1, 2. a) ¿Sribi meden bäri ütiäte Jesús nuainbare aune ñobätä? b) Ni rabadre “sribikä jen Ngöbökwe” yekäre, ¿nikwe dre nuaindre?

JESUKRISTO nämäne jondron sribere kribiti aune kukwe kwin driebare kwe arato (Mar. 6:3; Rom. 15:8). Sribi ketebu ye nuainbare kwin kwe. Ne madakäre, jondron sribikäre yebiti sribibare kwin kwe aune kri yebiti jondron keta kabre kwin sribebare kwe. Arato, kukwe nämäne gare krubäte ie Bibliabätä, yebiti nitre dimikani kwe Ngöbö Kukwei metre ye mike nüke gare jai (Mat. 7:28; Luc. 24:32, 45). Kä namanina 30 Jesubiti ye ngwane, niara nämäne jondron sribere kribiti ye tuanimetre kwe Gobran Ngöbökwe kukwei driekäre. Sribi ye namani bäri ütiäte kräke, ñobätä ñan aune niarakwe niebare Ngöbökwe niara juani sribi ye nuainne Kä tibienbätä (Mat. 20:28; Luc. 3:23; 4:43). Kukwe drie ye mikani nuaindre käne kwe jai aune tö namani nitre mada tuai ye erere nuainne arato (Mat. 9:35-38).

² Ni kristiano kwati ie jondron sribe ñaka gare kribiti, akwa ni jökrä kukwe kwin driekä. Sribi ye ütiäte krubäte, ñobätä ñan aune Ngöböta sribi ye nuainne arato. Erametre, Biblia tä niere ni abokän “sribikä jen Ngöbökwe” (1 Cor. 3:9; 2 Cor. 6:4). Kukwe Ngöbökwe ye abokän kukwe metre ye gare kwin nie (Sal. 119:159, 160). Ye medenbätä, nita kukwe driere ye ngwane nikwe “Ngöbö kukwei diri[dre] metre” (ñäkädre 2 Timoteo 2:15 yebätä). Ye nuainkäre, nikwe ja di ngwandre mantre jetebe dirikäre kwin Bibliabiti, ñobätä  ñan aune tärä yebiti nita kukwe metre driere Jehová, Jesús aune Gobran Ngöbökwe yebätä. Nikwe diridre kwin yekäre, juta ükaninte Jehovakwe käkwe tärä keta kabre biani nie ye nikwe mikadre gare kwin jai, abokän kädekata tärä aune video dirikäre.

3. a) ¿Kä nebera braibe nitre käme ye käne, ¿yebätä nikwe ja töi mikadre dre nuainne? b) ¿Hechos 13:48 ye raba ni dimike ño nitre töita kukwe metre mikabätä gare jai ye känene?

³ Ruäre ngwane, ni raba kukwe ne ngwentari jai, ¿ñobätä kädekata tärä aune video dirikäre aune ñaka kädekata tärä aune video kukwe driekäre? Nita kukwe driere nieta ye ngwane, nita kukwe mike gare nitre madai meden gärätä. Akwa, nita dirire nieta ye ngwane, nita kukwe ye mike gare kwin ne kwe nitre ie rükadre gare aune mikadre täte kwetre meden gärätä. Kä nebera braibe nitre käme ye käne, yebätä nikwe ja töi mikadre bäri nitre tötike Bibliabätä aune kukwe metre ye driere ietre. Ye abokän, nikwe ja di ngwandre krubäte nitre töita kukwe metre mikabätä gare jai aune töita nünanbätä kärekäre ye dimike ne kwe rabadre Jehová mike täte (ñäkädre Hechos 13:44-47; 13:48 yebätä). *

4. ¿‘Nitre jökrä töita nünanbätä kärekäre’ ye ni raba känene ño?

⁴ ¿‘Nitre jökrä töita nünanbätä kärekäre’ ye ni raba känene ño? Namani bare siklo kena ye erere, nikwe kukwe driedre ietre. Ye medenbätä, Jesukwe kukwe niebare ne nikwe mikadre täte: “Mun rika nebe juta krite ya o juta chite, ye känti nire tä biare mun kaen ngäbti töi kuinbti abko munkwe känä” (Mat. 10:11). Nitre bikaka kri, ñaka tö kukwe metre mikabätä gare jai aune kukwe ja üaire ye ñaka ütiäte kräke käkwe ñan Ngöbö kukwei kai ngäbiti ye gare nie. Nitre tö kukwe mikai gare jai, töi bobre aune tö kukwe ja üaire mikai gare jai ye nikwe känändre. Ani bämike, Jesús nämäne jondron sribere kribiti ye ngwane, nämäne kri kwin känene, jukwe aune jondron mada mada ye sribekäre raba ruin nie. Kri meden kwin nämäne kwen ie ngwane, jondron sribikäre ie yebiti nämäne sribi ye nuainne kwin. Ye erere arato nikwe nuaindre: käne ni rabadre nitre brukwä kwin känene, ye bitikäre ni raba jondron kukwe driekäre nie yebiti nitre tötike (Mat. 28:19, 20).

5. Tärä aune video kukwe driekäre yebiti ni raba kukwe driere ño ye mä raba mike gare (üai bämikani kena mikadre ñärärä).

⁵ Jondron sribikäre ye sribebare sribi jene jene nuainkäre. Ñodre, dre drebiti Jesukwe sribibare jondron sribekäre kribiti ye ani bämike ja töite. * Jondron kri ñäkäkäre, täräi mikakakäre, tikakakäre, mäkätikakakäre o ükatekäre, aune mikakäre ja närebe yebiti sribibare kwe. Ye erere arato, tärä aune video dirikäre yebiti dre dre nuaindre ye mikata gare. Jökrä ye ütiäte krubäte, aisete nikwe sribidre tärä aune video yebiti ye ani mike gare jai.

6, 7. a) ¿Tarjeta de contacto yebiti mätä kukwe driere ño? b) ¿Kukwe meden ketebu kräke täräkwata nitre nübaikäre gätäbätä ye sribebare?

⁶ Tarjeta de contacto. Tarjeta de contacto ye chi, akwa ütiäte krubäte kukwe driekäre nitre madai aune kukwe mikakäre gare nitre ie Internet käi nikwe yebätä. Internet käi nikwe yekänti kukwe raba kwen bäri ietre o nitre ye raba ja tötika ye kärere jai yete arato. Nitre 400,000 biti bäri käkwe ja tötika Bibliabätä ye ribebare jai jw.org yekänti. ¡Aune mantre jetebe nitre kwati krubäte tätre ja tötika Bibliabätä ye ribere jai! Käre ni rikadre  tarjeta de contacto ye ngwena jai. Ye köböire ni raba kukwe driere kä jökrä ngwane.

⁷ Täräkwata nitre nübaikäre. Täräkwata nitre nübaikäre gätäbätä ye abokän sribebare kukwe ketebu kräke. Täräkwata yebätä nieta: “Nunta mä nübaire ja tötike Bibliabätä nitre testiko Jehovakwe ben”. Ye bitikäre, gätä nuainta ño o nitre tötikata ño ye tä mike gare arato. Ne aisete, nikwe ñaka täräkwata chi ye mikadre tuare jerekäbe nitre ie, ñakare aune “nire nire ie gare tä kukwe ja üaire ribere jai” ye nikwe nübaidre gätäbätä ne kwe rabadre ja tötike Bibliabätä nibe (Mat. 5:3, TNM). Erametre, nitre jämi ja tötike Bibliabätä, akwa jökrä ka ngäbitita kwin gätäbätä. Niaratre näin gätäbätä ngwane, kukwe keta kabre rabai gare Bibliabätä ietre.

8. ¿Nitre rükadre gätä nuainta nikwe yebätä ye ñobätä ütiäte? Mä raba mike gare keteiti.

⁸ Nikwe ja töi mikadre nitre nübaire jankunu gätäbätä ye ütiäte krubäte. ¿Ñobätä? Ñobätä ñan aune ni testiko Jehovakwe tä kukwe metre Bibliabätä driere aune Ngöbö mike gare nitre madai, abokän erere nitre kukwe madabätä ñaka nuainne ye rükai gare ietre (Is. 65:13). Ye erere namani bare Ray aune muko kwe Linda yebätä, niaratre ye käi Estados Unidos. Niaratre nämäne Ngöbö mike era jai aune tö namani mikai gare bäri kwin jai. Ye medenbätä, ja töi mikani kwetre niken iglesia kwatire kwatire te. Iglesia nämäne kwati krubäte aune kukwe keta kabre mika nämäne täte. Kenanbe ja mikadre kwetre kukwebätä yekäre, kukwe ketebu rabadre bare. Kena, kukwe metre rabadre gare ietre iglesiate. Aune ketebukäre, nitre iglesiate yekwe ja ngwäkitadre kwin ribeta ni Ngöbö mikaka täte ie ye erere. Kä nikani kwati krubäte ta yete kukwe ñaka namani gare jire ietre aune nitre iglesiate ye ñaka nämänentre ja ngwäkite kwin yekwe niaratre mikani ulire. Köbö te niaratre kämikaninkä iglesiate ngwane, Linda nikani sribire aune Ray nikaninta gwä. Ray jatani Ju Ja Ükarakrö ye bäre ta aune namani töbike: “¿Dre nuainta yete ye ti raba niken mike ñärärä?”. Tä nemen bare ye erere, kä namani jutobätä. Nitre nämäne yete yekwe kani ngäbiti kwin aune nämänentre ja ngwäkitani kwin ribeta ni kristiano ie ye erere. Ray namani täkäni täkärä kena yete aune kukwe kädriebare ye namani tuin kwin ie. Nitre tä nüke kena gätäbätä tä niere “Ngöböta era metre bkänä mun ngätäite” niebare Apóstol Pablokwe ye erere namani bare (1 Cor. 14:23-25). Yete ja käne bämän kratire kratire te, Ray jatani niken gätäbätä aune ye bitikäre jatani kwen gätä jökräbätä. Linda jatani näin gätäbätä ben arato. Aune niaratre yebiti kä namanina 70 biti bäri ye ngwane, ja tötika Bibliabätä kani ngäbiti kwetre aune ja ngökani ñöte kwetre.

9, 10. a) ¿Ñobätä nuäre kukwe driekäre täräkwata kia yebiti? b) Täräkwata ¿Dre abokän Gobran Ngöbökwe? yebiti ni raba kukwe driere ño ye mä raba mike gare.

⁹ Täräkwata kia. Täräkwata kia ye tä 8 nikwe aune nuäre blita kömikakärebiti. Kä 2013 yete ja käne, täräkwata kia ye döräi jatani aune imprimibarera 5 mil millón näre. Täräkwata kia ye kwin kukwe driekäre, katibiti diridre ño tä nemen gare nie ye ngwane, mada mada yebiti tä nemen nuäre kukwe driekäre, ñobätä ñan aune jökrä ye ja erebe. ¿Ni raba blita kömike ño täräkwata kia yebiti?

¹⁰ Ni törbadre täräkwata ¿Dre abokän Gobran Ngöbökwe? ye driedi nitre ie ngwane, ni raba täräkwata kia ye mike tuare nitre gwi ie aune niere ietre: “¿Dre abokän Gobran Ngöbökwe ye mun tärä ngwentari jai? ¿Kukwe ngwantarita ketamä ne meden metre?”. Kukwe niedre kwin kwetre o ñakare ye ñaka niedre ietre, ñakare aune página känti sección “Biblia tä niere” ye mikadre tuare ietre aune ñäkädre Daniel 2:44 bätä Isaías 9:6 yebätä. Kä tärä ietre ngwane, nikwe blitadre jankunu  bentre. Ye bitikäre, kukwe ngwantarita mrä “Mäkwe ngwantari jai” nieta ye mikadre tuare ietre: “¿Gobran Ngöbökwe rabai ni gobraine ye ngwane nünain ño?” Nikwe nuaindi ye erere ngwane ni raba bliteta köbö mada ngwane kukwe ye arabebätä. Nikwe blitadreta nitre madabe täräkwata kia yebätä ngwane, täräkwata Ngöböta kukwe kwin mike gare nie kukwe ja tötikara 7 yebätä ni raba blite arato, ñobätä ñan aune yebiti ni raba nitre tötike.

11. ¿La Atalaya aune ¡Despertad ye ñokäre sribeta aune nikwe dre mikadre gare jai täräkwata yebätä?

¹¹ Täräkwata. La Atalaya aune ¡Despertad! ne kwitanina bäri aune döräita kä jökräbiti tibien. Juta keta kabre känti ñäkätä täräkwata yebätä, aisete kukwe meden tuin kwin nitre ie ye kädrieta täräkwata ketebu yebätä töi mikakäre ñäkebätä. Täräkwata yebätä nikwe nitre töi mikadre ñäke, ne kwe kukwe meden tä niaratre mike töbike ye rabadre gare ietre. Ne madakäre, nire ie nikwe täräkwata ye mikadrete rabadre gare nie yekäre, kukwe nietabätä ye nikwe mikadre gare kwin jai.

12. a) ¿Nire nire kräke täräkwata ¡Despertad! ye sribeta aune drekäre? b) ¿Dre kwin namanina bare mäbätä kukwe driebätä täräkwata yebiti?

¹² Täräkwata ¡Despertad! ye sribeta nitre ie kukwe ñaka gare krubäte Bibliabätä ye kräke. Ruäre ngwane, ni kristiano tä kukwe meden metre driere ye ñaka gare ietre, kukwe meden mikadre täte o Biblia raba niaratre dimike ño ye ñaka gare ietre. Täräkwata ye sribeta ne kwe Ngöbö tärä ye rabadre gare nitre ie (Rom. 1:20; Heb. 11:6). Arato, Biblia ye abokän Ngöbö kukwei ie nitre rabadre tödeke yekäre täräkwata ye sribeta (1 Tes. 2:13). Kukwe ketamä tä dianinkä täräkwata kä 2018 ye kräke, abokän kädekata, “El camino de la felicidad”, “12 claves para una familia feliz” aune “Ayuda para quienes están de duelo”.

13. a) ¿Nire nire kräke täräkwata La Atalaya ye sribeta? b) ¿Dre kwin namanina bare mäbätä kukwe driebätä täräkwata yebiti?

¹³ Täräkwata La Atalaya ni jökrä kräke ye känti kukwe metre Bibliabätä mikata gare nitre ruäre tä Ngöbö jürä ngwen jabätä aune tö Kukwe Bibliabätä mikai gare jai ye kräke. Nitre ruäre ie kukwe Bibliabätä gare kiakia, akwa dre drieta metrere ye ñaka gare ietre (Rom. 10:2; 1 Tim. 2:3, 4). Kukwe ketamä tä dianinkä täräkwata kä 2018 ye kräke, abokän tä kukwe ngwantarita ne mike gare: “¿Sigue siendo útil la Biblia?”, “¿Qué encierra el futuro?” aune “¿Piensa Dios en usted?”.

14. a) ¿Video ketabokä ye abokän ñokäre sribebare? b) ¿Kukwe meden kwin namanina mäkwe video ye mikabätä tuare?

¹⁴ Video. Jesús näire, nitre sribikä kribiti ye ie jondron ñan nämäne krubäte, akwa kä nengwane abokän jondron tärä keta kabre sribi ye nuainkäre, ñodre motosierra, taladro, lijadora aune clavadora. Ye erere arato, tärä aune täräkwata imprimita, aune nengwane video tärä nikwe mikakäre tuare nitre ie. Ketabokä abokänbiti ni raba kukwe driere: ¿Ñobätä ja tötikadre Bibliabätä? ¿Nunta nitre tötike ño Bibliabätä?, ¿Gätä nuainta ño nunkwe? aune ¿Nun testiko Jehovakwe ye abokän nire nire? Video meden minuto 2 o bäri chi yebiti blita kömika raba. Aune video meden abokän bäri nga yebiti ni raba nitre tuinbitita aune nire nire ie kä tärä yei mikadre tuare. Video nebiti ni raba nitre töi mike ja tötike Bibliabätä aune nüke gätäbätä arato.

15. Video mikata tuare nitre kukweibiti ye köböire kukwe meden kwin tä nemen bare ye mä raba niere.

¹⁵ Video mikata tuare nitre ie ye köböire dre kwin tä nemen bare ye ani mike gare jai. Meri iti nünanka Micronesia nikani nüne juta madate abokän ben Meri testiko iti blitabare ye ngwane, video ¿Ñobätä ja tötikadre  Bibliabätä? ye mikani tuare kwe ie niara kukwei yapés yebiti. Video ye mikani tuare ie ngwane, meri ye niebare: “¡Tä ti kukweibiti! Ni blitaka video yete ye nünanka ti käite. ¡Niara ye blite ti kukweibiti!”. Ye bitikäre niebare kwe, dre tä jw.org ye jökräbätä ñäkädi kwe aune mikadi ñärärä kwe (Hechos 2:8, 11 mikadre ñärärä). Ye erere arato, meri Testiko iti käi Estados Unidos käkwe video ye juani nurä kwe tä nüne juta madate yei, ne kwe tuadre kwe ja kukweibiti. Nurä ye käkwe video ye tuani ngwane, ye bitikäre kukwe tikani kwe correote ie: “Ni käme tä kä ne gobraine rababa gare tie ye käkwe ti töi mikaba ñan krütare. Tikwe ja tötika ribeba jai”. Akwa niarata nüne yekänti kukwe drie ye ñäkäibare.

16. Täräkwata keteitire keteitire ne sribebare ñokäre ye mä raba mike gare: a) Mäkwe Ngöbö mika täte aune mäkwe nünain kärekäre. b) Ngöböta kukwe kwin mike gare nie. c) ¿Nire nire tä kukwe Jehovakwe nuainne ni näire?

¹⁶ Täräkwata. Nitre ie ñäkä ñaka gare kwin täräbätä o täräkwata ñaka kukweibiti ye ngwane, ¿ño ni raba kukwe metre ye driere ietre? Täräkwata Mäkwe Ngöbö mika täte aune mäkwe nünain kärekäre * ye ütiäte krubäte kukwe driekäre. Täräkwata Ngöböta kukwe kwin mike gare nie yebiti ni raba nitre tötike ye ütiäte krubäte. Kukwe 14 tä página mrä yebätä abokän ni raba mike tuare nitre ie aune kukwe meden rabadre tuin bäri kwin ietre ye ni raba ngwentari ietre aune kukwe yebätä ja tötika kömikadre bentre. ¿Nita nikenta nitre tuinbiti ye ngwane nita ye erere nuainne? Täräkwata ketamäkäre dirikäre abokän, ¿Nire nire tä kukwe Jehovakwe nuainne ni näire? Täräkwata ne sribebare nitre dimikakäre juta ükaninte Jehovakwe ye mikakäre gare kwin jai. Nikwe nitre tötikadre ño täräkwata yebiti yekäre, Kukwe ja jie ngwankäre gätäte Nita Dirire aune Ja Ngwen Ño sö Marzo 2017 yebätä nikwe kukwe känändre.

17. a) ¿Tärä kwatire kwatire ye ñokäre sribebare? b) Nitre ja ngökadrera ñöte, ¿akwa yebiti ta rabadre dre nuainne aune ñobätä?

¹⁷ Tärä. Ni tädre nitre tötike täräkwata keteitibiti ngwane, ñongwane ni törbadre nitre tötikai tärä ¿Dre drieta erametre Bibliakwe? yebiti ngwane ni raba nuainne. Tärä ye köböire nitre ja tötikaka ie kukwe meden metre Bibliabätä ye rabai gare. Ni ja tötikaka ja tötikadrera tärä yebätä aune tädre nirien jankunu kukwe ja üairebiti ngwane, nikwe tötikadre tärä Munkwe Ngöbö taredre jankunu yebätä. Ye käkwe niaratre dimikai kukwe nieta Bibliabätä ja jie ngwankäre ye erere nuainne. Nitre ja tötikaka käkwe ja ngökadrera ñöte, akwa yebiti ta ja tötikadre kwe tärä ketebu yebätä. Ye käkwe, dimikai tödeke Jehovai aune ja ngwen metre ie (ñäkädre Colosenses 2:6, 7 yebätä).

18. a) Kukwe nieta Timoteo kena 4:16 ye erere, ¿nikwe dre nuaindre aune ye köböire dre rabai bare? b) Tärä aune video dirikäre yebiti nita kukwe driere ngwane, ¿ñokäre nita nuainne?

¹⁸ Ni testiko Jehovakwe tä kukwe metre ye mike gare ne kwe ja nire kärekäre ye rabadre nitre madakwe (Col. 1:5; ñäkädre 1 Timoteo 4:16 yebätä). Ni dimikakäre, kukwe keta kabre dirikäre biani nie (Recuadro “ tärä aune video dirikäre” ye mikadre ñärärä). Nikwe diridre kwinbiti. Ni kukwe driekä itire itire yekwe täräkwata aune video meden medenbiti kukwe driedre ye tä gare nie. Akwa, nikwe ngwandre törö jai ni ñaka rabadre täräkwata mikete jerekäbe ju ju te. Arato ni ñaka raba mikete nire ñan tö kukwe Ngöbökwe mikai gare jai ye kisete. Nitre tö “nünanbätä kärekäre”, nitre tö kukwe metre mikai gare jai, nitre töi bobre, abokän rabadre ja tötikaka Kristokwe ie ni tö (Hech. 13:48, TNM; Mat. 28:19, 20).