1, 2. a) Kukwe ngüba ñaka nikwe tä nemen bare ye ngwane, ¿ja raba nemen ruin ño nie? (Üai bämikani kena mikadre ñärärä). b) Salmo 131 tä kukwe niere ye erere, ¿dre raba ni dimike ja töi mike jäme?

LLOYD AUNE ALEXANDRA sribibare kä 25 biti bäri Betelte. Ye medenbätä, niaratre juani sribi mada nuainne ngwane, kenanbe namanintre ulire. Lloyd tä niere: “Ti nämä nüne Betelte aune ti nämä sribire ye nämä tuin kwin tie. Ñobätä nun juani sribi mada nuainne ye rükaba gare tie, akwa bämän aune sö jataba niken ta ngwane, ja ñan jataba ruin ütiäte tie. Ruäre ngwane, ti nämä nemen töbike kwin ja käne, akwa minuto nämä niken braibe ta ngwane, ti nämä nementa di nekä”.

² Kukwe ngüba ñaka nikwe tä nemen bare nibätä ye ngwane, ni raba nemen töbike krubäte aune nainte (Prov. 12:25). Yebätä, sribi mada bianta nie ye ñaka raba nemen nuäre ni kräke ka ngäbitikäre. Kukwe ye erere rabadre bare nibätä ngwane, ¿dre raba ni dimike ja töi mike jäme? (Ñäkädre Salmo 131:1-3 yebätä). * Kukwe ngüba ñaka abokän  erere namani bare nitre Ngöbö mikaka täte kirabe aune nitre Ngöbö mikaka täte kä nengwane yebätä, niaratre dre nuainbare ja töi mikakäre jäme ye ani mike gare jai.

3. ¿Dre namani bare Josebätä?

³ Jacob nämäne José tarere krubäte. Yebätä, etebatre nämäne bätä ngwen krubätebätä, aisete kä namani 17 biti ye ngwane, rürübäinbare kwetre ni klabore ye erere (Gén. 37:2-4, 23-28). Kä kwäjätäbiti komä näre te nämäne klabore aune ngite Egipto, niara nämäne mente krubäte rün tare kwe yebätä. ¿Dre käkwe niara dimikani ñaka töbike krubäte aune ñaka nemen rubun?

4. a) José nämäne ngite ye ngwane, ¿drebätä ja töi mikani kwe? b) ¿Jehovakwe orasion kwe kani ngäbiti ño?

⁴ José nämäne ngite ye ngwane, Jehová nämäne niara ngübare ño yebätä metrere ja töi mikani kwe raba ruin nie (Gén. 39:21; Sal. 105:17-19). Ne madakäre, niara nämäne bati ye ngwane, kukwe rabai bare ja känenkäre mikani tuare köböre ie yekwe dimikani tö ngwen bäri (Gén. 37:5-11). Aune ja brukwä tätebiti ja di käräbare kwe bä kabre Jehovai (Sal. 145:18). Dre dre rabadre bare niarabätä, akwa yebiti ta Jehová täi käre niarabe käbämikani kwe ie (Hech. 7:9, 10). *

5. Nita kukwe ja üaire mike nuaindre jai ye ngwane, ¿“kä jäme Ngöbökwe” ye tä ni dimike ño?

⁵ Kä nengwane, ni raba ja tuin kukwe kri ben. Ye ngwane, “kä jäme Ngöbökwe” ye tä ni töi kriemike ye tä nemen gare nie arato (ñäkädre Filipenses 4:6, 7 yebätä). * Ni rabadre töbike krubäte ngwane, nikwe ja di kärädre Jehovai. Ni töi mikai jäme kwe ye köböire ni ñaka di riaikä aune ni töita kukwe ja üairebätä ye nikwe mikai nemen bare. Kukwe ye erere namanina bare ño kä nengwane ye ani mike gare jai.

6, 7. Dreta ni töi nike ye nikwe niedi metre orasionte ngwane, ¿ye ni töi mikai ño jäme? Mä raba mike gare keteiti.

⁶ Ryan aune Juliette nämäne prekursor especial temporal nuainne, ye niaratre ñaka rabaira nuainne namani gare ietre ngwane, ja namani ruin ngwarbe ietre. Niaratre orabare bengwairebe Jehovai. Ryan tä mike gare: “Nun nämä tö ngwen Ngöböi ye nunkwe bämikadre metre ye nämä gare kwin nuen. Ja mräkätre kwati nämä konkrekasionte ye nämä krire kukwebätä, aisete nunkwe ja di käräba Jehovai kukwe kwin bämikakäre niaratre käne”.

⁷ ¿Dre namani bare? Ryan tä niere: “Nunkwe orasion nuainba ünä ye ngwane, töbika nämä nun kisete yebätä nun ñaka rababara töbike. Kä jäme Ngöbökwe ye nämä nun töi aune nun brukwä ye kriemike. Nunkwe töbikadre kwin ja käne ngwane, nun raba sribire jankunu Jehová kräke ye rükaba gare nuen”.

8-10. a) Töbikata nemen ni kisete ye ngwane, ¿Ngöbö üai deme raba ni dimike ño ja tuin kukwe yebe? b) Nita ja töi mike kukwe ja üairebätä ngwane, ¿Jehová raba ni di mike ño?

⁸ Üai deme Ngöbökwe tä ni töi mike jäme aune tä ni töi mike bersikulo keteiti ütiätebätä, ni dimikakäre kukwe ja üaire mike nuaindre käne jai (ñäkädre Juan 14:26, 27 yebätä). Philip aune Mary sribibare Betelte bäsi kä 25 te, niaratre yebätä dre namani bare ye ani mike gare jai. Sö nikani kräbokä ta yete, niaratre nibu ye meye krütani aune Philip mräkä mada krütani arato. Ne madakäre, Mary rün ye dokwäbiti kä jatani nikwitekä yebätä niaratre nikani ngübare.

⁹ Philip tä mike gare: “Ti nämä kä ngwen nüke jai rababa ruin tie, akwa kukwe ruäre nämä  nuaindre tie. Bati ti nämä ñäke täräkwata La Atalaya ja tötikara yebätä ngwane, Colosenses 1:11 yebätä tikwe töbikatariba. Ti nämä kä ngwen nüke jai, akwa kukwe nieta texto yebätä ye erere ti ñaka nämä nuainne ye rükaba gare tie. Bersikulo yekwe ti dimikaba kukwe ngübare bätärekä aune kä ngwen nüke jai kä jutobiti. Ye käkwe ngwanba törö tie, dre kwin tä nemen bare nibätä ye ñan ai köböire käta nemen juto nibätä, ñakare aune Ngöbö üai deme ye köböire käta nemen juto nibätä”.

¹⁰ Philip aune Mary käkwe ja di ngwani ja töi mike kukwe ja üairebätä aune Jehovakwe kukwe kwin keta kabre mikani nemen bare niaratre kräke. Ñodre, niaratre ñaka namanina sribire Betelte ye ngwane, nitre tö nämäne ja tötikai Bibliabätä bämän kratire kratire ye kwani ietre aune nitre ye ririabare jötrö kukwe ja üairebiti. Mary tä nemen töbiketa kukwe yebätä ngwane, niara tä niere: “Yekwe kä mikaba juto nunbätä aune yebiti Jehovakwe mikaba gare nunye, niarakwe nun dimikai jankunu”.

11, 12. a) ¿Josekwe dre nuainbare ne kwe Jehovakwe kukwe kwin mikadre nemen bare kräke? b) ¿José kä ngwani nüke jai ye köböire Jehovakwe kukwe kwin mikani nemen bare ño kräke?

¹¹ Kukwe ngüba ñaka nikwe tä nemen bare ye ngwane, dre rabai bare ja känenkäre ye jürä raba nemen nibätä aune ni ñaka raba nemen töbike kwin. José töi rabadre kore, akwa ja töi mikani kwatibe kwe sribire kwin ne kwe Jehovakwe kukwe kwin mikadre nemen bare kräke. Ye medenbätä, nämäne ngite ye ngwane, ni nitre ngite ngübabitikä nämene sribi bien nuaindre ie ye jökrä nuain nämäne kwin kwe, sribibare kwe Potifar kräke ye erere (Gén. 39:21-23).

¹² Bati, ni nitre ngite ngübabitikä käkwe niara mikani nitre nibu ütiäte sribikä faraón kräke ye ngübarebiti. Josekwe ja töi mikani kwin nitre ye kräke, yebätä dre nämäne niaratre töi nike aune köböbare kwetre ye mikani gare kwetre töi jämebiti ie (Gén. 40:5-8). Josekwe blitabare nitre yebe, ye köböire kukwe ñan tuabare rabai bare niara kräke ye ñaka nämäne gare ie. Kä nikani kubu ta, ye bitikäre niara mikani kwäre ye ngwane, köbö ye arabe te niara kädekani kri juta yete, akwa faraón aibe namani gobranka bäri kri niara kräke (Gén. 41:1, 14-16, 39-41).

13. Dre dre rabadre bare nibätä, ¿akwa yebiti ta nikwe ja di ngwain ye köböire Jehovakwe kukwe kwin mikai nemen bare ño ni kräke?

¹³ José erere, kukwe ruäre tä nemen ni kisete abokän ñan tä nemen nuäre ükadrete nie. Akwa, nikwe kukwe ngübai bätärekä aune ni raba dre nuainne ye erere nikwe ja di ngwain nuainne ngwane, Jehovakwe kukwe kwin mikai nemen bare ni kräke (Sal. 37:5). Ruäre ngwane nikwe dre nuaindre ye ñaka tä nemen gare nie, akwa Pablo niebare erere ‘ye ñan aibätä nita nainte’ (2 Cor. 4:8). Nikwe kukwe ja üaire mikai nuaindre käne jai ngwane, Jehovakwe ni dimikai.

14-16. Felipe ni kukwe driekä ye kisete kukwe ruäre namani, ¿akwa niarakwe dre nuainbare?

¹⁴ Dre dre rabadre bare nibätä, akwa ni raba ja töi mike ño kwatibe kukwe driere, ye Felipe ni kukwe driekä käkwe kukwe kwin krubäte bämikani ni käne yebätä ani blite. Felipe nämäne sribire konkrekasion Jerusalén yete (Hech. 6:1-6). Esteban murie ketani, ye bitikäre nitre kristiano rüe nakaninkä. * Nitre mada nänkä Jesube nämäne Jerusalén ngitiani mentokwäre ye ngwane, Felipe ñaka namani kwekebe. Juta Samaria yekänti krire kukwe metre drie jatani yete niara nikani kukwe driere (Mat. 10:5; Hech. 8:1, 5).

¹⁵ Ngöbö üai deme Felipe jie ngwandre medente erere känti niara nämäne juto nänkäre. Ye medenbätä, Jehovakwe niara mikani kukwe driere kä madakänti. Kä ye näire, nitre judío nämäne nitre samaritano mike tuin ngwarbe jai. Akwa, Felipe käkwe niaratre mikani tuin ja erebe jai, yebätä ja namani ruin kwin ietre Felipe ben raba ruin nie. Aisete, nitre kwati käkwe niara kukwe nuani kwin (Hech. 8:6-8).

¹⁶ Kä Asdod aune Cesarea yete nitre ñaka judío ye nämäne nüne kwati krubäte, yekänti Ngöbö üai deme niara jie ngwani (Hech. 8:39, 40). Felipe kukwe driebare Samaria ye käi nikani gre näre ta ngwane, niara ñaka namanina nüne nämäne nüne käne ye erere. Ñobätä ñan aune mräkätre namani ngübadre ie aune namani nüne kukwe driebare kwe yekänti. Kukwe yebiti ta ja töi mikani kwatibe kwe kukwe driere aune ye köböire Jehovakwe kukwe kwin krubäte mikani nemen bare niara aune mräkätre kwe ye kräke (Hech. 21:8, 9).

17, 18. Kukwe ruäre tä nemen ni kisete ngwane, ¿nita ja töi mike kwatibe kukwe driere ye tä ni dimike ño?

¹⁷ Nitre kwati sribikä köbö täte Ngöbö kräke ye tä niere, ja töi mikani kwatibe kwetre kukwe driebätä ye niaratre dimikani ja tuin kukwe ngüba ñaka nämäne kwetre yebe. Osborne aune muko kwe Polite nünanka Sudáfrica, yebätä dre namani bare ye ani mike gare jai. Niaratre ñaka namanina sribire Betelte ngwane, köbö rikai braibe ta yete sribi aune ju kwain ietre nünankäre namanintre nütüre. Akwa, ¿dre namani bare? Osborne tä niere: “Sribi ñan kwanba jötrö nunye”. Aune, Polite tä niere arato: “Sö rikaba krämä ta yete sribi ñan kwanba nunye aune ngwian ñaka nämä nunkwe. Ñan rababa nuäre nun kräke”.

¹⁸ ¿Dre käkwe niaratre dimikani ja tuin kukwe kri yebe? Osborne tä mike gare: “Nunkwe kukwe drieba ja mräkätre konkrekasionte ben yekwe nun  dimikaba ñaka töbike krubäte. Nunkwe ja töi mikaba kwatibe kukwe driere aune ñaka ja töibikaire. Ye käkwe kä mikaba juto nunbätä. Nunkwe sribi känänba kä jökrä känti, mrä mada sribi kwanba nunye”.

19-21. a) ¿Dre käkwe ni dimikai ja töi mike jäme? b) Kukwe ruäre tä nemen ni kisete ye ererebätä nita ja töi mike nüne ngwane, ¿ye tä ni dimike ño?

¹⁹ Kukwe namani bare ne tä mike gare nie, dre dre rabadre nibätä akwa ni raba dre nuainne ye erere nikwe nuaindi aune nikwe tö ngwain Jehovai yekwe ni töi mikai jäme (ñäkädre Miqueas 7:7 yebätä). * Kukwe meden tä nemen ni kisete ye ererebätä nita ja töi mike nüne, ye tä ni dimike kukwe ja üairebiti. Kukwe namani bare Polite yebätä ye käkwe dre driebare ie ye tä mike gare: “Sribi mada mikata ni kisete ye ngwane nikwe tö ngwandre kwatibe Jehovai kukwe meden rabadre bare nibätä yebiti ta ye rükaba gare tie. Ye köböire, tita ja kete bäri kwin Ngöböbe”.

²⁰ Mary abokänbätä blitani párrafo 8 yekänti, niara täbe rün ngübare aune sribi prekursor nuainne. Niara tä niere: “Tita nemen ulire ye ngwane, tikwe oradre aune tikwe ja töi mikadre jäme. Kukwe ne tä mike gare tie, ti rabadre kukwe jökrä mikete Jehová kisete. Aune yekwe ti dimikai ja tuin kukwe ja känenkäre yebe”.

²¹ Lloyd aune Alexandra abokänbätä blitani kena, niaratre tä niere kukwe namani bare bätätre ye käkwe tödeka kwetre nuaninte. Tätre mike gare: “Kukweta nemen ni kisete ye ngwane, nita tödeke o ñakare ye tä nüke gare nie aune ye käkwe ni dimikai ja tuin kukwe tare ben o ñakare ye rabai gare nie. Nengwane ja ruin kwin nunye”.

22. Kukwe rabadre bare nibätä akwa yebiti ta ni raba dre dre nuainne erere nikwe nuaindi ngwane, ¿ni raba tö ngwen kukwe meden ie?

²² Sribi mada mikata ni kisete, nita nemen bren o ni mräkätre tä nemen ngübadre nie, kukwe ye erere ben ni raba ja tuin. Akwa, Jehová töita nibätä aune niarakwe ni dimikai yei nikwe tö ngwandre (Heb. 4:16; 1 Ped. 5:6, 7). Kukwe meden rabadre bare nibätä, akwa ni raba dre dre nuainne ye erere nikwe ja di ngwandre nuainne. Orasion yebiti nikwe krötadre bäri ni Rün kä kwinbiti ye ken aune niarakwe ni ngübadi ie nikwe tö ngwandre. Ye köböire dre dre rabai bare nibätä, akwa käre ni töi tädi jäme.