Kukwe rababa bare tibätä ti jämi niere jokrä munye ye känenkri dre käkwe ti töi mikani sribire köbö täte Jehová kräke ye ti bike mike gare munye.

Ti däreba kä 1942 ye ngwane ngutuä chi mrente caribeña kä Curazao yete. Ti rün därebare Surinam aune nikani sribire Curazao. Ti jämi därere känenkri niara ja ngökani ñöte. Niara ye namani Testiko kena Curazao yete. a, nun abokän nirike nun ñaka nämä ja di ngwen ja tötikakäre yebitita bämän kratire kratire nämä ja tötike nunbe Bibliabätä. Kä nämä 14 tibiti ngwane, ti rün rikaba nunbe Surinam ti mölöi umbre krubäte ye ngübakäre.

Surinam yete monsotre bati nämä sribire Jehová kräke kä jutobiti yebe ti nämä ja kete. Niaratre ye bäri umbre ti kräke aune niaratre ye prekursor regular. kukwe driere yebätä nämä blite ngwane kä jutobiti nämä bätätre ye nämä tuin tie. Gätä ye bitikäre nun tö nämä nemen blitai kukwe Bibliabätä yebätä ruäre ngwane nun nämä muke okwä mrusaire deu ngwane nun nämä blite jabe. Ja ketamuko kwin ye köböire tikwe dre dian nuaindre jai ye rababara gare, ti tö rababa sribidi Jehová kräke. Yebätä kä nämä 16 tibiti ngwane tikwe ja ngökaba ñöte aune kä nämä 18 tibiti ngwane ti ja mikani prekursor regular.

Ti ja mikaba prekursor ngwane kukwe ütiäte keta kabre rababa gare tie käta ti dimike sribire köbö täte. Keteiti ye abokän ja mräkätre kitadre ye ütiäte krubäte. Ti ja mikaba prekursor ngwane misionero iti kädekata Willem van Seijl ti dimikaba krubäte. b Kukwe  keta kabre rababa gare niarabätä tie ñodre sribi mikata konkrekasionte ye jie ngwankäre ño. Ye ngwane batibe ti kitadre ye ütiäte ti kräke rababa gare tie. Ja känenkäre ti kädekaba prekursor especial yebitikäre ti nämä kä tokwä chi Surinam ye tuinbiti aune ngubarebiti. ¡Ti tötikaba ja mräkätrekwe yebätä tita debe bien krubäte! Yete ja käne tita ja di ngwen kä denkä jai ja mräkätre mada kitakäre kukwe kwin bämikani ti käne ye erere.

Kukwe ketebukäre rababa gare tie ye abokän jondron braibebiti ti rabadre nüne aune tädre ükaninte kwin tikwe. Nunkwe dre ribedi bämän kratire kratire kräke ye kökakäre sö kratire kratire prekursor iti aune ti nun nämä kukwe ükete jai. Ye ngwane ti o niara nämä niken mente jutate jondron kökakäre aune nun nämä jondron kökö kwetadre jai, mrö rabadre nuin sö krati nunye yekäre nun nämä kwete kia kia nun nämä sribire mobe kä tokwäte yebätä, jondron krütadre nunkän ngwane ni ñan nämä jire jötrö nun dimikakäre. Ye medenbätä ti nämäne bati aune nünandre jondron braibebiti, kukwe ükadrete kwin tikwe jai rababa gare tie ye ti dimikaba krubäte ja töi mike kwatibe ti nämä sribire Jehová kräke yebätä.

Kukwe ketamäkäre rababa gare tie ye abokän kukwe driedre nitre ie kukwe kwe yebiti ye bäri kwin. Ti jataba nirien ngwane ti nämä blite holandes, inglés, papiamento aune surinamés (Kukwebiti blitata ye kädekata sranan arato), kä yekänti blita nämäne krubäte kukwe yebiti. Akwa ti rikaba sribire kä tokwäte nitre nämä yekänti ngwane rükaba gare tie nitre ie kukwe drie nämä kukwe kwe yebiti ngwane niaratre nämä kain ngäbiti bäri kwin. Akwa kukwe ruäre biti blita nämä yete ye ñan nämä nemen nuäre ti kräke ñodre, saramacano kukwe yebiti nitre nämä ja kukwei mike kri, ja kukwei mike chi aune ye kwrere ñan nämäne nuäre ti kräke blitakäre. Tikwe ja di ngwanba krubäte. Ye köböire kä yete ja käne ti jataba nitre dimike bäri kukwe metre Bibliabätä yebiti.

Ni jökräbätä tärä nemen bare erere kukwe ranteba krubäte tie aune bä kabre ti rababa ja gaire. Ñodre, bati ni ja tötikaka Bibliabätä iti nämä blite kukwe saramacano yebiti ie ti tö rababa ngwaintari ja nibi ruin ño mäi,niara bule nämä bren yebätä ja namani ruin ño ie ti tö rababa ngwaintari ie. Akwa tikwe ngwantaribare ie mäta bulebiti ya. Ti kukwe ngwantariba ie ye ñan mataba kwinbätä. Ne kwrere kukwe keta kabre känti kukwe ranteba tie akwa, tikwe ja di ngwanba blitakäre nitre ye kukweibiti.

Kä 1970 ye ngwane ti kädekaba ni circuito tuabitikä. Kä yete ti nämä niken nitre nämä ja ükaninkrö kä keta kabre känti, nun nämä niken kä yekänti aune ti nämä kukwe kädekata “Visitando la central mundial de los testigos de Jehová” ye kä driere aune ti nämä üai mike tuare. Nun rabadre kä ye tuinbiti ye käre ja mräkätre aune ti nun nämä niken bote sribebare kribiti yete. Nun nämä niken planta eléctrico, gasolina ngwena tanque krati, lámpara trä mika nämä querosinbiti aune equipo üai mikakäre tuare ye ngwena. Nun nämäna nemen yete ngwane nun nämä tribe jökrä ye ngwen kötärä rabakäre kä jene jene känti nun nämä niken programa mike tuare ye känti. Nun nämä kukwe driere yebätä kukwe törö bäri tie ye abokän nitre kä yekänti ie nun nämä kukwe driere ye ka ngäbiti nämä kwin kwe. Kä nämä nemen juto krubäte tibätä nitre dimikabätä Jehová mike gare jai aune juta Jehovakwe tä ja ükaninkrö kä tibienbätä ye mikabätä gare ietre. Ja di ngwandre kukwe ne erere nuainne ye chi krubäte aune ñäkä ñaka raba kukwe kwin keta kabre Jehová tä  mike nemen bare ni kräke kukwe ja üarebiti nita ja di ngwen niara mikakäre täte yebe.

Ti tädre sribire kaibe ni circuito tuabitikä erere ye kwin krubäte ye nämä gare tie akwa ti tö rababa ja muko ie, tädre käre sribire tibe yekäre. Ye medenbätä Jehovakwe ti dimikadre ja muko kwin känene rabadre sribire kä jutobiti tibe ti nämä sribire mobe nitre nämä nüne kä tokwäre yekänti yete yekäre ti nämä ribere ie. Kä rikaba krire kwati ta ngwane Ethel rababa gare tie, ti jataba niara mike gare bäri jai niara ye abokän prekursora especial niara nämäne ja di ngwen krubäte sribi ye nuainkäre. Ethel nämäne bati ye ngwane Pablo nämäne kukwe driere ye kwrere niara tö nämäne nuaindi siba arato. Septiembre 1971 ye ngwane nunkwe ja mäkäteba, yete ja käne nunta sribire gwaire ni circuito tuabitikä erere.

Ethel ye ñan rubuabare jondron bäkäne krubäte ye medenbätä ñan rababa ribi niara kräke sribikäre jateta nun nämä nitre tuinbiti ni circuito tuabitikä erere ye ngwane. Ñodre, nun nämä ja mike juto konkrekasion nemenkä mobe jate ye tuabitikäre ngwane nun ñan nämä niken jondron ngwena kabre jai. Nun nämä niken dän ngwena aune nun nämä jüben ñöbätä. Arato ja mräkätre nämä nun buke dre dre te ye erere nun nämä kwete ñodre, nun buka nämä röte, gwa piraña o jondron muntiai nämäne kwetre o gwa meden nämä muntiaire ye erere nun nämä kwete. Blato ñan nämä nemen mrökäre nunye ye ngwane nun nämä mröre platano käte aune cuchara ñan nämä nemen ngwane nun nämä mröre kisebiti. Ethel aune ti nun nämä nütüre nun nämä ja di ngwen sribikäre ngwairebe Jehová kräke ye nämä kö krämä nunkwe ye mike bäri dite (Ecl. 4:12). Nunta sribire ne kwrere ne nun ñan tö kwitabätä jire sribi mada nuainbätä.

Kenanbe tikwe kukwe nini munye ye rababa bare ngutuä chi mrente te nun nämä nun jatabata ja jiebiti ye ngwane. Bote rikaba ñö nente ja dibiti yete ye ngwane gitiainkäbitiba akwa jötrö ngwarbe rükabata kä mrenbiti aune nun arato. Akwa kukwe tare ñan rababa bare ñan ñobätä aune chaleco  salvavida ye nun nämä ngwen jabätä nun ñan betakaba timo akwa ñö rikaba bote kwati ye medenbätä nun nämä jondron ngwen yete ye nunkwe tökaba ñö rikaba botete ye diankakäre.

Mrö ñan rababara kwetadre nunye ye medenbätä nun rikaba ñöbiti nedon ye ngwane nun jababa gwakite akwa gwa ñan rakaba jire chi nunye. Yebätä nunkwe oraba Jehovai aune mrö biandre kwe nunye köbö ye kräke nunkwe ribebare ie. Krire nunkwe ja drieba ünä Jehovai orasionte ngwane, eteba iti nämä näin nunbe ye käkwe kö kitaba ñöte gwakitakäre aune gwa rakaba ie yete nun nirike nämä näin jabe ye bukaba kwe aune nun rababa trine.

Kä rikabara krärike ta nun nämä sribire ni circuito tuabitikä erere kä yekänti akwa kukwe ngüba ñan nämä nunkwe ye rababa bare, kukwe kwin krubäte: nun jababa nemen ni rüne. Kukwe ye käi rababa juto krubäte tibätä, akwa yebätä dre rabai bare nunbätä ye ñan rababa gare tie nun tö nämä sribibätä jankunu köbö täte nun raba nuainne ye ngwane. Kä 1976 ngwane nun ngobo käne ye däreba kädekata Ethniël aune kä rikaba kubu biti ötare ta ngwane Giovanni däreba.

Surinam yete nitre ribe nämä krubäte sribikäre ye medenbätä sukursalkwe ti tuametreba sribire ni circuito tuabitikä ye erere. Monso tikwe nämä kia krubäte ye medenbätä ti nämä konkrekasion känime nun bäre ye tunbiti. Ye köböire bämän krobu sö kratire kratire te ti nämä nemen konkrekasion tikwe yete. Ethel aune monsotre tikwe ye nämä niken tibe konkrekasion känime ye tuinbiti. Akwa ti nubai nämä gätä kribätä o ti nämä niken ja mräkätre tuinbiti jateta ye ngwane ti nämä niken kaibe.

Sribi nämä ti kisete konkrekasionte ye rabadre bare tie yekäre ti nämä kukwe ükete kwin jai. Käre ti nämä ja di ngwen ne kwe ja tötika nun mräkäbe bämän kratire kratire rabadre bare nunye yekäre. Ti nämä niken konkrekasion nämä nemenkä jate ye tuinbiti ngwane, Ethel nämä ja tötika nun mräkäbe ye nuainne monsotre yebe. Aune käre nun nämä ja di ngwen jondron nuainkäre keteitibe. Nun nämä kä denkä jai monsotre nunkwe ye ben jadakakäre aune basakäre känime nun bäre yete. Bäsi käre ti nämä nemen ngwäte raire deu ja ükatekäre sribi nämä ti kisete konkrekasionte rabadre bare tie yekäre, Ethel ti muko niara ye sribikä valente krubäte mikata gare Proverbios 31:15 yete erere, käre niara nämä nüke dekä dekä ngwäte ne kwe nun rabadre ñäke texto ñäkäkäre köbö kwatire kwatire yebätä gwaire monso nunkwe jämi  niken kwelate ye känenkri. Tita debe bien krubäte ti muko kwin namani tikwe yebätä niara ye tä ja di ngwen krubäte aune ti dimike ne kwe sribi tä ti kisete ye rabadre bare kwin tie ni kristiano rabadre nuainne erere.

Ethel aune ti nun nämä ja di ngwen käre monsotre nunkwe ye rabadre Jehová tarere aune kukwe drie mikadre nuaindre käne kwe jai yekäre. Nun tö nämä niaratre tuai sribire köbö täte Jehová kräke akwa nunkwe niedre ietre ye ñan aibätä nuaindre kwe ñakare aune niaratre tö rabadre mikai nuaindre jai. Sribidre köbö täte Jehová kräke ye nämä kä mike juto nunbätä ye nun nämä käre ja di ngwen niekäre ietre aune kukwe tare ben ja tua raba ye nun nämä niere ie, akwa kukwe kwin namani nunkwe ja mräkä erere Jehovakwe nun dimikani ye nun nämä niere ietre arato, ne kwe monsotre nunkwe ye tädre ja mräkätre konkrekasionte nämä sribi Jehovakwe mike nuaindre käne jai yebe.

Jehová köböire nun nämä dre dre ribere jai ye käre nämä nunkwe. Bäkänä sribi tä nuaindre nie ni rüne ie ye erere ti nämä ja di ngwen mikakäre nemen bare. Ti nämä sribire kä jateta te ye käkwe diriba tie, ti rabadre töbike kä ja känenkäre yebätä aune ngwian nämä ti kisete ye ti nämä ngübarebiti kwin. Ruäre ngwane nun nämä ja di ngwen krubäte akwa yebitita ngwian ñan nämä nemente nunye jondron kökakäre jai ye ngwane Jehovakwe nun dimikaba ye gare metre tie. Ñodre, kä ochenta jatabara krute aune noventa kömikaba ye ngwane guerra civil rakakaba Surinam. Ruäre ngwane ñan nämä nemen nuäre nun kräke jondron kiakia ütiäte nun nämä ribere jai ye kökakäre. Akwa Jehová nämä käre nun ngübare (Mat. 6:32).

Jehová ñaka nun tuemetre jire ñakare aune ye köböire nunta nüne kä jutobiti. Monsotre ye kukwe kwin krubäte namani nunkwe aune Jehová taredre nunkwe drieba ie ye käita juto krubäte nunbätä. Monsotre ye tä kämike nuäre nunbbätä, sribi köbö täte diani nuaindre kwetre jai yebätä. Ethniël aune Giovanni ye graduabare kwela teocrática yete aune nengwane tä sribire sukursal Surinam yete muko kwe ben.

Ethel aune ti nun niena umbre akwa nun täbe sribire Jehová kräke prekursor especial erere. Sribita krubäte nun kisete yebätä kä jämi nemente tie ja kitakäre jübakabätä. Akwa kukwe diani nuaindre tikwe jai yebätä ti ñaka ja töi kwite. Ti raba niere ye tä kämike juto krubäte tibätä aune tikwe sribi bäri kwin diani nuaindre jai ti nämäne bati ye ngwane, ye abokän sribire köbö täte Jehová kräke.