KÄ KWATIRE kwatire te, nitre kitaninkä kukwebätä ye kwati kiteta konkrekasion kokwäre. Nitre oveja kwrere ütiäte krubäte ye tä kiteta konkrekasionte ye käi tä nemen juto kä kwinbätä, ¿ye mä tärä bämike ja töite? (Luc. 15:7, 10). Krire mä namaninta kukwebätä ngwane ye käi juto krubäte Jesús, angeletre aune Jehová yebätä ye tädre gare metre mäi. Akwa mäta kukwe ükete ja ketakäreta bäri kwin Jehovabe ngwane, mä raba ja tuin kukwe keta kabre ben. ¿Kukwe ye abokän meden meden aune mä raba ja tuin ño ben?

Ja mräkätre kwati tä kiteta konkrekasionte ngwane, töbikakwe ñaka kwin yebe tätre ja tuin. Ye erere nemen bare mäbätä ngwane, ja namani ruin ño rei David ie ye nüke gare kwin mäi. Ngite juanina ta niarabiti akwa niarakwe kukwe ne erere niebare: “Kukwe keta kabrebätä ti ja mikanina ngite ye käne ti kitera nainte krubäte” (Sal. 40:12; 65:3). Ni iti tä kiteta Jehová kokwäre ngwane ja raba nemen ruin ngite ie aune raba nemen ja gaire kä kwati krubäte te. Ñodre, Isabelle, * nämäne kitaninkä kukwebätä kä 20 näre te, niarakwe niebare: “Jehová raba ngite juen ta tibiti ye ñan nämä nemen era ti kräke”. Mäkwe ja di ngwain nekä ngwane, mä ñaka raba kite ja kete kwin Jehovabe (Prov. 24:10). Mäkwe ja di ngwan ne kwe kukwe ye ñaka rakadrekä mäbätä.

Ja mräkätre tä nementa kukwebätä ye rabadre kukwe keta kabre nuainne ja ketakäreta kwin Jehovabe ye tä niaratre ngwen di nekä. Antoine namaninta kukwebätä ye bitikäre, niebare kwe: “Ti nämä kukwe keta kabre nuainne ni kristiano erere ye käi nikwitaninkä tibiti”. Ja mräkätre ruäre ie jata nemen ruin ye erere, yebätä ñaka tä ja di ngwen krubäte sribikäre Jehová kräke.

Ani kukwe ne bämike. Nü jobe muriebe minimini jatadre käkwe ju keteiti juandre ngwarbe aune ju bökänkä rabadre ja di ngwen krubäte aune rabadre kä denkä jai ju ye ükatekäre yebätä töbikadretari jerekäbe kwe ngwane, raba nemen nainte käne. Ye erere arato, nita ja mike ngite krubäte ye köböite ni  ñaka tä nemen ja kete Jehovabe aune ja ketakäreta Jehovabe ja di ngwandre krubäte raba nemen tuin nie. Akwa ni dimikaka tärä.

Jehová tä kukwe ne niere nie: “Mun jakwre, ani kukwe ükete jabe” (Is. 1:18). Mäkwe ja di ngwanina ja ketakäreta Jehovabe ngwane, niara tä mä tarere kukwe yebätä. Satana ye abokän ni ngökaka ye Jehová raba mike gare kukwe nuainta mäkwe yebiti, yebätä töbike (Prov. 27:11).

Mä jataninanta Jehová kokwäre ngwane, mä rökrabarera niara ken aune niarakwe rökrai mä ken käbämikata kwe mäi (Sant. 4:8). Ma namaninanta kukwebätä ye jutuadre ni madai ye kwin krubäte, akwa mä rabadre kukwe mada nuainne. Mä rabadre ja di ngwen mä Rün aune ja ketamuko mäkwe Jehová ye tarere bäri. ¿Mä raba nuainne ño?

Kukwe meden mä raba nuainne ye erere mäkwe ja di ngwan nuainkäre. Üra mäkwe kukwe ja üairebiti, ye abokän dre käbämikata Jehovakwe aune kukwe mada mada Jehovabätä gare mäi, ye täbe krö raba ruin nunye. Akwa mä rabadre ju ja üaire ye üketeta ye abokän, kukwe driere, niken gätäbätä aune kä denkä jai rabakäre gwairebe ja mräkätre ben. Mä raba kukwe meden meden mike nuaindre jai ye ani mike gare jai.

Mäkwe blita käre Jehovabe. Mäkwe ja mikani ngite yebätä ja täbe ruin ngite mäi aune ja ñaka tä nemen ruin kwin mäi blitakäre mä Rün kä kwinbiti ben ye nüke gare ie (Rom. 8:26). Akwa yebiti ta, mäkwe ora jankunu aune mä tö ja ketaita Jehovabe ye mäkwe mika gare ie (Rom. 12:12). Andrej tä kukwe ne niere: “Ja nämä nemen ruin ngite tie aune ti nämä nemen ja gaire krubäte. Akwa ti nämä orare ye bitikäre ja nämä nemen ruin kwin aune jäme tie”. Dre drebätä mä raba orare ye ñaka rabadre gare mäi ngwane, rei David käkwe ja töi kwitabare ngwane orabare kwe yebätä mäkwe töbikatari aune ye raba kwen nie Salmos 51 aune 65 yebätä.

Mäkwe ja tötika käre Bibliabätä. Ye käkwe mä dimikai tödeka jakwe mike bäri dite aune mä rabai Jehová tarere bäri (Sal. 19:7-11). Felipe tä niere: “Ti ñan nämä ja tötike Bibliabätä aune ñäkebätä yebätä ti jataba di nekä aune tikwe ja mikaba ngite Jehová rüere. Ti ñan tö kukwe ye tuaita nementa bare jabätä, ye medenbätä tikwe ja töi mikaba ja tötike käre Bibliabätä ja ngübabitikäre”. Mä raba kukwe ye erere nuainne arato. Dre drebätä mäkwe ja tötikadre ñaka rabadre gare mäi ngwane, mä raba ja di kärere ja ketamuko ünä mäkwe kukwe ja üairebiti ye ie.

Mäkwe ja ketata ja mräkätre ben. Nitre kitaninkä kukwebätä ye tä kiteta konkrekasionte ngwane, ja mräkätre mada mada ye käkwe töbikai ñaka kwinbätä tä nemen ruin ietre ye töbikaita nemen kwetre. Larissa tä niere: “Kä kwati krubäte te ti nämä ja gaire. Aune tikwe ja mikani konkrekasion rüere nämä nemen ruin tie”. Nitre umbre ji ngwanka aune ja mräkätre mada mada ünä kukwe ja üairebiti ye tö mä dimikai ja ketakäreta kwin Jehovabe ye tädre gare metre mäi (recuadro “ Nitre umbre ji ngwanka raba dre nuainne” ye mikadre ñärärä). Mä jataninta Jehová kokwäre ye käi juto bätätre aune tö kä tuai juto mäbätä arato (Prov. 17:17).

¿Mä raba dre nuainne ja ketakäre bäri kwin ja mräkätre konkrekasionte ben? Mä rika käre gätäbätä aune mäkwe kukwe drie käre ja mräkätre ben. ¿Kukwe jökrä ne nuaindre mäkwe ye raba mä dimike ño? Félix käkwe niebare: “Ti rükadreta konkrekasionte ye ja mräkätre jökrä nämä ngübare. Ti nämä tare niaratrekwe rükaba gare tie. Ja mräkätre jökrä ye käkwe ti dimikaba ne kwe ja rabadre ruin kwin konkrekasionte tie, Jehovakwe ngite kitani ta tibiti aune ti raba näin ja käne rükadre gare tie yekäre” (recuadro “ Mä raba dre nuainne” ye mikadre ñärärä).

Mäta kukwe ükete jai ja ketakäreta Jehovabe ngwane, ñü muriebe minimini ye kwrere Satana tä juen jankunu mäbiti (Luc. 4:13). Mä tö ja tuai juto ja tuakäre kukwe yebe ngwane, ju mäkwe kukwe ja üairebiti ye mäkwe mika bäri dite.

Jehovata kukwe ne käbämike oveja kwetre ie: “Meden nianinte ye tikwe känäin, meden nikani ji madabiti ye ti jatai ngwenanta, meden träine ye tikwe dänkwä mriaibätä aune meden di ñakare ye tikwe mikaita dite” (Ezeq. 34:16). Jehovakwe nitre kwati niara mikaka täte ye dimikanina ja ketakäreta ben. Ye medenbätä, Jehová tö mä dimikai ne kwe mä rabadre ja kete bäri kwin ben ye tädre gare metre mäi.