovai aune dre tuin käme ie yebätä Jehovakwe kukwe ükaninte mikakäre täte ye mikani täte töi kwatibebiti. Aune niara ñaka ni mada tuanimetre nämäne ja ngwen metre Jehovai yebätä ja töi kwite (Job 27:5, 6). ¿Ne tä dre driere ja töi kräke nie? Ni mada tä mä kötaire ye mä ñaka tuametre mäta Jehová mike täte yebätä ja töi kwite. Mäta Jehová mike täte yebätä dre kwin namanina mäkwe yebätä töbike. Bä kabre kukwe kwin namanina mäkwe ¿ñan ererea? Juta Jehovakwe tä kukwe ükaninte kwe ye mike täte ye nikwe dimikadre. Yebätä ni mada tä ni kötaire yekwe ñaka ni mikai näin mento Jehovabätä (ñäkädre Salmo 119:50-52 yebätä). e
15. ¿Brizit mräkätre nämäne kötaire yebätä ñobätä kä ngwani nüke kwe jai?
15 Meri testiko iti nünanka India kädekata Brizit yebätä ani blite. Mräkätre nämäne kötaire niara testiko yebätä, yebätä kä ngwani nüke jai. Kä 1997 ye ngwane ja ngökani ñöte kwe, kä nikani ruäre ta ngwane muko kwe ñan Testiko yekwe sribi ñan namanina. Yebätä muko kwe käkwe ja töi mikani niken mräkätre ben juta madate rün nämäne nüne yekänti. Akwa kukwe ye ñan ngöräbe ben Brizit ja tuani. Muko kwe sribi ñan nämäne yebätä niara ja töi mikani sribire köbö täte mräkätre kwe ngübakäre. Aune kukwe madabe nämäne ja tuin arato, Ju Ja Ükarakrö bäri känime ye nämäne nemenkä 350 kilómetros (220 millas). Aune muko mräkätre ye ja mikani rüere niara testiko yebätä ye kukwe tare krubäte. Kukwe jatani nakainkä bäri tare yebätä Brizit aune mräkätre kwe nikaninta kä mada känti. Kukwe ñan ngüba nämä namani bare: muko kwe krütani kän. Ngängän iti kä 12 biti ye krütani cáncer ye kisete. Akwa ye ñan ngöräbe, mräkä kwe käkwe ngite kitanibiti kukwe tare namani bare yebätä. “Mä ñan ja mikadre testiko akräke kukwe ne ñan rabadre bare”, niebare kwe ie. Akwa niarakwe käre tö ngwani Jehovai aune nämäne käre juta kwe ken.
16. ¿Brizit nämäne käre Jehová ken aune juta kwe ken ye köböire dre kwin namani kwe?
16 Brizit nämäne nüne mente krubäte Ju Ja Ükarakrö yete yebätä, ni tuabitikä iti käkwe töi mikani kukwe driere kä yekänti aune gätä nuainne gwirete. Akwa kenanbe Brizit kräke ye ñan rabai nuäre nütübare kwe. Akwa ni ni tuabitikä käkwe kukwe niebare ie ye erere nuainbare kwe namani kukwe driere, gätä nuainne ja gwirete aune ja tötika ni mräkäbe ye nuainne. Ye köböire, ¿dre namani bare? Brizit jatani ni kwati tötike Bibliabätä aune ni ja tötikaka ben ye kwati käkwe ja ngökani ñöte. Aune kä 2005 yete, ja mikani kwe prekursora regular. Nämäne tö ngwen aune ja ngwen metre Jehovai aune juta kwe ie yebätä kukwe kwin namani kwe. Ngängäntre kwe ye sribikä metre Jehová kräke aune nengwane konkrekasion niena ketebu kä yekänti. Brizit ie gare metre Jehovakwe dimikani kä ngwen nüke jai ja tuakäre kukwe tare yebe aune mräkätre nämäne kötaire yebe.
JA NGWANDRE METRE JEHOVAI AUNE JUTA KWE YEI
17. ¿Nikwe ja töi mikadre kwatibe dre nuainne?
17 Kukwe tare ben nita ja tuin aune juta Jehovakwe dimikadre ye tä ni mike bäri kukwe tare te nikwe nütüdre ie Sataná tö. Arato kukwe ngwarbe nieta nibätä ja mikata ni rüere aune ja mräkätre kisete sribi tä ye mikata ngite yebätä kä jürä rabadre nibätä ie tö arato. Ne madakäre, nitre tä ni kötaire nita Jehová mike täte aune tö ngwen ie aune juta kwe ie ye juandre ngwarbe ie tö. Drebiti Satanás tä ni nuinte ye gare metre nie, ye medenbätä nikwe ñaka ja tuadremetre ngökadre ie (2 Cor. 2:11). Kukwe ngwarbe nieta kwe ye nikwe ñaka kadre ngäbiti jire aune ja ngwandre metre Jehová aune juta kwe ye ie. Jehová ñaka ni tuenmetre jire ye nikwe ngwandre törö jai (Sal. 28:7). Ye medenbätä, ¡kukwe jökräbiti ta nikwe ñaka kämikadrekä Jehovabätä! (Rom. 8:35-39).
18. ¿Kukwe ja tötikara ja känenkäre yebätä dre rabai gare nie?
18 Kukwe ja tötikara nekänti nikwe blitani kukweta nemen bare konkrekasion bäre mento abokän raba nita tö ngwen Jehovai aune juta kwe ie ye nuinte. Akwa konkrekasion yete kukwe ruäre ñan nuäre raba nemen bare arato. Akwa, ¿ño ni raba ja tuin kukwe yebe? Kukwe ja tötikara ja känenkäre yebätä rabai gare nie.
KANTIKO 118 “Nun mike tödeke bäri”
a Ni tö kä ngwain nüke jai aune ja ngwain metre kä krüte ne näire ngwane, nikwe tö ngwandre Jehovai aune juta kwe yei. Nita tö ngwen ie ye Satana tö juain ngwarbe. Kukwe ketamäbiti Sataná tä kukwe ye nuainne, akwa ni raba dre nuainne ne kwe ñan rabadre bare ie ye rabai gare nie kukwe ja tötikara nekänti.
b Salmo 31:13, 14: “Kukwe käme aibe tita kukwe nuin; kä jurä krubäte tibätä. tätre ja ükekrö keteitibe ti rüere ngwane, töita ti kämikabätä. Akwa ti, oh, Jehová, tita tö ngwen mäi. Tita mike gare: ‘Mä abokän Ngöbö tikwe’”.
c Habacuc 3:17-19: “Higuera ñaka blü rabaikä aune uva ngwä ñaka rabai; olivo ñaka nökai, nura ngwä ñaka rabai; oveja jatai nekä ki teri aune nibi ñaka rabai kä teri; akwa yebiti ta. Erametre tikwe Jehová käi ngwain juto jabätä, erametre Ngöbö ti mikaka kwäre ye käi rabai juto tibätä. Däkien Gobranka Kri Jehová ye ja di biainka tie; niarakwe ti ngoto mikai bura ye kwrere aune ti mikai räte kwe kä mente kwin känti”.
d Nitre ruäre kä kwitani.
e Salmo 119:50-52: “Ne tä ti töi mike jäme tita ja tare nike ngwane, ñan ñobätä aune mä kukwei ye köböire tita nire jankunu. Nitre bikaka kri ñan tä ti mike ütiäte jai jire chi yebitita, ti ñan kä mikaikä mä kukweibätä. Mä kukwe ükaninte kirabe ye törö tie, oh, Jehová, aune ye tä ti töi mike jäme”.