1. ¿Ángel iti tä dre niere aune kukwe nieta kwe ye nikwe mikadre tuin ño jai?

 ÁNGEL iti käkwe blitadre gwärere mäbe ngwane, ¿mäkwe kukwe nuadre ya? Nengwane ángel iti tä blite ‘ni kä jökräbti, ni bätäkä, ni kukwe bätäkä amne ni nünanka juta kwatire kwatire’ te yebe. ¿Tä dre niere nie? “Ngöbö kä käinbti btä kä tementa dätekä amne Ngöbö mren dätekä btä ñö dätekä, Ngöbö ye abko mika ütiäte munkwe aune käikitaika” (Apoc. 14:​6, 7). Ni jökrä rabadre Jehová mike ütiäte jai: Niara ye Ngöbö metre. Nita templo ja üaire Jehovakwe te yebätä nita debe bien krubäte. Kukwe ye kwin krubäte ¡ñan ererea!

2. ¿Templo ja üaire Jehovakwe ye dre gärätä? (Recuadro “ Kukwe ne ñan ai gärätä” ye mikadre ñärärä).

² ¿Templo ja üaire ye dre gärätä aune medente kädekateta Bibliakwe? Metrere templo ye abokän ñaka ju metre. Ñakare aune kukwe ükaninte Jehovakwe niara mikadre täte aune Jesukwe ja nire biani ni kökatarikäre yebätä blitata. Siklo kena yete apóstol Pablo kukwe ruäre mikani gare kukwe ükaninte Jehovakwe niara mikadre täte ño yebätä. Kukwe tikani kwe ye raba kwen nie tärä tikani nitre kristiano hebreo nämäne Judá ie yebätä. b

3, 4. ¿Ñobätä Pablo nämäne nitre kristiano hebreo töibikaire aune dimikani ño kwe?

³ ¿Ñobätä apóstol Pablo kukwe tikani nitre kristiano hebreo nämäne nüne Juda ye ie? Kukwe ketebubätä raba ruin nie. Kena, niaratre dimikakäre. Niaratre ñaka nämäne kukwe Judío mike täte yebätä nitre ji ngwanka kukwe ngwarbebätä  ye nämäne niaratre kötaire nie raba. ¿Ñobätä? Ñobätä ñan aune nitre Judío ye erere ja mräkätre kristiano yekwe templo ñaka nämäne, kä jondron kukwakäre Jehovai aune sacerdote ye ñaka nämäne kwetre. Ye käkwe tödeka ja mräkätre ja tötika Jesukwe ye ngwani di nekä raba ruin nie (Heb. 2:1; 3:​12, 14). Ye medenbätä ja mräkätre ye tö namani kukwe nitre Judiokwe ye mikaita täte nie raba.

⁴ Ketebukäre, nitre kristiano hebreo ye ñaka nämäne kukwe mrä mika nämäne gare Bibliabätä aune kukwe nguseta o “mrö ribi” ja üairebiti ye kwete niebare apóstol Pablokwe ietre (Heb. 5:​11-14). Lei biani Moisés ie ye niaratre nämäne mike täte raba ruin nie. Akwa kukwe ruäre nuaindre ngite juankäre ta jabiti nie nämä leibätä ye ñan namanina ütiäte. Ja käne mada apóstol Pablo kukwe bäri nguseta mikani gare ietre. Jesús ja nire biani ni ütiäre ye “tödekara bäri ütiäte nämäne kwetre” aune raba niaratre dimike nökrö Ngöbö ken niebare kwe (Heb. 7:​18, 19).

5. ¿Dre mikadre gare mrebe jai aune ñobätä?

⁵ Kukwe ükaninte Ngöbö mikakäre täte ye bäri kwin nuain nämäne käne ye kräke niebare Pablokwe ja mräkätre hebreo ie. Nitre nämäne kukwe Judío mike täte ye abokän “Kukwe bämikani jerekäbe” niebare kwe. Arato niebare kwe: “Kukwe era metre Ngöbökwe, ye abko Kristo jatani ngwena ni kräke” (Col. 2:17). Jondron keteiti üai tä mate tibien tä tuin nie akwa ye ñaka jondron metre, ñakare aune üai aibe. Ye erere arato, nitre judío nämäne Ngöbö mike täte kirabe ye abokän kukwe jatadi ja känenkäre rabai bare metre ye bämika nämäne kwetre. Jehovakwe kukwe ükaninte niara mikakäre täte templo ja üairebiti ye mikadre gare kwin jai. Ñobätä ñan aune ye köböire Ngöböta ngite kite ta nibiti aune ni raba niara mike täte niara tö ye erere. Ja käne mada “kukwe bämikata” (nitre Judío nämäne Ngöbö mike täte) aune “kukwe metre”, (nitre kristiano tä Ngöbö mike täte) ye nikwe mikai gare jai. Yekäre nikwe ja kitai tärä Hebreos yebätä. Ye köböire templo ja üaire ye dre gärätä aune ñobätä täbe ütiäte ni kräke ye rükai gare bäri kwin nie.

6. ¿Drekäre tabernáculo ye sribebare?

⁶ Kukwe bämikani jerekäbe. Templo ja üaire ye dre gärä nämäne mikakäre gare, Pablokwe blitabare tabernáculo sribebare Moisekwe kä 1512 kristo känenkri yebätä (“Kukwe  bämikani jerekäbe aune kukwe era metre” ye mikadre ñärärä). Tabernáculo nieta ngwane ye ara “ju ja ükarakrö” nie raba. Yete nitre israelita nämäne ja ükekrö Ngöbö mikakäre täte aune jondron kukwakäre ie (Éx. 29:​43-46). Niaratrekwe dikakabare kä nötare te ye jökrä känti tabernáculo ngwani kwetre (Éx. 25:​8, 9; Núm. 9:22). Kä 500 biti bäri jire te niaratrekwe dikakabare tabernáculo yebe nememe namanintre Jerusalén templo sribebare yete yekänti. Akwa ye abokän kukwe bäri kwin rabai bare nitre kristiano kräke ja känenkäre bämika nämäne kwetre.

7. ¿Ñongwane templo ja üaire ye kömikani?

⁷ Kukwe era metre. Tabernáculo ye abokän “kukwe tä ükaninte kwin Jehovakwe kä kwinbiti” aune tä templo ja üaire Jehovakwe ye bämike. Pablokwe niebare: “Tienda [o Templo] ye abko tä kukwe bämike jirekäbe nie kä ne ngwane” (Heb. 8:5; 9:9). Pablo kukwe tikani nitre kristiano hebreo ie ngwane, templo ja üaire ye nämänena. Ñobätä ñan aune kä 29 yete Kristo ja ngökani ñöte aune dianinkä üai deme köböire yete namani sribire “dänkien kri nikwe” ye erere tabernáculo ja üairebiti yete (Heb. 4:14; Hech. 10:​37, 38). c

8, 9. Hebreos 7:​23-27 tä mike gare erere, ¿ni Däkien Kri Jesús aune sacerdote nämäne Israel ye ñobätä ñaka ja erere?

⁸ Kukwe bämikani jerekäbe. Sacerdote bäri kri ye nämäne blite juta ye diäre Ngöböbe. Sacerdote namani kena ye abokän Aarón, Jehovakwe niara kädekani tabernáculo sribebare kena ngwane. Pablokwe niebare: “Nitre blitaka Ngöböbe ni mda mda diäre därebare Levíkri ye abko kwati, käkwe sribibare ja täritäri, ñobtä ñan angwane tä krüte abko täte mda nämane neme sribire abti kä nüke mtare” (ñäkädre Hebreos 7:​23-27 yebätä). d Sacerdote töi ngite yebätä nämäne jondron kukwe Ngöböi ngite kwetre ye ütiäre. Aisete sacerdote bäri kri nämäne Israel aune Sacerdote bäri Kri Jesús ye ñan ja erebe.

⁹ Kukwe era metre. Jesukristo ni Däkien Kri tä blitaka ni diäre, “ju blitakrä Ngöböbe [ . . . ] abko ñan ni kä nebtäkwe mikani, akwa ni Dänkien Ngöbö ara jire käkwe mikani au” yekänti (Heb. 8:​1, 2). Pablo mikani gare, Jesús ye abokän “tä kärekäre yebätä ni mada ñan raba nemen niara täte”. Ne madakäre, “niara tä mobe ja mika ngite aune nitre ja ngwen blo yebätä”, aisete nitre sacerdote nämäne Israel “nämäne jondron kukwe ngite jakwe ütiäre Ngöböi köbö kwatire kwatire ye erere Jesús ñaka nuainne jire”. ¿Kä jondron kukwakäre aune jondron kukwa nämäne ye dre gärätä? Kukwe bämika nämäne aune meden metre ye ani mike gare jai.

10. ¿Kä jondron kukwakäre sribebare cobrebiti ye nämäne dre bämike?

¹⁰ Kukwe bämikani jerekäbe. Templo mikani yekänti jubäre kä jondron nire kukwakäre sribebare cobrebiti nämäne mikani (Éx. 27:​1, 2; 40:29). Akwa jondron kukwa nämäne ngite ütiäre ye ñaka nämäne ngite kite jökrä ta nitrebiti (Heb. 10:​1-4). Jondron kukwa nämäne kärekäre ye abokän nämäne Jesús ja nire biandre ni ütiäre ngite kitakäre ta nibiti ye bämike.

11. ¿Kä känti jondron kukwa nämäne Ngöböi ye meden känti Jesús murie ketani? (Hebreos 10:​5-7, 10).

¹¹ Kukwe era metre. Jehovakwe Jesús juani  kä tibienbätä ja nire biankäre ni jökrä ütiäre, nämäne gare Jesús ie (Mat. 20:28). Yebätä, Jesús ja ngökani ñöte ye bitikäre namani Jehová ngwärekri niara töi nuainkäre (Juan 6:38; Gál. 1:4). Aisete Jesús murie ketani kä jondron kukwakäre yekänti ye kwrere. Kä känti jondron kukwa nämäne ye abokän nämäne Ngöbö “töi nämäne ño” ye bämike, Jehová tö namani Ngobo kwe tuai ja nire metre ye bien ni ngite ütiäre. “Jesukristo krütani batibe amne ye abko ütiäte kärekäre” aune ngite kitani kwe ni jökräbiti ta ye köböire nire töi ngite nämäne tödekebiti ye rabadre kwäre (ñäkädre Hebreos 10:​5-7, 10 yebätä). Ja käne mada, tabernáculo nämäne sribebare ño terita aune jondronbiti nämäne sribebare ye nämäne dre bämike, yebätä nikwe ja tötikai.

12. ¿Tabernáculo nämäne ñäkäninbiti jene jene yete nire aibe nämäne niken?

¹² Kukwe bämikani jerekäbe. Tabernáculo aune templo sribebare ja känenkäre Jerusalén ye terita sribebare bäsi ja kwrere. Nämäne ñäkäninbiti ketebu: “kä deme” aune “kä bäri deme”, dänkwäbiti nämäne ñäkäninbiti (Heb. 9:​2-5; Éx. 26:​31-33). Kä Deme yekänti candelabro orore, kä jondron rä mane kukwakäre aune mesa ban mikakäre nämäne mikani. “Nitre sacerdote dianinkä üai deme köböire” aibe nämäne niken kä teri yete sribi nämäne mikani kisete ye nuainkäre (Núm. 3:​3, 7, 10). Kä bäri deme ye nämäne arca del pacto ye ken, sribebare orobiti aune Jehová nämäne yete bämikakäre (Éx. 25:​21, 22). Sacerdote bäri kri ye aibe nämäne niken dänkwä  mikani ye kwäräkri kä bäri deme yekänti. Bati kä kwatire kwatire niaratre nämäne niken jondron nire därie ye ngwena ngite jakwe aune ngite juta jökrä yekwe ye kitakäre ta biti (Lev. 16:​2, 17). Kä nikani ta yete üai deme köböire tabernáculo ye sribebare drebiti aune dre gärä nämäne ye mikani gare (Heb. 9:​6-8). e

13. ¿Kä Deme aune Kä Bäri Deme ye tä dre bämike?

¹³ Kukwe era metre. Nitre braibe dianinkä üai deme köböire 144.000 ye tä ja kete kwin Jehovabe aune rabai sacerdote erere Jesube kä kwinbiti (Apoc. 1:6; 14:1). Akwa ye känenkri niaratre tä kä tibienbätä ye ngwane, Jehovakwe dianinkä ja kräke monso kwe ye erere. Kä Deme tabernáculo känti ye nämäne niaratre tä ja kete Jehovabe ye bämike (Rom. 8:​15-17). Kä Bäri Deme tabernáculo känti, ye tä kä kwinbiti känti Jehovata nüne ye bämike. Aune “dänkwä” nämäne Kä Bäri Deme aune Kä Deme ñäkebiti ye abokän Jesús nämäne ni nire erere kä tibienbätä ye bämike. Niara nämäne ni nire erere kä tibienbätä ye nämäne ketebätä nänkäre kä kwinbiti rabakäre sacerdote kri erere. Akwa Jesukwe ja nire biani ni jökrä kä tibienbätä ngite ye ütiäre ngwane jukwe tikani kwe nitre kristiano jökrä dianinkä nänkäre kä kwinbiti ye ie ne kwe rabadre nüne ni üaire ye erere. Ye erere arato kukwe kwin ye rabadre nitre kristiano yekwe yekäre, tätre nüne ni nire erere kä tibienbätä ye tuenmetre nünankäre üaire (Heb. 10:​19, 20; 1 Cor. 15:50). Jesús ganinkröta ye bitikäre nikani Kä Deme tabernáculo ja üaire yete, yekänti nitre kristiano dianinkä üai deme köböire nänkäre kä kwinbiti ye tä ja ükekrö ben.

14. Hebreos 9:​12, 24-26 tä niere erere, ¿ñöbätä templo ja üaire Jehovakwe ye bäri kri?

¹⁴ Jehovakwe kukwe ükaninte niara mikakäre täte metre ye tä nuainne ni kökanintari Jesukwe yebiti aune niara rabai Sacerdote kri erere ye bäri kwin gare metre nie. Ñobätä ñan aune kä bäri deme känti sacerdote nämäne niken ye abokän ni kä tibienbätäkwe sribebare aune yete ngite ütiä bian nämäne jondron nire därie yebiti. Akwa Jesús nikani Ngöbö “kä kwinbiti ara jire känti”, känti kä deme krubäte jondron jökrä mada biti ta ye kräke, yete ja nire metre biani kwe ni nire ütiäre ye mikani gare kwe. Yete “Kristo ara jire käkwe ja biani müre ketadre au ni ngite diankakäre mento nibtä” (ñäkädre Hebreos 9:​12, NGT  f, 24-26 yebätä). Yekänti ni ütiä biani bäri kri kwe jondron jökrä biti ta. Ja käne mada templo ja üairebiti Jehovakwe yete ni jökrä raba mike täte ye rabai gare nie ni näin kä kwinbätä o nikwe nünain kä tibienbätä yebiti ta.

15. ¿Nire nämäne sribire tabernáculo yete jubäre?

¹⁵ Kukwe bämikani jerekäbe. Kä jubäre Tabernáculo känti ye nämäne ketaninkä, yete nitre sacerdote nämäne sribire. Arato kä jondron kukwakäre sribebare cobrere nämäne jubäre yekänti jondron nire kukwa nämäne. Aune jondron sribebare cobrere, te ñö nämäne yete sacerdote nämäne ja kise bätete sribi deme ye nuainkäre (Éx. 30:​17-20; 40:​6-8). Ja käne mada tabernáculo sribebare, yekänti jubäre nitre ñaka sacerdote nämäne Ngöbö mike täte.

16. ¿Nire tä sribire templo ja üaire yete jubäre aune templo ye bäre mento?

¹⁶ Kukwe era metre. Nitre kristiano dianinkä üai demebiti nänkäre kä kwinbiti jämi sribire  sacerdotere Jesube kä kwinbiti ye känenkri niaratre tä sribire aune ja ngwen metre Jehovai, aune tä sribire templo ja üaire yete jubäre kwrere. Ñö nämäne mikani jondron cobrere te ye tä ngwen törö nie aune niaratre ie ni rabadre ja ngwen deme ja ngrabarebiti aune ja üairebiti. ¿Akwa “nitre kwati mada”, tä sribire gwairebe nitre dianinkä nänkäre kä kwinbiti ben ye tä medente? “Nitre kä jökräbiti tibien nämäne kwati” küra Ngöbökwe yekänti aune nämäne “sribire Ngöbökrä dibire rare bätä” Juan okwä namani. Nitre kwati mada ye tä sribi ye nuainne kä tibienbätä, templo ja üaire ye bäre (Apoc. 7:​9, 13-15). ¡Nita Ngöbö mike täte templo ja üairebiti yete ye kwin krubäte ni kräke!

17. ¿Ni raba dre nuainne Jehová kräke?

¹⁷ Ni kristiano jökrä raba jondron ütiäte nuainne Ngöbö käikitakakäre. ¿Raba nemen bare ño nie? Kä nikwe, ni die aune dre dre tä nikwe yebiti nikwe ja di ngwandre sribire Gobran Ngöbökwe kräke. Apóstol Pablo niebare nitre kristiano hebreo ie ye erere ari Ngöbö käikitekä kärekäre Jesukristo köböire. Ngöbö käikitadrekä nikwe ja kadabiti, “ye jändrän bianta Ngöbö käikitakakäre kwrere” yebätä nikwe Ngöbö mikadre gare nitre jökrä ie ja kadabiti (Heb. 13:15). Nikwe ja di ngwain kukwe jökräbiti Ngöbö mike täte ngwane, ni raba niara mike täte ye käi juto nibätä nikwe bämikai.

18. Hebreos 10:​22-25 tä niere erere, ¿nikwe dre nuaindre käre? ¿Aune dre abokän ñaka käi kwitadrekä jire chi jabiti?

¹⁸ (Ñäkädre Hebreos 10:​22-25 yebätä). Apóstol Pablo tärä tikani nitre kristiano hebreo ie yekänti mrä yete niebare kwe, nita Ngöbö mike täte yebätä kukwe ütiäte ruäre ye ñaka käi kwitadrekä jabiti. Ñodre, nita orare, blite nitre madabe kukwe ie nita tö ngwen yebätä, ja ükökrö ja mräkätre ben aune ja dimikakäre aune bäri “köbö Jehovakwe nibira ja ken tuin nie yebätä”. Tärä Apocalipsis yekänti mrä ángel iti käkwe kukwe ne niebare: “¡Ngöbö aibe mika ütiäte jae!”. Niarakwe kukwe ye niebare bobu jire yebiti kukwe ye ütiäte krubäte mikani gare kwe (Apoc. 19:10; 22:9). Kukwe nguseta nibi gare nie templo ja üaire Jehovakwe bätä ye nikwe ñaka käi kwitadrekä jire chi jabiti aune ni raba niara aibe mike ütiäte jai ye rabadre ütiäte ni kräke.