1. ¿Ñobätä nitre kwati töi nemen ngwarbe kwäräkwärä kukwe mikata täte yebätä?

IGLESIA kwati tärä aune tä ja bien kristiano bätä Ngöbö mikadre ño täte ye erere niaratre tä nuainne mikata gare kwetre ye namanina gare. Aisete ñobätä nitre kwati töita nemen ngwarbe kwäräkwärä kukwe yebätä ye nüke gare nie aune tä nemen kukwe ne ngwentari jai: “¿Kukwe metre keteiti tärä, o iglesia jökrä ye Ngöböta kain ngäbiti?”. Aune ni testiko Jehovakwe tä kukwe metre driere bätä nita Ngöbö mike ño täte kä nengwane, ¿ye niara tä kain ngäbiti ye era ni kräke? ¿Ni raba kukwe ye mike era jai? Kukwe keta kabre tä kukwe ye mike gare yebätä ani blite.

2. ¿Ñobätä kukwe nämene era Pablokrä ye metre nämäne gare ie? (1 Tesalonicenses 1:5).

² Dre nämäne era Pablokrä ye metre nämäne gare ie (ñäkädre 1 Tesalonicenses 1:5 yebätä). Ñaka jerekäbe niara ja töi mikani kukwe ye mikakäre era jai. Ñakare aune niara ja tötikabare nguseta Bibliabätä yebätä niara töi nämäne ye erere. “Kukwe jökrä Tikani yebätä Ngöbökwe ja töi mikani” ye nämäne gare metre Pablo ie (2 Tim. 3:16, TNM). Niara ja tötikani kukwe Ngöbökwe yebätä ngwane Jesús ye abokän Mesías käbämikani ye kukwe keta kabre nämäne mike gare namani gare ie. Akwa nitre judío ji ngwanka kukwebätä käkwe ñaka kukwe ye töbikaibare. Nitre ja bämikaka jerekäbe ye nämäne blite Ngöbö käbiti nämäne niere, akwa kukwe nuain nämäne kwetre yebiti nämäne kukwe jene bämike (Tito 1:16). Akwa kukwe Ngöbökwe ye meden mikadre täte aune meden ñan mikadre täte ye Pablo ñaka diani jai, ñakare aune Ngöbö töita ño ye niara nämäne juto driekäre aune mikakäre täte (Hech. 20:27).

3. Kukwe metre mikata täte nikwe ye rabadre gare nie yekäre, ¿kukwe ngwantarita ye jökrä rabadre gare täte nie? (Recuadro “ Jondron jökrä sribebare Jehovakwe aune töita ño ye ñaka raba nemen tändre nie” ye mikadre ñärärä).

 ³ Nitre tä kukwe metre mike täte ngwane kukwe jökrä ngwantarita aune kukwe meden mika ñaka gare metre ta Bibliabätä, ye mikadre gare kwetre nitre kwati tä nemen nütüre. ¿Ni rabadre kukwe ye erere ngübare? Ani blite Pablo yebätä. Bati nitre kristiano rabadre kukwe jökrä mike ñärärä kwin mikani gare kwe ietre, akwa kukwe ñaka nämäne gare jökrä ie ye nämäne gare ie arato (1 Tes. 5:21). “Kukweta neme gare braibe” nie aune ye abokän “ñäi ngututure te jändrän bä tuen diore kwrere” bämikani kwe (1 Cor. 13:9, 12). Kukwe ñaka nämäne gare jökrä Pablo ie aune nie arato. Akwa kukwe ütiäte ütiäte nämäne gare Jehovabätä ie, ne madakäre kukwe nämäne gare krubäte ie ye köböire kukwe mika nämäne täte kwe ye metre nämäne gare kwin ie.

4. ¿Kukwe metre mikata täte nikwe ye rabadre bäri era ni kräke yekäre nikwe dre nuaindre aune nikwe dre mikai gare jai kukwe ja tötikara nekänti?

⁴ Kukwe metre namanina gare nie ye rabadre bäri era ni kräke yekäre, ¿ni rabadre dre nuainne? Kukwe keteitibiti ni raba nuainne ye abokän Ngöbö mikadre ño täte Jesukwe driebare aune nitre testiko Jehovakwe tä Ngöbö mike ño täte kä nengwane, ye nikwe mikadretari ñärärä kwin. Kukwe ketabokä nitre kristiano metre tä nuainne ye rabai gare nie kukwe ja tötikara nekänti 1) jondron ngwarbe mikata ngöböre jai ye ñan ka ngäbitita kwetre, 2) tä Jehová kä ye mike ütiäte jai, 3) tä kukwe metre ye tarere aune 4) tä ja tarere krubäte kwärikwäri.

5. ¿Ngöbö mikadre ño täte ye Jesukwe driebare ño aune ni raba nuainne ño?

⁵ Jesús nämäne Jehová tarere krubäte yebätä nämene kä kwinbiti aune nükani kä tibienbätä ngwane Jehová aibe mikani täte kwe (Luc. 4:8). Aune nitre ja tötikaka kwe käkwe kukwe ye  erere nuaindre arato driebare kwe ietre. Jesús aune nitre ja tötikaka kwe ñaka jondron ngwarbe sribebare Jehová mikakäre täte. Ngöbö ye üaire aisete nitre kä tibienbätä raba jondron ñokwä sribere niara bämikakäre, akwa ñaka raba nemen jire Ngöbö ütiäte krubäte ye kwrere (Is. 46:5). ¿Santo üai sribeta aune rezata ie yebätä dre nie raba? Kukwe biani Ngöbökwe Moisés ie yekänti mikani gare kwe: “Mäkwe ñaka jondron üai sribedre jai jondron kä kwinbiti o jondron kä tibienbätä o jondron ñöte ye bä erere. Mäkwe ñaka ja mika ngukodokwäbiti känenkri” (Éx. 20:4, 5). Nire tö ja ka ngäbitimana Ngöböi ye ie kukwe ne nüke gare metre.

6. ¿Kä nengwane nitre testiko Jehovakwe tä ja ngwen nitre meden erere?

⁶ Nitre kristiano siklo kena yete nämäne Ngöbö aibe mike täte, ye mikata gare nitre ja tötikaka kukwe kirakira yebätä yekwe. Ñodre, tärä tikani nitre kristiano yebätä yete mikata gare nitre kristiano nämäne Ngöbö mike täte medente, yekänti ni iti ja töi mikadre jondron üaire mikata ngöböre jai mike yete akräke, “rabadre tuin yaikrä krubäte ietre” (History of the Christian Church). Nitre kristiano siklo kena nämäne Jehová mike ño täte, ye erere nun testiko Jehovakwe tä nuainne kä nengwane arato. Nun ñaka “santo” üai sribeta, angeletre aune Jesús ye ie orare. Ne madakäre, jondron üai sribeta juta ketare ketare kräke ye nun ñaka käikitekä, nun ñaka bandera saludare aune jondron mada mada ye erere nuainne. Kukwe ñokwä raba nemen bare akwa yebiti ta Jesukwe kukwe niebare ne nun tö mikai täte: “Jehová Ngöbö mäkwe ye aibe mäkwe mikadre täte” (Mat. 4:10, TNM).

7. Nitre testiko Jehovakwe aune nitre kukwe mada mada mikaka täte ye ñaka ja erebe, ¿ye nemen gare nie kukwe meden medenbiti?

⁷ Kä nengwane nitre ji ngwanka kukwebätä ütiäte ütiäte ye jiebiti nitre kwati tä näin kä jutobiti aune bäsi tä mike ngöböre jai. Nitre tä nemen iglesia kwetre ye kwati, tärä kwetre ye tä kökö jai aune tätre ngwian bien ere krubäte ietre dimikakäre. Dre dre nieta kwetre ye jökrä nitre ruäre ta mike era jai. ¡Nitre ye käkwe Jesús tuadre akräke ñaka käi rabadre juto bätätre ye erere! Akwa nun Jehová mikaka täte metre ñaka tä nitre ji ngwanka kä nebätä ye jiebiti näin. Nitre nun jie ngwanka ye nunta mike ütiäte jai akwa Jesukwe kukwe niebare nebätä nunta ja jie ngwen: “Mun abko ja etbare jökrä” (Mat. 23:8-10). Nitre kä nebätä ji ngwanka kukwebätä o gobrantre ye nun ñaka mike ngöböre jai aune dre nuainta kwetre yekri nun ñaka ja mike. Nun ñaka ja mike kukwe kä nebätä yete, ñakare aune nunta ja dianinkäbätä mento. Kukwe jökrä nekänti nun ñaka ja erebe nitre ja bianka kristiano yebe (Juan 18:36).

8. Nikwe Jehová kä ye käikitadrekä aune mikadre gare nitre kä jökräbiti tibien ie ye ie Jehová tö, ¿ye ñokänti gare nie?

⁸ Bati Jesús nämäne orare ngwane kukwe ne niebare kwe: “Ti Rün tikwe, ja kä mike bäri kri”. Jehovakwe kukwe nuani aune kukwe ngitianinkä ñan kiabe kä kwinbiti ja kä ye käikitaikä kwe käbämikani kwe (Juan 12:28, NGT). Jesukwe kukwe driebare kä tibienbätä ngwane, Rün kwe kä ye käikitaninkä kwe (Juan 17:26). Ye medenbätä, ni kristiano metre ye tä Ngöbö ye kädekete aune mike gare ni madai ye käi jutobätä ye nüke gare kwin nie.

9. Nitre kristiano siklo kena ye nämäne Ngöbö kä ye mike ütiäte jai, ¿ye bämikani ño kwetre?

⁹ Siklo kena yete konkrekasion kristiana dianinkä kena ye bitikäre, Jehová “ja töi mikani ño kena nitre juta madate ye diankakäre ja kä ngwankäre” (Hech. 15:14, TNM). Nitre kristiano ye nämäne Ngöbö kä ye kädekete aune nämäne driere nitre madai ngwane, käi nämäne nemen juto krubäte bätätre. Niaratre kukwe driebare aune tärä Bibliabätä tikabare kwetre ngwane, Ngöbö kä ütiäte krubäte ye kädekaninte kwetre. *  Aisete niaratre ye namani dianinkä juta Ngöbö kä ngwankäre jabätä ye bämikani kwetre (Hech. 2:14, 21).

10. Nitre testiko Jehovakwe ye dianinkä Jehová kä ngwankäre jabätä, ¿ye kukwe meden meden tä mike gare?

¹⁰ ¿Nun testiko Jehovakwe ye tä dianinkä Jehová kä ngwankäre jabätä? Kukwe meden tä kukwe ye mike gare ye ani mike gare jai. Kä nengwane, Ngöbö kä tärä ye nitre ji ngwanka kukwebätä tä ja di ngwen ñaka mikakäre gare. Biblia kwitata kwetre yekänti diankata kwetre aune ruäre ngwane ja ükakröta kwetre yekänti, ñaka kädekadrete ribeta kwetre. * Akwa nun testiko Jehovakwe ye aibe tä Jehová kä ye käikitekä aune mike ütiäte jai ye gare metre nie. Iglesia mada mada ñaka Ngöbö kä ye mike gare nitre kwati krubäte ie nun testiko Jehovakwe tä nuainne ye erere. Nun kä testiko Jehovakwe ye abokän dre gärätä ye erere nunta ja di ngwen nuainne (Is. 43:10-12). Nitre mada mada Biblia kwitaka käkwe Jehová kä ye dianinkä rikadre medente ye erere känti, akwa Traducción del Nuevo Mundo yekänti Jehová kä rikadre medente ye erere känti mikaninta aune ye sribebarera 240 millón näre. Aune tärä aune täräkwata dianinkä Biblia yebätä känti Jehová kä ye kädekateta ye sribeta kukwe 1,000 jene jenebiti bäri.

11. ¿Nitre kristiano siklo kena nämäne kukwe metre tarere ye bämikani ño kwetre?

¹¹ Jesús tä kukwe metre ye tarere, ye abokän kukwe metre Ngöböbätä aune Ngöbö töita ño.  Kukwe ye ererebätä niarakwe nünanbare aune driebare kwe nitre madai (Juan 18:37). Nitre nänkä metre Jesús jiebiti nämäne kukwe ye tarere krubäte arato (Juan 4:23, 24). Nitre kristiano siklo kena nämäne Ngöbö mike täte ye apóstol Pedro käkwe kädekani “ji era metre” (2 Ped. 2:2). Nitre kristiano siklo kena ye nämäne kukwe metre ye tarere krubäte, ye medenbätä kukwe metre ye ererebätä ñaka drie nämäne nitre kukwebätä yekwe, kukwe jene mika nämäne täte aune nitre töi nämäne jene, ye niaratre ñaka nämene kain ngäbiti (Col. 2:8). Ye erere arato, nitre kristiano kä nengwane tä ja di ngwen jankunu nünankäre kukwe metre ye ererebätä (3 Juan 3, 4). ¿Nuainta ño kwetre? Kukwe Jehovakwe ye mikata täte kwetre aune ye ererebätä tätre nüne ye niaratre tä mike gare kwin jai.

12. Kukwe ruäre kwitadre ye tä nemen gare nitre sribi Ngöbökwe jie ngwanka ye ie ngwane, ¿tätre dre nuainne aune ñobätä tätre nuainne?

¹² Nitre testiko Jehovakwe ie kukwe Bibliabätä ye nüke gare kwin metre, ye niaratre ñaka mike gare. Ruäre ngwane kukwe Bibliabätä ye mikanina gare jene kwetre aune ñaka konkrekasion ükaninte kwin kwetre. Akwa ye ñaka ni töi mikadre niä, ñobätä ñan aune juta Ngöbökwe ie kukwe metre ye rükai gare bätärekä bätärekä nememe kwin mrebe mikani gare kukwe Ngöbökwe yebätä (Col. 1:9, 10). Jehovata kukwe metre ye mike gare bätärekä bätärekä, aisete kukwe metre ye jatadre nüke gare bätärekä bätärekä nie nememe rabadre kwin mrebe, ye ni tädre juto biare ngübakäre bätärekä bätärekä (Prov. 4:18). Kukwe Bibliabätä nüke gare ño nunye ye kwitadre tä nemen gare nitre ji ngwanka sribi Ngöbökwe yebätä ye ie ngwane, tätre juto biare kwitakäre. Nitre kukwe mada mada mikaka täte tätre kukwe kwite ne kwe käi rabadre juto nitre nänkä iglesia kwetre yebätä aune rabadre tuin kwin nitre kä nebätä ie yekäre. Akwa nun testiko Jehovakwe ie kukwe Bibliabätä nüke gare jene ye nunta kwite ne kwe nun rökradre bäri Jehová ken aune Ngöbö mikadre ño täte driebare Jesukwe ye erere nuainkäre (Sant. 4:4). Kukwe ruäre nämäne nüke gare jene nunye, ye nunta kwite ñan nitre kä nebätä töita ño aune kukwe meden nieta kwetre tuin kwin gwä ngwane ye aibätä nuainne, ñakare aune kukwe Bibliabätä ye nüke gare bäri kwin nuen yebätä. Nunta kukwe metre ye tarere (1 Tes. 2:3, 4).

13. ¿Töi kwin meden bäri ütiäte nitre kristiano metre yekwe aune nitre testiko Jehovakwe tä bämike ño kä nengwane?

¹³ Nitre kristiano siklo kena ye nämäne kukwe keta kabre kwin nuainne yebätä nämäne gare nitre ie, akwa nämäne ja tarere yebätä nämäne gare bäri nitre ie. Jesús käkwe niebare: “Munkwe ja taredre kwärikwäri tita niere munye, ne kwrere munkwe ja taredre ne ngwane, mun abko ja töitikaka tibe ye rabadi gare ni jökräye” (Juan 13:34, 35). Ye erere arato, nitre testiko Jehovakwe kä jökräbiti tibien tä ja tarere aune nüne keteitibe jabe kä nengwane. Nitre mada kukwe mada mada mikaka täte ye erere nun testiko Jehovakwe ñaka, ñobätä ñan aune nun nünanka kä jene jene känti, nun kwata bä jene jene, nun jondron bäkäne o ñakare, akwa yebiti ta nun jökrä tä ja tarere ni ja mräkäre ye kwrere. Aune nunta ja ükekrö gätäte bätä gätä kri nuainta yekänti, nunta ja tarere bökän ye bä tä nemen gare metre. Nun aibe tä Jehová mike täte niara tö ño ie ye ererebätä ye nüke gare bäri kwin nie kukwe yebiti.

14. Colosenses 3:12-14 tä mike gare erere, ¿kukwe meden bäri ütiätebiti nita ja tarere kwärikwäri ye ni raba bämike?

¹⁴ “Munkwe ja taredre kri kwärikwäri” mikata gare Bibliabätä (1 Ped. 4:8). Ni ngite yebätä nita ja mike ngite ngwane, nita ngite kite ta jabiti aune ja ngübare bätärekä yebiti nita ja tare ye bämike. Aune ja mräkätre tä ja mike ngite ni rüere bätä ja mräkätre jökrä ye kräke nita ja ngwen mantiame ye ngwane, nita ja tare ye bämike arato (ñäkädre Colosenses 3:12-14 yebätä). Erametre nita ja tare ne erere bämike ngwane, ni kristiano metre tä nemen gare.

15. ¿Kukwe meden mada känti nunta kukwe nuainne konkrekasion kristiana käkwe kukwe nuainbare ño siklo kena yete ye erere?

¹⁵ Kukwe mada känti konkrekasion kristiana nämäne Ngöbö mike ño täte siklo kena yete ye erere nuainta nunkwe. Nitre apóstol käkwe kukwe ükaninte ño siklo kena yete, ye erere juta Ngöbökwe tä ükaninte kä nengwane. Ñodre, ni circuito tuabitikä, nitre umbre ji ngwanka aune siervo ministerial ye tärä konkrekasionte (Filip. 1:1; Tito 1:5). Aune ja mika gure, ja mäkäteta, däri bätä nitre ja mikaka ngite ñaka tö ja töi kwitai yebätä konkrekasion kriemikadre, ye nitre kristiano siklo kena nämäne mike tuin ño jai ye erere nunta ja töi mike arato (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Efesios 4:4-6 ye tä dre driere nie?

¹⁶ Nitre kwati käkwe ja biandi ja tötikaka Jesukwe, akwa ye ñaka metre mikani gare Jesukwe (Mat. 7:21-23). Ne madakäre, kä krüte näire nitre kwati tädi Ngöbö mike täte ye kwrere rabaitre ja bämike mikani gare kukwe Ngöbökwe yebätä (2 Tim. 3:1, 5). Akwa tödekakrä tä kratibe aune Ngöböta kain ngäbiti ye mikata gare metre ta Bibliabätä arato (ñäkädre Efesios 4:4-6 yebätä). *

17. ¿Nire tä kukwe nuainne Jesús erere aune tä kukwe metre ye aibe mike täte kä nengwane?

¹⁷ Aisete, ¿nire tä kukwe metre ye aibe mike täte? Nikwe kukwe keta kabre mirira gare jai aune Ngöbö mikadre ño täte ye Jesukwe driebare bätä nitre kristiano siklo kena käkwe nuainbare ye nikwe mirira gare jai arato. Ye medenbätä nitre testiko Jehovakwe ye aibe tä kukwe ye mike täte ye ni raba niere metre ta. Nita juta Ngöbökwe yete siba aune kukwe metre niena gare nie Jehová aune niara töita ño yebätä ye käi juto krubäte nibätä. Ye medenbätä. nikwe ja töi mikadre kwatibe kukwe metre ye ketete dime kisete.