Kukwe meden nieta texto ye känenkri aune bitikäre ye tä nun dimike mike nüke gare jai “Ngöbö Kukwei[bätä]” Pablo blitabare ye abokän Ngöbö töita ño yebätä kukwe mikata gare ye meden gärätä, Biblia tä mike gare ye erere.

Tärä aune täräkwata nikwe yekänti nunta blite bä kabre Hebreos 4:12 yebätä driekäre munye Biblia ye raba nitre töi kwite. Aune kukwe ye mikata gare metre. Akwa Pablo bersikulo ye tikani ye ngwane nämene blite drebätä ye nikwe mikadre nüke gare jai ye kwin arato. Niara nämene nitre kristiano hebreo ye töi mike sribire Ngöbö töita ño ye mikakäre nemen bare. Ngöbö töita ño yebätä kukwe keta kabre mika nämene gare Kukwe Tikani yebätä. Ye ngwane, Pablo blitabare Ngöbökwe nitre israelita mikani kwäre Egipto yebätä. “Kä känti leche aune munkö krubäte” yekänti niaratre rikadre nüne Ngöbökwe käbämikani ietre yei niaratre nämene tö ngwen. Kä yekänti niaratre rabadre erametre kä ja dükakäre ye käi ngwen juto jabätä (Éxodo 3:8; Deuteronomio 12:9, 10).

Ye erere ie Ngöbö tö namani. Akwa nitre israelita nämene tödeke Jehovai ye ñaka bämikani kwetre aune ñaka niara mikani täte kwetre, ye köböite niaratre jökrä bäsi ñaka namani kä ja dükakäre Ngöböi yekänti (Números 14:30; Josué 14:6-10). Akwa yebiti ta, “kä jadükakrä Ngöbökwe köböi mikani nie, ye känti kä [...] rikakrä” nie ye nämene niebare Pablokwe (Hebreos 3:16-19; 4:1). Erametre Ngöbökwe kukwe mikani gare niara töita ño yebätä ye ngätäite kukwe “köböi mikani” kwe nie ye tä. Nitre kristiano hebreo ye erere, Ngöbö töita ño mikata gare yebätä ni raba ñäke arato aune ni raba sribire niarabe mikakäre nemen bare. Génesis 2:2 aune Salmo 95:11 yekänti Pablo kukwe ye ruäre niebare, kukwe käbämikani ye tä Kukwe Tikani yebätä mikakäre gare.

“Kä jadükakrä Ngöbökwe köböi mikani nie, ye känti kä [...] rikakrä” nie ye täbe gare metre nie ye tä kä mike juto krubäte nibätä. Biblia tä niere ye erere, kä ja dükakäre Ngöböi yekänti erametre ni raba nemen yei nita tö ngwen. Ye medenbätä nita ja di ngwen rabakäre kä yekänti. ¿Nita ja di ngwen ño? Ngöbökwe kukwe biani Moisés ie ye nita mike täte aune nita kukwe kwin nuainne akwa ni ñaka tä nuainne Ngöbökwe ni kadre ngäbiti ye aibe kräke. Ñakare aune, nita kä jutobiti sribire Ngöbö töita ño mikakäre nemen bare aune nita tödeke Ngöböi yebätä nikwe nuaindi jankunu. Nitre kwati krubäte kä jökräbiti tibien ye niena ja tötike Bibliabätä aune Ngöbökwe kukwe mikani gare niara töita ño yebätä ye niaratre niena mike gare jai. Kukwe ye tä niaratre kwati krubäte töi kwite ñaka nünankäre käne ye erere, tä niaratre töi mike tätre tödeke ye bämike aune tätre ja ngökö ñöte. Kukwe ye jökrä tä mike gare metre nie “Ngöbö Kukwei [ye] abko nire amne dite”. Ngöbökwe kukwe mikani gare Bibliabätä niara töita ño yebätä ye käkwe ni töi kwitanina aune nuaindi jankunu kwe.