1. ¿Ni ja tötikaka dimikadre ja ngökö ñöte ye sribi ütiäte krubäte tä ni kisete ye 2 Corintios 3:1-3 tä mike gare ño? (Üai kena täräkwatabätä mikadre ñärärä).

NI JA TÖTIKAKA Bibliabätä konkrekasion nikwe te tä ja ngökö ñöte ye ngwane, ¿jata nemen ruin ño nie? Ye käita nemen nuäre nibätä (Mat. 28:19). Aune ni ara käkwe ni ye tötikani Bibliabätä ngwane, bäri kätä nemen juto nibätä (1 Tes. 2:19, 20). Nitre ja ngökani krire ñöte ye “tärä tikani kwin blitakäre kwin” ñan ni dirikä ye aibebätä, ñakare aune konkrekasionbätä arato (ñäkädre 2 Corintios 3:1-3 yebätä). *

2. a) ¿Kukwe meden ütiäte nikwe ngwandretari jai aune ñobätä? b) ¿Ni tötikata Bibliabätä ye abokän ño? (Nota mikadre ñärärä).

² Kä käbokä nikanina ta yete nitre 10 millón näre tötikani Bibliabätä sö kratire kratire kä jökräbiti tibien mikani gare ye käi juto nibätä. * Aune kä ye arabe te nitre 280,000 biti bäri ja ngökani ñöte kä kwatire kwatire te mikani gare arato. Meden kisete nüke gare nie nitre ja tötikaka täbe kwati krubäte abokän jämi ja ngökö ñöte. ¿Ni raba dre nuainne nitre kwati ye dimikakäre ja ngökö ñöte? Jehová ye ni ngübaka bätärekä aisete täbe kä bien nitre ie rabakäre ja tötikaka Kristokwe yekäre. Kä kitera krüte ni käne yebätä ni tö ja di tätebiti nitre ye dimikai nirien  ja üairebiti jötrö ngwarbe ja ngökakäre ñöte (1 Cor. 7:29a; 1 Ped. 4:7).

3. ¿Dre rabai gare nie kukwe ja tötikara nekänti?

³ Nitre ja tötikaka dimikadre ja ngökö ñöte jötrö ye ribeta krubäte. Yebätä Nitre Braibe Konkrekasion Jökrä Ngübabitikä käkwe encuesta nuainbare sukursal keteitire keteitire yete. Nitre prekursor ie kukwe gare krubäte, nitre circuito tuabitikä aune nitre misionero ye ruärebätä dre raba nemen gare nie ye rabai gare nie kukwe ja tötikara nekänti aune mada yebätä (Prov. 11:14; 15:22). * Ja mräkätre ye dre niebare ye tä mike gare ni dirikä aune ni ja tötikaka rabadre dre nuainne kukwe kwin rabadre bare yekäre. Kukwe ketarike ni ja tötikaka Bibliabätä käkwe nuaindre ja ngökakäre ñöte aune ño dirikä raba dimike ye rabai gare nie kukwe ja tötikara nekänti.

4. ¿Ñobätä nikwe ñaka ja tötikadre jukwebätä ni gwi ben aibe?

⁴ Ja mräkätre kwati tä nitre tötike Bibliabätä akwa nuainta jötrö ngwarbe kwetre. Ruäretre tä ja tötike jukwebätä ni gwi ben, ye kwin krubäte niaratre töi mikakäre jankunu kukwe mike gare jai. Akwa ye ngwane ñan blitata krubäte ni gwi yebe aune ñan nuain raba käre bämän kratire kratire. Yebätä, niara törbadre jankunu kukwe mikai gare jai yekäre, ja mräkätre ruäre tä número jakwe bien ie kukwe keteiti Bibliabätä ye kädriekäre ben telefononte o kukwe juankäre ie köbö te ñaka tuabitita kwe ngwane. Akwa ye aibe kräke ni ja tötikaka käkwe kä diainkä jai ngwane ñaka ririai kukwe ja üairebiti. Töi ñaka rabai ja diankabätä mento Ngöbö kräke aune ja ngökakäre ñöte ñobätä ñan aune tä kä denkä chi jai aune tä ja di ngwen braibe ja tötikakäre Bibliabätä.

5. ¿Jesús kukwe niebare Lucas 14:28-33 yebiti ni raba kukwe meden ütiäte mike gare ni ja tötikaka ie?

⁵ Ni iti törbadre nemen ja tötikaka Jesukwe yekäre dre nuaindre kwe ye Jesukwe bämikani kukwe ketebubiti. Blitabare kwe ni iti tö nämäne torre sribei yebätä aune rei iti nämäne ja mike juto rükäre yebätä. Ni tö namani torre sribere ye rabadre käne täke tibien aune “ngwian tärä täte ju ye mikakrä bare täte jökrä ya” bätä rabadre töbike käne niebare kwe. Aune ni reire rabadre täke tibien biti nitre rükä nibe tä kwe yebiti raba rü ganainne yebätä töbikadretari käne kwe niebare kwe (ñäkädre Lucas 14:28-33 yebätä). Ye erere arato, nire törbadre nemen ja tötikaka Jesukwe yekäre dre nuaindre kwe yebätä töbikadre kwin kwe nämäne gare Jesuye. Aisete ni ja tötikaka rabadre nänkä Jesús jiebiti yekäre ütiäte krubäte töi mikadre ja tötike Bibliabätä bämän kratire kratire. ¿Ye nuain raba ño?

6. ¿Nikwe ja töi mikadre dre nuainne ne kwe ni ja tötikaka nibe ririadre kukwe ja üairebiti?

 ⁶ Kena, kä diandrekä bäri jai ja tötikakäre ni gwi ben. Ñodre nita ni gwi tuinbiti ngwane, ni raba bersikulo ketebu ketamä o bäri mada ye kädriere ben batire batire. Ja rabaira ruin jäme ni gwi ie ja tötikabätä chi mada ngwane, kä tärä ie kukwe mada Bibliabätä kädriekäre jabe ye mä raba ngwentari ie. Ye nuainta mäkwe jukwebätä ben ngwane, kä mada tärä känti ni raba täke tibien blitakäre bäri kwin jabe ye mä raba ngwentari ie. Dre niei kwe nie ye käkwe mikai gare tä ja tötike bökän nibe Bibliabätä o ñakare. Aune kä rikadre ta ngwane, niara ririadre bäri jötrö ja üairebiti yekäre niara törbadre ja tötikai bobu bämän kratire kratire ye ni raba ngwentari ie. Kukwe meden mada ni ja tötikaka käkwe nuaindre ye ani mike gare jai.

7. ¿Ni dirikä ja ükadrete ño ni gwi tötikakäre batire batire ye känenkri?

⁷ Ni dirikä ja ükadrete kwin ni tötikadre kwe ye känenkri ye ütiäte krubäte. ¿Ye nuain raba ño? Käne, kukwebätä ja tötikai yebätä nikwe ñäkädre aune texto jökrä känändre. Kukwe ütiäte meden meden mika tö gare ye nikwe mikadre gare jai. Kukwe ja tötikara kädekata ño, subtítulo, kukwe ngwantarita, texto ñäkädrebätä, üai bämikani aune video meden meden raba ni dimike kukwe ye mike gare ye jökräbätä nikwe töbikadre. Biti töbikadre ni ja tötikaka yebätä. Niara tä ja ngwen ño, kukwe ño ben tä ja tuin, kukwe meden niena gare ie ye jökräbätä nikwe töbikadre. Aune kukwebätä nikwe ja tötikai ben ye ni raba mike gare ño nuäre aune kukwe braibebiti ie ne kwe rükadre gare mrebe ie aune mikadre täte kwe yebätä nikwe töbikadre (Neh. 8:8; Prov. 15:28a).

8. Apóstol Pablo kukwe niebare Colosenses 1:9, 10 ye erere, ¿nikwe dre nuaindre ni ja tötikaka ye kräke?

⁸ ¿Kukwe meden mada nuain raba ja mikakäre juto ja tötika känenkri? Nikwe blitadre Jehovabe ni ja tötikaka nikwe yebätä aune kukwe meden ribeta niara dimikakäre yebätä. Jehovakwe ni dimikadre Biblia yebiti kukwe mike nemen niara brukwäte nikwe ribedre ie (ñäkädre Colosenses 1:9, 10 yebätä). Kukwe meden ñan raba nemen nuäre ni ja tötikaka kräke mikakäre gare jai o kukwe meden ñan raba nemen nuäre kräke ka ngäbitikäre ye nikwe ngwandretari jai. Ngwen törö jai, ni tö niara dimikai ja ngökö ñöte.

9. ¿Ni ja tötikaka nibe y ni raba dimike ño ja ükete ja tötika känenkri?

⁹ Ja tötikadre käre Bibliabätä ye käkwe ni ja tötikaka dimikadre Jehová aune Jesús mike ütiäte jai dre nuainbare kwetre kräke yebätä  aune törbadre kukwe mikai gare bäri jai ie ni tö (Mat. 5:3, 6). Akwa kukwe ütiäte rabadre gare ni ja tötikaka ie tötikata Bibliabätä ngwane, ütiäte krubäte ja töi mikadre kwe dre drieta ie yebätä. ¿Ye nuain raba ño kwe? Ütiäte krubäte niarakwe ja tötikadre kwin känenkri nikwe niedre ie. Kukwebätä ja tötikai ben yebätä ñäkädre kwe aune niara raba kukwe ye mike ño täte yebätä töbikadre kwe nikwe niedre ie. Ja mikadre ño juto ja tötika känenkri ye ni raba nuainne ben nuaindre ño kwe bämikakäre ie. * Kukwe känändre ño kukwe ngwantarita mikakäre gare ye nikwe driedre ie aune kukwe braibe braibe täräi mikadrekä kwe jai, yekwe dimikai kukwe ngwen törö jai ni raba driere ie. Biti kukwe mikadre gare kwe ja kukweibiti nikwe ribedre ie. Ye köböire kukwebätä ja tötikata kwe ye nüke gare ie o ño ye rabai gare nie. Kukwe meden ketamä ni ja tötikaka käkwe nuaindre ye ari mike gare jai.

10. ¿Ni ja tötikaka ñäkädre mantre jetebe Bibliabätä ye ñobätä ütiäte aune kukwe kwin rabadre kwe yekäre dre nuaindre kwe?

¹⁰ Ni ja tötikaka ye ja tötikadre Bibliabätä dirikä kwe ben bämän kratire kratire ye ütiäte, akwa kukwe ruäre mada nuaindre kwe kaibe ja kräke köbö kwatire kwatire. Niara rabadre Jehová kukwe nuin aune blite ben. ¿Nuain raba ño kwe? Jehová kukwe nuakäre yekäre ñäkädre kwe Bibliabätä mantre jetebe (Jos. 1:8; Sal. 1:1-3). Programa ñäkäkäre Bibliabätä tä jw.org^® aune imprimi raba jai ye nikwe driedre ie. * Akwa kukwe kwin rabadre kwe yekäre kukwebätä ñäkäta kwe ye tä dre driere ie Jehovabätä aune niara raba mike ño täte yebätä töbikadretari kwe nikwe niedre ie (Hech. 17:11; Sant. 1:25).

11. ¿Ni ja tötikaka blitadre ño Jehovabe ye raba nemen gare ño ie aune nuaindre käre kwe ye ñobätä ütiäte?

¹¹ Ni ja tötikaka raba orare Jehovai blitakäre mantre jetebe ben nikwe niedre ie. Nita niara tötike ngwane, orasion nuainta känenkri aune orasion nuainta mrä ye nikwe nuaindre ja brukwä ngöibiti aune nikwe ni ja tötikaka ye kädekadrete orasionte. Ye köböire oradre kwe Jehovai aune nuaindre kwe ja brukwä tätebiti aune Jesukristo käbiti rabai gare ie (Mat. 6:9; Juan 15:16). Ni ja tötikaka ñäkäi mante jetebe Bibliabätä ye köböire Jehová kukwe nuai kwe aune orasion nuaindi kwe blitakäre ben ye köböire ja ketai ño kwe Jehovabe ye bämike ja okwäte (Sant. 4:8). Ye erere nuaindi kwe köbö kwatire kwatire ngwane, kukwe keteiti rabai  kwe käkwe dimikai ja denkä mento Ngöbö kräke aune ja ngökö ñöte. ¿Ye kukwe meden? Ari mike gare jai.

12. ¿Ni raba ni ja tötikaka ye dimike ño nemen ja ketamuko Jehovakwe?

¹² Ja tötika Bibliabätä köböire kukwe meden rükadre gare ni ja tötikaka ie ye ñan jerekäbe rabadrete töite, ñakare aune matadre brukwäte arato. ¿Kukwe ye matadre brukwäte ye ñobätä ütiäte? Ñobätä ñan aune Jehová rabadre gare ni ja tötikaka nikwe ie yei ni tö. Akwa kukweta nüke gare ie ye matadre brukwäte ne kwe törbadre mikai täte ye ütiäte krubäte arato. Kukwe drie nämäne Jesukwe ye nämäne nemente nitre töite ñobätä ñan aune drie nämäne kwe kwin jatäri aune bängrabe. Akwa nitre nämäne näin niara jiebiti ñobätä ñan aune kukwe ye nämäne mate niaratre brukwäte (Luc. 24:15, 27, 32). Ni ja tötikaka rabadre Jehová mike tuin metre jai ja Rün erere, Ngöbö kwe erere aune Ja ketamuko kwe erere (Sal. 25:4, 5). Yebätä nita niara tötike Bibliabätä ngwane, Jehová töi kwin keta kabre aune bä nuäre yebätä nikwe blitadre bäri ben (Éx. 34:5, 6; 1 Ped. 5:6, 7). Kukwe ño erere ño ni tädre ja tötike ben, akwa käre Jehovata ja ngwen ño ye nikwe mikadre tuare ie. Jehovata ni tarere, tä ja töi mike kwin ni kräke aune tä ni mike tuin bobre jai ye nikwe ni ja tötikaka dimikadre mike tuin ütiäte jai. Nikwe Jehová Ngöbö nikwe taredre ye kukwe bäri ütiäte aune tä bäri käne arato kukwe jökrä mada mada ngätäite niebare Jesukwe (Mat. 22:37, 38). Nikwe ja di ngwandre ne kwe ni ja tötikaka nikwe ye rabadre Jehová tarere ja brukwä ngöibiti.

13. ¿Jehovata ja ngwen kwin aune töita kwe ye ni ja tötikaka dimikadre ño mike gare jai? Mä raba bämike keteiti.

¹³ Nita blite ni ja tötikaka nikwe ben ngwane, Jehová tuin ño nie aune nita tarere ño ye ni raba niere ie. Ye käkwe mikai tuare ie niara rabadre akwle ja kete Jehovabe aune tarere arato (Sal. 73:28). Jehovata ni tarere, niara töbätä, tä kukwe ükete metre aune niara dite krubäte ye tä mate kwin ni brukwäte aune ye mikata gare täräbätä nita ja tötike yete o texto keteitibätä ngwane ¿ni raba dre nuainne? Ye kukwe keteiti köböire nita ni Rün kä kwinbiti tarere krubäte ye ni raba niere ni ja tötikaka nikwe ie. Kukwe ketarikekäre ni ja tötikaka käkwe nuaindre ja ngökakäre ñöte ye ani mike gare jai mada.

14. Hebreos 10:24, 25 tä niere erere, ¿dre raba ni ja tötikaka mike nirien ja üairebiti?

¹⁴ Nitre tötikata nikwe ye jökrä ja ngökadre ñöte ie ni tö. Yekäre nikwe nübaidre rikakäre gätäbätä ye kwin krubäte. Ni ja tötikaka tä biarebe  niken gätäbätä ye tä nirien bäri jötrö ja üairebiti nieta ja mräkätre dirikä kwin yekwe (Sal. 111:1). Ja mräkätre ruäre tä niere ni ja tötikaka ie, niara tötikata gwi ye köböire kukwe ütiäte keta kabre tä nemen gare ie Bibliabätä. Akwa kukwe ütiäte mada Bibliabätä ye rabadre gare ie yekäre ütiäte krubäte ja ükadrekrö kwe gätäte. Ni raba ñäke ni ja tötikaka nikwe ben Hebreos 10:24, 25 yebätä aune rikadre gätäbätä ye köböire dre kwin raba nemen kwe ye nikwe mikadre gare ie (ñäkädrebätä). Arato ni raba video ¿Gätä nuainta ño nunkwe? ye mike tuare ie. * Nikwe niara dimikadre ja töi mike näin gätäbätä.

15. ¿Ni ja tötikaka Bibliabätä rikadre gätä jökräbätä yekäre dre nuaindre?

¹⁵ Ni ja tötikaka ye jämi niken gätäbätä o tä niken nane nane ngwane, ¿nikwe dre nuaindre? Kukwe meden namani gare nie bitinkä gätäbätä ye nikwe tanre ie kä jutobiti. Ye raba töi mike bäri näin gätäbätä nikwe nübaidre jerekäbe ye kräke. Ni Mikaka Mokre o Kukwe ja jie ngwankäre gätäte medenbätä ja tötikata gwä ngwane ye ni raba bien kati ie. Drebätä ja tötikai bämän madabätä ye nikwe mikadre tuare ie aune kukwe meden nibi tuin ütiäte ie ye ni raba ngwentari ie. Dre tuai kwe aune dre kukwe nuai kwe näin gätäbätä kena ngwane, ye rabai bäri ütiäte dre tuani kwe o dre driebare ie iglesia madate ye kräke (1 Cor. 14:24, 25). Nitre mada raba kukwe kwin bämike okwäte aune dimike ja ngökö ñöte ye rabai gare ie.

16. a) ¿Ni ja tötikaka Bibliabätä ja ngökadre ñöte yekäre dre dre nuaindre? b) ¿Dre rabai gare nie kukwe ja tötikara ja känenkäre yekänti?

¹⁶ ¿Dre dre nuain raba ni ja tötikaka ja ngökadre ñöte yekäre? Niara tötikata Bibliabätä ye rabadre tuin ütiäte ie yekäre, ütiäte krubäte ja tötikadre kwe bämän kratire kratire aune ja ükadrete käne kwe ja tötika keteitire keteitire ye kräke ye nikwe niedre ie. Jehová kukwe nuadre kwe köbö kwatire kwatire aune blitadre kwe ben aune dre nuaindre kwe rabakäre ja ketamuko Jehovakwe ye nikwe driedre ie. Arato nikwe nübaidre näin gätä jökräbätä. (Recuadro “ Ni ja tötikaka käkwe ne nuaindre” ye mikadre ñärärä). Akwa ni ja tötikaka Bibliabätä ja ngökadre ñöte yekäre ni dirikä ie kukwe ketarike tä nuaindre arato ye rabai gare nie kukwe ja tötikara ja känenkäre yete.