¿Ñan tä nemen nuäre mä kräke ja tötikakäre bämän kratire kratire? ¿Kren o köböta nemen mäi nuainkäre? Ni jökräbätä tä nemen bare ruäre ngwane. Bä kabre nita kä aune ja di ribere jai kukwe ruäre nuainkäre, ñodre nita jüben. ¡Akwa jübata bitikäre jata nemen ruin kwin nie! Ye erere arato ja tötikata Bibliabätä ye raba kwin ni kräke ñö bänen tä niken ni ngrabare ye kwrere (Efes. 5:26). Kukwe nieta jatäri ne raba mä dimike:

• Kukwe ükate jai. Ja tötika kaibe ye kukwe “bäri ütiäte” abokän ni kristiano ñan rabadre juen ja bäre (Filip. 1:10). Kukwe ükateta jai ye ñan käi kwitadrekä jabiti yekäre mäkwe mika jutuadre mai yekänti, tablero, jukwebätä,o neverabätä o alarma mike celularte ne kwe ngwandreta törö kwe mäi hora jämi nüke ye känenkri.

• Mätä ja tötike ño, tä nemen kwin mä kräke ye erere mäkwe nuain jankunu. Nitre ruäre tä ja tötike hora kabre mada abokän tädre ja tötike braika, mada tä nuainne kia kia. ¿Mäta nuainne ño? Mäta kukwe ükete jai ja tötikara ye ngwane, mä ngwan törö jai. Hora tä nüke ye ngwane kren tä nemen mäi ja tötikakäre ye ngwane mäkwe ja di ngwan nuainne minuto 10 aibe te. Jötrö kwrere raba tuin mäi akwa, mäkwe nuaindi ngwane ja rabai ruin kwin mäi aune kukwe mada rabai gare mäi. Aune mäkwe ja tötika kömikaira ngwane batibe mä töi raba nemen ja tötikabätä bäri (Filip. 2:13).

• Drebätä mä ja tötikai ye mä ükate käne jai. Köbö te mäkwe ja tötikai ye ngwane batibe, drebätä mäkwe ja kitai yebätä mäta töbike ngwane mäta ‘kä gainte ngwarbe’ (Efes. 5:16). Kukwe meden tuin ütiäte mäi ye mä raba tike jai ja tötikakäre aune kukwe ruäre mäta ngwentari jai ja töite ye mäkwe tikai jai. Mäta ja tötike ye ngwane, kukwe mada mäta nemen ngwentari jai ye mäkwe tika jai arato.

• Mä rabadre hora o köbö kwite ngwane mäkwe nuain. Bäri ütiäte mäkwe ja tötikadre bämän kratire kratire. Aisete mä rabadre hora kwite, köbö madate nuainne o ja tötikai drebätä ye kwite o mäkwe ja tötikai braika ye bäri kwin ngwane mäkwe nuain.

Mäkwe ja tötika kaibe Bibliabätä ye nuaindi käre ngwane, kukwe kwin keta kabre rabai mäkwe: mä rabai ja kete bäri kwin Jehovabe, mäkwe kukwe kwin diandi nuaindre jai aune ja raba ruin kwin mäi (Jos. 1:8).