1, 2. ¿Ñäkädre aune ja tötikadre Bibliabätä ye nuain raba ño bäri kwin? Mä raba mike gare.

 MÄ TÖ ju kökai krati jai ye bämike ja töite mä jämi kökö ye känenkri ¿dre tädre gare kwin mäi? ¿Ju ye üai mäkwe tuadre ye aibe rabadre debe mä kräke? Metrere mä tö rabadre näin ju mike ñärärä, ¿ñan ererea? Kä ño jubäre, kä ñö gwita, jöndrön kia kia tä gwita ye mä tö rabadre tuaite kwin ¡ñan ñan! Aune plano ju yekwe ye mä tö rabadre tuai, ju ye sribebare ño mikakäre gare jai. Metrere mä tö rabadre kukwe kia kia ju yebätä ye mikai gare jökrä jai.

² Ye erere bämika raba ñäkätä Bibliabätä aune ja tötikatabätä yebätä. Ñäkäta Bibliabätä ye tärä keteiti tä kete “ju kri, mente kwin ürä mete nguse aune dite yebätä” ¿Aune kukwe mikata gare Bibliabätä ye ni rabadre mike gare ño jai? Nikwe ñäkädre jötröbätä ye ngwane, kukwe dirita käne, “ni jökrä ie Ngöbö kukwei bätä ye aibe rabai gare nie” (Heb. 5:12). Ye medenbätä bäri kwin ju mikata ñärärä kwin “terita” mikakäre gare kwin jai. Ye erere nikwe kukwe mikadre gare kwin jai. Ja tötikakäre kwin Bibliabätä kukwe ruäre mikata gare tärä keteitibätä Bibliabätä ye ara mikata gare tärä mada Bibliabätä yekänti ye mikadre gare kwin jai. Akwa dre ie nita tö ngwen ye ñan ngörä, ñakare aune, ñobätä kukwe ye era ni kräke ye rabadre gare kwin nie.

3. ¿Pablokwe ja mräkätre kristiano ye töi mikani dre nuainne aune ñobätä? (Efesios 3:​14-19).

³ Kukwe Bibliabätä rükadre gare nie yekäre nikwe ja kitadre nguseta kukwe yebätä, kukwe kia kia mikadre gare kwin jai. Apóstol Pablo käkwe nitre kristiano töi mikani ja kite kisere kukwe Bibliabätä yebätä. Ye köböire Ngöbö kukwei ötai nuäi,  ngraba nuäi aune nuäi nemen nguse aune ngraba nuäi kwin rükadre gare kwin ietre tödekadre kwatibe kwetre yekäre (ñäkädre Efesios 3:​14-17, 19; 3:​18, [NGT] yebätä). b Ni rabadre ye erere nuainne ni raba dre nuainne kukwe känänkäre kwin kukwe Ngöbö yebätä aune dre gärätä ye mikakäre gare kwin jai. Ye ani mike gare jai.

4. ¿Dre nuaindre rökrakäre bäri Jehová ken? Mä raba mike gare.

⁴ Kukwe dirita käne ni jökrä ie Ngöbö kukweibätä ye aibe ben ni kristiano ñan tö rabai. Ni töita kwatibe ‘kukwe kaibe tiebe Ngöbökwe’ mikabätä gare jai, aune rabai gare nie Üai Deme Ngöbökwe ye köböire (1 Cor. 2:​9, 10). ¿Ñobätä mä ñan ja töi mike kukwe ruäre mike nuaindre jai ja tötika kaibe ye ngwane, rökrakäre bäri Jehová ken? Kukwe keta kabre tärä. Ñödre: Jehovakwe nitre niara mikaka täte kirabe ye tarebare ño aune ye erere tä mä tarere ye mä raba känene. Jehovakwe kukwe ükaninte ño, ne kwe nitre israelita käkwe niara mikadre täte kirabe ye erere tä nuainne ño nitre kristiano niara mikaka täte kä nengwane yebätä ye mikadre ñärärä. Jesús nükani kä tibienbätä aune kukwe driebare kwe ye ngwane profecía meden mikani nemen bare kwe yebätä ja kitadre bäri nguseta.

5. ¿Kukwe medenbätä mä tö kukwe mikai gare bäri jai mäta ja tötike kaibe ye ngwane?

⁵ Ja mräkätre ruäre ie kukwe gare krubäte Bibliabätä, ye ie kukwe Bibliabätä meden bäri nguseta tö mikai gare jai ye ngwanintari ie. Recuadro “ Ja tötika kaibe ye ngwane ja tötika raba kukwe nebätä” yete kukwe ruäre niebare kwetre ye tä. Mä ja tötikai Índice de las publicaciones Watch Tower aune Tärä ni testiko Jehovakwe ji ngwankäre ja tötike yebätä ngwane kukwe kwin keta kabre raba gare mäi. Mäkwe ja tötikai bäri nguseta ye käkwe tödeka mäkwe mikai bäri dite aune “kukwe rabai gare bäri mäi Ngöbö yebätä” (Prov. 2:​4, 5). Kukwe metre, mikata gare Bibliabätä ye ruäre ani ja töi mike kukwe mike gare bäri bätä jai.

6. a) ¿Kukwe keteiti ükateta jai nuainkäre ye ñobätä ñaka ja erebe ja töi mikata kwatibe kukwe keteiti mike nemen bare yebe? b) ¿Ngöbö töita nitre kä tibienbätä kräke ye abokän kärekäre ye ñobätä niere raba? (Efesios 3:11).

⁶ Ngöbö töita ño tä mikata gare Bibliabätä yebätä töbike. Metrere kukwe ketebu ne ñaka ja erebe: kukwe ükateta jai aune ja töi mikata kwatibe kukwe keteiti mike nemen bare ñodre: kukwe ükateta jai ye abokän dre nuaindi ye gare nie akwa kukwe ruärebätä ni raba kukwe ye kwite. Akwa, ja töi mikata kwatibe kukwe keteiti mike nemen bare ye abokän medente ni näin aune medente ni tö rükai ye gare nie. Ye medenbätä kukwe ñaka jire raba ni töta kukwe nuainbätä ye ketebätä aisete ni töita rababätä medente yekänti ni rabai. Ye erere arato, Jehová töita kwatibe kukwe keteiti nuainbätä aune tä mike gare nie Bibliabiti bätärekä bätärekä yebätä nita debe bien krubäte ie (Efes. 3:11). Kukwe ño erere akwa Jehovata jondron jökrä mike ja töi mike nemen bare (Prov. 16:4). Aune Jehovata kukwe mike nemen bare yekwe nuai kärekäre. Akwa ¿Jehová töita dre nuainbätä? Aune ¿dre kwitanina jene kwe mikakäre nemen bare?

7. ¿Adán aune Eva ja mikani Ngöbö rüere ye ngwane Jehovakwe dre nuainbare jene ja töi mikakäre nemen bare? (Mateo 25:34).

⁷ Jehová Ngöbö töi nämäne ño “nitre kä tibienbätä kena kräke ye mikani gare kwe ie kukwe ne niebare kwe ngwane. ‘Ngäbäkre ngibia kwati munkwe aune jondron nire jateta ye jökrä ngübabiti munkwe’ (Gén. 1:28). Adán bätä Eva käkwe ja mikani ngite kenanbe sete aune ye köböite ni jökrä namani ngite. Akwa, Jehová töi nämäne dre nuainbätä ye ñaka ketaninbätä kwe ñakare aune jötrö ngwarbe kukwe mada nuainbare kwe niara töi nämäne ño ye mikakäre nemen bare. Ñodre jötrö ngwarbe ja töi mikani kwe Gobran ükete keteiti kä kwinbiti niara töi nämäne ño nitre kä tibien kräke ye mikakäre nemen bare (ñäkädre Mateo 25:34 yebätä). Kä debe näre te Jehovakwe ja tare kwe ye bämikani nie, Jesús monso ngöräbe itibe kwe ye juani kwe kä tibienbätä. Jesukwe blitabare gobran kwe yebätä nitre jökrä ben aune ja nire kwe ye biani kwe ni ütiäre, ni mikakäre kwäre gata aune ngite yebätä. Biti nükaninta nire aune nikani kä kwinbiti gobrankäre Rei erere Gobran Ngöbökwe yete, akwa Ngöbö töita ño ye kukwe keta kabre mada tärä yebätä ni raba töbiketari.

8. a) ¿Kukwe medenbätä blitata metrere Bibliabätä? b) ¿Jehovakwe dre mada nuaindi mikata gare Efesios 1:​8-11 yebätä? (Üai kena täräkwatabätä mikadre ñärärä).

⁸ Kukwe keteiti bäri ütiäte bätä blitata Bibliabätä ye abokän ne: Jesukwe Jehová töi nämäne ño ye mikai nemen bare nitre kä tibienbätä kräke, yebiti niarakwe Jehová kä ye mikaita mrebe, kukwe ñaka raba jire Jehová töita ño ye ketebätä, niarakwe mikani nemen bare mikata gare kwe (Is. 46:​10, 11, nota mikadre ñärärä; Heb. 6:​17, 18). Ja känenkäre mada kä tibien kwitai bä nuäre yete Adán bätä Evá monsoitre töi rabadi metre aune nünandi kärekäre kwetre (Sal. 22:26). Akwa ye ñan aibe: Jehová töita kukwe nuainta bäri. Niarakwe angeletre kä kwinbiti aune nitre kä tibienbätä mikai nüne keteitibe niara käikitakakäre aune gobran kwe mikakäre ütiäte kri (ñäkädre Efesios 1:​8-11 yebätä). Jehovata ja töi mike nemen bare ño ye bä nuäre krubäte, ¿ñan ererea?

9. ¿Dre rabai bare ja känenkäre yebätä kukwe gare nuäi mäi mätä ñäke Bibliabätä ye köböire?

⁹ Profecía niebare Jehovakwe Génesis 3:15 jardín Edén yete yebätä töbike. c Yete blitata  Ngöbö töi nämäne dre nuainbätä yebätä akwa ye rabadre bare kä rikadre mil kabre ta ngwane. Kukwe keteiti ye abokän meri monsoi, Mesías ye jatadre Abrahán ngäbriänkätre yekri (Gén. 22:​15-18). Kä 33 ye ngwane Jesús nuainbare tare ngoto üebätä mikani gare ye erere (Hech. 3:​13-15). Kä mil jire ye ngübata ne kwe Satana dokwä trekaite mikata mrä profeciabätä ye rabadre bare (Apoc. 20:​7-10). Gobran Satanakwe tä ja rüere juta Ngöbökwe ben mika jämi krüte ye känenkri dre rabai bare yebätä Biblia tä kukwe mike gare keta kabre.

10. a) ¿Kukwe meden kebera nakainkä? b) ¿Ja töi aune ja brukwä mika raba ño juto? (Nota mikadre ñärärä).

¹⁰ Biblia tä kukwe mike gare kä krüte bätä ye ngwandre törö jai. Kena, kä titibe aune jondron blo ñan tärä ye juta jökrä rabai niere (1 Tes. 5:​2, 3 NGT). Ja tare nikadi kri ye kömikai “jötrö ngwarbe” juta jökrä käkwe ja mikadi kukwe ngwarbe ye rüere ngwane (Apoc. 17:16). Kukwe ñan nakainkä jire abokän rakadikä ye ngwane “ni kä nebätä Ngobo abokän jatadi tuen ja di kri bä nuäre mutabiti abokän ni jökrä käkwe tuadi” (Mat. 24:30). Nitre obeja aune kabra kwrere ye Jesukwe diainkä jene jene kukwe ükatekäre ben (Mat. 25:​31-33, 46). Ye ngwane Satana ñaka rabai kwekebe kise mriani jäbätä ñakare aune brukwä rubunbiti juta jökrä ükaikrö kwe ja mikakäre juta Ngöbökwe rüere, ye Biblia tä kädekete Gog kite kä Magog yekri (Ezeq. 38:​2, 10, 11). Kä rükai ngwane nitre dianinkä nänkäre kä kwinbiti ye ükaikrö ja käntibe kä kwinbiti Kristo aune nitre rükä kwe yebe ye köböire rü kri Armagedón ye kömikai ja tare nikadi kri ye mikakäre krüte (Mat. 24:31; Apoc. 16:​14, 16). d Mrä mada Kristo Gobrandi kä Mil te kä tibienbiti ye kömikai (Apoc. 20:6).

11. ¿Nüna kärekäre ie tö ngwanta ye dre mä kräke? (Üai mikadre ñärärä).

¹¹ Ani ja töi mike nikwe nünandi ño ja känenkäre yebätä. Ngöbökwe nüna kärekäre ye mikani ni nire brukwäte mikata gare Bibliakwe (Ecl. 3:11). ¿Mäta ja kete Jehovabe  yebätä dre rabai bare ye mäta bämike ja töite? Tärä Acerquémonos a Jehová, página 319, yete kukwe ne kwrere nieta: “Nikwe nünandi kä cien kwati, mil kwati, millón kwati krubäte te o bäri ye ngwane, kukwe rabai gare krubäte Jehovabätä nie kukwe gare niarabätä nie kä ngwane ye kräke. Aune kukwe keta kabre niarabätä abokänbätä rabai ja kitadre nie yekwe ni töi mikai niä. Ye ni ñan raba bämike jökrä ja töite. Akwa nita ja di ngwen kukwe mikakäre gare bäri niarabätä jai aune kukwe jökrä rabai gare bätä nie ye käkwe ni krötai bäri niara ken. Akwa ye jämi nemen bare känenkri kukwe mada ütiäte Bibliabätä yebätä nikwe kukwe känändre bäri.

12. ¿Ni raba nikren ño kä kwinbiti? Mä raba mike gare.

¹² Kukwe Ngöbökwe ye tä ni dimike kukwe kwin krubäte nuaindi Jehovakwe “kä kwinbiti” ye bämike ja töite (Is. 33:5). Biblia tä kukwe ütiäte mike gare nie Jehovabätä aune “kukwe tä ükaninte ño kwe kä kwinbiti” yebätä (Is. 6:​1-4; Dan. 7:​9, 10; Apoc. 4:​1-6). Ñodre, “kä kwin ngitiani” aune kukwe ñan tuabare Ngöbökwe mikani tuare Ezequiel ie, yebätä ni raba ñäke (Ezeq. 1:1).

13. ¿Sribi nuainta Jesukwe kä kwinbiti yebätä mätä töbike ngwane, ¿jata nemen ruin ño mäi? (Hebreos 4:​14-16).

¹³ Sribi nuainta Jesukwe kä kwinbiti gobranka erere aune sacerdote bäri kri erere bätä tä mike ni mike tuin bobre jai yebätä töbikadre. Niara köböire ni raba nökrö orasionbiti “küra gobranka Ngöbökwe” ye ken aune nie die mikadi kwe ‘nita ribere jai ye ngwane’ (Ñäkädre Hebreos 4:​14-16). Jehová aune Jesús tä sribi nuainne kä kwinbiti yebätä töbikatarikäre ñaka kä juandre jire köböiti ta, niaratrekwe ni tare krubäte yekwe ni töi mikadre sribire Jehová kräke kä jutobiti (2 Cor. 5:​14, 15).

14. ¿Nita debe bien Jehovai aune Jesús ie ye ni raba bämike ño kwin krubäte kukwe keteitibiti? (Üai mikadre ñärärä).

¹⁴ Ngöbö aune Jesús tä kukwe nuainne ni  kräke yebätä nita debe bien ie ye ni raba bämike kwin krubäte kukwe keteitibiti. Nikwe ja di ngwandre nitre dimikakäre nemen ja tötikaka Jesukwe aune ja mike testiko Jehovakwe (Mat. 28:​19, 20). Ye ara käkwe Apóstol Pablo töi mikani kukwe nuainne nämäne debe bien krubäte Ngöböi aune Jesús ie bämikakäre. Jehová tö “ni jokrä diantari aune kukwe erametre Jesubätä rabadre gare ni jökrä ie ye nämäne gare niarai” (1 Tim. 2:​3, 4). Apóstol Pablo nämäne ja di ngwen krubäte kukwe driekäre nitre dimikakäre ye köböire abokän “ni ruäre rabadre dianintari yekäre” (1 Cor. 9:​22, 23).

15. ¿Drekwe kä mikai juto nibätä mikata gare Salmo 1:2 yekänti?

¹⁵ Jehovakwe kukwe biani ye dibire rare nire tä ñäke bätä aune töbiketari bätä yebätä kä juto niebare salmitakwe ye ñaka ni töi mike niä” (Sal. 1:​1-3). Ni iti Biblia kwitaka käkwe kukwe ne niebare: nire töta nemen ñäkäi Bibliabätä ye kräke kukwe tä mikani bätä mäträkäre ye rabadre ütiäte, rabadre kukwe känene, kukwe mike gare jai aune töbiketaribätä. Arato tä niere: Ni ye ie kukwe keteiti Bibliabätä ñan tä nüke gare kwin ngwane, köböiti ñan tä nemen ütiäte ye kwrere bämikata” (Studies in the Psalms, Joseph Rotherham). Mäkwe ñäkäi Ngöbö kukweibätä aune ja di ngwandi kukwe mike nüke gare kwin jai aune kukwe meden ja erebe aune kukwe jene jene mikata gare ye rükadre gare kwin mäi. Nita ñäke Ngöbö kukweibätä aune kukwe mike gare nguseta jai ye tä nemen kwin krubäte ni kräke.

16. ¿Dre rabai gare nie kukwe ja tötikara ja känenkäre yebätä?

¹⁶ Kukwe bä nuäre krubäte Jehovata mike gare nie ja kukweibätä ye ni jökrä ie raba nüke gare. Kukwe ja tötikara mada yebätä nikwe ja tötikai nguseta kukwe keteitibätä: Templo ja üaire Jehovakwe bätä Pablo blitabare tärä tikani kwe nitre kristiano hebreo ye ie ngwane. Kukwe rabai gare nie kukwe nebätä ye ni jökräbätä käi rabai juto nibätä.